Матта 5

Исайи дагъдиин аьгъювалар улупуб

1Уч духьнайи халкь дябкъну, Иса дагъдиина удучӀвуру; ва, деъган, Дугъахьна Дугъан ученикар гъюру. 2Дугъу дурариз гьамци аьгъювалар улупуз хъюгъру:

3– Бахтаврар ву Аллагьдин улихь касиб вуйидар, фицики Аьршарин Паччагьлугъ гьадраринуб ву.

4Бахтаврар ву дерд зигрудар, фицики дурар Аллагьди ккарциди.

5Фурс ктрудар бахтаврар ву, фицики дурариз ирс вуди жил рубкьиди.

6Агъайин гьякьвалихъ дахаргнайидар бахтаврар ву, фицики Аллагьди дурар тухъ апӀиди.

7Бахтаврар ву рягьимлудар, фицики дурарилан хил алдабгъиди.

8Бахтаврар ву юкӀв марццидар, фицики дурариз Аллагь рякъиди.

9Ислягьвал гъабхрудар бахтаврар ву, фицики дурариз Аллагьдин веледар пиди.

10Бахтаврар ву Аллагьдин гаф тамам апӀурайиган утӀуккурайидар, фицики Аьршарин Паччагьлугъ гьадраринуб ву.

11Бахтаврар вучва учву, гьаз гъапиш, Йиз ученикар хьпаз лигну, учву беябур апӀура, учвухъ хъергра ва учвлан футнийир апӀура.

12Гьаци беябур апӀури гъахьну учву хьайиз гъахьи пайгъамбрарра. Рази йихьай ва шадвал ачмиш апӀинай, фицики аьршариъ учвуз айи пешкеш зурбаб ву.

Жилин кьил

13Учву жилин кьил вучва. Амма кьилан кьилзишин гъудубгиш, думу фти кьилзи апӀиди? Думу сарун фтизкӀа ярамиш шулдар: думу сарун, инсанарин ликариккан апӀруси, гатӀабхьиди. 14Учву дюнʼяйин акв вучва. Дагъдиин али шагьур дярябкъди гъубзидар. 15Ва чирагъ кабхьиган, думу гъабран кӀанакк ккидривур, хъа, диди хулаъ вардариз акв тувруганси, чан йишвʼин дивур.

16Гъит гьаци ичв аквну инсанарин арайиъ акв туври, ичв ужудар ляхнар дурариз рякъруганси ва дурари Аьршарин ичв Адаш адлу апӀбан бадали.

17Хиял мапӀанайки, Узу Къанун вая пайгъамбрар батӀул апӀуз Дуфнайир ву кӀури. БатӀул апӀуз ваъ, хъа дурари кӀурайиб кӀулиз адабгъуз Дуфнайир вуза. 18Фицики дюзди кӀуразачвуз, гьелелиг заварна жилар имиди, дибикӀнайиб вари тамам дархьикьан гагьди, Къанундиан гьич саб гьярфкьан, ясана саб цӀаркьан дубгидар. 19Гьаци вуйиган, му гафарикан фукӀа тамам дарапӀрур ва гьаци жара адмийирихьдира апӀуз гъитрур Аьршарин Паччагьлугъдиъ вартӀан бицӀир вуди гьисаб апӀиди. Хъа шли думу гафар тамам гъапӀиш ва жара касарихьра гьаци апӀуз гъитиш, думу Аьршарин Паччагьлугъдиъ вартӀан зурба кас хьиди. 20КӀуразачвузки, эгер учву Аллагьдин табшуругъар къанунчйирина фарисйиритӀан ужуди тамам дарапӀди гъашиш, учву Аьршарин Паччагьлугъдиъ учӀвидарчва.

Ажугълуваликан

21Учвуз аьгъячвузки, ихь ата-бабйириз фу дупнаш: «Адми йивну миликӀан; хъа шли гъакӀиш, дугъу суддин улихь жаваб тувди». 22Хъа Узу учвуз кӀуразаки, шли чан багахьлу хъюлакк гъидисиш, думу чан суд апӀбакк ккуркьди, ва шли чан гъардшиз «усал кас» гъапиш, думу Заан диванханайиъ чан суд апӀбакк ккуркьди, хъа шли жарариз «ахмакь» гъапиш, думу жегьеннемдин цӀигъ гъитбакк ккуркьди.

23Гьаци вуйиган, эгер уву Аллагьдиз яв багъиш Аллагьдин Хулаз хури айиган, яв гъардшиз увкан гиран кайивал кӀваин гъабхьиш, 24гъурбан апӀру йишвахь яв багъиш гъибтну, душну, сифте яв гъардшихъди мясляаьтар апӀин, хъасин, дуфну, яв багъиш гъурбан апӀин.

25Эгер шлиз увухъди суд апӀуз ккунди аш, шлукьан ухди, суддиз рякъюъ имиди, мясляаьтар апӀин. Даршиш дугъу уву судьяйихьна, хъа судьяйи гъаравлихьна тувди ва дустагъдиъ итдиву. 26Гьякьди кӀуразавуз: аьхиримжи кепкиина гъяйиз яв вари бурж ктипайизкьан, душвʼан удучӀвидарва.

Кьяппаваликан

27Учвуз гъеебхьнийчвузки: «Кьяппавал мапӀан», – кӀури. 28Хъа Узу учвуз кӀуразаки: фуж жара дишагьлийихьинди тямягьниинди лигураш, дугъу сарун чан кӀваъ дугъахъди кьяппавал гъапӀну. 29Эгерки яв арччулну ули уву гунгьихъна гъахураш, думу адабгъ ва гатӀабхь тина, фицики бедендин саб гьендемдихьан шуб ужу вувуз, яв вари беден жегьеннемдиъ ипайиз. 30Ва эгер яв арччул хили уву гунгьихъна гъахураш, хъадабтӀ думу ва гатӀабхь тина, фицики бедендин саб гьендемдихьан шуб ужу вувуз, яв вари беден жегьеннемдиъ ипайиз.

Хпир гьидитбакан

31Дупна гьацира: «Эгер фуж чан хпирихьан жара шулаш, дугъу хпирихьна жара хьпан кагъаз туври». 32Хъа Узу кӀуразачвузки: шли, чан хпир, дугъу кьяппавал дарапӀди, гьидитиш, дугъу думу хпир кьяппавалихъ хъаъра; ва шли гьидитнайир чаз дитиш, дугъура кьяппавал апӀура.

Ху апӀбакан

33Хъана, аьгъячвузки, ичв абйир-бабариз фу дупнаш: «Уву гъапӀу ху чӀур дарапӀди, Агъайин улихь тамам апӀин». 34Хъа Узу кӀуразачвузки: затра ху мапӀанай: я аьршариинди, гьаз гъапиш аьршар Аллагьдин тахт ву; 35я жилариинди, гьаз гъапиш жилар Аллагьдин ликарикк йишв ву; я Ерусалимдиинди, гьаз гъапиш думу Кьудратлу Паччагьдин шагьур ву; 36ясана жвуван кӀулʼиндира ху мапӀанай, гьаз гъапиш гьич саб чӀаркьан я кӀару, я лизи апӀуз хьибдарчвухьан. 37Эгер увуз «ав» пуз ккунди аш, гьаци «ав» йип; «ваъ» пуз ккунди аш, гьаци «ваъ» йип. Хъа митӀлан артухъ вуйиб иблисдихьан ву.

38Учвуз гъеебхьунчвуз, дупна: «Уву шлинкӀа ул идипиш, яв улра идипну ккун, ва уву шлинкӀа силиб идипиш, яв силибра идипну ккун». 39Хъа Узу кӀуразачвузки: писвализ писвал мапӀан. Яв арччул гарцӀликкан бачӀ ккадатуриз тмунубра ккив. 40Ва фуж, увухъди суддиз удучӀвну, яв кӀанккан ккабхьру ккуртт ккидибтуз ккаш, дугъаз яв заълан алабхьру палатра тув. 41Ва шли уву чахъди саб манзил гъягъюз мажбур апӀуруш, дугъахъди кьюб манзилра гъарах. 42Увкан тӀалаб апӀурайириз тув, ва увкан буржназ ккун апӀурайирихьан маш магьадабгъан.

Душмнарихьна вуйи ккунивал

43Учвуз гъеебхьунчвуз, дупна: «Багахь хьайир ккун апӀин, хъа душман – даккун». 44Хъа Узу кӀуразачвузки: ичв душмнар ккун апӀинай, ва ичв кьяляхъ хъахьнайидарихъанди ккарагай. 45Мидʼинди учву Аьршарин ичв Адашдин баяр хьидичва, гьаз гъапиш Дугъу гьам пис касар, гьамсана гъянидар Чан ригъдихъди тямин апӀура ва мархьра гьам гьякьлудариина, гьамсана нягьякь вуйидариина гьапӀра. 46Фицики анжагъ учву ккунидартӀан ккун апӀдарш, учвуз фтин бадали пешкеш хьибди? Налук гъадабгъурайидарира гьаци апӀурадаринхъа? 47Хъа нагагь учву анжагъ ичв гъардшартӀан тебрик апӀури шулдаш, имбудари апӀурайибтӀан артухъ учву фу апӀурачвахъа? Гьаци апӀури шулдаринхъа аллагьсузарира? 48Гьаци вуйиган, ичв Аьршарин Адашси, тамамлудар йихьай.

Currently Selected:

Матта 5: ТабГК

Highlight

Copy