Ляхнар 4

Петриин ва Югьандиин суд

1Петрна Югьан халкьдихъди улхурайи вахтна, дурарин багахьна маллйир, Аллагьдин хулан гъаравларин аьхюдарна саддукйир гъафнийи. 2Петрина Югьанди халкьдиз Исайилантина гъачӀидар чӀиви хьуваликан аьгъювалар улупура кӀури, дурариз гизаф хъял кайи. 3Дурари, Петрна Югьан дидисну, сарун хябяхъ хьпаз лигну, гвачӀиндизкьан гъаравликкди уьрхюру. 4Аьгъювалар гъеерхьдарикан гизафдар хъугънийи. Дурарин кьадар хьуд агъзурихьнакьан вуйи.

5Хъайигъан гьякимар, агъсакълар ва аьлимар Ерусалимдиъ уч шулу. 6Душваъ аьхюну малла Гьаннай, гьацира Каяфа, Югьан, Александр ва жугьдарин аьхюну маллайин тухмиан вуйи жарадарра айи. 7Дурари, Петрна Югьан хъади духну, дурарихьан гьерхну:

– Фициб кьувватниинди вая фуну ччвурнахъан учву гьамци гъапӀунчва?

8Гьадмуган, Гирами Рюгьнахьди ацӀну, Петри дурариз кӀуру:

– Эй халкьдин гьякимдрарна Израилин кавхйир! 9Эгер учву аьжуз адмийиз ужʼвал гъапӀну кӀури ва, думу фици сагъ гъахьнуш, пуб гъи учкан жаваб тӀалаб апӀураш, 10учвуз варидариз ва вари Израилин халкьдиз аьгъю ибшри, му, учву дариз гъизигу ва Аллагьди чӀиви гъапӀу Назаретдиан вуйи Месигь Исайин гьунарниинди думу ичв улихь сагъ духьну, дийигъна.

11Думу,

устйири нигь дапӀну

ва хъасин мурччван кӀулин гъван гъаши, Гъван ву.

12Фицики заварин кӀанакк инсанариз тувнайидарикан, ухьуз уьрхювал тувру, сарун жара ччвур ккадар.

13Жугьдарин гьякимдрариз Петринна Югьандин дирбашʼвал дябкъну, дурар гъурхдар дару ва аьдати адмийир вуйивалин гъаври ахъну, гьаддиин мюгьтал духьнайи. Дурар Исайихъди гъахьидар вуйиб аьгъю гъабхьнийи. 14Исайин вакиларин гъвалахъ сагъ дапӀнайи адми дийигънайиган, сарун артухъ дурарихьан гаф пуз гъабхьундайи. 15Петризна Югьандиз диванханайиан удучӀвуз буйругъ тувну, гьякимдрари чпин арайиъ мясляаьт апӀуру:

16– Ухьу мурарикан гьапӀхьа, фицики Ерусалимдиъ яшамиш шулайи гьарсар касдиз му аьхю аьламат гьадрари гъапӀуб ачухъди аьгъя, ва ухьхьан му гъапӀундар пуз шулдар. 17Амма му аваза хъанара ярхлаз дарабгъбан бадали, Исайикан гьич сарихъдира дулухуз дурариз гъадагъа апӀидихьа.

18Ва дурариз дих дапӀну, Исайикан сарун саризра фукӀа дарпуб ва аьгъювалар улулупуб гъадагъа апӀуру. 19Хъа Петрина Югьанди дурариз жаваб тувру:

– Учву саб фикир апӀинай: Аллагьдин улихь АллагьдихътӀан учвухъ артухъ хъпехъуб дугъри вуйинхъа? 20Учхьан учуз гъябкъюбдиканна гъеебхьубдикан дарпиди гъитуз шулдарчухьан.

21Дурар, хъана гучӀар ккаъну, деетну. Гьаз гъапиш дурариз жаза тувуз гьякимарихьан багьна абгуз гъабхьундайи, фицики гъабхьибдиз лигну, вари халкьди Аллагьдин ад апӀурайи. 22Сагъ гъаши касдин ягъчӀвур йистӀан артухъ вуйи.

Вакиларин ккарагувал

23Деету Петрина Югьанди, чпиндарихьна дуфну, аьхюну маллйирина кавхйири чпиз фу гъапнуш, ктибтуру. 24Мурар деерхьну, заварихьинди илдицну, Аллагьдиз варидари кӀуру:

– Я Гьякимдар Аллагь, Уву зав, жил, гьюл ва дюнʼяйиъ айи гьарсаб яратмиш гъапӀунва! 25Ич аба ва Яв лукӀ Давудрин мелзниинди Гирами Рюгьналанмина Уву гъапунва:

«Гьаз жара миллетар гьяясуз шулу?

Гьаз дурариъ кӀулиз удудучӀвру ниятар а?

26Дюнʼяйин паччгьар ва гьякимдрар

дяви апӀуз гьязур духьна,

Агъайиз ва Дугъан Месигьдиз

къаршу вуди сабишвʼина уч духьна».

27Фицики дугъриданра мурар вари, Гьиродна Понтий Пилат Израил халкьдихъди ва жара миллетарихъди гьаму шагьриъ Уву Месигьди ктагъу Яв Гирами Гъаравашдиз къаршу вуди уч гъахьну. 28Чпин ляхнар кӀулиз адагъуз уч гъашидариинди Яв кьастниинди ва гьюкмиинди улупнайи ляхнар кӀулиз удучӀвну. 29Гьамус Уву лиг, Агъа, учуз гучӀар ккаъри, дурари фйир кӀураш, Яв лукӀариз Яв гаф гучӀ дарди пуз кюмек апӀин. 30Аьзарлуйир сагъ апӀури, аьламатар ва аьжайиб лишнар улупури, Яв Гирами Гъараваш Исайин ччвурнахъди Яв кьувват улуп.

31Ккарагбахъан, дурар али йишв тӀубччвуру ва дурар Гирами Рюгьнахъди ацӀру. Гьаддиз дурари Аллагьдин Гаф аьшкьниинди пуз хъюгънийи.

Вари уртахъуб вуйи

32Вари хъугънайидар саб юкӀвси ва саб жанси гъахьнийи. Дурарикан сарира чаз айи мал-мутмуйиз, йизуб ву, кӀурдайи, хъа вариб дурарин уртахъуб вуйи. 33Вакилари зурба кьувватниинди Агъа Иса чӀиви хьуваликан шагьидвал апӀури гъахьну. Дурариин Аллагьдин ужʼвал алди гъабхьну. 34Дурарин арайиъ дарвал кайидар адайи, фицики мулкар вая хулар-йишвар айидари, дурар масу туври, пул хури шуйи. 35Хъа пул вакиларихьна тувуйи, ва дурари, шлиз фтин дарвал каш, гьубкӀбан бадали пай апӀуйи.

36Месела, Киприъ бабкан гъаши сар левит Юсуфди (вакилари дугъаз Варнав кӀуйи, яна «Ккарцрур») 37чан хутӀил масу тувну, дидихъ гъадабгъу пул дубхну, вакиларихьна тувнийи.

Currently Selected:

Ляхнар 4: ТабГК

Highlight

Copy