aYohana 10

Kumaas natoon aner akak a ta be kukpara ítsamang

1“Katsak'e ne mi ta ka tak yin, aner aya ne sang a no̱ naming ítsamang, nanu kaming'e baꞌ, amma a ngarak ni iren ikak, i nye ye, a nye akpatang. 2Aner aya a ta gor nanu kaming'e nye afek itsamang'me. 3Aner aya a ta tor kaming itsamang'me ta karak afek itsamang'me kaming'e. Ne itsamang'e fok kuto̱ afek ba. A yis itsamang wu'me be ayerek ba. Ne a ku tun ba nufang. 4Nizen iya ne a tun ifu cice̱r, ne wu tseng nasho̱o̱n ne itsamang'me ku kuus kamok ba ren kuto̱ wu. 5Itsamang'me tà kuus aner atsen baꞌ, i tu ku teng kamok ba ren kuto̱ aner atsen'e baꞌ.” 6aYeso ti nye itomong be kumaas na, amma ba ren ike̱ng wu tá sen nife̱ baꞌ.

aYeso ne a nye afek atek

7Kamok anong, aYeso bun a fe̱ be ba gbak ye, “Katsak'e ne mi ta ka tak yin, mi ne i nye kanukutu itsamang'e. 8Cice̱r áfe a ta tsang á be̱ nizham mi tá ra be̱ na nye ákpatang. Itsamang'me tú fok ba baꞌ. 9Mi ne i nye kanukutu'me, aner aya a gor nunaan a tà se̱ kashesh. A tà no̱ kaye̱e̱r'e ne a bun a wuruk, a ta se̱ karo̱ kufek katek. 10Akpatang be̱ kamok itsang tsek ne a fe̱r ne a beseng. Amma mi be̱ nong á ta se̱ kutser, á ta se̱ kutser'e kpe̱.

11“Mi ne i nye afek atek. Afek atek no̱o̱k rice wu kamok itsamang wu. 12Aner aya a tu ku sok kamok kufek, sang itsamang'me wor i te ifu baꞌ. Kamok anong, izen iya ne wu di abo̱ saase, ne wu teng a ta won itsamang'me. Ne abo̱ nikpa ni itsamang'me ne a ku fo ba. 13Afek itsamang'me tà teng kamok a tu ku sok nong a tu ku karang tsek, kamok anong a daam be itsamang'me baꞌ.

14“Mi ne i nye afek atek. Mi ren inaan ne inaan min ren. 15Kyo̱ndi Ada'me tin ren, anong ne mi ren Ada'me. Mi no̱o̱k rice mi kamok itsamang'me. 16Mi be kukpara itsamang ikak i ta se ze̱e̱r be iyu. Ba gip, ma mi tà be̱ be ba dim. Á tà fok kuto̱ mi, ne á be̱ te kukpara kuzining be afek azining. 17Ike̱ng iya i tá sak Ada tin shim'ong, kamok mi tá no̱o̱k kutser'i, nong ta bun i dorok'e. 18Akak ta kyem a sok kutser'i baꞌ. Be kushim mi ne mi no̱o̱k rice mi. Mi be kukyem mi tanin no̱o̱k kutser'i, ne mi bun i be kukyem mi tanin dorok'e. Ada mi ne a ti no̱o̱k iren anong.”

19Rife̱ aYeso na sak áner aYahuda bun a kpaan kuya kanu gbak. 20Whe̱re̱ kaye̱e̱r ba fe̱ ye, “A be amaan kabik, an te afunam'e. Akye̱ sak yin tú ku fok yin e̱?”

21Amma ákak fe̱ ye, “Wayo, aner a ta be amaan kabik fe̱ ana baꞌ. Itseng ta nye ane̱ i tá karak akpato̱o̱n anyisi e̱?”

Áner aYahuda raba aYeso

22I se nizen kuwun, áner aYahuda se be Riye̱ Rikan Kuno̱o̱k Agbang Karo̱ Kuya Adakunom Iben #10.22: Riye̱ rikan kute zhe̱l: fa: Akanang Ike̱re̱ Ikak, kaye̱e̱r nafarap'e nakak. na aUshalima. 23aYeso se be kutsang tseng kaye̱e̱r kubang agbang kutu kuya Adakunom iben, a ta yis ye kanukutu aSolomon. 24Áyong áner aYahuda tú gorok nong á tá fe̱ be wu ye, “Ma akye̱ izen ne wan tin won yir kaye̱e̱r agak riye̱ e̱? Ke wan ne i nye aKiristi'me, ne wan ni tak yir kanang.”

25aYeso fe̱ be ba ye, “Mi kun ka tak yin, amma yin ti no̱o̱k yin katsak baꞌ. Itomong azhing iya mi tá nye, mi nye kaye̱e̱r riyerek Ada mi, tonong kuri aner aya afe mi ta nye. 26Amma yin ti no̱o̱k yin katsak baꞌ, kamok yin nye yin itsamang kaming'i baꞌ. 27Itamang'i fok kuto̱ mi, mi ta ren ba ne ba ni kuus. 28Mi tu no̱o̱k ba kutser kufe izen izen, ba tà kus baꞌ sam. Aner akak tà kyem a tin shan nubo̱k'i baꞌ. 29Ada mi afe a tin no̱o̱k itsamang'e, se yiik ne a nar cice̱r. Aner akak kyem a tin shan nubo̱k Ada mi baꞌ. 30Mi be Ada'me i se yir ázining.”

31Áyong aner aYahuda ame bun á bo̱s ata nibo̱k nong á tin barak aYeso. 32Iyong aYeso fe̱ be ba ye, “Mi ma ka tonong yin itomong azhing dide̱ng i tá ne nufe Ada, kamok anong, inyaka ne yin shim tin barak yin mo e̱?”

33Áner aYahuda ame fe̱ ye, “Ei, sang kamok itomong itek wan tá nye ne yir sen ka barak yir baꞌ, amma kamok kuzhe̱e̱sh wan tá nye Adakunom'me. Wan nye anerawe tsek, amma wan sok rice wan ye wan nye Adakunom.”

34aYeso fe̱ be ba ye, “I se ni zibir na afumung Itsi yin ye Adakunom fe̱ ye, ‘Mi fe̱ ye yin se yin kyo̱ndi ike̱re̱ iya a tu ku ya ba iben.’ 35Ke a tu yis ba ye adakunom to̱, nufe angan ne rife̱ Adakunom'me be̱ e̱? Rife̱ Adakunom'me nye abo̱o̱s baꞌ. 36Mi ne Ada ti sak i tá te zhe̱l, ne a ni tom nazatse, rife̱ kuzhe̱e̱sh ne mi tá fe̱ ye mi nye Igon Adakunom a? 37To̱, ke itomong Ada mi ne mi nye baꞌ, tin no̱o̱k yin katsak ni mi baꞌ. 38Amma ke iyong ne mi nye, ko ke yin tin no̱o̱k katsak ni mi baꞌ, ni no̱o̱k yin katsak ni itomong'e. Nong ase̱ ta ren yin ye Ada'me se kaye̱e̱r'i ne mi se kaye̱e̱r Ada'me.”

39Gip be anong á shim ke á tú ku yiir, amma a bun a wher ni ibo̱k ba.

40Ayong aYeso tú bun nunyi isho̱ng aUrdun naro̱ aYohana tá tsang a ku nye abatisma ni ime̱se̱ng, a tá se sor azong. 41Ánerawe whe̱re̱ be̱s nufu. Áner'e fe̱ ye, “aYohana nye itomong azhing baꞌ, amma ike̱re̱ wu tá fe̱ cice̱r natoon aner na nye katsak.” 42Ánerawe whe̱re̱ ti no̱o̱k katsak na aYeso azong.

Currently Selected:

aYohana 10: izrNT

Highlight

Copy