aLuka 14

aYeso sak aner akak te atser

1Katuk Asabar akak, nizen aYeso tá tseng nong a tà se yas numa ako̱k kasho̱o̱n aner aFarisi akak, ánerawe tú ye̱re̱k kyur kyur. 2Aner akak tuse azong, atak be ibo̱k tá mos 3aYeso rip áner aFarisi'me be áfe a tá ren Itsi dide̱ng ye, “I nye Itsi aner ta sak akak ta te atser katuk Asabar a?” 4Iyong á te gbik. Ne aYeso yiir aner ame a tú ku sak a tá te atser ne a ku te niren.

5aYeso tú rip ba ye, “Ke igon akak yin ka amung akak yin kpa kaye̱e̱r ribong ri ta be ashi katuk Asabar, a ta tun zizirik aꞌa?” 6Ka á ba be rife̱ á tanin sak baꞌ.

Mees rice

7Nizen aYeso tá di ákak kaye̱e̱r átsen tá kasa naro̱ kusosok natek naro̱ kuya naya'me, ne a ku tak ba kumaas na ye, 8“Ke aner akak ta tak riye̱ rikan kuwe̱ne̱ng, tu se sonong naro̱ kayiik'e baꞌ, kamok kashim an tak aner akak a tá ka nar yiik gip. 9Ke anong baꞌ, aner a tá ka tak yin riye̱ rikan'e tà be̱ fe̱ be wan ye, ‘Dorok ta no̱o̱k aner akak karo̱ kusonong wan.’ Ne wan ma ku bun naro̱ kusonong kahiir'e be isum. 10Ke a tá tak riye̱ rikan, se sonong naro̱ kahiir'e, nong ke aner a tá ka tak riye̱ rikan'e be̱, a tà fe̱ be wan ye, ‘Are̱, be̱ ta se sonong naro̱ kusonong aze, ne a ka tiyiik nasho̱o̱n ribir átsen áfudang wan.’ 11Kamok koangan ne a mees rice wu a tú ku tiyiik, aner aya ne a sok rice naza a tà te be wu fe̱re̱.”

12Ne aYeso fe̱ be aner a tú ku yis kari wu ame ye, “Ke wan tà yis ánerawe nong á tà be̱ yas, tu tak áferime̱ wan ka áronyining wan ka afe iri wan ka áfe a ta se bubarak be wan á ta nye arum baꞌ. Ke wan nye anong, ba tà ma ka yis gip, ne á ka karang. 13Ke wan tà yis ánerawe nong á tá be̱ yas, yis áfe rizor be ákun ne áfe a ta yising ne ákpato̱o̱n. 14Wan tà se̱ ishorong, ba ta kyem á ka karang baꞌ gye̱rtatan, a tà ka karang nizen iya a tana dorok azhe̱l'e áya a ta n kus.”

Kumaas natoon agbang riye̱ rikan

(aMat 21.1-10)

15Aner akak kaye̱e̱r áfe a ta sen yas mak be aYeso tá fa fok anong, ne a fe̱ be aYeso ye, “Aner a ta be riye̱ rikan nye áya a tana yas nizen riye̱ rikan kaye̱e̱r rigwo̱m Adakunom.”

16Ne aYeso fe̱ be wu ye, “Aner akak se be kanye̱k agbang riye̱ rikan, ayong a taas ánerawe whe̱r. 17Izen riye̱ rikan'e tá fa nye ne a tom asam wu nong a ta se yis áner áfe wu tá ku taas ba ame ye, ‘Be̱ yin, an gang koakye!’

18“Amma cice̱r be̱s be naban ike̱re̱ ikak. Afe ime̱se̱ng'e fe̱ ye, ‘Kyo̱o̱rna ne mi shan karo̱. Kusuk, won ma mi se di karo̱'me dim nizham.’

19“Ne akak bun a fe̱ ye, ‘Mi n shan inyak ikap kuso̱k. Kusuk, ni won ta se bo̱mo̱ng nizham.’

20“Ne akak bun a fe̱ ye, ‘Kaye̱e̱r inom na ne mi ra nye kuwe̱ne̱ng, kamok anong mi ta kyem i se̱ ta be̱ baꞌ.’

21“Asam'me tú bun a tá be̱ tak atekasa wu kuto̱'me. Riye̱ atekasa'me beseng, yong a fe̱ be asam'me ye, ‘Tseng, ni nanu íren ne atsirik agbang kuwo̱p gbashak nong ta be̱ be áfe rizor be ákun ne ákpato̱o̱n ne áfe a ta yising.’

22“Ayong asam'me fe̱ ye, ‘Atekasa, mi n nye ike̱ng wan tá fe̱ ye i ra nye, gip be anong karo̱ ru kuse.’

23“Ne atekasa'me fe̱ be asam wu ye, ‘Tseng ni nanu íren nong tu ku yis ba ye á ra be̱ nong kasa mi tà shining. 24Mi ta ka tak yin, ko aner azining kaye̱e̱r áner aya mi tá tsang i ka yis ba riye̱ rikan'e tà re̱e̱r naya mi tan nye baꞌ.’ ”

Risam kute afikuus

(aMat 10.37-38)

25Katuk kakak rigwo̱m ánerawe se be kutseng be aYeso. Ayong a kirik nong a tá fe̱ be ba ye, 26“Ke aner aya a shim a tin kuus ma a rawu atek be anyining ne abining be inoon wu, ne áronyining be ángasnyining wu, be rice wu gip. Sang ke anong baꞌ, a tà kyem a te alimazhiri mi baꞌ. 27Aner aya ne a sok kukon ku kutigak mo nong a tin kuus baꞌ, a tà kyem a te alimazhiri mi baꞌ.

28“Ke akak yin shim a ta no̱k rino̱k, aser a tà sonong nizham nong a ta di ike̱ng iya wu tanin fe̱r natoon'e ne a bun a di ka wu be itso̱m i tana kyem kugang rino̱k'e aꞌa? 29Kamok ke a barak ribor'e a ra kyem a gang rino̱k'e baꞌ, áfe a ta gosok ne á ye̱re̱k tu ku mas. 30Ne á fe̱ ye, ‘Aner na san rino̱k a kyem a gang baꞌ.’

31“Ke agwo̱m akak tse̱r a ta se kpa kuwo̱p kukak be itsom, aser a tà sonong nizham nong a tà to̱ ka áner izungu kuso̱k wu ta be ta kyem á nyeseng, nong a ta ko̱n be aya afe a ta be ánerawe izungu iso̱k ifa aꞌa? 32Ke a ta kyem'me baꞌ, aser sang a tà tom átom ákak kum ne aner'e rusek gugo̱k, nong a tà tse̱r iren a tana sor caang aꞌa? 33Anong ne yin gip, koangan ne ke a won koakye wu ta be nong a tin kuus baꞌ, a tà kyem a te alimazhiri mi baꞌ.

Ito̱k ta

(aMat 5.13; aMar 9.50)

34“Ito̱k nye ike̱ng itek, amma ke kurereng ito̱k'e gang, a ta nye ne ane̱ nong i ta bun i rereng e̱? 35I ta ba se gye̱r kamok riko̱ ka narik baꞌ. A tà nyosong.

“Aner a ta be ato kufok a ra fok.”

Currently Selected:

aLuka 14: izrNT

Highlight

Copy