aLuka 12

aYeso kpam álimazhiri wu

(aMat 10.26-27)

1Nizen ánerawe whe̱re̱ ta nyim ma á naka shesh, aYeso fe̱ be álimazhiri wu ni ime̱se̱ng'e ye, “Nye yin tatan be ayisti #12.1: Ayisti: Ikpi ike̱ng ikak a tin ten a abiredi nong a ta dorok. áner aFarisi. aYisti'me nye akardak kuse ba. 2Ike̱ng ikak kuse a tan whe̱e̱n a tana won dar a karak baꞌ, ka ike̱ng ikak kuse nune̱re̱ng a tana won dar a te̱s baꞌ. 3Koakye ne yin tá fe̱ yin nawhi, a tá fok kanang, ne koakye ne yin tá fe̱ yin cucuk nato ka kaye̱e̱r atu kuko̱s a tà ngarak nagarang nong a ta fe̱ kanang.

Aner aya a tana fok inyim wu

(aMat 10.28-31)

4“Áro̱, won tà ka tak yin tu fok yin inyim aya a tana fe̱r kuro̱m baꞌ, kamok nama anong a tá baꞌ, kyem a nye ike̱ng ikak baba baꞌ. 5Won tá ka tak yin aner aya yin tana fok yin inyim wu. Fok yin inyim Adakunom, aya nama a tá ka fe̱r ne a bun a be iren a tana ka te yin kaye̱e̱r kuro̱ng. Katsak'e ne mi tà tak yin, fok yin inyim wu. 6A re̱e̱s ábo̱p atoon ni itso̱m cie̱k aꞌa? Gip be anong Adakunom tiburum be akak ba baꞌ. 7An fa nakuyo̱ng rice yin cei. Sang tu fok yin inyim baꞌ, yin se yin yiik ne i nar yin ábo̱p'ong.

Aner aya a ta fok isum aYeso nasho̱o̱n ánerawe

(aMat 10.32-33; 12.19-20)

8“Won tà ka tak yin, aner aya ne a fe̱ nasho̱o̱n ánerawe ye wu ti ren, Igon Anerawe tà fe̱ ye wu tu ren gip nasho̱o̱n ámaleka Adakunom. 9Amma aner aya ne a fe̱ nasho̱o̱n ánerawe ye wu ti ren baꞌ, a tà fe̱ anong be wu nasho̱o̱n ámaleka Adakunom gip. 10Koangan ne a fe̱ imaan'e natoon Igon Anerawe a tu ku re̱ng'e, amma aner aya ne a zhe̱e̱sh Kabik Kazhe̱l'e a tu ku re̱ng'e baꞌ.

11“Izen iya ne a tseng be yin nasho̱o̱n áko̱k kasho̱o̱n atu aduwa áner aYahuda be nufe ágwo̱m, tu daam yin be ike̱ng yin tana fe̱ yin natoon rice yin baꞌ, 12kamok Kabik Kazhe̱l'e tà ka tak yin ike̱ng iya yin tana fe̱ yin nizen iyong.”

Kumaas natoon arum akak a tá be ritse̱ng baꞌ

13Aner akak kaye̱e̱r rigwo̱m ánerawe ame fe̱ be aYeso ye, “Aner Kubo̱so̱p, fe̱ be aronyining'i ye a ra kabak kutse ada yir tin won yir'e.”

14Ayong aYeso fe̱ be wu ye, “Are̱, angan ti sak aner amok kaye̱e̱r yin ka afe i ka kabak yin kutse yin e̱?” 15Ne aYeso fe̱ be ba ye, “Sak yin riye̱, ne i nye yin tatan be koakye kuri amaan kuye̱re̱k, kamok kube ike̱ng whe̱r ne kunye kusor kutek baꞌ.”

16Ne a ku tak ba kumaas na ye, “Arum akak be riko̱ ri ta te naya dide̱ng. 17Ayong a fe̱ riye̱ wu ye, ‘Akye̱ ne mi tà nye e̱? Sang mi ta be karo̱ tanin korok naya mi baꞌ e̱?’

18“Ayong a fe̱ ye, ‘Ike̱ng mi tana nye na. Mi tà yirik íngme̱ mi, nong ta no̱k iya i ta nye igbang'e, nong ase̱ mi tin korok naya mi be ribir ike̱re̱ cei. 19Ne mi ma fe̱ riye̱ mi ye, “Mi be ike̱re̱ itek nusak ife aye̱ whe̱re̱. Sor ne̱k, ya ne i so̱, ne inye riye̱ rikan.” ’

20“Amma Adakunom fe̱ be wu ye, ‘Wan kufunam kukak! Natuk katuur, a tà sok kutser wan, iyong angan tá kok ike̱re̱ wan ta naka tusung'e na e̱?’

21“Anong ne i tà se be koangan afe a tá tusung rice wu ike̱re̱, Adakunom tú di kyo̱ndi arum baꞌ.”

Sang tu daam yin baꞌ

(aMat 6.25-34)

22aYeso fe̱ be álimazhiri wu ye, “Kamok anong mi fe̱ be yin ye, tu daam yin be kusor yin baꞌ, be ike̱ng iya yin tana ya yin ka ike̱ng iya yin tana so̱ yin baꞌ, ka ike̱ng iya yin tana te yin baꞌ. 23Kutser nar naya ne kuro̱m nar ares. 24Ye̱re̱k yin nanon ta di yin. Ba tuus ka á tse̱k baꞌ. Ba be karo̱ i saas naya ka ingme̱ baꞌ, gip be anong Adakunom tu nyesek ba naya. Shita yin i ta nar yin nanon yiik. 25Angan kaye̱e̱r yin kamok kudaam wu ta kyem a tin barang kaban izen cie̱k nutser wu e̱? 26Ke yin ta kyem i nye yin ike̱ng ihiir'e kyo̱ndi iyong baꞌ, akye̱ sak yin tin daam yin be ribir'e e̱?”

27“Ye̱re̱k yin kusas afure ta di yin, ba nye itomong ka á tos ares baꞌ Gip be anong, won tá ka tak yin ko aSolomon a tá nye agwo̱m be ares wu atek kususas'e gip, a te ares kususas'e kyo̱ndi azining kaye̱e̱r ba baꞌ. 28Ke Adakunom ta kyem a te agam iwe̱ng ares anong, aya a ta di katuur, natson ne a te nuro̱ng, shita yin'a. Yin áfe kuno̱o̱k katsak yin ta raar. 29Tin te yin riye̱ natoon ike̱ng iya yin tana ya yin ka tana so̱ yin baꞌ, tu daam yin baꞌ. 30Kamok áfurin kuus ike̱ng kuri iyong cice̱r gip, Ada yin ren ye yin tse̱r yin ike̱re̱'ong. 31Kamok anong, tse̱r yin rigwo̱m Adakunom, ike̱re̱ iyong a tà ka no̱o̱k yin gip.”

Tusung kurum wan naza

(aMat 6.19-21)

32“Sang tu fok yin inyim baꞌ, yin ahiir kaming, kamok Ada yin be riye̱ rikan nong yin tà nye yin rigwo̱m mak be wu. 33Re̱e̱s yin ike̱re̱ yin nong ta no̱o̱k yin áfe rizor itso̱m'e, be kunye anong ne yin ta sak yin kurum naro̱ afe sang ku tana beseng baꞌ, kaye̱e̱r kaza, naro̱ kaya ákpatang tanin be̱ bubarak ka itse̱ tana ya baꞌ. 34Kamok karo̱ kaya ne kurum wan tu kuse, azong ne riye̱ wan tà se gip.

Sor yin be kanye̱k

35“Sor yin be kanye̱k ne i won yin apitila yin be iro̱ng, 36kyo̱ndi ásam áya a tá nye itomong nasa akak, á tá sen tor kube̱ atekasa ba. Nizen atekasa'me tá be naro̱ riye̱ rikan kuwe̱ne̱ng nong ke a be̱ a rus kanukutu, ne a wor a ku karak'e. 37I ta sor ike̱ng riye̱ rikan ke atekasa'me be̱ ku se̱ ba an mereng ida baꞌ. Katsak'e ne mi tá ka tak yin, a tu ku sak ba á ta sosok ne a tun ares wu nong a tu ku no̱o̱k ba naya. 38I ta sor ike̱ng riye̱ rikan be ásam áya a tá nye kanye̱k ko atekasa'me be̱ natite katuk ka nadiding bop, ne a ku se̱ ba be kanye̱k. 39Amma yin ren yin ye, ke a fa nye ye atekasa ren izen iya akpatang tana be̱, ke a tor kasa wu sang ke a won nong akpatang ta nye itsang baꞌ. 40Kamok anong yin gip, sor yin be kanye̱k dim, kamok sang yin ren yin izen iya Igon Anerawe'me tana be̱ baꞌ.”

Asam a ta nye katsak

(aMat 24.45-51)

41aBitrus rip aYeso ye, “Atekasa, kumaas na se natoon yir a? Ka kamok koangan e̱?”

42aYeso fe̱ be wu ye, “Angan ne a nye asam afe a ta be katsak ne a be kukyem e̱? Aya atekasa wu tú ku won ribir ásam nubo̱k, ne a ku nyesek ba naya nizen gye̱r. 43I tà sor ike̱ng riye̱ rikan ke asam ayong atekasa wu be̱ a tu ku se̱ a sen nye ike̱ng iya a tá fe̱ be wu ye a ra nye. 44Katsak'e ne mi ta ka tak yin, a tu ku won ike̱re̱ wu cei nubo̱k nong a tu ku sak mo riye̱. 45Ke a fa nye ye asam'me to̱ ríye̱ wu ye, ‘Atekasa mi tà gum be̱ baꞌ,’ ne a kpaan kutsosok ribir ásam'me, ányining be atek, ne a ya ne a so̱ ma rice zim. 46Atekasa'me tà be̱ nizen iya afe asam'me ta ren ye a ta be̱ baꞌ, nizen iya wu ta ren baꞌ. Atekasa'me tu ku nye amaan atsor ne a ku barak naro̱ áfurin.”

47“Asam aya a tá ren ike̱ng atekasa wu tá shim, a ra nye kanye̱k, ka a ra nye ike̱ng atekasa wu'me ta shim baꞌ, a tú ku whereng dide̱ng. 48Afe a tá ren ike̱ng atekasa wu'me tá shim baꞌ, ke a nye ike̱ng i ta tas ke a ku whereng, a tu ku whereng cie̱k tsek. Kamok koangan ne a tú ku no̱o̱k whe̱r, a ma shim ke a se̱ whe̱r nufu. Aner aya a tú ku won'e whe̱r, a shim ke a bun a se̱ whe̱re̱ nubo̱k wu.

aYeso ne a sak ánerawe ta naka kabak

(aMat 10.34-36)

49“Mi be̱ tin te kuro̱ng nazatse, ye kushim fa nye kuse̱ ke ku kun san kuya. 50aBatisma kuse a tanin nye'me, a kon ni te ke a min i nye'me. 51Yin di yin ye mi be̱ be kusor caang nazatse na a? Wayo, mi be̱ nong ta sak ánerawe ta naka kabak. 52Kum kyo̱o̱rna, áner atoon nasa kazining ta naka kabak. Áner ataar ta raba áner afa, ne áner afa raba áner taar. 53Atek igon tà rawu igon wu, ne igon rawu atek, anyining igon tà rawu angas ne angas'e rawu anyining. Anyining ako̱p tà rawu akugon, akugon'e tà rawu anyining ako̱p.”

Kuren izen

(aMat 16.2-3)

54aYeso fe̱ be ribir ánerawe'me ye, “Ke yin di yin kune̱n wuruk nabas rikpa kunom, ne yin wor i fe̱ yin ye, ‘Iza ta kpa katuur,’ ne iza'me kpa. 55Ke kuwun tisik, ne yin fe̱ yin ye, ‘Karo̱ ta zhoosh,’ ne ka zhoosh. 56Yin ákardak áner! Yin ren i fe̱ yin natoon kaza be kaben. Akye̱ sak yin kyem i fe̱ yin ike̱ng ikak natoon izen na baꞌ e̱?”

Ni sak be aner aya wan ta be rife̱ be wu

(aMat 5.25-26)

57“Akye̱ sak yin to̱ yin be rice yin ike̱ng i ta se gye̱r nong tá nye yin baꞌ e̱? 58Ke akak se be tseng be wan naro̱ amok, nye kanye̱k nong tin sak yin niren be wu nizham. Ke anong baꞌ, a tà tseng be wan naro̱ amok'e, ne aner kuto̱ amok'e ka won nubo̱k áfe itomong wu. Áfe itomong'e ta ka te nitso̱m. 59Mi tà ka tak, wan tá kyem i wuruk baꞌ, ma wan karang kutiming'e cei nizham.”

Currently Selected:

aLuka 12: izrNT

Highlight

Copy