Матта 3

Штуан апӀру Ягьʼяйи аьгъювалар улупуб

1Думу йигъари штуан апӀру Ягьʼя дуфну, Ягьудияйин чюллериъ аьгъювалар улупуз хъюгъру: 2«Ичв гунгьар гардандиъ дидисну, уьмур дигиш апӀинай, – кӀуйи дугъу, – фицики Аллагьдин Паччагьлугъ багахь шула». 3Гьадму Ягьʼяйикан вуйиштӀан Ишая пайгъамбри гьамци дупнайиб: «ИчӀи чюлиъ дих атӀабгура: Агъайиз рякъ ккабалгай. Дугъаз рякъяр-жилгъйир дишдар апӀинай!» 4Ягьʼяйиин девейин хьайин палат алийи, юкьвнаан гъидкьин яркьу чӀул идибтӀнайи. Дугъан ипӀру хураг елгнагарна чӀурдин йиччв вуйи. 5Гьадмуган дугъахьна Ерусалимдиан, вари Ягьудияйиан ва Ярдан нирин аьтрафарихъан гизаф халкь гъюйи. 6Чпин гунгьариин швумал духьну, дурари чпин гунгьар гардандиъ дисуйи, ва Ягьʼяйи дурар Ярдан нириъ штуан апӀуйи. 7Хъа чахьна хайлин фарисйирна саддукйир штуан апӀуз гъюри дяркъну, Ягьʼяйи дурариз кӀуру: «БитӀракан гъахьидар! Гъюз ккайи Аллагьдин хъюлхьан гьергуз шли улупунчвуз?! 8Учву, ичв гунгьар гардандиъ дидисну, уьмур дигиш апӀуз шлуси, ичв ляхнариинди улупай. 9Ва: „Ич аба Ибрагьим вуйич“ кӀуру гафар учвуз чӀяаьн ву пну, миж микиванай, гьаз гъапиш учвуз кӀуразаки, Аллагьдихьан гьаму гъванариканра Ибрагьимдиз веледар ктауз шулу. 10Гьарин кьаблихъ магьа екӀв гьязурди хъа: гъяни йимиш туври адру гьарсаб гьар алдабтӀиди ва цӀигъна гатӀабхьиди.

11Учву гунгьарихьан марцц хьпан лишан вуди, узу учву анжагъ штуан апӀураза, амма йиз кьяляхъди Гъюрайир узутӀанна Кьудратлур ву, узу Дугъан шаламар гъахузкьан лайикь дарза. Дугъу учву Гирами Рюгьнахьдина цӀихьди цӀийи алаидичву. 12Дугъан хилиъ йирф хьибди, Дугъу дяхинна нахъв жара апӀиди: дяхин Чан танхариъ абхьди, хъа нахъвар гьаммишан убгру цӀигъ гъяхьну ургиди».

Иса штуан апӀуб

13Гьадму вахтна Ягьʼяйихьна штуан апӀбан бадали Ярдан нирихъна Галилей уьлкейиан Иса гъюру. 14Ягьʼяйиз сифте му ляхникк кӀул ккивуз даккунди гъабхьнийи: «Уву узу штуан апӀуб лазим ву, хъа Уву узухьна гъюрава!»

15Амма Исайи дугъаз жаваб вуди гъапи: «Гъит му ражну гьамци ибшри, фицики Аллагьди улупнайиб ухьу вари кӀули гъабхуб лазим ву». Ва гьадмуган Ягьʼя Иса штуан апӀуз рази гъахьи.

16Штуан гъапӀубси, Иса ниркан кудучӀвуру, магьа сабпну Дугъаз завар ачмиш гъаши, Дугъаз луфси ис шулайи Гирами Рюгь Чаина гъюри гъябкъю. 17Ва завʼан дих шулу: «Му Йиз масан Бай вуйиз, Узу Дугъʼин гизаф рази вуза!»

Currently Selected:

Матта 3: ТабГК

Highlight

Copy