ᐃᓯᐦᒋᑫᐃᐧᓂᐋᐧᐊᐧ 5

1ᒫᑲ ᐯᔭᐠ ᓈᐯᐤ ᐋᓇᓈᔭᐢ ᐁ ᐃᓯᔨᐦᑳᓱᐟ, ᐊᓯᒋ ᓵᐹᐃᕒᐊ ᐃᐧᐊᐧ, ᑭ ᐊᑖᐋᐧᑫᐤ ᐅᐟ ᐊᔮᐃᐧᐣ, 2ᐁᑯᓯ ᐸᐦᑭ ᐁ ᑭ ᐃᓯ ᑎᐸᐦᐊᒫᐦᐟ ᑭ ᑲᓇᐁᐧᔨᑕᒼ, ᐃᐧᐊᐧ ᒥᓇ ᐁ ᑭᐢᑫᔨᑕᒥᔨᐟ, ᐁᑯᓯ ᐸᐦᑭ ᑭ ᐯᑖᐤ, ᒥᓇ ᑭ ᐊᐢᑖᐤ ᐊᐹᐢᑎᓬᐊ ᐅᓯᑎᔨᕽ. 3ᒫᑲ ᐱᑕᕒ ᑭ ᐃᑌᐧᐤ, ᐋᓇᓈᔭᐢ, ᑖᓀᑭ ᓭᑕᐣ ᑳ ᒧᐢᑭᓇᑖᐟ ᑭᑌᐦ ᑭᑕ ᑭᔮᐢᑭᑲᐊᐧᐟ ᑳ ᑲᓈᑎᓯᐟ ᐊᐦᒑᕽ ᐁᑯᓯ ᐸᐦᑭ ᑭᑕ ᒥᒋᒥᓇᒪᐣ ᐁ ᐃᑕᑭᑌᐠ ᐊᐢᑭ? 4ᒣᑳᐧᐨ ᐁ ᐊᐢᑌᐠ, ᓇᒪ ᒋ ᑭ ᐊᐢᑌᐤ ᑭᔭ ᐁ ᑎᐱᔭᐁᐧᐃᐧᓯᔭᐣ? ᒥᓇ ᐃᐢᐱ ᑳ ᐊᑖᐋᐧᑫᔭᐣ, ᓇᒪ ᒋ ᑭᔭ ᑭ ᑭ ᑎᐯᔨᑌᐣ? ᑖᓂᓯ ᐅᒪ ᑳ ᐃᓯ ᐅᔦᔨᑕᒪᐣ ᐅᒪ ᑭ ᑌᐃᕽ? ᓇᒪᐃᐧᔭ ᐊᔨᓯᔨᓂᐤ ᑳ ᑭ ᑭᔮᐢᑭᑲᐊᐧᐟ ᒫᑲ ᑭᓭᒪᓂᑐ. 5ᐋᓇᓈᔭᐢ ᒫᑲ ᐁ ᐯᐦᑕᕽ ᐅᐦᐃ ᐃᑌᐧᐃᐧᓇ ᑭ ᐸᐦᑭᓯᐣ ᒥᓇ ᑭ ᓯᐯᐧᒑᐦᑫᐧᐤ: ᐁᑯᓯ ᒥᐢᑕᐦᐃ ᑭ ᓭᑭᓯᐊᐧᐠ ᑲᐦᑭᔭᐤ ᐊᓂᑭ ᑳ ᐯᐦᑕᐦᑭᐠ. 6ᐅᐢᑭᓂᑭᐊᐧᐠ ᒫᑲ ᑭ ᐸᓯᑯᐊᐧᐠ ᒥᓇ ᑭ ᐁᐧᐁᐧᑭᓀᐊᐧᐠ, ᐁᑯᓯ ᑭ ᐊᐧᔭᐃᐧᑕᐁᐊᐧᐠ ᒥᓇ ᑭ ᓇᐦᐃᓀᐊᐧᐠ.

7ᓈᐣᑕᐤ ᒫᑲ ᓂᐢᑐ ᑎᐸᐃᑲᐣ ᒣᐧᐢᑕᐢ ᐃᔨᑯᕽ, ᐃᐧᐊᐧ, ᐁᑳ ᐁ ᑭᐢᑫᔨᑕᒥᔨᐟ ᑳ ᑭ ᐃᐦᑭᓂᔨᐠ, ᑭ ᐯ ᐱᐦᑐᑫᔨᐊᐧ. 8ᐱᑕᕒ ᒫᑲ ᑭ ᓇᐢᑫᐧᐊᐧᓯᒣᐤ, ᐃᐧᐦᑕᒪᐃᐧᐣ ᑭᐢᐱᐣ ᐁᑯᔨᑯᕽ ᑳ ᐅᑎᓯᐁᐧᑫᐧ ᑳ ᐊᑖᐋᐧᑫᔦᐠ ᐊᓂᒪ ᐊᐢᑭ. ᐁᑯᓯ ᑭ ᐃᑌᐧᐤ, ᐁᐦᐁ, ᐁᑯᔨᑯᕽ. 9ᒫᑲ ᐱᑕᕒ ᑭ ᐃᑌᐤ, ᑖᓂᓯ ᐅᒪ ᑳ ᐃᓯ ᓇᐢᑯᒥᑐᔦᐠ ᑭᑕ ᑯᑌᔨᒫᔦᐠ ᑳ ᑎᐯᔨᐦᒋᑫᐟ ᐅᐟ ᐊᐦᒑᐦᑲᐧ? ᒋᐢᐟ, ᐅᓯᑎᐋᐧᐊᐧ ᐊᓂᑭ ᑳ ᑭ ᓇᐃᓈᒋᐠ ᑭ ᓈᐯᒪ ᓵᓴᐩ ᐃᐢᑳᐧᑌᒥᕽ ᐊᔮᔨᐊᐧ, ᐁᑯᓯ ᑭ ᑲ ᐊᐧᔭᐃᐧᑕᐃᑲᐧᐠ. 10ᓭᒫᐠ ᒫᑲ ᑭ ᐸᐦᑭᓯᐣ ᐅᓯᑎᔨᕽ, ᒥᓇ ᑭ ᓯᐯᐧᒑᐦᑫᐧᐤ: ᐅᐢᑭᓂᑭᐊᐧᐠ ᒫᑲ ᑭ ᐯ ᐱᐦᑐᑫᐊᐧᐠ ᒥᓇ ᒥᐢᑲᐁᐧᐊᐧᐠ ᐁ ᓂᐱᔨᐟ, ᐁᑯᓯ ᑭ ᐊᐧᔭᐃᐧᑕᐁᐊᐧᐠ ᒥᓇ ᑭ ᓇᐦᐃᓀᐊᐧᐠ ᒋᑭ ᐅ ᓈᐯᒪ. 11ᑭᐦᒋ ᑯᓯᑫᐧᔨᒧᐃᐧᐣ ᒫᑲ ᑭ ᐅᑎᐦᑎᑲᐧᐠ ᑲᐦᑭᔭᐤ ᐅᑕᔭᒥᐦᐋᐊᐧᐠ, ᒥᓇ ᑲᐦᑭᔭᐤ ᑳ ᐯᐦᑕᐦᑭᐠ ᐅᐦᐃ.

12ᐅᒋᐦᒋᐋᐧᕽ ᒫᑲ ᐅᐦᒋ ᐊᐹᐢᑎᓬᐊᐠ ᑭ ᐊᑐᐢᑳᑕᒪᐧᐠ ᒥᐦᒉᐟ ᐋᐧᐸᐦᑕᐦᐃᐁᐧᐃᐧᓇ ᒥᓇ ᒫᒪᐢᑳᒋ ᐃᓯᐦᒋᑫᐃᐧᓇ ᒣᑳᐧ ᐊᔨᓯᔨᓂᓈᕽ; ᑲᐦᑭᔭᐤ ᒫᑲ ᒫᒪᐃᐧ ᑭ ᐊᔮᐊᐧᐠ ᐊᓂᑕ ᓵᓬᐅᒪᐣ ᐅ ᐱᑕᐃᐧᐢᑳᐧᑌᒼ ᑳ ᐃᓯᔨᐦᑳᑌᐠ. 13ᒫᑲ ᐃᐧᔭ ᐊᓂᐦᐃ ᑯᑕᑲ ᐅᐦᒋ ᓇᒪᐃᐧᔭ ᐊᐃᐧᔭ ᑕᑯ ᐃᐧᒉᐃᐧᑲᐧᐠ: ᐁᔨᐁᐧᕽ ᒫᑲ ᐊᔨᓯᔨᓂᐊᐧ ᒥᐢᑕᐦᐃ ᐃᑕᑭᒥᑲᐧᐠ; 14ᐁᑯᓯ ᐅᑖᐯᐧᑕᒧᐊᐧ ᐊᐊᐧᓯᒣ ᑭ ᑕᑯᑐᐋᐧᐤ ᑳ ᑎᐯᔨᐦᒋᑫᐟ, ᒥᐦᒉᐟ ᓈᐯᐊᐧ ᒥᓇ ᐃᐢᑫᐧᐊᐧ; 15ᐁᑯᓯ ᐱᔨᐢ ᐊᐦᐳ ᐊᐧᔭᐃᐧᑕᐁᐊᐧᐠ ᐅᑖᑯᓯᐊᐧ ᐱᒧᐦᑌᐢᑲᓈᕽ, ᐁ ᐱᒥᓯᒫᒋᐠ ᓂᐯᐃᐧᓂᕽ ᒥᓇ ᐊᐢᐱᓯᒧᓂᕽ, ᓈᐣᑕᐤ ᐃᓯ, ᐱᑕᕒ ᐁᑯᑕ ᐱᒧᐦᑌᐟ, ᑲᓇᑫ ᑭᑕ ᒋᑳᐢᑌᐢᑲᐋᐧᐟ ᐊᐦᐳ ᐱᑯ ᐯᔭᐠ. 16ᐁᑯᑕ ᒫᑲ ᒥᓇ ᑭ ᐯ ᑕᑯᓯᓇᐧᐠ ᐁ ᐅᓵᒣᔭᑎᒋᐠ ᐊᔨᓯᔨᓂᐊᐧᐠ ᐅᑌᓈᕽ ᐅᐦᒋ ᐋᐧᐢᑳ ᒉᕒᐅᓴᓬᐊᒥᕽ, ᐁ ᐯᓯᐋᐧᒋᐠ ᐅᑖᑯᓯᐊᐧ, ᒥᓇ ᐊᓂᐦᐃ ᐁ ᑯᑕᑭᐦᐃᑯᔨᐟ ᐁᑳ ᐁ ᐯᑭᓯᔨᐟ ᐊᐦᒑᐦᑲᐧ: ᑲᐦᑭᔭᐤ ᒫᑲ ᑭ ᐃᔨᓂᑲᐋᐊᐧᐟ.

17ᒫᑲ ᒫᐊᐧᒋ ᑭᐦᒋ ᐊᔭᒥᐦᐁᐃᐧᔨᓂᐤ ᑭ ᐸᓯᑯ, ᐊᓯᒋ ᑲᐦᑭᔭᐤ ᐊᓂᐦᐃ ᑳ ᐃᐧᒉᐃᐧᑯᐟ (ᐁᐊᐧᑲᐧᓂᐠ ᐊᓂᑭ ᓵᐟᔪᓯᐊᐧᐠ ᑳ ᐃᓯ ᐅ ᐃᐧᒉᐋᐧᑲᓂᑐᒋᐠ), ᑭ ᓵᑲᐢᑭᓀᐢᑳᑲᐧᐠ ᒫᑲ ᐃᓴᐋᐧᓇᑫᔨᒧᐃᐧᐣ, 18ᐁᑯᓯ ᑭ ᐅᑎᐦᑎᓀᐊᐧᐠ ᐊᐹᐢᑎᓬᐊ, ᒥᓇ ᑭ ᐸᑭᑎᓀᐊᐧᐠ ᒫᒪᐃᐧ ᑭᐸᐦᐅᑐᐃᐧᑲᒥᑯᕽ. 19ᒫᑲ ᐅᑭᓯᑯᒪ ᑳ ᑎᐯᔨᐦᒋᑫᐟ ᓂᐹᑎᐱᐢᐠ ᑭ ᐯ ᐃᑐᐦᑌᐤ ᑭ ᔪᑌᓇᒼ ᐃᐢᑳᐧᑌᒪ ᑭᐸᐦᐅᑐᐃᐧᑲᒥᑯᕽ, ᒥᓇ ᑭ ᐯ ᐊᐧᔭᐃᐧᑕᐁᐤ, ᐁᑯᓯ ᑭ ᐃᑌᐤ, 20ᓂᔭᐠ, ᓇᑕᐃᐧ ᓂᐸᐃᐧᐠ ᒥᓇ ᐃᐧᐦᑕᒫᑯᐠ ᐊᔨᓯᔨᓂᐊᐧᐠ ᑭᐦᒋ ᐊᔭᒥᐦᐁᐃᐧᑲᒥᑯᕽ ᑲᐦᑭᔭᐤ ᐁ ᐃᑌᐧᒪᑲᕽ ᐅᒪ ᐱᒫᑎᓯᐃᐧᐣ. 21ᐃᐢᐱ ᒫᑲ ᐅᒪ ᑳ ᐯᐦᑕᐦᑭᐠ, ᑭ ᐱᐦᑐᑫᐊᐧᐠ ᑭᐦᒋ ᐊᔭᒥᐦᐁᐃᐧᑲᒥᑯᕽ ᓈᐣᑕᐤ ᐁ ᐯᑖᐸᕽ, ᒥᓇ ᑭ ᑭᐢᑭᓄᐦᐊᒫᑫᐊᐧᐠ. ᑭᐦᒋ ᐊᔭᒥᐦᐁᐃᐧᔨᓂᐤ ᒫᑲ ᑭ ᐯ ᐃᑐᐦᑌᐤ, ᒥᓇ ᐊᓂᐦᐃ ᑳ ᐃᐧᒉᐃᐧᑯᐟ ᐁᑯᓯ ᐁ ᑭ ᒫᒪᐃᐧ ᓇᑐᒫᐟ ᐊᓂᐦᐃ ᑳ ᐅᔭᓱᐁᐧᔨᐟ, ᐊᓯᒋ ᑳ ᓂᑳᓀᔨᑖᑯᓯᔨᐟ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᑭ ᐃᓯᑎᓴᐦᐅᐁᐧᐊᐧᐟ ᒫᑲ ᑭᐸᐦᐅᑐᐃᐧᑲᒥᑯᕽ ᑭᑕ ᐯᓯᒥᐦᐟ. 22ᒫᑲ ᐊᓂᑭ ᐅᑎᓂᐁᐧᐊᐧᐠ ᑳ ᐯ ᐃᑐᐦᑌᒋᐠ ᓇᒪᐃᐧᔭ ᒥᐢᑲᐁᐧᐊᐧᐠ ᑭᐸᐦᐅᑐᐃᐧᑲᒥᑯᕽ; ᐁᑯᓯ ᑭ ᑭᐁᐧᐊᐧᐠ ᒥᓇ ᑭ ᐋᒋᒧᐊᐧᐠ, 23ᐁ ᐃᑌᐧᒋᐠ, ᑭᐸᐦᐅᑐᐃᐧᑲᒥᐠ ᐃᐧᔭ ᓂ ᑭ ᒥᐢᑫᓈᐣ ᐁ ᐊᔮᒋ ᑭᐸᐦᐃᑳᑌᐠ, ᒥᓇ ᑳ ᑲᓇᐁᐧᔨᐦᑕᐦᑭᐠ ᐁ ᓂᐸᐃᐧᒋᐠ ᐃᐢᑳᐧᑌᒥᕽ; ᒫᑲ ᐃᐢᐱ ᑳ ᔪᑌᓇᒫᕽ ᓇᒪᐃᐧᔭ ᐊᐃᐧᔭᐠ ᐊᔨᓯᔨᓂᐤ ᐱᐦᒋ ᓂ ᒥᐢᑲᐋᐧᓈᐣ. 24ᐃᐢᐱ ᒫᑲ ᑳ ᓯᒫᑲᓂᓯᐃᐧᑭᒫᐃᐧᐟ ᑭᐦᒋ ᐊᔭᒥᐦᐁᐃᐧᑲᒥᑯᕽ ᒥᓇ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᐯᔦᑕᑭᐠ ᐅᐦᐃ ᐃᑌᐧᐃᐧᓇ, ᒥᐢᑕᐦᐃ ᑭ ᐊᐧᐋᐧᓀᔨᑕᒪᐧᐠ ᑖᓂᓯ ᐱᔨᐢ ᐅᒪ ᑭᑕ ᐊᑎ ᐃᐢᐸᔨᔨᐠ. 25ᐁᑲᐧ ᐯᔭᐠ ᑭ ᐯ ᐃᐧᐦᑕᒫᑲᐧᐠ ᒋᐢᐟ, ᐊᓂᑭ ᓈᐯᐊᐧᐠ ᑳ ᑭ ᐸᑭᑎᓈᔦᑯᐠ ᑭᐸᐦᐅᑐᐃᐧᑲᒥᑯᕽ ᑭᐦᒋ ᐊᔭᒥᐦᐁᐃᐧᑲᒥᑯᕽ ᓂᐸᐃᐧᐊᐧᐠ ᐁ ᑭᐢᑭᓄᐦᐊᒪᐋᐧᒋᐠ ᐊᔨᓯᔨᓂᐊᐧ. 26ᐁᑲᐧ ᒫᑲ ᑭ ᐃᑐᑎᐤ ᓯᒫᑲᓂᓯᐃᐧᑭᒫᐤ ᐊᓯᒋ ᐅᑎᓂᐁᐧᐊᐧ, ᒥᓇ ᑭ ᐯᓯᐁᐧᐊᐧᐠ, ᒫᑲ ᐁ ᒪᓈ ᒫᔨᑐᑕᐋᐧᒋᐠ; ᒋᑫᒫ ᑭ ᑯᐢᑌᐊᐧᐠ ᐊᔨᓯᔨᓂᐊᐧ, ᐁᑳ ᑭᑕ ᐱᒫᐧᐱᐢᑲᐅᑯᒋᐠ. 27ᐃᐢᐱ ᒫᑲ ᑳ ᐯᓯᐋᐧᒋᐠ, ᑭ ᐅᑎᐢᑲᐊᐧᐱᐁᐊᐧᐠ ᐅᔭᓱᐁᐧᐃᐧᓂᕽ. ᐁᑲᐧ ᒫᐊᐧᒋ ᑭᐦᒋ ᐊᔭᒥᐦᐁᐃᐧᔨᓂᐤ ᑭ ᑲᑫᐧᒋᒣᐤ, 28#ᒫᐟᔪ 27:25ᐁ ᐃᑌᐧᐟ, ᒥᑐᓂ ᑭ ᑭ ᐊᔮᑳᐧᒥᒥᑎᓈᐣ ᐁᑳ ᑭᑕ ᑭᐢᑭᓄᐦᐊᒫᑫᔦᐠ ᐅᒪ ᐃᐧᔪᐃᐧᓂᕽ: ᒫᑲ ᒋᐢᐟ, ᑭ ᑭ ᒧᐢᑭᓇᑖᓈᐋᐧᐤ ᒉᕒᐅᓴᓬᐊᒼ ᑭ ᑭᐢᑭᓄᐦᐊᒫᑫᐃᐧᓂᐋᐧᐤ ᐅᐦᒋ, ᒥᓇ ᑭᐟ ᐃᑌᔨᑌᓈᐋᐧᐤ ᐊᐊᐧ ᓈᐯᐤ ᐅᒥᐦᑯ ᓂᔭᓈᐣ ᑭᑕ ᐸᑲᒥᑐᐃᐧᔮᕽ.

29ᒫᑲ ᐱᑕᕒ ᒥᓇ ᐊᓂᑭ ᐊᐹᐢᑎᓬᐊᐠ ᑭ ᓇᐢᑫᐧᐊᐧᓯᐃᐁᐧᐊᐧᐠ ᒥᓇ ᑭ ᐃᑌᐧᐊᐧᐠ, ᐃᑕᐢᑌᐤ ᑭᓭᒪᓂᑐ ᑭᑕ ᓇᓇᐃᑕᐋᐧᔮᕽ ᐃᔨᑯᕽ ᐃᐧᔭ ᐊᔨᓯᔨᓂᐤ. 30ᐅ ᑭᓭᒪᓂᑐᒥᐋᐧᐊᐧ ᑯᑖᐃᐧᓇᐊᐧᐠ ᑭ ᐊᐧᓂᐢᑳᓀᐤ ᒋᓴᓴ, ᑳ ᑭ ᓂᐸᐦᐋᔦᐠ, ᐁ ᐊᑯᑖᔦᐠ ᒥᐢᑎᑯᕽ 31ᐁᐊᐧᑲᐧᓂ ᑭᓭᒪᓂᑐ ᑭ ᐃᐢᐹᑫᓀᐤ ᐅ ᑭᐦᒋᓂᐢᑭᕽ ᑭᑕ ᑭᐦᒋ ᐅᑭᒫᐃᐧᔨᐟ ᒥᓇ ᑭᑕ ᐅᐱᒫᒋᐦᐃᐁᐧᐃᐧᔨᐟ, ᑭᑕ ᒥᔮᐟ ᐃᐢᕒᐁᐃᓬᐊ ᑫᐧᐢᑭᐱᒫᑎᓯᐃᐧᐣ, ᒥᓇ ᐊᓭᓇᒫᑯᐃᐧᐣ ᒪᒋᐃᑎᐃᐧᓇ. 32ᓂᔭᓈᐣ ᒫᑲ ᓂᐟ ᐋᑐᑌᓈᐣ ᐁᐊᐧᑲᐧᓂ ᐅᐦᐃ; ᐁᑯᓯ ᒥᓇ ᐊᓇ ᑳ ᑲᓈᑎᓯᐟ ᐊᐦᒑᕽ, ᑭᓭᒪᓂᑐ ᑳ ᑭ ᒥᔮᐟ ᐊᓂᐦᐃ ᑳ ᓇᓇᐃᑖᑯᐟ.

33ᒫᑲ ᐃᐧᔭᐋᐧᐤ, ᐃᐢᐱ ᐅᒪ ᐱᔦᐦᑕᐦᑭᐠ, ᐅᑌᐃᐋᐧᕽ ᑭ ᐃᐧᓴᑲᐅᑲᐧᐠ, ᒥᓇ ᑭ ᐃᑌᔨᑕᒪᐧᐠ ᑭᑕ ᓂᐸᐦᐋᒋᐠ. 34ᒫᑲ ᑭ ᓂᐸᐃᐧᐤ ᐯᔭᐠ ᐅᔭᓱᐁᐧᐃᐧᓂᕽ, ᐹᕒᐊᓯ, ᑲᒣᓬᐃᔭᓬ ᐁ ᐃᓯᔨᐦᑳᓱᐟ, ᐅᑭᐢᑭᓄᐦᐊᒫᑫᐤ ᐅᔭᓱᐁᐧᐃᐧᓂᕽ, ᐁ ᑭᐢᑌᔨᒥᑯᐟ ᑲᐦᑭᔭᐤ ᐊᔨᓯᔨᓂᐊᐧ, ᒥᓇ ᑭ ᐃᑕᓱᐁᐧᐤ ᑭᑕ ᐊᐧᔭᐃᐧᑕᐃᒥᐦᐟ ᐊᒋᔭᐤ. 35ᑭ ᐃᑌᐤ ᒫᑲ, ᑭᔭᐋᐧᐤ ᐃᐢᕒᐁᐃᓬ ᐊᔨᓯᔨᓂᑎᐠ, ᒣᔮᑳᐧᒼ ᑭᔭᐋᐧᐤ ᐅᑭ ᐊᔨᓯᔨᓂᐊᐧᐠ ᐅᐦᒋ, ᑳ ᐃᐧ ᐃᑐᑕᐋᐧᔦᑯᐠ. 36ᒋᑫᒫ ᒪᐧᔦᐢ ᐅᐦᐃ ᑭᓯᑳᐊᐧ ᐊᔮᑭ ᑭ ᐸᓯᑯ ᑎᔪᑖᐢ, ᐁ ᑭᐦᒑᔨᐃᐧᐊᑭᒥᓱᐟ; ᐁᐊᐧᑯ ᒥᐦᒉᑎᐢ ᓈᐯᐊᐧ, ᓈᐣᑕᐤ ᓀᐋᐧᐤ ᒥᑖᑕᐦᑐᒥᑕᓇᐤ, ᑭ ᐃᐧᒉᐃᐧᐠ, ᐁᑯᓯ ᑭ ᓂᐸᐦᐋᐤ; ᒥᓇ ᑲᐦᑭᔭᐤ, ᑕᐦᑐ ᑳ ᓇᓇᐃᑖᑯᐟ, ᑭ ᐱᐋᐧᒧᑳᑖᐊᐧᐠ, ᐁᑯᓯ ᑭ ᐳᓂᐸᔨᐤ. 37ᑳ ᐳᓂ ᐊᔮᐟ ᐊᐊᐧ ᓈᐯᐤ ᑭ ᐸᓯᑯ ᒍᑕᐢ ᑳᓬᐊᓬᐃᕽ ᐅᐦᒋ ᒣᑳᐧᐨ ᑭᓯᑳᐊᐧ ᐃᐧᔪᐃᐧᓇ ᑳ ᐅᑎᓂᑳᑌᑭ, ᐁᑯᓯ ᐋᑎᐦᐟ ᐊᔨᓯᔨᓂᐊᐧ ᑭ ᐅᒋᐱᑌᐤ ᑭᑕ ᐱᒥᑎᓴᐦᐅᑯᐟ: ᐃᐧᔭ ᒥᓇ ᑭ ᓂᓯᐊᐧᓈᑎᓯᐤ; ᐁᑯᓯ ᑲᐦᑭᔭᐤ, ᑕᐦᑐ ᑳ ᓇᓇᐃᑖᑯᐟ, ᑭ ᐱᐋᐧᒧᑳᑖᐊᐧᐠ. 38ᐁᑲᐧ ᒫᑲ ᑭᐟ ᐃᑎᓈᐋᐧ, ᓯᑐᐃᐧᔨᑯᐠ ᐅᑭ ᐊᔨᓯᔨᓂᐊᐧᐠ, ᐁᑳ ᑐᑖᑯᐠ: ᒋᑫᒫ ᑭᐢᐱᐣ ᐅᒪ ᐅᔭᓱᐁᐧᐃᐧᐣ ᐊᐦᐳ ᐅᒪ ᐊᑐᐢᑫᐃᐧᐣ ᐊᔨᓯᔨᓂᕽ ᐁᐧᒋᒪᑲᓄᑫᐧ, ᑭᑕ ᓵᑯᒋᑖᓂᐊᐧᐣ: 39ᒫᑲ ᑭᐢᐱᐣ ᑭᓭᒪᓂᑐᕽ ᐁᐧᒋᒪᑲᓄᑫᐧ, ᓇᒪᐃᐧᔭ ᑭ ᑲ ᑭ ᓵᑯᒋᐋᐋᐧᐊᐧᐠ; ᑫᑲ ᓈᐣᑕᐤ ᐃᓯ ᐳᑎ ᑭ ᑲ ᓄᑎᓈᐋᐧᐤ ᑭᓭᒪᓂᑐ. 40ᐁᐊᐧᑲᐧᓂ ᒫᑲ ᑲᐦᑭᔭᐤ ᑭ ᓇᐢᑯᒣᐊᐧᐠ: ᐁᑯᓯ ᐃᐢᐱ ᑳ ᓇᑐᒫᒋ ᒥᓇ ᐊᐹᐢᑎᓬᐊ, ᑭ ᐸᓴᐢᑌᐁᐧᐊᐧᐠ ᒥᓇ ᑭ ᐊᔮᑳᐧᒥᒣᐊᐧᐠ ᐁᑳ ᑭᑕ ᐱᑭᐢᑫᐧᔨᐟ ᐅ ᐃᐧᔪᐃᐧᓂᔨᕽ ᒋᓴᓴ, ᐁᑯᓯ ᑭ ᐸᑭᑎᓀᐊᐧᐠ.

41ᑭ ᓯᐯᐧᑌᐊᐧᐠ ᒫᑲ ᐅᔭᓱᐁᐧᐃᐧᓂᕽ ᐅᐦᒋ, ᐁ ᒪᒪᐦᑖᑯᓯᒋᐠ ᐁ ᑌᐸᑫᔨᒥᐦᒋᐠ ᑭᑕ ᑭ ᒧᓯᐦᑖᒋᐠ ᓇᓀᐯᐃᐧ ᐃᑐᑖᑯᐃᐧᐣ ᐅ ᐃᐧᔪᐃᐧᐣ ᐅᐦᒋ. 42ᐁᑯᓯ ᑕᐦᑐ ᑭᓯᑳᐤ, ᑭᐦᒋ ᐊᔭᒥᐦᐁᐃᐧᑲᒥᑯᕽ ᒥᓇ ᐃᐧᑭᐋᐧᕽ, ᓇᒪᐃᐧᔭ ᑭ ᐳᓂ ᑭᐢᑭᓄᐦᐊᒫᑫᐊᐧᐠ ᒥᓇ ᐁ ᑲᑫᐢᑭᒥᐁᐧᒋᐠ ᒋᓴᐢ ᐁᐊᐧᑯ ᙭.

Currently Selected:

ᐃᓯᐦᒋᑫᐃᐧᓂᐋᐧᐊᐧ 5: KKMs

Highlight

Copy