Nikamowina 25
25
kiskinohtahiwēwin mīna kanawēyimiwēwin
onikamon David
1hāw, kā‑tipēyihcikēyan, kiya kika-ayamihēstātin;
2kiya kimamisītotātin, nikisē-manitōm.
ēkāya nika-wī-nēpēwi-sākōcihikawin,
ēkāya kā‑māyēyimicik kita-mistēyimisowak niya ohci!
3namōya nēpēwihāw awiyak kā‑mamisītotāsk;
māka nēpēwihowak aniki kā‑nōtiniskik.
4kā‑tipēyihcikēyan, kiskinohamawin kiya kititātisiwin;
kiskinohamawin kimēskanawa.
5nīkānohtahin kitāpwēwin ohci mīna kiskinohamawin,
cikēmā kiya nikisē-manitōm kā‑pimācihiyan.
kapē-kīsik kimamisītotātin.
6kiskisi, kā‑tipēyihcikēyan, kikitimākinākēwin mīna kisākihiwēwin ēkāya wīhkāc kā‑kīsipipayik
kayās ohci ē‑nōkohtāyan.
7kāsīnamawin nipāstāhowina mīna niwanitōtamowina
kā‑kī-tōtamān ē‑oskāyiwiyān.
māka kisākihiwēwinihk ēkāya wīhkāc kā‑kīsipipayik mīna kimiywātisiwinihk
kiskisitotawin, kā‑tipēyihcikēyan!
8ayisk kā‑tipēyihcikēt ē‑kwayaskwātisit mīna ē‑miywātisit
kiskinohamawēw omacātisa anima mēskanaw
kita-pimitisahamiyit.
9kiskinohtahēw otapahtēyimisowa kwayask isi
mīna kiskinohamawēw otisiyinīhkēwin.
10nīkānohtahiwēw mamisītotamowinihk isi mīna sākihiwēwinihk ēkāya wīhkāc kā‑kīsipipayik
anihi kā‑kanawēyihtamiyit owīci-isīhcikēmiwēwin
mīna kā‑natohtamiyit owiyasiwēwina.
11kanawēyihta kitasotamākēwin, kā‑tipēyihcikēyan,
mīna pōnēyihtamawin niwanitōtamowina
āta iyikohk ē‑mihcētiki.
12aniki kā‑kihcēyimācik kā‑tipēyihcikēyit,
ēwakonik kita-kiskinohamākwak
tānima mēskanaw kita-pimitisahahkik.
13tāpitawi kita-miywāyāwak,
mīna otawāsimisa ōma ōta askiy ka‑tipēyihtamwak.
14kā‑tipēyihcikēt miyo-otōtēmiw anihi kā‑nanahihtākot,
mīna kiskēyihtamohēw owīci-isīhcikēmiwēwin.
15kākikē nikitāpamāw kā‑tipēyihcikēt
ēkwa nipaspīhik kakwēspanātanohk ohci.
16kwēskīstawin mīna kitimākinawin, kā‑tipēyihcikēyan,
ayisk nikaskēyihtēn mīna ninēsowisin.
17īkatēnamawin niwawānēyihtamowina
mīna pimācihin nitāyimisiwinihk ohci.
18kiskisi nimākwēyimowina mīna nikakwātakihtāwina
mīna kāsīnamawin nimaci-tōtamowina.
19wāpamik tānitahto ē‑ihtasicik aniki kā‑māyēyimicik,
wāpamik iyikohk ē‑pakwāsicik.
20kanawēyimin mīna pimācihin;
ēkāwiya nika-sākōcihikawin.
kinātāmototātin.
21kiyām nimiywātisiwin mīna nitāpwēwātisiwin nika-kanawēyimikon,
ayisk kimamisītotātin.
22hāw, kisē-manitow, pimācihik Israelīwiyiniwak
omikoskātēyihtamowina ohci.
Currently Selected:
Nikamowina 25: PCSBR
Highlight
Share
Copy
Want to have your highlights saved across all your devices? Sign up or sign in
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society
