Kucangtsi 31

Ititer-nwunn Yakubu Uwog Laban

1Yakubu fxen ti anyisu Laban ku pwen unju baa, Yakubu na pu tag pu wu meme iken ti itse-ba na site, ama na tu rifunn ko timambe. 2Cwucwo awu nungye baa, Laban na ku nde-wu iken nyinyang te wu pangma ti kucang be.

3Ama Yaweh ri te wu baa, “Kafe ru ti yi uten abitse-fu ti ande-fu. Ame u te fu ta tetso.”

4Ikyaen yine, Yakubu tsa kutsa kunn Rahel ti Leyatu ba tu wu uwae risaen ufang uwog ti awu ku shi asinn atang. 5Awu ri te ba baa, “Ame nungye pu m baa, iken ti itse-ni ku nde te m si-yi pangma ti kucang be, amaa Rimam na itse-m te m ta tetso. 6Ani nung pu ni ti ame nde wande na itse-ni ti kpakang-m meme. 7Amaa, itse-ni ci m timambe. Awu nde kufúm yi kujwofwa-m atsepu rijwe. Amaa, Rimam cwe-wu ti wu na nde m ira beb skeb ayine be. 8Kiye ti awu a ri baa, ‘Asinn ti ta ribae ā si kujwojang-fu.’ Asinn yi ku mbae imbae ti ta ribae ta ribae. Kiye ti awu a ri baa, ‘Itibyir ā si kujwojang-fu.’ Ayi ku mbae itibyir tibyir. 9Ikyaen yine Rimam pu ra asinn itse-ni na pu wu ame.

10“Kiye itso ti tso iwen, ame sunn kurwa ti iwenten tishir ku tso nyáng ayi ti ta ribae ta ribae amam. 11Atom Rimam kunn m ira uwae kurwa baa, ‘Yakubu.’ Ame cwe ira. 12Ama awu ri baa, ‘Sae meme iwen yi tishir ti ku tso ayi ti ta ribae ti titibyir akwen ne. Ame nde yine ikyaen ti, ame nung pu m iken ti Laban ku nde te fu. 13Ame si Rimam ti tso risu-m uwog-fu yi Betel, uwog ti afu sim kutxom u yaen kindob si risu-wu, ama u yer unju te m atang. Tine, nwunn uten wune. Kafe ru ti riben uwog ti a mbae fu atang.’ ”

14Ama Rahel ti Leyatu cwe na wu baa, “Ati site-ti kutunn iki uwae rifunn itse-ti cwucwo be. 15Awu ku nde te ti pangma ati na si rikyen uwog-wu. Awu pu ti jabci u pu aser ti risu-ti ci tag pu wu. 16Meme rifunn ti Rimam pu uwog itse-ti kafe pu yi ana-ti, ti ana anyisu-ti. Ikyaen yine, nde iken ti Rimam ri te fu.”

17Ama Yakubu nwunn u pu anyisu-wu ti awa-wu som tsa ikyinnsu ti kumunn isim. 18Amaa, awu fe meme asinn-wu ti awu tu uwae uten ti Padan-aram ta uwe, u pu rifunn-wu ti tsitsi meme kafe kaa tu itse-wu Ishaku yi uten Kanana.

19Kiye ti Laban ru pu wu ti wu kaa pwén asing iwen tam-wu, Rahel yib ra apxin itse-wu ti ta uwae kusog. 20Yakubu njwug Laban, urae Aram wune, yi fengo ti awu tē-wu awu tē be, u tam ru ru amam. 21Awu ter nwunn ti meme iken ti awu site kujwo-wu ama ka yen uyinn ti Yufiretis u ndabta ku ru yi Gileyadi.

22Uwae usir ti fa ti ita, Laban fxen baa, Yakubu na ter nwunn pu wu. 23Tiri Laban pu ande-wu rwae putsa Yakubu nde usir itsongfaen, m ka ye wu yi rikwèn ti Gileyadi. 24Amaa, Rimam ba uwog Laban uwae kurwa, u fa wu kusen baa, “Ri-fu ira iki, ko ti tinyang ko titibi te Yakubu be.”

25Kiye wune, Yakubu sim afug-wu yi rikwen ti Gileyadi, Laban ti ande-wu ama rwae ye wu u ka sim ana-ba yi rikwèn iki yi Gileyadi atang ama. 26Ama Laban rang Yakubu baa, “Imi ti afu nde te m ne, ti afu kyafa m, u ye pu anyisu-m ti anda ter ru pangma a na ye ba upyi uwog rika?” 27Imi ti nde afu kyafa m, u ter nwunn uwae kitam? A baa, afu na tsag te m te, ame ú tē fu ti ashwu ti shwu ti akyang ti yang, ti atàng ti byinn, ti kufwa. 28Imi ti nde afu nda-fu ame riyae ti m u ye anyisu anyisu-m bur utob, u tē ba be? Ayine si ira ti kuskwab ti afu nde. 29Ame si te kpakang ti ame u nde fu itibi, amaa, utitang ire, Rimam na itse-fu fa m kusen baa, ame na ri-m ira iki titinyang ko titibi na te fu be. 30Tine afu ter nwunn ikyaen ti utob-fu tsi ti fu kafe ru uwae kununn itse-fu. Amaa, imi ti nde afu yib ra apxin-m fa te atang?

31Yakubu ri te Laban baa, “Ikyaen ti, ame ku kyen ikyenricwu baa, iki be afu na u shir pu anyisu-fu kujwo-m ti kpakang ahoo. 32Ama asiti afu a tu unde iki uwae-ti ti apxin-fu, unde wu u tu iticwu te ayib ande-ti bane. Sha, asiti afu a tu iken-fu iki, sa-fu.” Yakubu nung-wu ti ayi na si Rahel ti na yib apxin yi be.

33Tiri Laban sang ka fxae tag afug Yakubu, u ba sang ana Leyatu ti ana apyi-ba ti anda meme, ama awu tu-wu iken iki be. Awu ruye afug Leyatu u ka sang afug na Rahel. 34Kiye wu Rahel sa apxin itse-wu tam mam pu wu uwae iken ti som ti a ku sa tā isim ikyinnsu ti kumunn isim, ama u ka som tsa atang. Laban sha sha u shanum.

35Ama Rahel ri te itse-wu baa, “Ndembeb-fu utob be itse-m, ame u nwunn-m risu iken ti som ne be, ikyaen ti ame ta ise.” Ama Laban sha uwae ufug atang shisha, awu tu-wu apxin-wu atang be.

36Ama Yakubu ndembeb utob u rang Laban baa, “Ame raen fu ira imi? Ame nyatsa icwe titini ti nda fu ti afu rwae putsa m ahan? 37Ti afu sha tag pu fu meme isu-m ne, pu iken yi ti afu tu uwae isu yi ti afu fxae ne, ti si ana-fu ba cwu uwe ike ti ande-fu, ti ande-m ā taen rikwén kutampwa-m te fu.

38“Ame te fu ta tetso ka asang rikom tine. Iwentam ti iwenten-fu wab-yi imbae be, ame ye-m iwentam-fu iki uwae asinn-fu wen kub be. 39Ame pu akom asinn-fu iki ti ibye anyi wen ba na-m afu be, ame pae tag yi fa ti ayi ti yag byibyinn meme ti ajwo-m. Afu ye m, ame pae tag na fu, ayi ti riyib yib yi utitang ko usirtaen. 40Usir fxab m pu usir sunn, rijwen kwar m utitang pu ucwefam, ame ku cwag-m be. 41Ame nde rikaen yine ka asang rikom kununn-fu. Ame nde na fu wande uyeb asang rijwe asu inje ikyaen anyisu-fu ti anda ifaen. Ame nde na kyi fu asang itsongnjo ikyaen asinn-fu, amaa, afu nde kufúm yi kujwofwa-m. 42A baa, Rimam na Ibrahim, Rimam ti itse-m Ishaku ku kyen ikyenricwu-wu, na te m ta-wu tetso be, afu ú tē m ru ajwo ukaen. Amaa Rimam nung rikaen ti ame ngwa, ti wande ti ame nde na fu nee awu fa-fu kusen utitang ire.”

43Tiri Laban ri te Yakubu baa, “Anda ba si anyisu-m, anyisu-ba si anyisu-m, asinn yi si asinn-m. Meme iken ti afu ku sae ne si ana-m. Imi ti ame u nde kyi te anyisu-m ti anda bane ti anyisu-ba ti aba mbae ne? 44Ba ti ti yer unju tetso kutampwa-m te fu tine.”

45Ikyaen yine, Yakubu sa kutxom sim ikyaen ititangsom. 46Ama Yakubu ri te ande-wu baa, a na byir atxom. Ama aba byir atxom tsi kurr pangma kumunn. Ama aba som u ci u ngwa tetso uwog kumunn atang. 47Laban kunn uwog wu ti unju Aram baa, Jegar-Sahaduta. Amaa Yakubu kunn ana-wu ti unju Mbaibrane baa, Galeyedi.

48Laban ri baa, “Atxom yi ti tsi kurr ne si unju ti yer-m te fu yaka ne.” Nee iken ti nde a kunn uwog wu baa, Galeyedi. 49Rinyi uwog wu iki si Mizipa, ikyaen ti awu ri baa, “Yaweh ā sae kutampwa-m te fu kiye ti ati a ta rurwen tetso. 50Asiti afu a nde anyisu-m iyib ko afu a mbe anda tishe fa ba, ko ti unde iki ta te-wu ati be, tangsom baa, Rimam na ta kutampwa-m te fu.”

51Laban ri te kyi Yakubu baa, “Sae atxom yi ti tsi kurr ne, ti kutxom na ititangsom wu ti ame sa sim kutampwa-m te fu ne. 52Atxom yi ti tsi kurr ti kutxom na ititangsom ne, ame pu yi tsi ti yi u sae kutampwa-m te fu baa, ame na u yafe-m ayi ka uwog-fu be, afu ama na u yafe-fu ayi ba uwog-m ikyaen ira titibi be. 53Rimam na Ibrahim ti Rimam na Nahor ti Rimam na itse-ba ā pwen rikwén kutampwa-ti.”

Yakubu ama ben uben yi Rimam ti itse-wu Ishaku ku kyen ikyenricwu-wu. 54Yakubu twen ikentitwen utaen rikwen atang, ama u kunn ande-wu ba ti a na ba ci ukwab. Isim ti aba ci tag wuci yi, aba som ti utaen rikwen atang pu ucwefam.

55Ucwe fam kiskinn, Laban ye anyisu na anyisu-wu bur utob ti anyisu-wu ti anda ba ti baen Yakubu, ama u wae na ba ira. Isim ayine, awu nwunn u kafe ru-wu ti kununn-wu.

Currently Selected:

Kucangtsi 31: kubNT

Highlight

Copy