ᐃᓯᐦᒋᑫᐃᐧᓂᐋᐧᐊᐧ 14

1ᑭ ᐊᔨᐢᐸᔨᐤ ᒫᑲ ᐊᐩᑳᓂᔭᒥᕽ, ᐁ ᑭ ᐱᐦᑐᑫᒋᐠ ᐅᐟ ᐊᔭᒥᐦᐁᐃᐧᑲᒥᑯᔨᕽ ᒍᐊᐧ, ᐁᑯᓯ ᐁ ᐃᓯ ᐱᑭᐢᑫᐧᒋᐠ, ᒥᐦᒉᐟ ᑳ ᒫᒪᐁᐧᔭᑌᔨᐟ ᒍᐊᐧ ᒥᓇ ᑲᕒᐃᑲ ᑭ ᑖᐯᐧᑕᒥᔨᐊᐧ. 2ᒫᑲ ᐊᓂᑭ ᐁᑳ ᑳ ᑖᐯᐧᑕᐦᑭᐠ ᒍᐊᐧᐠ ᑭ ᒥᑯᐢᑳᑌᔨᑕᒥᐁᐊᐧᐠ ᒉᐣᑖᐃᓬᐊ, ᒥᓇ ᑭ ᓯᑭᐢᑲᐁᐧᐊᐧᐠ ᑭᑕ ᒫᔨ ᐃᑌᔨᒫᔨᐟ ᐅᒋᐋᐧᒥᒫᐊᐧ. 3ᑭᓀᐧᐢ ᒫᑲ ᐁᑯᑕ ᑭ ᐊᔮᐊᐧᐠ, ᐁ ᓱᑫᔨᒧᐃᐧ ᐱᑭᐢᑫᐧᒋᐠ ᑳ ᑎᐯᔨᐦᒋᑫᐟ ᐅᐦᒋ, ᐁᐊᐧᑯ ᑭ ᐃᐧᒋᑖᐤ ᐅ ᑭᓭᐋᐧᑎᓯᐃᐧ ᐃᑌᐧᐃᐧᐣ, ᐁ ᐸᑭᑌᔨᑕᕽ ᐋᐧᐸᐦᑕᐦᐃᐁᐧᐃᐧᓇ ᒥᓇ ᒪᒫᑖᐃᐧ ᐃᓯᐦᒋᑫᐃᐧᓇ ᑭᑕ ᐃᑐᒋᑳᑌᔨᑭ ᐅᒋᐦᒋᐋᐧᐊᐧ ᐅᐦᒋ. 4ᒫᑲ ᑳ ᐅᓵᒣᔭᑎᒋᐠ ᐊᔨᓯᔨᓂᐊᐧᐠ ᐅᑌᓈᕽ ᑭ ᓂᓴᐧᔭᑭᐃᑐᐊᐧᐠ; ᐋᑎᐦᐟ ᒫᑲ ᑭ ᐃᐧᒉᐁᐧᐊᐧᐠ ᒍᐊᐧ, ᐋᑎᐦᐟ ᒥᓇ ᐊᐹᐢᑎᓬᐊ. 5ᒫᑲ ᐃᐢᐱ ᒥᔮᒪᐃᐧ ᒪᐃᐧᓀᐢᑳᑯᒋᐠ ᒍᐊᐧ ᒥᓇ ᒉᐣᑖᐃᓬᐊ ᐊᓯᒋ ᐅᔭᓱᐁᐧᐃᐧᔨᓂᒥᐋᐧᐋᐧ, ᓇᓀᐯᐋᐧᑳᐨ ᑭᑕ ᐃᑐᑖᑯᒋᐠ ᒥᓇ ᑭᑕ ᐱᒫᐧᐱᐢᑲᐅᑯᒋᐠ, 6ᑭ ᑭᐢᑫᔨᑕᒪᐧᐠ, ᒥᓇ ᑭ ᐃᑖᒧᐊᐧᐠ ᐅᑌᓈᕽ ᓬᐊᐃᑫᐅᓂᔭᐃᕽ ᓬᐃᐢᑕᕒᐊ ᒥᓇ ᑕᕒᐱ, ᒥᓇ ᐊᐢᑭᕽ ᐁᑯᑕ ᐋᐧᐢᑳ: 7ᐁᑯᑕ ᒫᑲ ᑭ ᐋᐧᐃᐧᑕᒪᐧᐠ ᒥᔮᐧᒋᒧᐃᐧᐣ.

8ᐁᑯᑕ ᒫᑲ ᓬᐃᐢᑕᕒᐊ ᑭ ᐊᐱᐤ ᐯᔭᐠ ᓈᐯᐤ, ᐁᑳ ᐁ ᑭ ᐊᐧᐢᑲᐃᐧᐟ ᐅᓯᑎᕽ, ᐁ ᑭ ᐃᓯ ᓂᐦᑖᐃᐧᑭᐦᐃᑯᐟ ᐅᑳᐃᐧᔭ ᐁᑳ ᐃᐧᑳᐨ ᐁ ᑭ ᐱᒧᐦᑌᐟ. 9ᐁᐊᐧᑯ ᐊᐊᐧ ᐯᑕᐁᐧᐤ ᐹᓬᐊ ᐁ ᐱᑭᐢᑫᐧᔨᐟ: ᐁᑯᓯ ᐃᐧᔭ, ᓱᑭ ᐁ ᑲᓇᐋᐧᐸᒫᐟ, ᐁ ᐋᐧᐸᐦᑕᕽ ᒫᑲ ᐁ ᐊᔮᔨᐟ ᑖᐯᐧᔦᔨᑕᒧᐃᐧᐣ ᑭᑕ ᑭ ᐃᔨᓂᑲᐃᒥᐦᐟ, 10ᑭ ᐃᑌᐧᐤ ᐁ ᑭᓯᐁᐧᐟ, ᓂᐸᐃᐧ ᑲᐧᔭᐢᐠ ᑭ ᓯᑎᕽ. ᐁᑯᓯ ᑭ ᐸᓯᑯᓯᐸᑖᐤ ᒥᓇ ᑭ ᐱᒧᐦᑌᐤ. 11ᐃᐢᐱ ᒫᑲ ᐁ ᒫᒪᐁᐧᔭᑎᒋᐠ ᐊᔨᓯᔨᓂᐊᐧᐠ ᐃᐧᔮᐸᐦᑕᑭᐠ ᐹᓬᐊ ᑳ ᑭ ᑐᑕᒥᔨᐟ, ᑭ ᑌᐯᐧᐊᐧᐠ, ᐁ ᐃᑌᐧᒋᐠ ᓬᐊᐃᑫᐅᓂᔭ ᐱᑭᐢᑫᐧᐃᐧᓂᕽ, ᒪᓂᑐᐊᐧᐠ ᑯᑎᑎᑯᓇᐊᐧᐠ ᐊᔨᓯᔨᓂᕽ ᐁ ᐃᓯᓈᑯᓯᒋᐠ. 12ᐹᕒᓇᐸᓴ ᒫᑲ ᑭ ᐃᓯᔨᐦᑳᑌᐊᐧᐠ, ᒍᐱᑕᕒ; ᐁᑯᓯ ᐹᓬᐊ, ᒪᕒᑯᕒᐃ, ᒋᑫᒫ ᐁᐊᐧᑲᐧᓂ ᑭᐦᒋ ᐁ ᐱᑭᐢᑫᐧᔨᐟ. 13ᐁᑯᓯ ᒍᐱᑕᕒ ᐊᔭᒥᐦᐁᐃᐧᔨᓂᑳᐣ ᐅᐟ ᐊᔭᒥᐦᐁᐃᐧᑲᒥᐠ ᑎᐱᐢᑯᐨ ᐅᑌᓈᕽ ᑳ ᐊᔮᔨᐠ, ᑭ ᐯᓯᐁᐧᐤ ᒧᐢᑐᓴᐧ ᒥᓇ ᐊᐧᐁᐧᓯᒋᑲᓇ ᑭᐦᒋ ᐃᐢᑳᐧᑌᒥᕽ, ᐁᑯᓯ ᐊᓯᒋ ᐊᔨᓯᔨᓂᐊᐧ ᑳ ᒫᒪᐁᐧᔭᑎᔨᐟ ᑭ ᐃᐧ ᐃᑐᑕᒼ ᒪᒍᐢᑌᐊᒫᑫᐃᐧᐣ. 14ᒫᑲ ᐃᐢᐱ ᐊᓂᑭ ᐊᐹᐢᑎᓬᐊᐠ, ᐹᕒᓇᐸᐢ ᒥᓇ ᐹᓬ, ᐱᔦᐦᑕᐦᑭᐠ, ᑭ ᔮᔨᑭᐱᑕᒫᐧᐠ ᐅ ᑭᑭᐢᑳᒋᑲᓂᐋᐧᐊᐧ, ᒥᓇ ᒣᑳᐧ ᐁ ᐅᓵᒣᔭᑎᔨᐟ ᐊᔨᓯᔨᓂᐊᐧ ᑭ ᐃᐢᐸᔨᐅᐊᐧᐠ, ᐁ ᑌᐯᐧᒋᐠ, 15#ᐁᐠᓴᑕᐢ 20:11; ᓂᑲᒧᓇ 146:6ᒥᓇ ᐁ ᐃᑌᐧᒋᐠ, ᐅᑭᒫᑎᐠ, ᑖᓀᑭ ᐅᐦᐃ ᑳ ᐃᑐᑕᒥᐠ? ᓂᐢᑕᓈᐣ ᓂᐟ ᐊᔨᓯᔨᓂᐃᐧᓈᐣ ᑖᐱᐢᑯᐨ ᑭᔭᐋᐧᐤ ᑳ ᐃᓯ ᐊᔮᔦᐠ, ᒥᓇ ᑭ ᐯᑕᒫᑎᓈᐣ ᒥᔮᐧᒋᒧᐃᐧᐣ, ᑭᑕ ᐳᓂᑖᔦᐠ ᐅᐦᐃ ᐸᑲᐧᓇᑕ ᑫᑲᐧᔭ ᐁᑯᓯ ᑭᑕ ᐊᑐᐢᑲᐋᐧᔦᐠ ᑳ ᐱᒫᑎᓯᐟ ᑭᓭᒪᓂᑐ, ᑳ ᑭ ᐅᓯᑖᐟ ᑭᓯᐠ ᒥᓇ ᐊᐢᑭ ᒥᓇ ᑭᐦᒋᑲᒥ, ᒥᓇ ᑲᐦᑭᔭᐤ ᑫᑲᐧᐩ ᐁᑯᑕ ᑳ ᐊᔮᐠ: 16ᐊᓇ ᐅᑖᕽ ᐅᑌ ᑳ ᐯ ᐊᔮᓂᐢᑫ ᐱᒫᑎᓯᕽ ᑳ ᑭ ᐃᔨᓇᒪᐋᐧᐟ ᑲᐦᑭᔭᐤ ᐁ ᐃᑕᐢᑳᓀᓯᔨᐟ ᐊᔨᓯᔨᓂᐊᐧ ᑭᑕ ᐱᒧᑖᑐᑕᒥᔨᐟ ᐃᐧᔭᐋᐧᐤ ᐅᐟ ᐃᓯᑖᐧᐃᐧᓂᔨᐊᐧ. 17ᒫᑲ ᐁᔨᐁᐧᕽ ᓇᒪᐃᐧᔭ ᑭ ᐃᓯ ᓇᑲᑕᒼ ᐁᑳ ᑫᑲᐧᐩ ᑭᑕ ᐋᒋᒥᑯᐟ, ᐃᐧᔭ ᐁ ᑭ ᒥᔪ ᑐᑕᕽ, ᐁ ᑭ ᒥᔨᑯᔦᐠ ᑭᒥᐊᐧᓇ ᒥᓇ ᒥᔪ ᐅᐱᑭᒋᑫᐃᐧᐣ ᐁᐢᐱᑖᔭᐊᐧᑭ, ᐁ ᒧᐢᑭᓇᑖᐟ ᑭᑌᐦᐃᐋᐧᐊᐧ ᒥᒋᐃᐧᐣ ᐅᐦᒋ ᒥᓇ ᒪᒪᐦᑖᑯᓯᐃᐧᐣ. 18ᐅᒪ ᒫᑲ ᐁ ᐊᔨᑌᐧᒋᐠ ᐊᑲᐋᐧᐨ ᑭ ᑭᐱᑎᓀᐊᐧ ᐊᔨᓯᔨᓂᐊᐧ ᐁ ᐃᐧ ᒪᒍᐢᑌᐊᒫᑯᒋᐠ.

19ᒫᑲ ᐁᑲᐧ ᑭ ᑕᑯᓯᓇᐧᐠ ᒍᐊᐧᐠ ᐋᐣᑎᔮᐠ ᒥᓇ ᐋᐩᑳᓂᔭᐣ ᐅᐦᒋ: ᐁᑯᓯ ᐁᐊᐧᑲᐧᓂᐠ ᑭ ᓵᑯᒋᒣᐊᐧᐠ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ, ᑭ ᐱᒫᐧᐱᐢᑲᐁᐧᐊᐧᐠ ᒫᑲ ᐹᓬᐊ, ᐁᑯᓯ ᑭ ᐋᐧᔭᐃᐧᑖᐯᐊᐧᐠ ᐅᑌᓈᕽ ᐅᐦᒋ, ᓂᐱᐤ ᐁ ᐃᑌᔨᑕᐦᑭᐠ. 20ᒫᑲ ᑭᐢᑭᓄᐦᐊᒪᐋᐧᑲᓇ ᐁ ᐋᐧᐢᑳᑳᐸᐃᐧᐢᑖᑯᐟ, ᑭ ᐊᐧᓂᐢᑳᐤ, ᒥᓇ ᑭ ᐱᐦᑐᑫᐤ ᐅᑌᓈᕽ: ᐁᑯᓯ ᐃᐧᔮᐸᓂᔨᐠ ᑭ ᓯᐯᐧ ᐃᐧᒉᐁᐧᐤ ᐹᕒᓇᐸᓴ ᑕᕒᐱᐃᕽ ᐃᓯ.

21ᐃᐢᐱ ᒫᑲ ᑳ ᑲᑫᐢᑭᒥᐁᐧᒋᐠ ᒥᔮᐧᒋᒧᐃᐧᐣ ᐁᑯᑕ ᐅᑌᓈᕽ, ᒥᓇ ᒥᐦᒉᐟ ᑭᐢᑭᓄᐦᐊᒪᐋᐧᑲᓇ ᑳ ᐅᓯᐋᒋᐠ, ᑭ ᑭᐁᐧᐊᐧᐠ ᓬᐃᐢᑕᕒᐊᐃᕽ, ᒥᓇ ᐊᐩᑳᓂᔭᒥᕽ, ᒥᓇ ᐋᐣᑎᔮᑭᕽ, 22ᐁ ᐊᔮᒋᐋᒋᐠ ᐅᐟ ᐊᐦᒑᑯᔨᕽ ᑭᐢᑭᓄᐦᐊᒪᐋᐧᑲᓇ, ᒥᓇ ᐁ ᓴᓯᑭᒫᒋᐠ ᑭᑕ ᑖᐱᑕᐁᐧᔨᑕᒥᔨᐟ ᑖᐯᐧᔦᔨᑕᒧᐃᐧᐣ, ᐃᐧᔭ ᐁ ᓵᐳᐢᑲᒪᕽ ᒥᐦᒉᐟ ᐋᔨᒥᓯᐃᐧᐣ ᐁᑯᓯ ᐃᓯ ᐱᑯ ᑭᑕ ᑭ ᐱᐦᑐᑫᔭᕽ ᑭᓭᒪᓂᑐ ᐅᐟ ᐅᑌᓇᐃᐧᐃᐧᓂᕽ. 23ᐃᐢᐱ ᒫᑲ ᑳ ᐅᔭᑭᑕᒪᐋᐧᒋᐠ ᐊᔭᒥᐦᐁᐃᐧᔨᓂᐊᐧ ᑲᐦᑭᔭᐤ ᐃᑕ ᐅᑕᔭᒥᐦᐋᐊᐧᐠ ᐁ ᐊᔮᒋᐠ, ᒥᓇ ᑳ ᐊᔭᒥᐦᐋᒋᐠ ᐊᓯᒋ ᐁ ᐃᔨᐊᐧᓂᓯᐃᓱᒋᐠ, ᑳ ᑎᐯᔨᐦᒋᑫᔨᐟ ᑭ ᐃᓯ ᑳᑭᓯᒧᐢᑕᒪᐁᐧᐊᐧᐠ, ᐊᓂᐦᐃ ᑳ ᑭ ᑖᐯᐧᑕᐋᐧᔨᐟ.

24ᑭ ᐊᑎ ᓵᐳ ᐱᒧᐦᑌᐊᐧᐣ ᒫᑲ ᐱᓯᑎᔭ, ᐁᑯᓯ ᑭ ᑕᑯᓯᓇᐧᐠ ᐊᓂᑕ ᐹᒼᐱᓬᐃᔭ. 25ᐃᐢᐱ ᒫᑲ ᑳ ᐃᐧᐦᑕᐦᑭᐠ ᐃᑌᐧᐃᐧᐣ ᐸᕒᑲᐃᕽ, ᑭ ᐊᑎ ᐃᑐᐦᑌᐊᐧᐠ ᐊᓂᑕ ᐊᑖᓬᐃᔭ; 26ᐁᑯᑕ ᒫᑲ ᐅᐦᒋ ᐋᐣᑎᔮᐠ ᑭ ᐃᑖᓯᐊᐧᐠ, ᐃᑕ ᑳ ᑭ ᐅᐦᒋ ᐸᑭᑎᓂᐦᒋᐠ ᐅ ᑭᓭᐋᐧᑎᓯᐃᐧᓂᔨᕽ ᑭᓭᒪᓂᑐᐊᐧ ᐊᓂᒪ ᐊᑐᐢᑫᐃᐧᐣ ᐅᐦᒋ ᑳ ᑭ ᑎᐱᑐᑕᑭᐠ. 27ᐃᐢᐱ ᒫᑲ ᑌᑯᓯᑭᐠ, ᒥᓇ ᑳ ᒫᒪᐃᐧ ᓇᑐᒫᒋᐠ ᐅᑕᔭᒥᐦᐋᐊᐧ, ᑭ ᐊᑭᓀ ᐊᒋᒧᐢᑕᐁᐧᐊᐧᐠ ᑲᐦᑭᔭᐤ ᑫᑲᐧᐩ ᑭᓭᒪᓂᑐᐊᐧ ᑳ ᑭ ᐃᑐᑕᒥᔨᐟ ᐃᐧᔭᐋᐧᐤ ᐅᐦᒋ, ᒥᓇ ᑳ ᑭ ᐃᓯ ᔪᑌᓇᒪᐋᐧᔨᐟ ᑖᐯᐧᔦᔨᑕᒧᐃᐧ ᐃᐢᑳᐧᑌᒼ ᐊᓂᐦᐃ ᒉᐣᑖᐃᓬᐊ. 28ᐁᑯᓯ ᓇᒪᐃᐧᔭ ᐱᑯ ᐊᑲᓇᐠ ᑭ ᐃᐧᒋ ᐊᔮᒣᐊᐧᐠ ᑭᐢᑭᓄᐦᐊᒪᐋᐧᑲᓇ.

Currently Selected:

ᐃᓯᐦᒋᑫᐃᐧᓂᐋᐧᐊᐧ 14: KKMs

Highlight

Copy