aLuka 13

Shishing yin kuse yin ke anong baꞌ tà kus yin

1Nizen iyong áner ákak tuse azong áfe a tá tak aYeso itak natoon áner aGalili áya aBilatus tú ku fe̱s ba nizen á tá sen nye asidaka. 2Ayong aYeso fe̱ be ba ye, “Yin di yin ye áner aGalili ayong ne á nye rine̱n dide̱ng ne á nar ribir áner aGalili'me kamok á tá so̱ risam anong a? 3Won ta ka tak yin, i se anong baꞌ. Ke yin shishing yin kuse yin baꞌ, yin gip tà kus yin cei kyo̱ndi ba. 4Ka ánerawe kuso̱k be ikara á tá kus nizen rino̱k tin kpa natoon ba na aSiluwam, yin di yin ye rine̱n ba nar rife ribir ánerawe á tá se na aUshalima cei a? 5Mi ta ka tak yin i se nong baꞌ. Ke yin shishing yin kuse yin baꞌ, yin gip tà kus yin cice̱r yin.”

Kumaas natoon ritin atafo ri ta tes baꞌ

6Ne aYeso ku tak ba kumaas na ye, “Aner akak be ritin atafo riko̱ wu. A ta fa tseng ritin atafo'me nong a tá bo̱ kutes'e, a ra se̱ baꞌ. 7Ayong a fe̱ be aner a tin sak riye̱ riko̱'me ye, ‘Riye̱ rife̱ ataar na ne mi be̱s ne i tse̱r kutes atafo na, mi se̱ baꞌ. Te̱me̱ng ritin'e. Akye̱ sak ri ta te̱ne̱ng karo̱ ana tsek e̱?’

8“Ayong aner a tin sak riye̱ riko̱'me fe̱ ye, ‘Atekasa, won riman tin barang riye̱ rizining gbak. Mi tin tusung iben nong tin te narik. 9Ke rites riye̱ ri ta saase to̱, ke ri tes baꞌ ne mi te̱me̱ng.’ ”

Abining akak a tá nye akun'e te atser katuk Asabar

10Katuk Asabar akak, aYeso ku sen bo̱so̱p ánerawe'me nutu aduwa áner aYahuda kukak. 11Abining akak tuse azong amaan kabik ta sak a te akun'e aye̱ kuso̱k be ikara. A tiguk a kyem a naka nabak nigaan'e baꞌ. 12Nizen aYeso tú ku di, a tú yis nong a tá fe̱ be wu ye, “Anyiningkasa, a ma ka sun risam wan.” 13aYeso ti sak kubo̱k ni wu, ne a wor a naka nabak gye̱r. Abining'e kerek Adakunom.

14Riye̱ ako̱k kasho̱o̱n kutu aduwa'me beseng, kamok aYeso tá sak akak te atser katuk Asabar. Ayong a fe̱ be ánerawe'me ye, “Inom kuse igataar kamok itomong. Kamok anong yin ta kyem i be̱s yin nong a tà ka sak yin tà te yin atser, sang katuk Asabar baꞌ.”

15Iyong Agwo̱m Ágwo̱m fe̱ ye, “Yin, ákardak áner! Koangan yin karak kaming wu katuk Asabar nong a ta tseng be azhaki ka inyak wu a tin no̱o̱k ashi aꞌa? 16To̱, gye̱r ke a sak abining na a ta nye abafe kasa Ibrahim, afe Ishetan tá roos aye̱ kuso̱k be ikara, ta te atser katuk Asabar nong a tà kam be risam aꞌa?”

17A tá fa fe̱ anong, ne ámudo̱n wu cei fok isum, ánerawe nye riye̱ rikan be itomong azhing wu tá nye'ong ingya.

Kumaas natoon ica naya a ta yis ye amusta

(aMat 13.31-32; aMar 4.30-32)

18aYeso fe̱ ye, “Rigwo̱m Adakunom se kyo̱ndi akye̱ e̱? Mi tin maas be akye̱ e̱? 19Ri se kyo̱ndi ica naya a ta yis ye amusta, riya anerawe tá sok nong a tá tuus riko̱ wu, i ta rasak ne i te kakon, ma nanon tin no̱k are̱ niwhang'e.”

Kumaas be ica ayisti

(aMat 13.33)

20Ne a bun a rip ye, “Be akye̱ ne mi tin maas rigwo̱m Adakunom e̱? 21Ri se kyo̱ndi ayisti aner abining tá sok a tin kare̱ be nakan alikama whe̱re̱, ma nakan'e dorok cei.”

Kanukutu ka ta se whe̱

(aMat 7.13-14, 21-23)

22Ayong aYeso tsang a gosok ni iwo̱p igbang'e be izhizhe̱k'e, ne a bo̱so̱p ánerawe'me, ne a be na aUshalima. 23Aner akak tú rip ye, “Atekasa, yong ánerawe cie̱k tsek ne a tà se̱ kashesh a?”

Ne aYeso fe̱ be ba ye, 24“Nye yin koakye yin tana kyem i nye yin nong tà no̱ yin nanu kutu ka ta se whe̱. Won tà ka tak yin, ánerawe whe̱re̱ ta shim kuno̱, á tà ra kyem á no̱ baꞌ. 25Kum ke atekasa'me dorok a ta whe̱e̱n kanukutu'me, yin ta nyeseng yin nufang ne i ca yin kanukutu'me ne i nye yin akusuk ye, ‘Kusuk atekasa, ni karak yir kanukutu.’

“A tá fe̱ ye, ‘Mi ta ren yin, ka karo̱ yin tu ku ne yin baꞌ.’

26“Yin tà fe̱ yin ye, ‘Yir ya ne i so̱ yir be wan, ne wan bo̱so̱p ánerawe'me ni iwo̱p yir.’

27“Amma a tà bun a fe̱ ye, ‘Mi ta ren yin ka karo̱ yin tu ku ne yin baꞌ. Dorok yin nasho̱o̱n'i, yin áfe amaan kunye.’

28“Yin tà di yin Ibrahim be Ishaku ne aYakub be áner kuzarap Adakunom cei kaye̱e̱r rigwo̱m Adakunom, amma ka tà kyem i no̱ yin baꞌ. Azong ne á tana tos, ne á ya anyi. 29Ánerawe ta nes nikes kazatse inaas á tà be̱s ne á sosok naro̱ a tana kunye riye̱ rikan rigwo̱m Adakunom. 30Kamok anong, áya a ta nye áfe igang'e á tà te áfe ime̱se̱ng'e ne áfe ime̱se̱ng'e tu bun áfe igang'e.”

aYeso fok kuro̱ riye̱ áner aUshalima

(aMat 23.37-39)

31Nizen iyong áner aFarisi ákak be̱ nufe aYeso nong á ta fe̱ be wu ye, “Dorok ta won karo̱ na ta be naro̱ kakak, aHiridus tse̱r a tà ka fe̱r.”

32Ayong aYeso fe̱ be ba ye, “Tseng yin, ta se tak yin azen azen'ong ye mi tà turung ítseng ne i sak ánerawe ta te atser katuur be natson, kaniya mi tà gang ike̱ng mi tan sak nasho̱o̱n'i. 33Ko be ane̱, mi tà ya kasho̱o̱n be kutseng katuur be natson ne kaniya. Katsak'e, aner kuzarap akak tà ku ake̱ ayi ze̱e̱r be na aUshalima baꞌ.”

34“Kaꞌ, yin áner aUshalima, yin áner aUshalima, yin áfe i tá fe̱s yin áner kuzarap ne i barak yin áya a ta ka toos ba nufe yin. Yin fa di yin mi ta shim ta ka tusung yin naro̱ kazining kyo̱ndi anyining inyon ta tusung inoon wu na afabak wu baꞌ, amma yin shim yin baꞌ. 35Di yin, a ma ka won yin kasa yin kakoor dar aner akak. Kamok anong, katsak'e ne mi ta ka tak yin, yin ta ba ni di yin baꞌ, ma katuk kaya ne yin fe̱ yin ye, ‘Aner riye̱ rikan ne a nye aner aya a tá be̱ kaye̱e̱r riyerek Agwo̱m Ágwo̱m.’ ”

Currently Selected:

aLuka 13: izrNT

Highlight

Copy