Matiyu 22

Misal masǝna larusaye

(Luk 14.15-24)

1Koro Isa walde misalnin tayiro wulyeyeno. Tiye: 2«Nodo bargaa Mai Samemayedǝ alama mai laa tadanju nangaro masǝna larusaye dabbarjǝna gai. 3Maidǝ wolodiyanju laaa am masǝnaro dojǝnadǝa bowoja isaro nanjaro kinodǝnniya, kǝndero wayera. 4Koro walde wolodiya gadea cunode tayiro: “Am dokkǝnadǝro wullowo: ‘Akko masǝnanidǝ deyada. Dalowani so, kǝnnawani kaisua so duwajana, awiso kǝrma dabbargada. Arowo masǝna larusayero!’” yeno. 5Amma am dojǝnadǝ mananjudǝa awimaro ngojanni sapkadara. Laa kulonjaro, laa saniaramnjaro leyera. 6Am gapcǝnasodǝ ye wolodiyadǝa cadane basarjane roro keyeso. 7Maidǝ gǝrgaje sojiyanju cunode kamceji ania roro ceyese bǝlanja kannun waryera. 8Daji Maidǝye wolodiyanjuro: “Akko masǝna larusayedǝ dabbargada, amma am dokkǝnadǝ martawa tia boye cadanni. 9Adǝ nangaro lenowo lai laisolan am fanduwwa sammaa masǝna larusayero bowonowo isa!” yeno. 10Daji wolodiyadǝ lejane lai lai jaane am cawandǝna sammaa ngǝlan diwin capcane isane, har larusaramdǝ damgeno.

11«Maidǝ am dojǝnadǝa kuroro kǝrgaanniya, curonjan kam laa kalwu larusaye lujǝnni kiro. 12Maidǝye tiro: “Sawa, awiawin kalwu larusaye bawoa na adǝro kǝrgaam?” cǝne tia kiworǝnniya, kamdǝro awo wulduye katkero. 13Daji Maidǝye wolodiyanjuro: “Tia si-a mukko-alan gerowo deyan curo duwu cǝlǝm pǝttero gǝpkǝnowo, nadǝn so ye tǝdi, sheɍi ye naldi,” yeno. 14Nonowo, am bowojǝnadǝ ngǝwu, amma tayi kǝrejǝnadǝ gana,» yeno.

Kambiwu kǝla akki njoyen

(Mar 12.13-17; Luk 20.20-26)

15Daji Farisawadǝ lejane sawardane jawal Isaro curo mananjuyen bǝlaa laduwuye mayera. 16Fuwurawanja-a am Mai Hirudussa jaana laa-aa nanjuro canode tiro: «Sayinna, ni kam jirema ye, jawal Alaye kalkallo yikkǝrami yero noniyena, dalilnjudǝ wundumaa rinǝmmi ye, gayirnǝmmi ye nangaro. 17To, awi tǝmanǝm? Kaisarro#22.17 Kaisar - Gomna kura Rombe. akki njodǝ halal ra haram?» cane tia keworo. 18Amma Isa niadiwinjadǝa asuje tayiro: «Mǝnafǝkka! Awiro wua rijamsuwi? 19Wuro dinariyus tilan akki biyanuwidǝa fǝlesǝgǝnowo rukke!» cǝne dinariyus tiro kekkudo. 20Tayiro: «Cu-a kǝla-a wunduye tilan dasaa?» cǝne tayia kiworǝnniya, 21tiro: «Kaisarre,» yera. Daji Isaye tayiro: «Ngaimaa, awo Kaisarredǝa Kaisarro yowo, koro awo Alayedǝa Alaro yowo!» yeno. 22Adǝa fangeranniya, tia jauro ajapcane koljane sapkadara.

Kambiwu kǝla cinowo duniayen

(Mar 12.18-27; Luk 20.27-40)

23Yim adǝman Sadusiya laa, tayi cinowo duniaye bawo wuljaidǝ, na Isayero isane tiro koro cadde: 24«Sayinna, Nawi Musaye: “Kam laa tada bawo bawoje kamu koljia, yanjugǝna kamunjudǝa niyajo tiro kaduwu majuwo!”#SK 25.5 cǝnna. 25Akko curonden yaana tulur mbeji. Burwoyedǝ kamu ngoje tada cuwandǝnnin bawoje kamunjudǝa yanjugǝnaro kolyeyeno. 26Yindiyedǝ-a yakkuyedǝ-a yero ngai wakkajiye, har ti tulurredǝ kamudǝa cǝmoye bawoyeno. 27Ngawo adǝyen kamudǝ ye bawoyeno. 28To, tayi tulurso tia camowonadǝ, cinowo duniayen kamu wundunjayero walji?» cane tia keworo.

29Isaye tayiro: «Nayidǝ fattuwuwwa, dalilnjudǝ kitawu bi kǝnduwo Alaye nonuwwi nangaro. 30Cinowo duniayen larusa so, niya so cadiwawo, tayi alama malaiyawa samelan dasaanadǝ gairo waljai.#22.30 malaiyawa gai - Sawisoro na Alayen roa dasayi, gadero sanuiwawo. Adǝma nangaro samelan kaduwu mada bawo. 31Koro karmon cidudǝ, awo Ala kitawulan nayiro wulnjaanadǝa kǝranuwwi wa? 32Tiye: “Wuma Ala Ibrahimbe-a Isakuye-a Yakubaye-a wo,”#NL 3.6 cǝnna. Ti Ala am nunaye gǝni, am roaye, diye!» yeno. 33Jamadǝ adǝa fangeranniya, tai dajane alamdunjudǝa ajapkera.

Wadawa samman finja kura wo?

(Mar 12.28-34)

34Farisawadǝ Isa Sadusiyadǝa manan yapcǝgǝnaro fangeranniya, captane nanjuro kadira. 35Curonjan malǝm Attauraye laa tia rijapturo tiro: 36«Sayinna, wadawa curo Attaura Nawi Musayedǝn finja kura wo?» cǝne tia kiworo. 37Isaye tiro: «“Ala Kǝmanǝmba karwunǝm ngan, ronǝm ngan, hangalnǝm ngan raye!”#SK 6.5 38Adǝma wada kura burwoye wo! 39Koro yindiyedǝ ye ti gai: “Kǝmaskinǝm yea kǝlanǝm gairo raye!”#Lew 19.18 40Wada yindi anima fǝrdu Attaura Nawi Musaye-a kitawuwa nawiyaye-a sammaye!» yeno.

Almasiwudǝ Tada Mai Daudaye

(Mar 12.35-37; Luk 20.41-44)

41Farisawadǝ nadǝn captana duwon, Isaye tayiro: 42«Awi kǝla Almasiwudǝyen tǝmanuw? Ti tada wunduye?» cǝne tayia kiworo. Tiro: «Tada Mai Daudaye!»#22.42 Tada Mai Daudaye - Kaduwu Mai Daudaye, kaala Almasiwu Alaye. yera. 43Daji Isaye tayiro: «Adǝgaimaa, ndayilan gǝle Mai Dauda Ruhu Alayen tia Kǝmalan bowoyeno? Tiye: 44“Kǝmandeye Kǝmaniro: ‘Namme kǝmborammilan duwon, kǝladowanǝmba cidiya sinǝmbero yakkǝkko!’ cǝnna.”#Jaw 110.1 45Mai Daudaye tia Kǝmalan bowojǝnadǝ, ndayilan gǝle Almasiwudǝ tadanjuro walji?» yenniya, 46wundunjama rakce tiro jaawu cinni. Koro adǝn fuwun wunduma gadero cinju mudu kaje tiro koro cǝddǝnni.

Currently Selected:

Matiyu 22: kby

Highlight

Copy