Matiyu 22
22
Ruu kn sinyɛ
(Luk 14:15-24)
1A Yeesɔ rang ri yee kaa tɔkn nɛɛ nyaa vuu jeenang tɔɔ, 2“Kpanti ɓɔɔ Laa rooyi nwang naa ruu yɔɔ Kpanti ɓɔɔ palɛ jaa ɓiɓɛ ɓɔɔ varɛ vuu shaanang kn sinyɛ ɓɛɛ. 3A naa shong zang shonang ɓiɓɛ ka bii zang ɓɔɔ wu gaarɛ, nɛɛ ri á ta, a ri bɛ̃ɛ anang kati ɓɛɛ.
4“A yɔɔ kpanti ti naa shong zang shonang ɓiɓɛ ɓɔɔgn tɔkn ka bii zang ɓɔɔ wu gaarɛ ɓɛɛ nɛɛ, ‘Nɔɔ dita, nɔɔ daa kɔɔ ri nɛɛ n hangsɛ vuu shaanang palɛnang tɔ. N yele guu napo mɛɛ ɓɔɔ ɔ̃lɔ dɔɔli ɓɛɛ tɔ. N shĩili vuu shaanang tɔ. Nɔɔ a nɔng kn sinyɛ shaanang ta.’
5“A zang ɓɔɔ kpanti gaarɛ kaɓa, ri yee laa ɓarɛ kagn kpang. A ri daarɛ ɓarɛ ri. Zang gbete daa ka jaa ɓiɓɛ, a ɓɔɔ gbete daa ka nɔng vuu ɓiɓɛ malɛnang. 6A zang ɓɔɔ kpanti gaarɛ, ɓɔɔ ri yaa knti, ri yiki zang shonang kpanti, ri dang ri jĩng, a ri nyɔkɔ ri vɔrɔ. 7A gnvɔ shaa kpanti, kpanti shong zang sɔɔja ɓiɓɛ, ri daa nyɔkɔ zang ɓɔɔ ri nyɔkɔ zang shonang ɓiɓɛ, a ri dɔɔ gari ɓarɛ nɛɛ waa kpayi kpayi.
8“A Kpanti naa ɓaa nyaa ka zang shonang ɓiɓɛ ɓɔɔgn, a kɔɔ ri tɔɔ, ‘Zang hangsɛ kn sinyɛ palɛnang tɔ. A zang ɓɔɔ n gaarɛ ri, ri daa naa ɓɔɔ ri shaayi kaa takpang. 9Nɔɔ dita nyaa gbabang, nɔɔ daa gaarɛ zang ɓɔɔ nɔɔ ĩi piti, ri a nɔng kn sinyɛ.’ 10A zang shonang yɔɔ ri daa ka nyaa gbabang, ri daa kpalɛ zang piti ɓɔɔ ri ĩi ɓɛɛ kati. Zang shi kpang nɛɛ ɓɔɔ tɔ̃ɔ piti. A zang ɓɔɔ zang gaarɛ, ri yi nyaa nɔng kn sinyɛ kati.
11“A yɔɔ kpanti naa arɛ, nɛɛ wu naa leng jĩng ka zang ɓɔɔ wu gaarɛ ɓɛɛ, a naa zi shɔnzang gbete ɓɔɔgn nɔngkɔ, hãa zɔ̃ng fɔ̃ɔrɔ ɓɔɔ zang kn sinyɛ shaanang, hãlɛ ka bii kpang. 12A hɛ̃ɛ wu tɔɔ, ‘Masang, mɔɔ palɛ bɛ̀ɛ́, mɔɔ a ka nihn, fɔ̃ɔrɔ kn sinyɛ shaanang kagn bii kpang viya?’ Yɔɔ shii tɔ wek, vuu ɓɔɔ wu kɔɔ takpang.
13“A yɔɔ kpanti kɔɔ zang shonang ɓiɓɛ tɔɔ, ‘Nɔɔ yi wu ta, nɔ́ɔ ta naa nɛɛ doo. Nɔ́ɔ daa tasɛ ka biling, ka nɔng ɓɔɔ tɔ̀ɔ katɔ kɔngkɔng ɓɛɛ. Nɔng ɓɔɔ zang kaayi, zang shaa nyaa kagn kpaaka kpaaka ɓɛɛ.’ ”
14A Yeesɔ naa hangsɛ nyaa kati tɔɔ, “Zang ɓɔɔ zang gaarɛ, ri dɔɔli, a zang ɓɔɔ zang shɛ̃ɛrɛ, ri kaa tɔ̀ɔ́ dɔɔli kpang.”
Ruu saka tipi ɓɔɔ zang shu Kpanti Kayisa ɓɛɛ
(Mar 12:13-17; Luk 20:20-26)
15A zang Farisi ri daa tɔ̀ng zɔɔ ka naa ɓɔɔ ri yi wu ka yee ɓɔɔ wu rang ɓɛɛ. 16A ri shong zang ɓɔɔ ri mantɛ vuu ka bii ɓarɛ nɛɛ zang ɓɔɔ dũng knti Kpanti Hiridu tɔɔ, ri daa kɔɔ Yeesɔ nɛɛ, “Maalang, ruu zi tɔ, mɔɔ suu see ɓáa kpang. Mɔɔ tùsú zang ɓáa vuu ɓɔɔ niizang, ɓɔɔ Laa kasɛ nɛɛ zang wu palɛ ɓɛɛ. Ruu ɓaaɓɛ hãa ɓi kagn nɛɛ vuu ɓɔɔ shɔnzang rɛ̃rɛ ɓɛɛ kpang, ka ruu ɓɔɔ, mɔɔ ti shɛ̃ɛrɛ zang ɓáa kpang ɓɛɛ. 17Kɔɔ ruu vuu ɓɔɔ mɔɔ zi ka yeti ɓaaɓɛ, ka yuu ruu keɓe ta. Ruu shu Kpanti Kayisa, Kpanti Rooma saka tipi katɔ ya, kɔ ruu shu kpang?”
18Yeesɔ ti zi vuu shi kpang ɓɔɔ ri mang ka yeti ɓarɛ ɓi tɔ, a kɔɔ ri tɔɔ, “Nɔɔ zang ɓɔɔ nwãarɛ zang nɛɛ vuu palɛnang ɓɛɛ, nɔɔ gãsɛ m ka ruu viya? 19Nɔɔ tusu m saka ɓɔɔ nɔɔ shu saka tipi nɔng ta.”
A ri atɛ wu saka kati. 20A Yeesɔ hɛ̃ɛ ri tɔɔ, “Wee ɓu waa nyaating, nɛɛ nung wi ka yuu saka keɓe wiya?”
21Ri kasɛ wu nyaa tɔɔ, “Ɓɔɔ Kayisa.”
A Yeesɔ kɔɔ ri tɔɔ, “Nɔɔ a Kayisa vuu ɓiɓɛ ta, nɔɔ ti a Kpanti Laa ɓɔɔ ɓiɓɛ.”
22Ɓɔɔ ri tãa naa weɓe, ri mã naa ka danggn, a ri yaa wu ri daa kati.
Zang Saduki hɛ̃ɛ Yeesɔ ruu ka yuu ruu ɓɔɔ zang wisi zang paa nɛɛ sàa ɓɛɛ
(Mar 12:18-27; Luk 20:27-40)
23Ka diki kaɓa, zang Saduki ɓɔɔ ri tɔɔ ɓarɛ nɛɛ zang nɛɛ vɔ tɔ, zang seepaa ɓi tɔ̀ɔ́ nɛɛ saa kpang, ri a ka bii ɓiɓɛ. A ri hɛ̃ɛ wu tɔɔ, 24“Maalang, Musa kɔɔ rùu tɔɔ, zang ɓɔɔ nɛɛ yi jaa kagn nɛɛ soro ɓiɓɛ kpang, nɛɛ vɔ tɔ, ɓeezung wu sɔɔrɔ soro ɓiɓɛ, tɔ̀ɔ, wu yi wu jaa kati. 25Zang varɛ ɓɔɔ kagn ka teteng ɓuru, nàá ɓarɛ yi ri manziti. Jamari ɓarɛ ɓɔɔ tĩng shɔɔnang shing soro, yi jaa nɛɛ wu kpang, a vɔrɛ yàa ɓeezung ɓɔɔ pãng ka dakn ɓiɓɛ soro ɓiɓɛ. 26A ɓeezung naa sɔɔrɔ wu, a ti yi jaa nɛɛ wu kpang, ti vɔrɛ yaa soro kaɓa. Ɓeezung knti ɓɔɔgn ti naa sɔɔrɔ soro kaɓa tɔkn, a ti yi jaa nɛɛ wu kpang, ti vɔrɛ yaa wu. Dɔ̃lɔ nɔngkɔ, daa nɔng ka yuu ɓarɛ manziti nandon. 27A jaa soro kaɓa naa vɔ kaa nɛɛ knti. 28Ka diki ɓɔɔ zang naa wisi zang paa nɛɛ sàa, jaa soro kaɓa naa nwang ɓu kaa soro wi gbete ka teteng zang manziti kɔ ri shĩili wu ɓáa wiya? Ka ruu ɓɔɔ, ri shĩili wu katɔ kɔ nandon ɓɛɛ.”
29A Yeesɔ kasɛ ri nyaa tɔɔ, “Nɔɔ ning katɔ, ka ruu ɓɔɔ nɔɔ zi labeenang Kpanti Laa, nɛɛ náa vuu palɛnang ɓiɓɛ kpang ɓɛɛ. 30Zang nɛɛ naa wisi zang paa tɔ nɛɛ sàa, zang shing soro ɓi takpang, zang ti naa a zang wujɛ soro ɓi takpang nɛɛ zang gee ri kpang. Zang naa nwalɛ ɓi kaa naa zang nyaa shonang Kpanti Laa ɓɔɔ ri ka lapa ɓɛɛ. 31Ka yuu ruu ɓɔɔ zang naa wisi zang paa nɛɛ saa ɓɛɛ, nɔɔ gã vuu ɓɔɔ Kpanti Laa kɔɔ nɔɔ ka yuu ɓiɓɛ, gngn kpang ya? 32Kpanti Laa tɔɔ, ‘Nkɔ Laa Ibirayi, nɛɛ ɓɔɔ Ishaaku, nɛɛ ɓɔɔ Yakubu.’ Zang keɓe ri vɔlɔ tɔ doo tɛ̃ɛ tɛ̃ɛ. Wee Laa ɓaa yuu ɓiɓɛ nɛɛ wu Laa ɓarɛ ɓɛɛ, ruu zi ka wukɔ nɛɛ zang wisi ri paa tɔ nɛɛ sàa. Ka ruu ɓɔɔ, Laa ɓi Làá zang ɓɔɔ vɔ katɔ kpang, ɓi Laa zang ɓɔɔ ningkãari ɓɛɛ.” 33Zang ɓɔɔ ri kpalɛ zɔɔ tãa tɔ naa weɓe, ri mã naa ka danggn, ka ruu vuu ɓɔɔ wu tusu ɓɛɛ.
Nyaa dannang bang ɓɔɔ Laa dang ɓɛɛ
(Mar 12:28-34; Luk 10:25-28)
34Ɓu doo ɓɔɔ zang Farisi ri tãayi nɛɛ Yeesɔ yée zang Saduki yuu tɔ nɛɛ yee ɓɔɔ wu rang ɓɛɛ, a ri kpalɛ zɔɔ ka nɔng gbete. 35A zang gbete ɓɔɔ zi labeenang Laa dɔɔli ka teteng ɓarɛ, gãsɛ Yeesɔ, hɛ̃ɛ wu tɔɔ, 36“Maalang, ka yeti nyaa ɓɔɔ Kpanti Laa dangnɛ, ɓu wi bang wiya?”
37A Yeesɔ kasɛ wu nyaa tɔɔ, “Mɔ́ɔ kasɛ ruu Kpanti Laa ɓaaɓɛ nɛɛ yeti ɓaaɓɛ piti, nɛɛ suru bii ɓaaɓɛ piti, nɛɛ rɛ̃rɛnang ɓaaɓɛ piti. 38Wee nyaa bang ɓɔɔ Laa dang kɔ. Wukɔ ka tĩng. 39Ɓɔɔ ɓàng doo ɓiɓɛ, ɓi weɓe. ‘Kàsɛ̀ zang ɓɔɔ mɔɔ nwalɛ nɛɛ ri doo naa ɓɔɔ mɔɔ kasɛ bii ɓaaɓɛ kɔ.’ 40Labeenang Kpanti Laa ɓɔɔ Musa beeyi, nɛɛ yee ɓɔɔ rɛɛ zang nyaa shonang Kpanti Laa ri kɔɔrɔ piti, di yuu ɓi ka nyaa kɔ Kpanti Laa dang ziti ɓee kɔ.”
Kirisi ɓu Jaa zɔ̃ng wiya?
(Mar 12:35-37; Luk 20:41-44)
41Zang Farisi ri kpalɛ zɔɔ tɔ ka nɔng gbete, a Yeesɔ hɛ̃ɛ ri tɔɔ, 42“Nɔɔ kɔɔ ɓu nɛɛ Kirisi, zang ɓɔɔ naa a ɓɛɛ ɓu wiya? Ɓu jaa zɔ̃ng wiya?”
A ri kasɛ wu nyaa tɔɔ, “Jaa zɔ̃ng Dawuda.”
43Yeesɔ hɛ̃ɛ ri tɔɔ, “A ka ruu vi, Suru Laa tusu Dawuda gbalang, a zirɛ, a ɓaa Kirisi nɛɛ, ‘Kpanti’ viya? Ka ruu ɓɔɔ, Dawuda kɔɔyi tɔɔ,
44“ ‘Kpanti Laa kɔɔ Kpanti mɛɛ tɔɔ,
“Nwang ta naa nakn mɛɛ,
n shing zang ɓɔɔ ri shing jĩng nɛɛ mɔɔ kpang ditɔ,
mɔɔ naa ri nɛɛ doo ɓaaɓɛ.” ’
45Dawuda nɛɛ ɓàa wu nɛɛ, ‘Kpanti,’ ɓu wi bang ka teteng ɓarɛ wiya?”
46Zang gbete ɓɔɔ zi naa ɓɔɔ wu kasɛ Yeesɔ nyaa takpang. Vuu ɓɔɔ gaayu ka diki kaɓa, zang gbete ɓɔɔ paasɛ wu ruu hɛ̃ɛnang ɓɔɔgn kpang.
Currently Selected:
Matiyu 22: mzmNT
Highlight
Share
Copy
Want to have your highlights saved across all your devices? Sign up or sign in
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust
