Kucangtsi 37

Yusufu ti Ameinja-wu

1Yakubu nae ti riben uwog ti itse-wu som atang yi Kanana. 2Ayine si kuci Yakubu ti ishikununn-wu. Yusufu si umbae ti utaen ti site asang rijwe asu itsongfaen. Awu ti ameinja-wu anyisu Biliha, ti Zilipa, awa itse-wu, ku nungkyi asinn itse-ba. Yusufu ba tsag ira titibi ti ameinja-wu ku nde, te itse-wu.

Kurwa Yusufu

3Kiye wune, Yakubu (Isirela) ye ure te Yusufu skeb pu wu meme anyisu-wu ti tsitsi, ikyaen ti, aba mbae Yusufu na wu kiye ti awu kyáen tag pu wu. Awu kob kutupwa titinyang si Yusufu. 4Ti ameinja-wu nung ti itse-ba ye ure te Yusufu skeb pu wu aba meme, aba sa wu kuka, u ri-ba ira ti jimshwur te wu ama be.

5Usir iki Yusufu sunn kurwa, u tsag kurwa yi te ameinja-wu, ama aba sa wu kuka ko kufufa. 6Awu ri te ba baa, “Ni fxen kurwa ti ame sunn: 7Ati ku fwa awum ufang, ama ana-m sunwunn ritsen, ana-ni ama funn pakob wu, u ku riben na wu.”

8Ameinja-wu ri baa, “Afu ku kab ti afu u ta risu-ti a. Ko afu u nae Ukwe risu-ti a.” Ama aba sa wu kuka ko kufufa ikyaen kurwa-wu, ti ira yi ti awu ri.

9Ama Yusufu sunn kyi kurwa, u tsag yi te kyi ameinja-wu baa, “Ni fxen! Ame sunn kyi kurwa baa, usir ti ishaen ti aswer rijwe asu kinjo na ku riben na m.”

10Awu pwen kyi kurwa wu te itse-wu ti ameinja-wu, ama itse-wu fwan wu kubyag u rang wu baa, “Kurwa-fu ne ku tso imi? Ayi si kubenti ti ame, ti iya-fu, ti ameinja-fu, u ba ku riben na fu a.” 11Ameinja-wu sa kitsinn tsi te wu, ama itse-wu sa ira yi tsi utob-wu.

Ameinja Yusufu Sa Wu Jabci na Ande ti Ejib

12Usir iki ti ameinja-wu pu asinn itse-ba ru yi kutur fer ti Shekem, 13Isirela (Yakubu) ri te Yusufu baa, “Ameinja-fu pu asinn kaa kub irum fer Shekem. Ba, ti m tom fu atom ru uwog-ba.” Awu cwe.

14Ama Isirela ri te wu baa, “Ru ka nung ko ameinja-fu ti asinn som nyang pu ba, ti fu ba ri te m.” Ama itse-wu tom wu nwunn kubxab Hebiron, ama awu ru ka sang Shekem. 15Unde iki tu wu ti awu yaen ku kyang uwae kutur atang. Unde wu rang wu baa, “Afu yaen ku sha-fu imi?”

16Awu ri baa, “Ame ku sha rifab ameinja-m. Ame ku jwam fu, ri te m uwog ti aba pu asinn ka ku kub irum atang.”

17Unde wu ri baa, “Aba nwunn pu ba ike. Ame fxen aba ku myae ti a na ku ru yi Dotan.” Ama Yusufu rwae rifab ameinja-wu ka tu ba yi Dotan.

18Ama ti aba nung Yusufu ku ba ti fengo ti rwen, aba myae ti a na u wen wu. 19Aba ri tetso, baa, “Nung, Ukwe kurwa wu ti ku ba ti.” 20Ti wen wu, ti ti sa wu jwunnsi kukwae ike, ti ti ka ri baa, ibye anyi na kub wen pu yi awu, ti ati u nung ira kurwa-wu ayi.

21Ti Roben fxen kumyae yine, awu kwab ti wu u nwangru Yusufu kujwo-ba. Awu ri baa, “Ti wen-ti awu be.” 22“Ti sa wu jwunnsi uwae ukwae wune ike, ikyaen ti, ati ā yaenmbub-ti anying be.” Roben ri ahan ikyaen ti, awu ku sha ti wu u nwangru wu, u pu wu kafe kaa na itse-wu. 23Kiye ti Yusufu ba sang, ameinja-wu ye wu u tunn pu kutupwa-wu titinyang tsoye ijwe-wu. 24Ama aba ye wu jwunnsi uwae kukwae iki ti ambyi ta-yi atang be.

25Ti aba som ku ci wuci, aba txaen pu ayib tso u nung, kumbub ande Ishimayel ti nwunn Gileyadi ba ku ru yi Ejib. Ikyinnsu ti kumunn isim-ba su acin ti umung iken ti ku nung kuyang ti tsotso. 26Yawuda ri baa, “Imi ti ati u tu asiti ati a wen inja-ti, ama u tamkyi yi? 27Ti sa wu jabci na anyisu Ishimayel, ti ayi ā si-yi ati ti u wen wu be, ikyaen ti, awu si inja-ti u si anying-ti.” Ameinja-wu cwe. 28Ama ti ande ti Mediyan ti ku jab iken#37:28 Ande ti kujab bane si rishi Ishimayel ti som uten Midiyan. ba ku ru, aba ka shir Yusufu tsoye uwae kukwae atang, u sa wu jabci na anyisu Ishimayel ba uwae zinariya rikom, ama aba ye pu Yusufu ru yi Ejib.

29Kiye ti Roben kafe ba kukwae atang u sae, Yusufu ta-wu atang cwucwo be, awu ndembeb utob si-yi ti ti ri be. 30Awu kafe ka tu ameinja-wu u rang baa, “Yusufu ta-wu uwae ukwae atang be, ame u nde rimang tine?”

31Aba ye iwen yerwen, u pu atupwa Yusufu kam uwae anying-yi. 32Aba pu kutupwa Yusufu kafe ka na itse-ba, u ri te wu baa, “Ati kya kutupwa wune. Sae ko awu si ana umbae-fu ahoo?”

33Awu sae u nungye, u ri baa, “Awu si kutupwa umbae-m, yiii! Ibye anyi ye umbae-m shir yae pu wu roo.” 34Yakubu ndembeb utob si-yi ti ti ri be, u pu atupwa tibyir si, u som ricwu umbae-wu usir yang-yi. 35Meme anyisu-wu ti arom te ti anda ba nwunn ba ri jim itse-ba utob, amaa awu pyir-wu. Awu ri baa, “Iyee, ayi nyangskeb ti m u cwu putsa umbae-m ru yi kinjag.” Ikyaen yine awu jwub ricwu umbae-wu jwub, jwub, jwub.

36Ti ande ti kujab ba ka sang Ejib, aba ye Yusufu jabci na Potifar, kinjo uwae ande ti uwe na ande ti ku kyir Ukwe ti Ejib.

Currently Selected:

Kucangtsi 37: kubNT

Highlight

Copy