aMatiyu 8
8
aYeso sak akparo̱ng akak tá te atser
(aMar 1.40-45; aLuk 5.12-16)
1Nizen aYeso tá tiik natoon kawhanang ame, ánerawe whe̱re̱ tú ku kuus. 2Ayong aner akak a tá be rikparo̱ng be̱ nufu nong a tá tigbok akuur nasho̱o̱n aYeso ame. Ne a fe̱ be wu ye, “Atekasa, ke wan shim wan ta kyem i ni sak ta te atser.” #8.2: Ni sak ta te atser: Ka, “ni sak ta te zhe̱l.” Igo̱o̱n áner aYahuda tonong ye aner a ta be rikparo̱ng se zhe̱l baꞌ.
3Ayong aYeso nabak kubo̱k nong a tá ra aner ame, ne a fe̱ be wu ye, “Mi shim, te atser!” Nizen izining rikparo̱ng'e wor ri tú won. 4Ayong aYeso fe̱ be wu ye, “Di, sang tú tak akak baꞌ. Amma tseng se tonong rice wan nufe atsi ne i nye asidaka kuri aya aMusa tá fe̱, nong á tà ren ye wan n te atser.”
Kuno̱o̱k katsak ako̱k kasho̱o̱n aSozha akak
(aLuk 7.1-10)
5Nizen aYeso tá no̱ kaye̱e̱r aKapanum, iyong ako̱k kasho̱o̱n aSozha aRom akak be̱ nufu nong a tú ku nye izong ye, 6“Atekasa, asam mi se nameneng kari, atak wu we̱, a se risam dide̱ng.”
7aYeso fe̱ be wu ye, “Mi tà tseng nong tu ku sak a tà te atser.”
8Ayong ako̱k kasho̱o̱n ame fe̱ ye, “Mi kyem afe wan tana be nasa mi baꞌ, fe̱re̱ng tsek asam mi tà te atser. 9Kamok mi se nubo̱k akak gip, ne ásozha akak se nubo̱k'i gip. Ke mi fe̱ be akak ye, ‘Tseng,’ ne á tseng ne mi fe̱ be akak ye, ‘Be̱,’ ne a be̱. Mi fe̱ be asam mi ye, ‘Nye iyu,’ ne a nye.”
10aYeso tá fa fok anong ne a te zhing, iyong a fe̱ be áfe a tú ku kuus ye, “Katsak'e, ne mi ta ka tak yin, mi kun di aner akak kaye̱e̱r Isarela afe a ta be kuno̱o̱k katsak kyo̱ndi aner na baꞌ. 11Mi fe̱ be yin ye, ánerawe dide̱ng ta nes nabas kunom tu ku wuruk ne nabas kunom tu ku kpas nong a ta be̱ ya naya riye̱ rikan be Ibrahim ne Ishaku ne aYakub kaye̱e̱r rigwo̱m kaza. 12Amma á tà barak áya a ta tas ke ba ne a nye áfe Adakunom, amma á ra gaar kaye̱e̱r amaan awhi, naro̱ á tana tos ne á ya anyi.”
13Ayong aYeso fe̱ be ako̱k kasho̱o̱n aSozha aRom ame ye, “Tseng kari! A tà ka nye'me kyo̱ndi wan ti no̱o̱k katsak.” Asam wu ame wor a te atser nizen iyong.
aYeso sak aman aBitrus tá te atser
(aMar 1.29-31; aLuk 4.38-39)
14Nizen aYeso tá no̱ nasa aBitrus, a di aman aBitrus nameneng be kuro̱m kuzhosh. 15Ayong aYeso ra kubo̱k'e ne kuro̱m kuzhosh'e ku won, yong a dorok a ta nyes aYeso.
aYeso sak ánerawe dide̱ng tá te atser
(aMar 1.32-34; aLuk 4.40-41)
16Kawheshirim tá fa nye, a be̱s be ánerawe whe̱re̱ áya amaan nabik tá min no̱ niba nufe aYeso, ne aYeso turung nabik'e ne a sak áfe iro̱k cice̱r á ta te atser. 17A nye anong, nong a ta shining ike̱ng iya Ishaya aner kuzarap tá zibir ye,
“A sok iro̱k yir cice̱r
ne a ni sak yir ta sor yir dar kuro̱k.”
Áner aya a ta fe̱ ye wu ta kuus aYeso
(aLuk 9.57-62)
18Nizen aYeso tá di ánerawe whe̱re̱ tú ku gorok, a fe̱ be alimazhiri wu ye á ra tar nunyi agbang kudung'e. 19Ayong aner kubo̱so̱p itsi akak be̱ nufu a ta fe̱ ye, “Aner Kubo̱so̱p, mi ta ka kuus koakye ne wan ta tseng.”
20aYeso fe̱ be wu ye, “Áromong be ibong á tin no̱o̱s ne nanon be are̱, amma Igon Anerawe be karo̱ a tanin sak rice wu baꞌ.”
21Azining kaye̱e̱r alimazhiri wu fe̱ be wu ye, “Atekasa, won mi ta tseng ta se ne̱r ada mi nizham.”
22Amma aYeso fe̱ be wu ye, “Ni kuus, won ikom ta ne̱se̱k ikom.”
aYeso tigba kuwun
(aMar 4.35-41; aLuk 8.22-25)
23aYeso tá fa no̱ kaye̱e̱r kukpara ashi kukak iyong alimazhiri wu tú kuus. 24Kuwun kumaan'e wor ku dorok natoon agbang kudung ma ashi tang agung ma a no̱o̱s kaye̱e̱r kukpara'me, amma aYeso se be ida. 25Iyong álimazhiri wu tseng á tu ku shiming. Ne á fe̱ be wu ye, “Atekasa, yir sen wei yir kaye̱e̱r ashi, ni shesh yir.”
26Ayong aYeso fe̱ be ba ye, “Yin áfe kuno̱o̱k katsak yin ta gop baꞌ, akye̱ sak yin be yin inyim anong e̱?” Ayong a dorok a ta tigba kuwun be agung ashi'me ne karo̱ wor ka te win.
27Ánerawe te zhing ne á fe̱ ye, “Akye̱ kuri aner na, kuwun be ashi tu ku fok e̱?”
aYeso sak áner á be ítseng tá te atser
(aMar 5.1-20; aLuk 8.26-39)
28Nizen iya aYeso tá tar agbang kudung ame a ta no̱ nunyi iben aGarasi, aner afa afe a ta be amaan nabik wuruk naro̱ are̱k nong á ta nyim be wu. Án te ike̱ng inyim, akak kyem a gor iren iyong baꞌ. 29Á ta kukun nizen izining ye, “Igon Adakunom, wan tse̱r akye̱ be yir e̱? Wan m be̱ tin no̱o̱k yir risam nizham izen'e ta ra nye a?”
30Kukpara álade sen ya naya azong bubarak be ba. 31Amaan nabik ame nye aYeso kusuk ye, “Ke wan tin tun yir, ne i ni sak yir kaye̱e̱r kukpara álade kya.”
32Ayong aYeso fe̱ be ba ye, “Tseng yin!” Ayong amaan nabik ame wuruk nong á ta be kaye̱e̱r alade ame. Kukpara alade'me cice̱r teng nong á ta se kpas kaye̱e̱r kudung nong á kus. 33Áya á ta sen ni sak riye̱ na alade ame teng, á tá be kaye̱e̱r kuwo̱p nong á ta se taas ike̱ng iya a tá nye, cice̱r be ike̱ng i ta nye be aner a tá be amaan nabik ame. 34Iyong áner kuwo̱p'e cice̱r wuruk nong á ta nyim be aYeso. Nizen á tu ku di a nye aYeso akusuk ye a ra won iben ba.
Currently Selected:
aMatiyu 8: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc