Maraku 10

Soro hinnang

(Mat 19:1-12; Luk 16:18)

1A Yeesɔ seepaa nɛɛ nɔng kaɓa, daa ka tipi Yahudi, a ta rang Urudung. A zang dɔɔli ri kpalɛ zɔɔ kaa tɔkn ka bii ɓiɓɛ, a tusu ri vuu kaa naa ɓasidi ɓɛɛ.

2Zang Farisi ri naa a ka bii ɓiɓɛ, nɛɛ ri naa gãsɛ wu. Ri hɛ̃ɛ wu tɔɔ, “Ruu Laa kasɛ tɔ nɛɛ zang wu hing soro ɓiɓɛ ya?”

3A Yeesɔ kasɛ ri nyaa tɔɔ, “Musa dang nɔɔ nyaa ɓu nɛɛ viya?”

4Ri kasɛ wu nyaa tɔɔ, “Musa kasɛ katɔ nɛɛ zang wu bee zang soro labeenang soro hinnang, zang a wu tɔ̀ɔ zang yaa wu naa kati.”

5A Yeesɔ kɔɔ ri tɔɔ, “Musa bee nɔɔ vuu keɓe, ka ruu ɓɔɔ nɔɔ, kasɛ nɛɛ nɔɔ tà vuu ɓɔɔ Laa tusu kpang ɓɛɛ. 6Ɓɔɔ Laa gaayu vuu ɓɔɔ ka koo keɓe mãanang, ‘Laa mãa zang varɛ nɛɛ zang soro.’ 7‘Ka ruu nɔngkɔ, zang varɛ yaa diiɓɛ nɛɛ niiɓɛ, ɓakɛ zɔɔ kaa nɛɛ soro ɓiɓɛ. 8Tɔ̀ɔ, ri ziti ri nwang kaa bii gbete.’ Ka ruu nɔngkɔ, ri tɔ̀ɔ́ ziti kpang, ri kaa bii gbete. 9Vuu ɓɔɔ Laa nɛɛ ɓákɛ́ tɔ, shɔnzang wu basɛ takpang.”

10Yeesɔ daa ka yeti gãa, a zang ɓɔɔ ri mantɛ vuu ka bii ɓiɓɛ, ri naa hɛ̃ɛ wu ruu keɓe kaa tɔkn. 11A Yeesɔ kɔɔ ri kati tɔɔ, “Zang ɓɔɔ nɛɛ nwangsɛ soro ɓiɓɛ, a shing ɓɔɔgn, palɛ soro ɓiɓɛ ɓɔɔ tĩng shɔɔnang vuu shi kpang. 12Zang soro ɓɔɔ nɛɛ yupaa gãa varɛ ɓiɓɛ, a daa gee zang ɓɔɔgn, palɛ ɓi vuu dũndũng nɛɛ zang ɓɔɔgn kaɓa.”

Yeesɔ ta wujɛ seseere

(Mat 19:13-15; Luk 18:15-17)

13Zang ɓɔɔ ri atɛ Yeesɔ wujɛ seseere nɛɛ wu shing ri naa ka yuu, tɔɔ wu ti gaa ri Laa. A zang ɓɔɔ ri mantɛ vuu ka bii Yeesɔ, ri mangkɛ zang ɓɔɔ ri atɛ wujɛ kati. 14Ɓɔɔ Yeesɔ zi naa weɓe, gnvɔ shaa wu dɔɔli, a kɔɔ zang ɓɔɔ ri mantɛ vuu ka bii ɓiɓɛ nɛɛ, “Nɔɔ yaa wujɛ seseere ka nɔngkɔ ri a ka bii mɛɛ, nɔ́ɔ zãa ri anang kpang. Kpanti roonang Laa ɓi ɓɔ̀ɔ́ zang ɓɔɔ naa weɓe kɔ. 15N kɔɔ nɔɔ ruu ɓɔɔ niizang kɔ nwani, zang ɓɔɔ nɛɛ ta Laa nɛɛ wukɔ Kpanti naa jaa tɔkɔlɔng kpang, Laa naa nwang Kpanti ɓiɓɛ kpang.” 16A see ri, shing ri naa ka yuu, a gaa ri Laa kati.

Zang ɓɔɔ kasɛ ruu vuu naa ɓiɓɛ ɓɔɔ dɔɔli ɓɛɛ

(Mat 19:16-30; Luk 18:18-30)

17Yeesɔ yi gbalang daanang ɓiɓɛ tɔ, daa kana, a jaa varɛ ɓɔɔ yurɛ naa tang ka tĩng ɓiɓɛ, a hɛ̃ɛ wu tɔɔ, “Maalang ɓɔɔ tɔ̃ɔ tɔ̃ɔ ɓɛɛ, n palɛ vi tɔ̀ɔ, Laa wu a m suru bii ɓɔɔ waa nyaa kpang viya?”

18A Yeesɔ kasɛ wu nyaa tɔɔ, “Mɔɔ ɓaa m nɛɛ zang tɔ̃ɔ ka ruu viya?” Zang tɔ̃ɔ ɓi kagn kpang, ɓi Kpanti Laa kɔ tɔ̃ɔ gbete. 19Mɔɔ zi nyaa ɓɔɔ Laa dang ɓɛɛ tɔ, Laa tɔɔ, “Mɔɔ nyɔ zang vɔrɔ kpang, mɔɔ palɛ vuu dũndũng kpang, mɔɔ ɓɔ̀ɔ́ shɔngɓɔ kpang, mɔɔ suu sèé ka yuu zang ɓɔɔ kpang, mɔɔ mulu zang kpang. Ɓaa shoo ka nyaa daaɓɛ nɛɛ ɓɔɔ naaɓɛ tɔ̃ɔ tɔ̃ɔ.”

20A yɔɔ kɔɔ Yeesɔ tɔɔ, “Maalang, n gaayu jĩng shinnang ka nyaa kɔ Laa dang ɓee nandon, bɛ̀ɛ́ n doo tɔkɔlɔng.”

21Yeesɔ shu wu jĩng tɔ ka bii, kasɛ wu kati. A kɔɔ wu tɔɔ, “Mɔɔ shing jĩng tɔ ka nyaa ɓɔɔ Laa dang ɓɛɛ niizang, yaa mɔɔ vuu gbete. Dita, mɔɔ daa mãlɛ̀ vuu naa ɓaaɓɛ nandon, mɔɔ basɛ zang ɓɔɔ vuu ka naa ɓarɛ kpang, saka vuu ɓɔɔ mɔɔ mãlɛ́ ɓɛɛ. Mɔɔ naa walɛ vuu naa ditɔ ka lapa. Tɔ̀ɔ, mɔɔ arɛ mɔɔ dũng m.” 22Ɓu doo ɓɔɔ yɔɔ tãa naa weɓe, yeti ɓiɓɛ lasɛ dɔɔli, kãngtɛ waa nyaating, a yaa Yeesɔ daa kati, ka ruu ɓɔɔ, vuu naa ɓiɓɛ dɔɔli ɓɛɛ.

23A Yeesɔ raa jĩng pɛ̃ɛrɛ nɔng, a kɔɔ zang ɓɔɔ ri mantɛ vuu ka bii ɓiɓɛ tɔɔ, “Nɔng ɓɔɔ Laa roo Kpanti kagn naa kpãa zang ɓɔɔ vuu naa ɓarɛ kagn daanang ɓi dɔɔli.”

24Ɓɔɔ zang ɓɔɔ ri mantɛ vuu ka bii ɓiɓɛ ri tãa naa weɓe, ri mã naa ka danggn. A Yeesɔ ti kɔɔ ri tɔkn tɔɔ, “Wujɛ mɛɛ, n kɔɔ nɔɔ daanang ka nɔng ɓɔɔ Laa roo Kpanti, kpãa nyaa dɔɔli.” 25Daanang zang vuu naa ka nɔng ɓɔɔ Laa roo kpanti kpãa nyaa bang. Kpãayi ɓa ɓɔɔ vuu vaa ɓɔɔ zang ɓaa nɛɛ hòlòng ɓù nɛɛ yeng shɔng fɔ̃ɔrɔ katɔ.

26Ruu kaɓa kpãa zang ɓɔɔ ri mantɛ vuu ka bii Yeesɔ dɔɔli. Ka ruu nɔngkɔ, ri hɛ̃ɛ wu tɔɔ, “A ɓu wi naa walɛ suru bii ɓɔɔ waa nyaa kpang gbete wiya?”

27Yeesɔ pɛ̃ɛrɛ ri, a kɔɔyi tɔɔ, “Vuu ɓɔɔ shɔnzang zunung palɛnang kpang, Laa zunung ɓi katɔ. Ka ruu ɓɔɔ, Laa zunung vuu piti palɛnang ɓi katɔ ɓɛɛ.”

28A Bituru hɛ̃ɛ wu tɔɔ, “A wee ruu yaa vuu ɓuru nandon ruu dũng mɔɔ ɓee?”

29A Yeesɔ kasɛ wu nyaa tɔɔ, “N kɔɔ nɔɔ ruu ɓɔɔ niizang kɔ nwani, zang ɓɔɔ nɛɛ yaa gãa ɓiɓɛ, nɛɛ ɓeezung, nɛɛ ɓeenaa, nɛɛ diiɓɛ, nɛɛ niiɓɛ, nɛɛ wujɛ ɓiɓɛ, nɛɛ tipi ɓiɓɛ, ka ruu mɛɛ nɛɛ Ruu Tɔ̃ɔ Laa, 30naa walɛ vuu ɓɔɔ wu yaa ɓɛɛ ditɔ ka koo keɓe. Naa walɛ gãa nɛɛ ɓeezung, nɛɛ ɓeenaa, nɛɛ niiɓɛ, nɛɛ wujɛ, nɛɛ tipi dakn laa maani. Zang ti naa dang wu jĩng ditɔ dɔɔli, ti naa walɛ suru bii ɓɔɔ waa nyaa kpang ditɔ. 31Zang dɔɔli ka teteng zang ɓɔɔ ri ka tĩng kãntang keɓe, kɔ naa waa nyaa knti. Zang kɔ ri ka knti kãntang keɓe, kɔ naa sɔɔ zang tĩng kaa jong.”

Yeesɔ kɔɔ naa ɓɔɔ wu naa vɔ ɓɛɛ tɔkn

(Mat 20:17-19; Luk 18:31-34)

32Yeesɔ nɛɛ zang ɓɔɔ ri mantɛ vuu ka bii ɓiɓɛ, ri daa kana Urushalima, Yeesɔ ti ka tĩng ɓarɛ. Ri rɛ̃rɛ ɓarɛ doo naa ka yuu vuu ɓɔɔ Yeesɔ túsú ɓɛɛ. Zang ɓɔɔ ri dũuru ri ka knti, ri kaa vɔrɔ. A Yeesɔ ɓaa zang ɓɔɔ ri mantɛ vuu ka bii ɓiɓɛ nyaa kaa dang gbete tɔkn, a gaa ri tɔɔsung vuu ɓɔɔ naa palɛ wu kɔɔnang kati. 33Yeesɔ kɔɔ ri tɔɔ, “Nɔɔ ɓaa shoo ta nɔɔ tãayi. Ruu dáa kana Urushalima, zang ɓɔɔ naa a zang bang bang, zang ɓɔɔ ri dɔɔ vuu ka Gãa Laa, nɛɛ zang ɓɔɔ ri tusu zang vuu ɓɛɛ Jaa Shɔnzang ditɔ. Ri naa jɛ̃ɛ wu ruu, ri kɔɔ zang nɛɛ zang nyɔ wu vɔrɔ. Tɔ̀ɔ, ri tuu wu ri a zang ɓɔɔ ri dũng Laa kpang kati. 34Ri naa kpaa wu, ri ti naa tùlù wu sisãa ka bii. Ri naa nyɔ wu nɛɛ gbãa, tɔ̀ɔ, ri nyɔ wu vɔrɔ kati. Kpanti Laa naa wisi wu paa ka lee ɓɔɔ diki daa taati ɓɛɛ.”

Vuu ɓɔɔ Yakubu nɛɛ Yɔhana ri gaa ka naa Yeesɔ ɓɛɛ

(Mat 20:20-28)

35A Yakub nɛɛ Yɔhana, wujɛ Zebedi ri a ka bii Yeesɔ. Ri kɔɔ Yeesɔ tɔɔ, “Maalang, ruu kasɛ nɛɛ mɔɔ palɛ vuu piti ɓɔɔ ruu gaa mɔɔ katɔ.”

36A Yeesɔ hɛ̃ɛ ri tɔɔ, “Nɔɔ nɛɛ n pàlɛ̀ nɔɔ ɓu viya?”

37A ri kasɛ wu nyaa tɔɔ, “Ruu kasɛ nɛɛ wee ruu ziti ɓɛɛ, zang gbete wu naa nwang ka naa nakn ɓaaɓɛ, a ɓɔɔ gbete wu nwang ɓi ka naa nagang ɓaaɓɛ, ka ɓɔɔ mɔɔ naa roo Kpanti ɓɛɛ.”

38A Yeesɔ kɔɔ ri tɔɔ, “Nɔɔ zi vuu ɓɔɔ nɔɔ gàá ɓɛɛ kpang. Nɔɔ naa zunung jĩng dannang katɔ jong naa ɓɔɔ n naa dang ɓɛɛ ya? Zang naa palɛ nɔɔ batizima katɔ nɛɛ jĩng dannang naa ɓɔɔ zang naa palɛ m ɓɛɛ ya?”

39A ri kasɛ Yeesɔ nyaa tɔɔ, “Ruu zunung katɔ.” A Yeesɔ kɔɔ ri tɔɔ, “Nɔɔ zunung jĩng dannang ɓɔɔ n dang ɓi katɔ, zang ti naa palɛ nɔɔ batizima ɓɔɔ zang palɛ m ɓi katɔ. 40Ɓɔɔ nwannang manɛ ka naa nakn nɛɛ naa nagang mɛɛ, ɓi nkɔ a zang naa kpang. Nɔng nwannang keɓe, ɓi ɓɔ̀ɔ́ zang ɓɔɔ Laa pàlɛ̀ ri ɓɛɛ.”

41Ɓɔɔ zang ɓɔɔ ri mantɛ vuu ka bii Yeesɔ ɓɔɔ kopi, ri tãa naa weɓe, gnvɔ shaa ri nɛɛ rɛɛ Yakub nɛɛ Yɔhana dɔɔli. 42A Yeesɔ ɓaa ri nyaa, kɔɔ ri tɔɔ, “Nɔɔ zi tɔ nɛɛ rɛɛ kpanti zang ɓɔɔ ri dũng Laa kpang, nɛɛ zang bang bang ɓarɛ, ri kasɛ nɛɛ zang zirɛ nɛɛ rikɔ zang bang. 43Ɓɔɔ manɛ ɓi nɔngkɔ kpang. Zang ɓɔɔ kasɛ nɛɛ wu nwang zang bang ka teteng manɛ, wukɔ wu nwáng zang ɓɔɔ pàlɛ́ nɔɔ shonang ɓɛɛ jong. 44Shɔnzang ɓɔɔ kasɛ nɛɛ wu naa nwáng ka tĩng, wukɔ wu nwáng jaafoo manɛ jong. 45Ka ruu ɓɔɔ, Jaa Shɔnzang àrɛ́ nɛɛ zang shòng wukɔ shonang kpang, àrɛ́ nɛɛ wu shong zang katɔ kɔ jong. Wu ti mã̀lɛ̀ yuu ɓiɓɛ, ka ruu zang dɔɔli nɛɛ tɔ̀ɔ, wu ta yuu ɓarɛ kati.”

Yeesɔ masɛ Batimawu ɓɔɔ jĩng ringtang ɓɛɛ

(Mat 20:29-34; Luk 18:35-43)

46Yeesɔ nɛɛ zang ɓɔɔ ri mantɛ vuu ka bii ɓiɓɛ, nɛɛ zang ɓɔɔ ri kpalɛ zɔɔ gaagaa, ri a ka Jeriko. Ɓɔɔ ri seepaa daanang kati nɛɛ Jeriko, Batimawu jaa Timawu ɓɔɔ jĩng ringtang ɓɛɛ, nwang ka nyaa gbalang gaa vuu. 47Ɓu doo ɓɔɔ Batimawu tãayi nɛɛ Yeesɔ yɔɔ Nazara kɔ tɛɛ gbalang, a gaa tɔɔsung nyaa mɛɛrɛnang kati tɔɔ, “Yeesɔ Jaa zɔ̃ng Dawuda, gn mɛɛ wu kɔng mɔɔ jong.”

48Zang dɔɔli ri mangkɛ wu, ri kɔɔ wu, nɛɛ wu vɔ̃ nyaa ta. A mɛ̀ɛrɛ́ nyaa ɓi kaa nabm kɔ jong nɛɛ, “Jaa zɔ̃ng Dawuda, gn mɛɛ wu kɔng mɔɔ jong.” 49A Yeesɔ shiiyi, kɔɔ zang nɛɛ zang wu ɓaa wu nyaa ta. A zang ɓaa zang jĩng ringtang kaɓa nyaa kati. Ri kɔɔ wu tɔɔ, “Mɔ́ɔ loo danggn kpang. Seepaa ta, ɓaa mɔɔ nyaa kana.”

50Ɓu doo ɓɔɔ Batimawu tãa naa weɓe, tasɛ fɔ̃ɔrɔ ɓɔɔ wu zuu sɔɔrɔ nɛɛ mani, a ta ka lapa, a daa ka bii Yeesɔ.

51Yeesɔ hɛ̃ɛ wu tɔɔ “Mɔɔ kasɛ nɛɛ n palɛ mɔɔ viya?” A zang ringtang kaɓa kɔɔ wu tɔɔ, “Maalang, n kasɛ nɛɛ n zi nɔng tɔkn.”

52A Yeesɔ kɔɔ wu tɔɔ, “Dita, danggn ɓɔɔ, mɔɔ shing ka bii Laa, masɛ mɔɔ tɔ,” A tantɛ nɔng kaa zinang tɔkn. A dũng Yeesɔ kaa knti.

Currently Selected:

Maraku 10: mzmNT

Highlight

Copy