Kucangtsi 42

Anyisu Yakubu Ru Ka Jab Wuci yi Ejib

1Ti Yakubu fxen baa, wuci na ta Ejib, awu ri te anyisu-wu baa, “Imi ti nde ani som ku sae atso piin? 2Ame fxen baa, wuci na ta Ejib. Ni si yi atang ti ni ka jab wuci ba be, ati u cwu rimenn.” 3Ama ande rijwe uwae ameinja Yusufu si ti a kaa jab wuci yi Ejib.

4Amaa Yakubu ya Benjamin, inja Yusufu, ta ti kununn, ikyaen ikyenricwu, iki be ira titibi na u tu wu. 5Ikyaen yine anyisu Isirela fa uwae ande ti ka jab wuci yi Ejib, ikyaen ti, rimenn ta uten ti Kanana ama. 6Kiye wune Yusufu ti si Gwamna na uten Ejib. Awu ti ku jabci wuci na ande meme. Ti ameinja Yusufu ka sang, aba kú riben, u fur risu riben uwe-wu. 7Ti Yusufu pu ayib sae ameinja-wu, awu nungye ba, amaa awu nde te ba pangma awu na nung-wu aba usir iki be, u nde ira tí kubyag tí kubyag te ba. Awu rang ba baa, “Ani ru aka ba?” Aba ri baa, “Ati ru Kanana ba ku jab wuci.”

8Yusufu nungye ameinja-wu, amaa, aba nungye-ba awu be. 9Ama Yusufu tangsom ti kurwa ti awu sunn risu-ba, ama u ri te ba baa, “Ani si ricwu tam riben! Ani ba ti ni u baen u sae uwog ti uten ti nam sisi atang.”

10Aba ri baa, “Iyee, itsekuru-ti, apyi-fu ba ku jab wuci.” 11Meme-ti si anyisu unde kinjo. Apyi-fu si ande ti kubenti, si-ba ricwu tam riben be.

12Awu ri te ba baa, “Iyee, ani ba ku baen uwog ti uten wune nam sisi atang.”

13Amaa aba ri baa, “Ati apyi-fu si rijwe asu ifaen uwae rishwu itse-ti. Ati som uten ti Kanana. Tine, umbae ricwunnkyi-ti ta te itse-ti ti kununn, kinjo ama ta-wu cwucwo be.”

14Yusufu ri te ba baa, “Ayine si ira yi ti ame ku ri te ni, ani si ricwu tam riben! 15Fengo ti ati u myae ni ta re. Ame ben uben ti rinyi Ukwe ti Ejib baa, ani u nwunn-ni ike be se inja-ni ti ricwunnkyi wu a ba pu wu titawe. 16Ni tom kinjo uwae-ni ka pu inja-ni ba. Aba ti tsitsi ne u nae uwae pursuna, ti ti u nung ko ira-ni si kubenti. Ayi a si-yi ahan be, ame ku ben uben ti rinyi Ukwe ti Ejib, baa, ani na si ricwu tam riben!” 17Ama awu ye ba meme cwunn. Aba nde usir ita uwae pursuna atang.

18Usir ti ita, Yusufu ri te ba baa, “Ame si unde ti ku kyen ikyenricwu Rimam. Iken ti ani u nde u nwangru ta re. 19Asiti ani a site kubenti, kinjo uwae-ni ā som ti pursuna ike ti aba ti tsitsi ama ā su wuci ka na ande-ni ti ku cwu rimenn. 20Ni ka pu inja-ni ti ricwunnkyi wu ba kang ti m u nung baa, ani na ku ri kubenti, ama ani u cwu-ni be.” Aba cwe. 21Aba ri tetso baa, “Kubenti, tine ati ku ngwa rikaen ikyaen iken ti ati nde te inja-ti. Ati nung itso rikaen ti ati nde wu. Awu jwam ti, ti ti na ya wu ta, ati cwe-ti be, nee iken ti shir rikaen ne ba risu-ti.”

22Roben ama ri baa, “Mbaa ame ri te ni baa, ati na nde-ti umbae wu ira titibi be, ani shaen-ni re! Tine ati ku ngwa rikaen ikyaen iticwu-wu.” 23Aba nung-ba ti Yusufu ku fxen ira yi ti aba ku ri be, ikyaen ti, awu ku ri ira te ba, unde iki ti ku kafe ira yi na ba. 24Yusufu nwunn u ya ba ta u ka jwub ira, u kafe ba ku ri ira te ba cwucwo. Awu ye Simeyon cwunnkyi ti ayib-ba.

Ameinja Yusufu Kafe Ru ti yi Kanana

25Yusufu nda unju baa, a na pu wuci si munn meme ibae-ba, ti a na pu aser unde titini na si fa ti uwae usu-wu, ti a na sha na ba wuci ti a ci fengo. Ama apyi ba nde ti mbwe-yi. 26Tiri aba ye isu yi baen ikyinnsu-ba, ama u ru-ba. 27Ti aba ka sang uwog ti aba u cwag atang utitang wu, kinjo uwae-ba mbub ibae-wu ti wu u pu wuci na ikyinnsu-wu, awu sae, aser-wu ta ti uwae ibae-wu! 28Awu ri te ameinja-wu baa, “Aba sa aser-m kafe si-ba ame ti uwae ibae-m! Nung! Ayi ta re!” Anying yer ba utob, ijwe-ba fwer mbeb, aba ku rang atso baa, “Ayine si imi ti Rimam nde te ti ne?”

29Ti aba ba tu itse-ba Yakubu yi Kanana, aba tsag te wu meme iken ti nde. Aba ri baa, 30“Unde ti uwe uten wu ri ira te ti tí kubyag tí kubyag ku tso baa, ati na si ricwu tam riben ti na ba ku baen uten wu. 31Ama ati ri te wu baa, ati na si-ti ricwu tam riben be, ati na si ande ti kubenti. 32Ati na si rijwe asu ifaen uwae rishwu itse-ti, amaa kinjo na ta-wu cwucwo be. Umbae ricwunnkyi-ti ama na ta te itse-ti ti kununn yi kanana akwen. 33Tiri unde ti uwe uten wu ri te ti baa, ‘Iken ti ani u nde ti m u nung kubenti-ni ta re. Ni ya kinjo uwae-ni ta te m ti ike, ti ni su wuci ka na ande-ni ti ku cwu rimenn. 34Amaa ni pu inja-ni ti ricwunnkyi ba ti m u nung baa, ani na si ande ti kubenti, ani na si-ni ricwu tam riben be. Ama ame u pu inja-ni kafe na ni ti atang, ama ani u jab wuci uwae uten ike.’ ” 35Ti aba yaen ru wuci uwae ibae-ba, aba sae, aser unde titini ta ti uwae ibae-wu. Ti aba ti itse-ba sae aser yine, ikyenricwu ye ba timambe. 36Itse-ba Yakubu ri te ba baa, “Imi ti ani ku sha ti ni u nde te m? Yusufu ti Simeyon ta-ba cwucwo be, tine ani ku sha ti ni u pu Benjamin kaa bē fa ba. Kayi! Ira ti tu m ne, ame u nde rimang!”

37Ama Roben ri te itse-wu baa, “Itse, wen tag anyisu-m ifaen bane asiti ame a pu umbae-fu kafe ba na-m afu ti atang be. Pu wu na m kujwo, ame u pu wu kafe ba na fu.”

38Yakubu ri baa, “Umbae-m u te ni ru-wu tetso be. Inja-wu cwu pu wu, awu amam ti tsitsi. Ira titibi iki a tu wu uwae ikyin ti ani ku ru ne, ani u nda m ti m u cwu fae.”

Currently Selected:

Kucangtsi 42: kubNT

Highlight

Copy