Эвел 12

Заанури Ибрам ктагъуб

1РАББИЙИ Ибрамдиз кӀуру:

– Яв ругарилан улдучӀвну, яв тухмихьан гьудучӀвну, яв адашдин хулʼан, Узу увуз улупру ругариинна гъарах. 2Хъа Узу увкан зурба халкь артмиш апӀидиза. Ужувлакк ккаъдизаву. Яв ччвур адлу апӀидиза, ва увлантина варидариз ужʼвал хьибди. 3Увуз ужʼвал ккун апӀрудар Узу ужувлакк ккаъдиза, хъа увуз чӀуруб ккун апӀрудар балайикк ккитдиза. Увлантина дюнʼяйин вари халкьариз ужʼвал хьибди!

4РАББИЙИ гьамци гъаписи, Ибрам удучӀвну гъягъюру. Дугъахъди – Лутра. Харрандиан удучӀвруган, Ибрамдин ургцӀурна хьуд йис вуйи. 5Ибрамди чахъди чан хпир Сарай, чан чвуччвун бай Лутра, чпи гъазанмиш гъапӀу вари мал-мулкра, Харрандиъ чпихъ лихурайидар вари гъадагъуру. Дурар Ханаан жилариина гъягъюз рякъюъ учӀвру ва думу жилариина гъюру. 6Ибрам Шехем кӀуру йишвахь хьайи Морэ кӀуру мяхъюн гьарихьна гъюру. Думуган му жилиин ханаан халкьар яшамиш шулайи. 7РАББИ Ибрамдиз ачмиш шулу ва Дугъу кӀуру: «Яв наслариз Узу гьаму жил тувдиза». Ибрамди душваъ чаз ашкар гъахьи РАББИЙИЗ гъурбан апӀрушв тикмиш апӀуру. 8Думу душвʼан Бет-Эл шагьрихьан ригъ гьудубчӀвру терефнаъ айи дагъларихьна гъюру. Душваъ дугъу, Бет-Элихьан ригъ алабхъру терефнаъ шлуси, чан чадрар дивру, хъа Гай шагьур ригъ гьудубчӀвру терефнахъинди гъубзру. Дугъу, душваъ РАББИЙИЗ гъурбан апӀрушв дивну, икрам апӀуру. 9Хъа Ибрамди чан рякъ Негев чюлиз, кьиблайизди, давам апӀуру.

Ибрамна Сарай Египетдиз гъягъюб

10Ханаандиъ гашʼвал айиган, Ибрам Египетдиз яшамиш хьуз гъягъюру. 11Дугъу, Египетдиз багахь шулайиган, чан хпир Сарайиз кӀуру:

– Аьгъязуз, уву успагьи дишагьли вува. 12Египтянариз уву гъяркъган, уву йиз хпир ву пиди, ва узу йивну йикӀиди, хъа увуз чӀалра пидар. 13Уву дурариз, йиз чи вуза, йип. Уву гьаци гъапиш, вари ужу хьибди – йивну йикӀбаккан узу уьрхидива.

14Ибрам чан хпирра хъади Египетдиз гъюру, ва египтянариз му дишагьли гизаф успагьиди рякъюру. 15Думу фяряуьндин гъуллугъчйиризра рякъюру ва фяряуьндиз дугъан уччвуваликан ктибтуру. Думу фяряуьндин хулаз гъадагъуру. 16Гьаци Ибрамдизра ужуйи вуйи. Дугъахъ марччар, малар, дажйир, лукӀар (жилар ва хпар) ва девйир хъиршру. 17Хъа РАББИЙИ, Ибрамдин хпир себеб духьну, фяряуьнна дугъан хал гъагъи аьзабари ва уьзрари ккапӀнийи. 18Фяряуьнди, Ибрамдиз дих дапӀну, дугъаз гъапи:

– Уву узкан фу гъапӀунва? Уву, му яв хпир вуйиз кӀури, гьаз гъапундарва? 19Уву гьаз, му йиз чи вуйиз, гъапунва? Гьаддиз думу узуз хпирди гъадагънийза! Гьан, гъадагъну яв хпир, гъарах!

20Фяряуьнди, Ибрам чан хпирра хъади, чаз айибра хьади, му уьлкейиан адауз гъитру.

Currently Selected:

Эвел 12: ТабГК

Highlight

Copy