Markus 7

Ariki Kwab ti A u Tu Yesu te Riraen

(Matiyu 15:1-9)

1Uwog wune, ande ti kumbub Farisi fa ti ande ti ku kwen na ande ira Icwe ru Urushelima ba byir uwog Yesu. 2Aba nung ariki uwae ande ti ku putsa Yesu ku ci wuci ti ajwo ajib. Ayi tatso baa, aba na jwo-ba ajwo be. 3Ikyaen ti, aba Farisi, fa ti Mbayawuda ti tsitsi, ku ci-ba wuci amen be, se iken ti a jwo pu ba ajwo ajib-ba itawe a u ci wuci. Ayine si icwe abitse-ba ti kute ti aba ku putsa. 4Cwucwo, kiye ti aba a ru yi ritug u ba uwae kununn, a ku ci-ba wuci be, se iken ti a jwo pu ba ijwe ajib-ba sisaen itawe aba u ci wuci. Icwe-ba munnae ti abitse-ba ye tsi, pangma icwe risu fengo ti a ku jwo atu ambyi, ti atutong, ti akye.#7:4 Uwae atsinken iki na unju Mbahelene a bae ira iki ike baa, “Ti iken ti nae.”

5Ama ande ti kumbub Farisi ti ande ti ku kwen na ande ira Icwe bane rang Yesu ira baa, “Imi ti nde nee ande ti imbyi-fu ku putsa-ba icwe na ande ndufu be, ku ci wuci ti ajwo ajib?” 6Yesu ri te ba baa, “Ishaya ri kubenti risu-ni ande ti kufur, pangma ti a bae baa,

‘Ande bane ku teb rinyi-m

ti apwa unju amen;

utob-ba ta rurwen te m.

7Aba ku fen m ti ukaen amen,

ikyaen ti,

aba ku kwen na ande icwe

ti si ana ande ti ye tsi,

u ku ri baa,

ayi na si Icwe Rimam.’ ”

8Yesu ri baa, “Ani ya icwe Rimam ta pu ni, u ye icwe ande ti ajwo ifaen!

9“Ani nde itsab ku pyi ira Rimam ikyaen ti ni putsa icwe na abitse-ni. 10Nung! Musa ri baa, unde na u nda itse-wu ti iya-wu kuko. Cwucwo, asiti unde a txun iya-wu ko itse-wu asu, a na wen kang wu. 11Amaa ana-ni txi! Asiti unde a site usu ti awu ú ndeya itse-wu ti iya-wu atang, ani ku cwe na wu ti wu na kunn usu yi baa, usu na Rimam. 12Yi fengo wune ani byang kyi unde wu, wu ndeya-wu itse-wu ti iya-wu cwucwo be. 13Ayine si fengo ti ani ku sa ira Rimam kafe ira ti ukaen, ikyaen ira icwe na abitse-ni ti ani ku kwen na ande. Ira munnae yang-yi ti ani ku nde ti pangma ayine.”

Iken ti ku Ndembeb Unde

(Matiyu 15:10-20)

14Isim yine Yesu kafe kunn byir kyi ande uwog-wu cwucwo u ri te ba baa, “Ni naa atong meme-ni, ti ni nungye ira yine! 15Asiti unde a ci wuci si uwae rishwu-wu, wuci yine u nde tu-yi ti yi u nde beb unde wu uwae ira icwe be. Ayi si iken ti ku tsoye uwae rishwu unde ti ku ndembeb wu uwog icwe.”#7:15 Uwae atsingken iki ti kucang a ko ra ira iki uwog ne baa, 16 Unde ti site atong ti ku fxen ira, awu a fxen! 17Yesu ya ande ti funn atang ta ama u sang uwae kununn iki. Atugbug-wu ba rang wu imbyi ira yi ti awu sunn ne. 18Awu rang ba baa, “Fa te ani, ani shanum te ititangye ira wune ama a. Nung! Wuci ti unde a ci si yi uwae-wu u nde tu-yi ti yi ndembeb unde be. 19Ikyaen ti, wuci yi si-yi uwae utob unde be. Ayi si yi uwae rishwu-wu, awu ka nja ra yi tika.” (Ayi si uwog wune ti Yesu cwe na ande ti a ci itso wuci meme patag.)

20Ama awu ri baa, “Iken ti ku ndembeb unde uwog icwe si iken ti ku tso uwae riyaen utob unde ba. 21Ikyaen ti, uwae riyaen utob unde si uwog ti ira ti tang titibi ku ruye atang. Ayi ti ku nda unde nde ikentitibi meme, pangma iyag ti nae, riyib ti yib, unde ti wen, 22amae ti nae, ayib ti tàen, usum ti sha, kukyaefa, ishíg ti shíg, ti ijib ti ti nde ti iken ti ku txi iyib ti tsotso ti nde, kitsinn ti tsinn, asu ti txun, ijwe ti ndub, wande ti kuskwab ti ti nde. 23Meme ikentitibi yine ti ku tso uwae riyaen utob unde ba. Ayi ti ku ndembeb unde.”

Unda Iki Ru Uwae Kinjo

(Matiyu 15:21-28)

24Yesu nwunn tiri u ru yi uten ti Tiire u ka sang uwae kununn unde iki atang. Awu sha-wu ti unde iki na nung baa, awu na ta atang be, amaa, ande nungye kang-ba wu kang. 25Ayi tsi-yi tsi be, unda iki ti fxen iten Yesu ru ba u ba jwunn ikyig uwe-wu ku mbyae ajwo. Umbae-wu site rijwen titibi risu-wu. 26Amaa, unda wu si unda ti apxin ti a mbae wu uten ti Suro Fonikiya. Awu jwam Yesu ti wu na rwae ruye rijwen titibi risu umbae-wu. 27Yesu ri te wu baa, “Ā sa wuci na anyisu ti ā ci kyikyaen titawe, ikyaen ti, ayi nyang-yi ti a u sa wuci na anyisu jwunnsi mbapxu be.” 28Unda wu ri te wu baa, “Een, Itsekuru, amaa, mbapxu ku fyi amumunn wuci ti ku si riben uwog ti anyisu ku ci wuci atang.” 29Yesu ri te wu baa, “Ikyaen ira yi ti afu ri ne, ru-fu, kusung titibi ruye pu wu ijwe unda-fu.” 30Unda wu kafe ru yi uwae kununn u ka tu unda-wu nae tsa uwaen. Rijwen titibi ya wu ta pu wu.

Yesu Nwangru Unde ti Tsi Atong

31Yesu nwunn uwae uten Tiire u ba ru tsa uten Sidon ti uten Dekapoli ru fe yi uyinn ti Galili. 32Uwog iki a pu unde ti tsi atong ku skang apwe ba uwog-wu. Aba jwam wu ti wu na sa kujwo nae tsa unde wu risu. 33Ama Yesu pu unde wu fa imbyi u ru iyen uwe ande ti funn atang. Ti a ka tsi kum aba amam, awu sa akyikyin ajwo sang aye atong unde wu. Isim ayine awu tub atsang si kukyikyin kujwo u sa tekunn ujaen unde wu. 34Yesu txaen ayib tso yi apupwen u si kiku “Hmm” u ri te unde wu ti unju uten baa, “Efata.” Imbyi-yi baa, “Mbub ta” 35Ama tiri, atong unde wu mbubta, ujaen-wu ama saen ta. Awu ku ri ira nyinyang. 36Yesu fwa ba kusen u fwa shishem baa, aba na ri-ba ira yi te ande iki be. Amaa aba nwunn atang u sa ira yi mbub shag kyi fe uwog meme. 37Ande ti som atang nung ira yi fur ba ayib si-yi ti ti ri be. A ri baa, awu ku nde iken meme nyang timambe. Ande ti tsi atong, awu ku nda ba fxen ira, ande ti ku skang apwe ama ku ri saen ira unju.

Currently Selected:

Markus 7: kubNT

Highlight

Copy