Kucangtsi 44

Yusufu Txae Ameinja-wu Kutxae

1Yusufu nda unju na upyi-wu baa, “Pu wuci si ba uwae ibae kpang ti ukwae-ba, ti fu sa aser unde titini si ti uwae usu-wu. 2Sa kitu ambyi azurfa-m ne si fa uwae usu umbae ti tinying uwae-ba, ti aser awum-wu meme.” Ama awu nde ti bara-yi ti Yusufu ri te wu. 3Ti ucwefam ku yae, awu tē ameinja-wu. Ama aba ti ikyinnsu-ba nwunn ru ba tiri. 4Ti ti aba ru-ba rurwen khika be, Yusufu ri te upyi-wu baa, rwae tsa ande bane ti kufe. Afu a rwae ye pu fu aba, rang ba baa, “Imi ti nde ani pae titinyang-m ti itibi? Imi ti nde ani yib ra kitu ambyi azurfa-m? 5Awune si-wu kitu ambyi unde ti kununn-m, ti awu ku ngwa iken atang, u ku caen ira te wu be a. Iken ti ani nde ne, si riraen ti beb timambe.”

6Kiye ti upyi wu rwae ye pu wu aba, awu ri ira yine te ba. 7Aba ri te wu baa, “Itsekuru-m, imi ti nde afu ku ri itso ira yine? Apyi-fu u nde-ba itso iken yine be! 8Nung, aser ti ati ka tu uwae ibae-ti kiye ti ati nwunn ike ku ru yi Kanana, ati sa kafe ba na-ti ani be a. Ikyaen imi ti ati u yib azurfa ko zinariya uwae kusog unde ti kununn-fu? 9Asiti afu a tu kitu ambyi azurfa wu kujwo upyi-fu iki uwae-ti ike, wen-fu awu, ati ama u kafe apyi-fu.”

10Unde wu cwe baa, “Ayi ā si pangma ti ani ri. Unde ti a tu kitu wu kujwo-wu, awu amam ti u kafe upyi-m, ani ande ti tsitsi u ru-ni.” 11Ti ritsen, meme-ba ye isu-ba si riben u saen yi. 12Ama unde wu bag itisha isu yi ti ti undufu ba cwunnkyi usu ana umbae titinying. Ama awu ka tu kitu wu uwae usu Benjamin. 13Ama unyang kunn ba, aba ye atupwa-ba shiryaen,#44:13 Atupwa ti shiryaen si iken ti Mbaibrane ku nde kob ko kiye titini ti ira a ndembeb ba utob. Unde titini ye usu-wu baen ikyinnsu-wu ama aba kafe sang ti uwae uten. 14Kiye ti Yawuda ti ameinja-wu kafe ba kununn Yusufu, awu ta ti kusog. Aba ba kaen nae riben uwe-wu. 15Yusufu rang ba baa, “Ayine si imi ti ani nde? Ani nung-ni ti utso unde ma ame u caen ira be a.”

16Yawuda ri baa, “Ira imi ti ati u ri te itsekuru-ti? Ati u ri baa imi? Ati u nde rimang u txen unju-ti? Rimam shaen imbyi apyi-fu nae pu wu ise. Ati ti risu-ti, fa ti awu ti aba tu kitu wu uwog-wu meme, kafe pu ti apyi-fu.”

17Yusufu ri baa, “Ame u nde-m itso iken yine be, si nyáng unde wu ti a tu kitu ambyi wu uwog wu amam ti u si upyi-m. Ani ande ti tsitsi u kafe ru-ni uwog itse-ni uwae kujimshwur.”

Yawuda Jwam Yusufu Ikyaen Benjamin

18Yawuda nwunn u jwam Yusufu baa, “Itsekuru-m, ndembeb-fu utob be, ti ame upyi-fu u tsag ira pang te fu, ikyaen ti afu pangma Ukwe ti Ejib ti risu-wu. 19Itsekuru-m, afu rang ti apyi-fu baa, ati na site itse ko inja bara. 20Ati cwe baa, itse-ti na ta ti unyang, u kyáen tag pu wu, ama inja-ti titinying ti a mbae na wu kiye ti awu kyáen pu wu ne, te wu ta tetso. Inja-wu ti uwae rishwu iya-wu cwu pu wu. Awu amam ti tsitsi, itse-wu ama site ure te wu timambe.

21“Itsekuru, afu ri te ti baa, ati na pu wu si ba ti afu u sae wu ti ayib-fu. 22Ati ri te fu baa, umbae wu na u ya itse-wu ta-wu be. Asiti awu a ya itse-wu ta, itse-wu na u cwu. 23Afu ri te apyi-fu baa, ‘Se inja-ni ti ricwunnkyi wu a te ni ba te tso titawe ani u nung uwe-m.’ 24Ama kiye ti ati kafe ru uwog itse-ti, ati ri tag te wu ira ti afu ri.

25“Isim yine itse-ti ri te ti baa, ati na ka jab wuci pang na ba kyi. 26Ati ri te wu baa, ‘Ati u ka-ti be, asiti inja-ti ti ricwunnkyi a u te ti ru-wu tetso be. Ikyaen ti, awu a putsa-wu ati be, ati u nung-ti uwe unde wu be.’

27“Tiri upyi-fu, itse-m, ri te ti baa, ‘Ani nung pu ni ti uwa-m mbae na nyáng ame anyisu ifaen amam. 28Kinjo ya ti ta pu wu, ama ame ri baa, kubenti ibye inyi wen pu wu awu. Ti kiye wu ba ku kwer tine, ame nung-m ayib-wu cwucwo be. 29Asiti ani a pu wune ru kyi, ira titibi a ka tu wu, ani u nda m ame u cwu ti utob tibyir.’

30“Ikyaen yine, asiti ame a ka uwog upyi-fu, itse-m, umbae wune a putsa-wu ati be, ti awu site ure ti umbae wu timambe ne, 31awu a nung baa, umbae wu na ba-wu te ti be, itse-m u cwu fae. Ama itsekuru, ati shir iticwu na pu ti unde ti ijwu risu wu ne. 32Ikyaen ti ame yer unju te itse-m baa, ‘Asiti ame a pu umbae wu ba-m be, itse-m ā sa riraen ana iken ti tu umbae wu sī m risu!’

33“Tine Itsekuru-m, ame ku jwam fu, asiti afu a cwe, ame u som te fu ti ike ti ame u si upyi-fu, ti umbae wune ā te ameinja-wu kafe ru uwog itse-wu. 34Ame u nde rimang kafe kaa tu itse-m, asiti umbae wu a te ti ru-wu ama be? Ayi u caeb m timambe ti m u sae ira titibi ti u tu itse-m.”

Currently Selected:

Kucangtsi 44: kubNT

Highlight

Copy