Rooma 6

Rúu nwannang shɔɔ

1Rùu kɔɔ ɓu kaa nɛɛ viya? Rúu yi tĩng ta nɛɛ vuu shi kpang palɛnang tɔ̀ɔ, Laa wu gisi tɔ̃ɔ ɓɔɔ wu pálɛ̀ ruu ka yuu zɔɔ yuu zɔɔ ya? 2Kpang, ruu palɛ nɔngkɔ kpang. Ɓɔɔ ruu yaa vuu shi kpang palɛnang ɓuru tɔ, ruu palɛ takpang. 3Nɔɔ zi kpang ya? Ka ɓɔɔ zang palɛ ruu batizima, zang ɓakɛ ruu nɛɛ Yeesɔ Kirisi, a ruu vɔ jong naa ɓɔɔ wu vɔ ɓɛɛ. 4Ka ɓɔɔ zang pàlɛ̀ ruu batizima, nwàng naa ruu vɔ katɔ nɛɛ Kirisi, a zang gbã̀a ruu nɛɛ wu. Tɔɔ, zang naa wisi ruu paa kaa jong naa ɓɔɔ Daa ɓiɓɛ wisi wu paa nɛɛ bannang ɓiɓɛ, nɛɛ tɔ̀ɔ, ruu nwang nwannang kaa naa ɓɔɔgn.

5Naa zang ɓakɛ ruu nɛɛ wu ka zɔ̃ng vɔrɔ ɓɔɔ naa weɓe, zang ti ɓakɛ ruu nɛɛ wu doo nɔngkɔ, ka paa ɓɔɔ zang wisi wu ɓɛɛ. 6Ruu zi ɓuru tɔ nɛɛ, zang ɓáa nwannang ɓɔɔ ɓeleng ruu nwang ka tĩng ɓi tɔ ka laa nɛɛ Yeesɔ. Tɔ̀ɔ, bii ɓuru ɓɔɔ kasɛ vuu shi kpang palɛnang wu shaarɛ. Tɔ̀ɔ ruu nwang kaa tɔ̀ɔ́ naa jaafoo vuu shi kpang palɛnang kpang. 7Zang ɓɔɔ nɛɛ vɔ tɔ, wɔ ɓi tɔ, palɛ vuu shi kpang ɓi takpang. 8Ruu nɛɛ vɔ nɛɛ Kirisi, ruu zi tɔ ruu naa nwáng ningkãari jong nɛɛ wu. 9Ruu zi tɔ, vɔrɔ palɛ Kirisi vuu ɓɔɔ ɓi takpang. Yeesɔ vɔrɛ, a zang wisi wu paa tɔkn ningkãari, vɔ ɓi takpang. 10Ka ɓɔɔ Yeesɔ vɔrɛ, vɔ doo gbete kak, ka ruu vuu shi kpang. A kãntang keɓe, nwàng kaa ningkãari ka Ruu Laa. 11Nɔɔ rɛ̃rɛ doo nɔngkɔ, ka yuu manɛ nɛɛ nɔɔ nwàng naa vɔrɔ, nɛɛ a tɔ ka nɔng vuu shi kpang palɛnang ɓɛɛ. A nɔɔ nwàng ningkãari ka Ruu Laa, ka ruu ɓɔɔ, nɔɔ ɓakɛ zɔɔ tɔ nɛɛ Yeesɔ Kirisi ɓɛɛ.

12Ka ruu nɔngkɔ, nɔɔ yaa vuu shi kpang wu ɓaa saara ka bii manɛ ɓɔɔ vɔ ɓi katɔ ɓɛɛ kpang. Tɔ̀ɔ, nɔɔ ɓaa shoo kaa tɔ̀ɔ́ vuu ɓɔɔ bii kasɛ ɓɛɛ kpang.

13Nɔ́ɔ ti yaa bii manɛ dang gbete wu ràa vuu ɓɔɔ nɔ̀ɔ palɛ vuu shi kpang nɛɛ mani ɓɛɛ kpang. Nɔɔ a Laa, bii manɛ naa zang ɓɔɔ zang wisi ri paa nɛɛ sàa ri nwàng kaa ningkãari ɓɛɛ. Nɔɔ risi bii manɛ dang gbete katɔ kɔ jong wu nwang vuu ɓɔɔ Laa palɛ shonang tɔ̃ɔ nɛɛ mani ɓɛɛ. 14Nɔ́ɔ yaa vuu shi kpang, wu roo kpanti ka nwannang manɛ kpang, ka ruu ɓɔɔ, nɔɔ manɛ tɔ̀ɔ́ jaafoo nyaa dannang Laa kpang ɓɛɛ, nɔɔ manɛ kaa zang ɓɔɔ Laa pàlɛ́ ri tɔ̃ɔ ɓɛɛ.

Nɔɔ manɛ jaafoo vuu tɔ̃ɔ palɛnang

15A nɛɛ nɔngkɔ ɓɛɛ, rúu pálɛ́ vuu shi kpang ta, ka ruu ɓɔɔ ɓi nyaa dannang Laa roo kpanti ka yuu ɓuru kpang, ɓi tɔ̃ɔ Laa rooyi ɓɛɛ ya? Kpang tingkiring. 16Nɔɔ zi tɔ nɛɛ, naa nɔɔ a zang ɓɔɔ yuu manɛ nɛɛ nɔɔ nwang jaafoo ɓiɓɛ, nɔɔ ɓaa shoo ka nyaa ɓiɓɛ. Nɔɔ manɛ jaafòó zang gãa ɓɔɔ nɔɔ ɓaa shoo ka nyaa ɓiɓɛ ɓɛɛ. Naa nɔɔ ɓaa shoo doo ka nyaa vuu shi kpang ɓɔɔ nwǎng zang vɔrɔ ɓɛɛ, naa nɔɔ ti ɓaa shoo ka nyaa Laa, tɔ̀ɔ, Laa wu ta nɔɔ nɛɛ nɔɔ zang tɔ̃ɔ ka tĩng ɓiɓɛ ɓɛɛ. 17Ruu zãa Laa tɔ, ka ruu ɓɔɔ, bɛ̀ɛ́ nɔɔ manɛ jaafòó vuu shi kpang ɓɔɔ nɔɔ palɛ ɓɛɛ. A nɔɔ naa ɓaa shoo ka ruu ɓɔɔ niizang ka vuu ɓɔɔ zang tusu nɔɔ, a nɔɔ tarɛ nɛɛ yeti manɛ nandon. 18Zang tà nɔɔ nɛɛ naa vuu shi kpang manɛ, a nɔɔ ràa jaafòó vuu tɔ̃ɔ palɛnang. 19N rang nɔɔ yee, n gãsɛ nɔɔ vuu nɛɛ vuu ɓɔɔ ruu zi diki diki ɓɛɛ. Ka ruu ɓɔɔ, bii shɔnzang manɛ lakɛ naa ka bii, ka vuu zinang kpang ɓɛɛ. Bɛ̀ɛ́ nɔɔ á dũndũng, nɛɛ vuu shi kpang, yuu manɛ dɔ̃ɔ gbete naa jaafoo, kãntang keɓe, nɔɔ á yuu manɛ doo nɔngkɔ dɔ̃ɔ gbete, nɔɔ palɛ vuu ɓɔɔ tɔ̃ɔ ɓɛɛ, tɔ̀ɔ, nɔɔ nwang kaa zang Laa niizang.

20Ɓɔɔ bɛ̀ɛ́ nɔɔ doo naa jaafoo vuu shi kpang ɓɔɔ nɔɔ palɛ, ruu manɛ hãa ɓi kagn nɛɛ vuu tɔ̃ɔ palɛnang kpang. 21Nɔɔ wàlɛ̀ ɓu vi ka vuu ɓɔɔ nɔɔ pálɛ́, ɓɔɔ kãntang keɓe yusɛ̃ɛ ɓarɛ tuu nɔɔ kaa tɔ ɓee viya? Vuu kaɓa nwàng nɔɔ vɔrɔ. 22A kãntang keɓe zang ta nɔɔ tɔ nɛɛ, naa vuu shi kpang palɛnang, nɔɔ kaa jaafoo Laa. Vuu keɓe shing nɔɔ, nɔɔ nwang zang ɓɔɔ shi kpang ka bii ɓarɛ kpang ɓɛɛ. Wu ti shingnɛ nɔɔ wàlɛ̀ suru bii ɓɔɔ waa nyaa kpang ɓɛɛ. 23Zang nɛɛ palɛ vuu shi kpang tɔ, zang vɔ katɔ. Vuu ɓɔɔ Laa a ruu waati, ɓi suru bii ɓɔɔ waa nyaa kpang ɓɛɛ. Ka ruu ɓɔɔ, ruu ɓákɛ́ bii tɔ, nɛɛ Kpanti ɓuru Yeesɔ Kirisi ɓɛɛ.

Currently Selected:

Rooma 6: mzmNT

Highlight

Copy