Luka 12

Yesu Fwa Kusen Risu Ande ti Kufur

(Matiyu 10:26-27)

1Uwae kiye wu ti ande kumbub kumbub funn u ku tur atso tur, Yesu tawe ri te ande ti awu ku kwen na ba baa, “Ni nung ijwe-ni nyinyang ti yisiti ti ku nda ande ti kumbub Farisi ndub ijwe. Ayi si ira ti kufur-ba. 2Meme iken ti a bur kyi yi ti uwae rifen u ba nae shwong. Meme ira ti titam ti ande iki ku tang baa, ande na nungye-ba yi be, a u ba shaen imbyi-yi tso ise. 3Ikyaen yine, meme ira ti afu a ri uwog ti kitam ande u ba fxen yi fxen uwog ti paenine. Cwucwo meme akaen ti afu a tsag si ande atong uwae kusog, a u ya iski-yi rishen.

Unde ti A u Kyen Ikyenricwu-wu

(Matiyu 10:28-31)

4“Arwan-m, ame ku ri te ni, ni kyen-ni ikyenricwu ande ti ku wen unde be. Isim ti a wen mam pu ba unde aba site-ba iken iki ti a u nde kyi cwucwo be. 5Ame u tatso ni iken ti ani u kyen ikyenricwu-wu. Ni kyen ikyenricwu Rimam. Isim ti afu a cwu pu fu, awu ti site kuko ti wu sa fu jwunn si uwae urwa. Kubenti ti ame ku ri te ni, ni kyen ikyenricwu-wu!

6“Ani ku ye-ni ísen itsong jabci nyáng kobo ifaen amam be a. Rimam u munnji-wu te kinjo uwae-yi be. 7Ai, ikyinn risu-ni titini, Rimam pwen mam pu wu ayi. Ikyaen yine, ni kyen-ni ikyenricwu be. Ani skeb pu ni ísen yang-yi ti rurob uwe na Rimam.”

Ande ti Shaen Yesu

(Matiyu 10:32-33; 12:32; 10:19-20)

8Yesu ri te ande ti funn atang baa, “Ame ku ri te ni, unde titini ti a cwe uwe ande baa, awu na si unde-m, Umbae Unde u ri ira ti tinyang risu-wu ama uwe atom Rimam ti apupwen. 9Ama unde titini ti awu a wae rukwae ti wu u kunn rinyi-m uwe ande, Umbae Unde u shaen wu uwe atom Rimam apupwen ama.

10“Unde titini ti a ri unju titibi risu Umbae Unde, Rimam u yata na wu ikentitibi-wu, amaa, unde ti a ri unju titibi risu Kusung Rimam, Rimam u yata na-wu unde wu ikentitibi-wu be.

11“Kiye ti a ye ni ba kusog Rimam-ba, ko uwe akwe ti ande ti uwe na utense ti a na pwen ni rikwen, ni fwer-ni ijwe risu ira ti ani u ri be. 12Ikyaen ti, Kusung Rimam u kwen tatso ni ira ti ani u ri kiye wu.”

Unde ti Kuskwab ti Site Rifunn

13Uwae ande ba ti funn atang unde iki sa ira unju tso u jwam Yesu baa, “Unde tiyang, ri te inja-m ti wu sa iken ti si ana-m uwae rifunn itse-ti na m.” 14Yesu rang wu baa, “Urwan, aye ti tsab m ti m na taen rikwen u ka rifunn itse-ni na ni?” 15Awu ri kyi cwucwo te ande ti funn atang baa, “Ni nung ijwe-ni nyinyang. Ni cwe-ni ira ti ni sa utob-ni tsi risu rifunn ande be. Unyang unde si-yi ira rifunn-wu amam be.”

16Isim ira yine, Yesu tsag te ba ici iki uwae ira ti sunn baa, “Unde ti rifunn iki site risaen-wu ken tag. Awum waen kusang wu si-yi ti ti ri be. 17Awu nwunn ku kab u ri te risu-wu baa, ‘Ame site-m uwog ti ame u pu awum-m si tag atang be. Imi ti ame u nde tine ara? 18Enheen! Ame tangsom pu m iken ti ame u nde. Ame u mbub arug-m si tag yi riben meme u mbye tishe ti riyaen ti m u wur awum si atang ti wuci ti tsitsi. 19Isim yine ame u ri te risu-m baa, “Afu tu pu fu meme iken ti afu ku sha. Uwae asang ti ku ba uwe ne afu u nde-fu wande iki be. Som ti ngwa rijwen! Ci ti ngwa ti tsen utob!” ’ 20Ama, Rimam ri te wu baa, ‘Afu unde ti kuskwab! Ame ku sha unyang-fu ureb ne, ama iken yi ti afu tom tsika ijwe-fu, aye ti u ci yi?’ ”

21Ricwunnkyi-yi Yesu ri baa, “Ayi si ahan ama uwog ande ti ku byir rifunn tsi ikyaen ijwe-ba, amaa, uwog Rimam aba si ande ti rikaen.”

Uwae Kinjo Uwog Rimam

(Matiyu 6:25-34)

22Isim ira ti sunn yine Yesu ri te ande ti awu ku kwen na ba baa, “Ikyaen yine ame ku ri te ni, ni kab-ni ira risu wuci ti ani u ci u som ti user be, ko risu atupwa ti ani u bur kyi rimenn-ni te yi be, 23ikyaen ti, unyang-ni site rurob skeb pu yi wuci yang-yi akwen. Rimenn ijwe ama site rurob skeb yi atupwa. 24Ni sae kurang ti ku pinn apupwen. Ayi ku tom-yi ritom be, ayi site-yi itaen ti ayi ku pu wuci tso atang ko arug ti ayi ku pu wuci si atang be. Rimam ku shi yi! Ani site rurob uwe Rimam skeb pu ni anung yang akwen. 25Ko unde a kab ira rimang risu unyang-wu, awu nde fob-wu ti wu shwe ra usir kinjo fa usir ti Rimam sa tsi wu utense be. 26Asiti ani a ku nde tu-ni iken ti kpang ahan be, ani kyang rimang u ku kab ira risu ayi wuci ti iken ti tsitsi ne? 27Ni sae ajwug iken ti ta uwae kutur. Ayi ku ser ku ben u ku nde-yi wande iki be, ku kob atupwa si-yi rimenn-yi be. Amaa ayi nyang ti sae timambe. Kubenti ti ame ku ri te ni, Solomon ti risu-wu ma, ko ti awu si unde ti riyinn ti rifunn, awu site-wu atupwa ti rinyang pangma ajwug ituku yine be. 28Rimam ku kyae ijwe irum nyinyang ahan, ko ti ayi si iken ti ta kutur ti yaka, ucwe urwa ku twen mbub yi. Kubenti, ani skeb pu ni irum, awu u sha kang atupwa cwun ni ama. Uwae kinjo ko-yi ani be, ande-m!

29“Ni kab-ni uwae be. Ni ndembeb-ni utob risu iken ti ani u ci u ngwa be. 30Ikyaen ti, ande ti apxin ama ku sa utob-ba tsi risu iken ti ci ti iken ti ngwa. Itse-ni nung pu wu baa, ani na ku sha yi. 31Ni sa Kujwokwe-wu tsi uwe, meme iken ti tsitsi yine u ba tu ni isim.

Rifunn ti Apupwen

(Matiyu 6:19-21)

32“Ni kyen-ni ikyenricwu be, ani iwen-m, ikyaen ti, Itse-ni Rimam ku tsen utob risu Kujwokwe-wu ti awu u nda ni. 33Ni pu rifunn-ni jabci ti ni pu aser-yi ru ka na ande ti rikaen. Ni sha na ijwe-ni ukyig ti ku rwa-wu rwa be. Ni byir rifunn-ni tsi apupwen uwog ti ayi u mam-yi mam be, unde ti riyib u ka fob-wu atang be, ibyaen u ci fob-ba ayi be. 34Ikyaen ti, uwog ti rifunn-fu tsi atang si uwog ti utob-fu u ta atang ama.

Ande ti Tsi ti Ujwin

35“Ni kyae nyang ijwe-ni ti ni tsi ti kujwén! Ni nda urwa fitila-ni ti ayi ā cwucwé. 36Ni som ti ujwin pangma ande ti som ku ji kiye ti unde ti kununn-ba u ka ru uwog unda ishe ba. Kiye ti awu a ka ru ba ku kwer kujwo ufu, ti ritsen, a u mbub na wu ufu kusog. 37Tinyang u si ana apyi ba ti Itsekuru-ba u ba tu ba aba som te ujwin ku sae wu. Kubenti ame ku ri te ni, awu u kyae nyang ijwe-wu u tatso ba uwog ti som-ba, u pu wuci ba na ba. 38Ko awu a ka ru ba ukatitang ko kukunn ta ira, awu a ru ba tu ba a tsi ti ujwin u num-ba num be, ayi u nyang timambe uwog-ba. 39Ama, ni nung ira yine nyinyang ikyaen ti, a baa, unde ti kununn na nung kiye ti unde ti riyib na u ka ru ba sang kununn-wu, awu ú cwe-wu ti unde a sang ka yib iken uwae kusog-wu be. 40Tine, ani ama, ni tsi ti ujwin, ikyaen ti, Umbae Unde u ka ru ba uwae kiye ti ani kab-ni baa, awu na ru ku ba atang be.”

Upyi ti Tinyang ti Upyi Titibi

(Matiyu 24:45-51)

41Bitrus rang baa, “Itsekuru, ira ti sunn ne, afu ku ri yi ikyaen-ti ree, re ikyaen ande meme?” 42Itsekuru ri baa, “Uwae ira-m ayine, aye ti si upyi ti site kubenti ti ben-ayib? Upyi ti kubenti si upyi ti itsekuru-wu u sa wu ta risu apyi ti tsitsi. Awu ti kú kan na apyi ti tsitsi wuci ko kiye titini ti pang atang. 43Awu u tsen utob ken tag kiye ti unde ti kununn-wu a ka kafe ru ba tu wu uwae wande ti ti nde. 44Kubenti ti ame ku ri te ni, itsekuru-wu u sa wu ta risu rifunn-wu meme. 45Ama asiti upyi wu a tang baa, ‘Itsekuru-m ru ku fe fengo ti rwen. Awu u ka ru ba-wu fife be.’ Ama awu a ye apyi ti tsitsi ti byinn, apyi ti arom te ti anda, u ku ci u ku ngwa u ku shishaen, 46itsekuru-wu u ka ru ba usir iki ti awu nung-wu be.

47“Upyi ti nung iken ti itsekuru-wu ku sha ti wu na nde, ama awu a pyir u nde-wu ayi be, a u kum wu kutxu ti ken tag. 48Cwucwo, unde titini ti Rimam pu na wu iken kpang, Rimam u ba sha iken kpang yine kujwo-wu ama. Ama unde titini ti a pu na wu iken yang-yi ti wu na nungkyi, Rimam u ba sha iken yang-yi ama.

Yesu u Kata Ande

(Matiyu 10:34-36)

49“Ame ru ba ikyaen ti m ba kwer urwa si utense. Á baa, awu na ye pu wu urwa tine, ayi ú nyang uwae-m! 50Ama ame site batisma ti a u nde na m. Ame u byir utob se kiye ti a nde na pu ba ame batisma yi. 51Ani ku tang baa, ame na ba ti m na sa kujimshwur na ru ba utense a? Iyee, ayi si-yi kujimshwur be, ayi si itikanta. 52Tsikunn ike ru fe yi uwe, uwae kununn kinjo ande itsong u kata ambub ifaen, ande ifaen u cwe-ba ira ande ita ti tsitsi be. 53Abitse u cwe-ba ira anyisu ti urom be, anyisu ti urom ama u cwe-ba ira abitse-ba be. Abija u cwe-ba ira andā-ba be, andā-ba ama u cwe-ba ira abiya-ba be. Anda u cwe-ba ira awabyib-ba be, awabyib-ba ama u cwe-ba ira Abija abaen-ba be.”

Iken ti u Tso Kiye ti Ricwunnkyi

(Matiyu 16:2-3)

54Yesu ri kyi cwucwo te ande ti funn atang baa, “Kiye ti ani a nung kubyi a ru ku ye usir kujwo ureb, ti ritsen ani ku ri baa, ‘Upwen ku ba,’ ara kubenti upwen u tsa. 55Cwucwo kiye ti ani a nung ufunn a ru uwe ti kujwo ife ku ba, ani ku ri baa, uwog na u byag timambe, ara ayi ku nde ahan. 56Ani ande ti ku ndub ijwe! Ani ku nde tu ti ni u ri imbyi iken ti ku nde apupwen ti riben. Ani kyang rimang nung tu-ni ti ni ri imbyi iken ti ku nde uwae kiye wune be?

Kyaenyang Ira-fu ti Ande ti Rika-fu

(Matiyu 5:25-26)

57“Imi ti nde, ani kab ye tu-ni ti ajwo-ni iken ti kpang atang be? 58Kiye ti unde ti rikwen-fu a pu fu ku ru yi kusog rikwen, kwab ti kyae nyang te wu ti wu ya fu ta ti ti ani ta ti fengo, bè awu u shir fu ru ba-wu uwog ukwe rikwen, u sa fu na dogari, ama a u sa fu ru ka cwunnkyi. 59Ame ku ri te fu kubenti, afu u ruye-fu uwae pursuna atang be, se ti afu a pae tag pu fu meme aser ti a yer na fu.”

Currently Selected:

Luka 12: kubNT

Highlight

Copy