Эвел 8
8
Шту дюнья ккапӀну ккудубкӀуб
1Заанурин Нюгьна, дугъахъди гимийиъ айи хулан ва вягьши вари гьяйванатар кӀваин алийи. Заанури жилиин микӀ утӀубччвуз гъитру ва штар кьяляхъ гъягъюру. 2Жилин бушлугъарин булагъар хъяркьру, заварин улдар хъирхьру, мархь ктӀиппуру. 3Шид явашди жилилан улдубчӀвурайи. Штар варжна хьцӀурпи йигъаз цӀиб хьуз хъюгънийи. 4Ургубпи вазли, вазлин йицӀиургудпи йигъан Арарат дагълариъ гими дийибгънийи. 5ЙицӀубпи вазлиз штар яваш-явашди айибтӀан кам хьуз хъюгънийи. ЙицӀубпи вазлин садпи йигъан дагъларин кӀакӀар кказаргнийи.
6ЯгъчӀвур йигълан Нюгьди гимийин чав гъапӀу улд абццру 7ва хъют деебтуру. Думу, шидхьан жил азад хьайиз, мина-тина тӀибхури гъубзру. 8Хъасин Нюгьди, жилилан шид улдубчӀвнуш аьгъю апӀуз, луф деебтуру. 9Луфраз чан ликар дивуз ужуб йишв гъибихъундайи ва гимийиз кьяляхъ гъитӀибхнийи, фицики сабан дюнʼяйиин шид илмийи. Нюгьди хил гьачӀабккну, луф чахьди гимийизди хуру. 10Ургуд йигълан дугъу луф хъана деебтуру. 11Луф дугъахьна хябяхъдин вахтна гъюру. Дидин ушвнигъ олива гьарин таза кюл гъяйи. Сарун Нюгьдиз жилилан шид улдубчӀвуб аьгъю шулу. 12Думу ургуд йигъансана ккилигури гъузру. Хъасин луф деебтуру, сарун думу кьяляхъ гъафундайи.
13Нюгьдин уьмрин йирхьудваржна садпи йисан ва гьадму йисандин садпи вазлин садпи йигъан жилилан шид кам гъабхьнийи. Нюгьди гимийин гъваъ абццру, лигуруш, жилилан шид улдубчӀвнайи. 14Кьюбпи вазлин къанна ургудпи йигъан, жил гъеебцциган, 15Заанури Нюгьдиз гъапну:
16– Гимийиан яв хпирра, баярра, баярин хпарра хъади удучӀв. 17Вари чӀивишнар: ничхрар, гьяйванатар, мал-къара ва вари гьяшаратар адаъ. Гъит дурари вари дюнʼя алабцӀри, дурар бегьерлу, артмиш ва артухъ ишри.
18Хъа Нюгь чан хпир, баяр ва баярин хпар хъади удучӀвуру. 19Дурарин кьяляхъди гьарсаб жинснан жилин вари гьяйванатар жа-жаради – нахшрар, гьяшаратар, ничхрар удучӀвуру.
20Нюгьди РАББИЙИЗ гъурбан апӀрушв дивру. Хъа Нюгьди душвʼин, гьарсаб гьялал гьяйванатдикан ва вари гьялал ничхрарикан гъадагъну, вари цӀигъ дургну, гъурбан апӀуру#8:20 Думуган, гьялал гьяйванатар урккури, фукӀа гъидритди цӀигъ ургури гъурбан апӀру аьдат ади гъабхьну..
21РАББИЙИЗ кабалгру ниъ гъюру ва Чан кӀваъ гьамци кӀуру: «Инсан себеб духьну, сарун Узу дюнʼя балайикк ккипидарза. БицӀидихъанмина инсандин апӀурайи фикир ужуб даршра, Узу вари жан алиб сарун тӀанкь апӀидарза.
22Сабан, дюнʼя имбукьан гагьди,
убзубна ккадабцӀуб,
аьхълушинна манишин,
хьадна кьюрд,
йигъна йишв
ккудуркӀидар».
Currently Selected:
Эвел 8: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
