aLuka 11

aYeso bo̱so̱p álimazhiri wu kunye aduwa

(aMat 6.9-15; 7.7-11)

1Katuk kakak aYeso se be aduwa naro̱ kakak. Nizen iya a tá gang kunye aduwa ame, alimazhiri wu akak fe̱ be wu ye, “Agwo̱m Ágwo̱m, ni bo̱so̱p yir kunye aduwa kyo̱ndi aYohana tá bo̱so̱p álimazhiri wu'me.”

2Ayong aYeso fe̱ be ba ye, “Izen iya yin tana nye yin aduwa, fe̱ yin ye,

“ ‘Ada yir,

won riyerek wan tu sor zhe̱l,

rigwo̱m wan tu be̱.

3Ni nang yir naya kuya koakye katuk.

4Ni re̱ng yir rine̱n yir,

kamok yir ta re̱ng yir áya a tin nye yir rine̱n.

Sang tu tseng be yir naro̱ afe a tana sen bo̱mo̱ng yir baꞌ.’ ”

5aYeso bun a fe̱ be álimazhiri wu'me ye, “Angan kaye̱e̱r yin ta tseng nufe afertseng wu natite katuk, ne a fe̱ be wu ye, ‘Are̱, ni nang ágbang abiredi ataar. 6Aferime̱ mi akak ne nutseng a gor kari mi, mi be ike̱ng ikak tana ku no̱o̱k nong a ta ya baꞌ.’

7“Ne afertseng wu ame fe̱ be wu ye, ‘Tin daam baꞌ. Mi n whe̱e̱n kanukutu, mi be inoon'i n no̱ yir nutu, mi ta kyem i dorok nong ta be̱ ka no̱o̱k baꞌ.’ 8Won ta ka tak yin, a tá dorok nong a tú ku no̱o̱k sang kamok a ta nye afertseng wu tsek baꞌ, amma kamok afertseng'e tana mak a ku daam. A tá dorok nong a tú ku no̱o̱k whe̱re̱ kyo̱ndi wu ta shim.

9“Kamok anong mi fe̱ be yin ye, rip yin a tà ka no̱o̱k yin, tse̱r yin ta se̱ yin, rus yin kanukutu a ta ka karak yin'e. 10Kamok koangan afe a ta rip ne a tu ku no̱o̱k, afe a tà tse̱r a tà se̱, afe a ta rus kanukutu a tu ku karak'e.

11“Yin atek inoon, angan kaye̱e̱r yin, ke igon wu tu rip izos ne a ku no̱o̱k iwhen e̱? 12Ka ke a tu rip ritsi ne a ku no̱o̱k inye̱ng e̱? 13Ke yin, i ta nye yin amaan'e ren i nyesek yin inoon yin ike̱re̱ itek, shita Ada afe ta se naza ta won dar a no̱o̱k aya a tu ku rip Kabik Kazhe̱l'e e̱?”

Kukyem aYeso ne kukyem aBazabul

(aMat 12.22-30; aMar 3.20-27)

14aYeso tun itseng i ta sak rigbanu na aner akak. Nizen itseng'e tá wuruk, agbanu'me kpaan kufe̱ kanu. Ánerawe whe̱re̱ á tá se azong te zhing. 15Ákak ba fe̱ ye, “Be kukyem aBazabul, #11.15: aBazabul: fa: Akanang Ike̱re̱ Ikak, kaye̱e̱r nafarap'e nakak. a ta nye agwo̱m ítseng, ne a ti turung ítseng'e.” 16Ákak kaye̱e̱r ba shim ke á bo̱mo̱ng aYeso yong á fe̱ be wu ye, a ra nye ike̱ng ikak ife azhing nong iya i tana tonong ye wu ne naza. 17aYeso ta ren kuto̱ro̱ng ba, yong a fe̱ be ba ye, “Ke rigwo̱m naka kabak ne ri kpa, ke kasa naka kabak ne ka kpa. 18Ke Ishetan naka kabak, rigwo̱m wu ta nye ane̱ ri ta nyeseng e̱? Mi fe̱ anong kamok yin fe̱ yin ye mi turung ítseng be kukyem aBazabul. 19Ke mi turung ítseng be kukyem aBazabul, to̱, be kukyem angan ne áner yin ti turung e̱? Kamok anong, ba ne á ta ka tonong yin katsak'e. 20Ke i nye ye mi turung ítseng'e be kukyem Adakunom, i nye ye rigwo̱m Adakunom m be̱ nufe yin.

21“Ke aner agap nye kanye̱k gye̱r nong a tin tor kasa wu, akak tà sok ike̱ng ikak baꞌ. 22Ke aner aya a tu ku nar be agap tikpa ni wu, a tin shan ike̱re̱ aner'e tin tor rice wu ame. A tà kok ike̱re̱ aner'e ta be cei.

23“Aner aya a ta se mak be mi baꞌ, i nye ye a ti ramin. Afe a ta tusung ánerawe mak be mi baꞌ, i nye ye a shik.

Amaan kabik ta kyem a tu ku bun ke a won karo̱'me kakoor

(aMat 12.43-45)

24“Izen iya amaan kabik'e ta wuruk kaye̱e̱r anerawe, ka ta kuus naro̱ nafe sang na ta be ashi baꞌ, ne ka tse̱r karo̱ ka tana ku fan. Ke ka se̱ baꞌ, ne ka fe̱ ye, ‘Mi tu ku bun naro̱ mi tú ku wuruk.’ 25Nizen iya ka tú ku bun ka se se̱ karo̱'me an re̱ng a tan nye gye̱r. 26I tá tseng nong ka tá se be̱e̱n áfudang kanataar áya a ta nye amaan'e ne á ku nar, ne á be̱ no̱ azong kaye̱e̱r aner'e. Ne kuse aner'e nasho̱o̱n risik ne ku nar kufe ime̱se̱ng'e.”

27Nizen aYeso tá se be kufe̱ ike̱re̱'ong, ne abining akak kaye̱e̱r rigwo̱m'e tá kuto̱ be agap a tá fe̱ ye, “Aner riye̱ rikan ne a nye aner aya a tá ka tes ne a ka ngasa.”

28Amma aYeso fe̱ be wu ye, “Wayo, aner a ta be riye̱ rikan nye aner a tá fok rife̱ Adakunom ne a ninye itomong.”

Áner izam iyu shim kuye̱re̱k ike̱re̱ azhing

(aMat 12.38-42; aMar 8.12)

29Nizen rigwo̱m ánerawe'me tin barang ne aYeso fe̱ be ba ye, “Ánerawe izam iyu nye amaan'e. A shim á ta ye̱re̱k ike̱re̱ azhing á ta ra ku nye ba'me baꞌ, ma ke ife aZhona aner kuzarap. 30Kyo̱ndi i tá se̱ be aZhona na aNineve, #11.30: aNineve: fa: Akanang Ike̱re̱ Ikak, kaye̱e̱r nafarap'e nakak. anong ne i tá se be Igon Anerawe be áner izam iyu. 31Katuk amok abining akak aya a tá nye agwo̱m niben aSheba tà nyeseng be áner izam iyu nasho̱o̱n Adakunom ne a tonong ye yin nye yin ámaan'e, kamok wu tá ne nigang kazatse nong a tá be̱ foos kukyem aSolomon. To̱, aya a ta nar aSolomon na aze. 32Katuk igang'e áner aNineve tà nyeseng be áner izam iyu nasho̱o̱n Adakunom, ne á tonong ye ánerawe'me nye ámaan'e. Kamok ba shishing kuse ba be rife̱ aZhona tú ku taas ba. To̱, kyo̱o̱rna afe a ta nar aZhona na aze!

Anyisi ne a nye akanang kuro̱m

(aMat 5.15; 6.22-23)

33“Akak te kuro̱ng na apitila ne a kis, ka ne a sak ribong agadu baꞌ, amma a sak nagarang nong áfe a ta be̱s kaye̱e̱r kasa'me ta di akanang'e. 34Anyisi wan ne á nye apitila kuro̱m wan. Ke anyisi wan nye atser, kuro̱m wan cice̱r ta se̱ akanang. Amma ke anyisi wan nye atser baꞌ, kuro̱m wan cice̱r ta se na awhi. 35Kamok anong, sak riye̱ be akanang wan tá be, kashim a nye awhi. 36Ke kuro̱m wan cei se kanang, abas akak tà se whi baꞌ, ne kuro̱m'e gye̱se̱m dide̱ng, kyo̱ndi kuro̱ng apitila ta sak wan ta se kanang.”

aYeso te̱s áner aFarisi ne áner kubo̱so̱p Itsi aMusa

(aMat 23.1-36; aMar 12.38-40; aLuk 20.45-47)

37Nizen aYeso tá gang kufe̱ kanu, aner aFarisi akak tu yis ye, á ra se ya naya be wu, yong a no̱ a tá sonong nong á tá ya naya'me. 38Amma aner aFarisi'me te zhing a tá di aYeso tá ya naya'me dar ku kusu ibo̱k kyo̱ndi igo̱o̱n ba ta fe̱ ye a ra nye nizham a ta ra ya naya.

39Ayong aYeso fe̱ be wu ye, “Yin áner aFarisi, yin daam yin be kukusu nama áko̱p be nakereng, amma yin be yin amaan kuse kaye̱e̱r aye̱ yin ne i mo̱o̱r yin ánerawe. 40Yin áfunam ákak, yin ren yin ye aner a tá nye kama'me ne a nye kaye̱e̱r'e aꞌa? 41Kamok anong no̱o̱k yin áfe rizor ike̱re̱ yin ta be yin be riye̱ rizining, nong koakye yin tà te zhe̱l.

42“Awo̱ be yin áner aFarisi, yin nyesek yin izining kaye̱e̱r koakye ike̱ng kusok: ritun be akugang ne afumung a tin nyes gye̱r tatan, amma yin won yin katsak ne kushim Adakunom. Ike̱re̱ yin ta nye yin'ong se gye̱r, amma gye̱r ke yin nye yin iya i ta nye igbang'e gip.”

43“Awo̱ be yin, áner aFarisi, yin shim yin naro̱ kusosok nayiik'e natu aduwa yin, ne á ka nye yin ashou ninaro̱ rizhik kyo̱ndi ágbang áner.

44“Awo̱ be yin, áner aFarisi, yin se yin kyo̱ndi are̱k ánerawe tin tseng natoon'e dar kuren ba.”

45Akak kaye̱e̱r áfe a ta ren Itsi dide̱ng ame fe̱ be aYeso ye, “Aner Kubo̱so̱p, rife̱ wan tá fe̱ na, wan ti kas yir gip.”

46Ayong aYeso fe̱ be wu ye, “Awo̱ be yin áfe i ta ren yin Itsi dide̱ng, yin saas yin ánerawe acer áya a ta gaar dide̱ng, amma yin be rice yin, yin shim tin sak yin kubo̱k yin nong tu ku se̱ mo yin ba baꞌ.”

47“Awo̱ be yin, yin ne i ra bun i no̱k yin are̱k áner kuzarap Adakunom áya ada yin tú ku fe̱s ba gbugbang. 48Yin tonong yin ye, yin kuus yin kama ike̱re̱ áda yin tá nye. Ba ne á fe̱s áner kuzarap'e ne yin no̱k yin are̱k'e. 49Kamok anong, Adakunom fe̱ kaye̱e̱r kukyem wu ye, ‘Mi tà tom áner kuzarap ne ámanzo, á tà fe̱s ákak ne á tabak ákak ba.’ 50Kamok anong, a tà to̱ áner izam iyu amok kamok áda ba tá fe̱s áner kuzarap Adakunom agbugbang'e cei kum nizen a tá nye kazatse, 51kum nizen a tá fe̱r aHabila ma nizen aZakariya, aya a tá fe̱r natite abagadi ne karo̱ azhe̱l'e. Katsak'e ne mi tá ka tak yin, á tà to̱ áner izam iyu amok kamok ba cei.”

52“Awo̱ be yin áya i ta ren yin Itsi dide̱ng, yin te̱ne̱ng yin ánerawe iren kuren Adakunom. Yin no̱ yin baꞌ, yin won yin ákak ta no̱ baꞌ.”

53Nizen aYeso tá dorok azong, áner aFarisi ne áfe kubo̱so̱p Itsi san ku raba rife̱ wu, ne á ku risim iriri ike̱re̱. 54Á shim ke aYeso wher kanu nong á tu ku yiir be ike̱ng iya wu tana fe̱.

Currently Selected:

aLuka 11: izrNT

Highlight

Copy