2 aTimoti 4
4
1Mi fe̱ be wan be agbang kuto̱ nasho̱o̱n Adakunom ne aYeso Kiristi, aya a tana to̱ atser be ikom amok, a tana bun a be̱ nong a ta te tsik rigwo̱m wu ye, 2wan ri tsesek ninye awazi rife̱ Adakunom, ko be izen ko dar izen. Nees ánerawe, kuzhe̱e̱r ba ne i kutsesek ba ne i ka bo̱so̱p ba'me kaye̱e̱r awhiwhe̱. 3Kamok izen ta be̱ iya sang ánerawe tana baꞌ, shim kufoos kubo̱so̱p kufe katsak baꞌ. Amma á ta nar kushim kufoos ike̱re̱ iya aye̱ ba tà shim ne kamok kuwhaan ato ba a tse̱r áner kubo̱so̱p nong á tu ku taas ba ike̱re̱ iya ba ta shim á ta foos. 4Ánerawe ta raba kufok katsak, amma á ta ban á shim kufoos atin afekasho̱o̱n ingya. 5Amma wan sak riye̱ be ike̱re̱ kuri iyong, naka tsesek kaye̱e̱r risam wan, ya kasho̱o̱n be kunye itomong aner awazi Rife̱ Ritek ne i ni sak riye̱ ni itomong iya a tá ka sak'e ye wan ra nye cice̱r.
6Kamok izen n nye a tanin sok a ta no̱o̱k kyo̱ndi asidaka igang'e, izen kutseng'i n nye. 7Mi n nye ike̱ng ife mi tana kyem i nye, mi n kon kuren kutek, mi n gang itsi'me, mi yiir kuno̱o̱k katsak mi ta be. 8Kyo̱o̱rna makong, a min sak ishorong ife ku se gye̱r'e nasho̱o̱n Adakunom, iya Agwo̱m Ágwo̱m, aner kuto̱ amok afe katsak tanin no̱o̱k Katuk'ong. Sang awan mi ne a tin no̱o̱k tsek baꞌ, amma be cice̱r áner aya a ta min te riye̱ nube̱ wu gip.
Rife̱ igang'e
9Nye koakye ike̱ng iya wan tana kyem i nye nong tà be̱ nunaan gbashak, 10kamok aDemas min won kamok kushim kazatse na, nong a tá be na aTasalonika, aKirishen be na aGalati, aTitus be aDalmatiya. 11aLuka wu ze̱r tsek ne a se mak be mi. Tse̱r aMarkus nong tà be̱ yin mak be wu, kamok wu tin se̱ mo ni itomong'e. 12Mi n tom aTikikus na Afisa. 13Nizen iya ne wan tana be̱ ne i ni cer awe̱n kukpiin'i mi ta won nufe aKarpus na aToruwas be afumung'i ákak, abanang áfe kukpa #4.13: afumung áfe akpa: Nizen aBulus a nye izibir kaye̱e̱r akpa. kya baꞌ.
14Alekzanda a ta nye atu'me ti mo̱o̱r dide̱ng. Agwo̱m Ágwo̱m tú ku no̱o̱k ishorong wu tite̱re̱ be ike̱ng iya wu tá nye. 15Wan gip sak riye̱ be wu, kamok a shik rife̱ yir tá fe̱ yir dide̱ng.
16Nizen iya a tá tseng be mi naro̱ amok ni ime̱se̱ng'e, akak ti tobok baꞌ, koangan ti won. Mi mok ye Adakunom tà yiir iyong natoon rice ba baꞌ. 17Amma Agwo̱m Ágwo̱m se mak be mi, ayong a ti no̱o̱k agap nong ase̱ kamok mi rife̱ wu tà tseng cei nong áner aya a ta nye áner aYahuda baꞌ, cice̱r tà fok. A ti shesh nanu azaki fan a bin te̱n amok riku. 18Agwo̱m Ágwo̱m tin shesh kaye̱e̱r koakye kuri ike̱ng imaan'e i tana be̱ ne á tseng be mi gye̱k gye̱k ma kaye̱e̱r kasa rigwo̱m wu kaye̱e̱r kaza. Won kuyiik tu nye kufu ma izen izen! Anong.
Atato̱
19Ni nye shou aBiriskila be Akila ne áfekasa Onesiforus. 20Arastus rusek na aKoranti, mi won aTaromus be kuro̱k na aMilitus. 21Te gbashak ta be̱ nizham izen kuwun ta ra nye. aYubulus be aPuden ne aLanus be aKalaudiya ne ribir ároneng cice̱r ta nye ashou.
22Agwo̱m Ágwo̱m ra se mak be kabik yin. Ritek wu se mak be yin.
Currently Selected:
2 aTimoti 4: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc