Zang Shonang Yeesɔ 22

1“Rɛɛ manzung, nɛɛ rɛɛ daa mɛɛ, nɔɔ ɓaa shoo, ka ruu kɔ n kɔ̀ɔ́ nɔɔ ka yuu mɛɛ ɓee.” 2Ɓɔɔ ri tãayi rang ri yee nɛɛ nyaa Yahudi, ri ɓaa shoo kaa tɔ̃ɔ. A kɔɔyi tɔɔ:

3“N zang Yahudi. Zang yi m ka gari Taasu ka tipi Silisiya, n bang kaa Urushalima ka nihn. N bee laa ka bii Gamaliyel, zang tusu m nyaa dannang rɛɛ dabang ɓuru gbãng gbãng. N ti kasɛ nɛɛ n pàlɛ́ Laa shonang gbãng gbãng naa wee nɔɔ palɛ lɛɛkɔ ɓee. 4N dang zang ɓɔɔ ri dũng gbalang keɓe jĩng, n nyɔ̀kɔ̀ ri ɓɔɔ vɔrɔ. N yiki zang varɛ nɛɛ zang soro n mã ri, n looro ri ka sãa. 5Zang bang zang ɓɔɔ ri dɔɔ vuu ka Gãa Laa ɓɛɛ nɛɛ rɛɛ zang bang bang zang Yahudi ri kɔ̀ɔ́ nɔɔ katɔ nɔɔ nɛɛ hɛ̃ɛ ri ɓɛɛ. N ta labeenang ka naa ɓarɛ kɔ nɛɛ n daa a rɛɛ manzung ɓuru zang Yahudi ɓɔɔ ri ka gari Damasiku ɓɛɛ. Ǹ daa ka nɔng kaɓa, nɛɛ n daa yiki rɛɛ zang keɓe, ń mã ri nɛɛ saka, n atɛ ri ka Urushalima, tɔ̀ɔ, zang naa dang ri jĩng.

Bulu kɔɔ naa ɓɔɔ wu kɔ̃̀sɔ̀ yeti ɓɛɛ

(ZSY 9:1-19; 26:12-18)

6“N daa kana, n a tɔ ka Damasiku naabm, bɛ̀ɛ́ laa kaa dãngdãng yuu. Nɔng yakɛ nɛɛ lapa kiiri m nyaa ka teteng tantɛnang. 7N watɛ ka tipi, a n tãa yee ɓaa m nyaa nɛɛ lapa nɛɛ, ‘Shaawulu, Shaawulu, mɔɔ dang m jĩng vi nɔngkɔ viya?’ 8A n hɛ̃ɛ wu nɛɛ, ‘Ɓu mɔkɔ wiya Kpanti.’ Kɔɔ m tɔɔ, ‘Nkɔ Yeesɔ yɔɔ Nazara ɓɔɔ mɔɔ dang m jĩng ɓɛɛ.’ 9Zang ɓɔɔ ri nɛɛ n ri zi nɔng ɓɔɔ yakɛ katɔ, a ri tãa yee zang ɓɔɔ rang yee nɛɛ n kaa takpang. 10N hɛ̃ɛyi n tɔɔ, ‘A ń palɛ ɓu kaa viya Kpanti.’ A Kpanti kɔɔ m tɔɔ, ‘Yupaa mɔɔ daa ka yeti gari Damasiku, zang daa kɔɔ mɔɔ vuu piti ɓɔɔ Laa shingnɛ nɛɛ mɔɔ palɛ wu ɓɛɛ, ka nɔngkɔ.’ 11Jĩng mɛɛ zi nɔng takpang, ka ruu nɔng ɓɔɔ yakɛ keɓe, a zang ɓɔɔ ri daa nɛɛ n, ri yi m kaa naa ri daa nɛɛ n ka Damasiku.

12“Yɔɔ ɓɔɔ kagn ka gari Damasiku zang ɓaa wu nɛɛ Hananiya. Dṹng nyaa ɓɔɔ Laa dang ɓɛɛ gbãng gbãng, zang Yahudi ɓɔɔ ka gari kaɓa, ri rang ruu ɓiɓɛ tɔ̃ɔ. 13A ka bii mɛɛ, a naa shii ka kagn mɛɛ, a kɔɔ m tɔɔ, ‘Manzung Shaawulu, jĩng ɓaaɓɛ wu zi nɔng ta tɔkn.’ N tantɛ nɔng zinang, a n zi wu kati. 14Kɔɔ m tɔɔ, ‘Làá rɛɛ dabang ɓuru zɔ̃ng mɔɔ nɛɛ mɔɔ zi vuu ɓɔɔ wu kasɛ ɓɛɛ, nɛɛ mɔɔ zi zang shonang ɓiɓɛ ɓɔɔ tɔ̃ɔ ɓɛɛ, nɛɛ mɔɔ ti tãa ruu nɛɛ nyaa ɓiɓɛ. 15Ka ruu ɓɔɔ, mɔɔ naa nwang zang ɓɔɔ naa kɔɔ zang piti ruu ka yuu ɓiɓɛ, ka yuu vuu kɔ mɔɔ zirɛ a mɔɔ ti tãa ɓee. 16Mɔɔ gã ɓu kaa vi kãntang viya? Yupaa zang palɛ mɔɔ batizima, zang kɔsɔ mɔɔ vuu shi kpang ɓaaɓɛ, ka ruu ɓɔɔ, mɔɔ ɓàa nung ɓiɓɛ ɓɛɛ.’

Laa ɓaa Bulu nyaa nɛɛ wu kɔɔ zang ɓɔɔ ri zang Isirela kpang ruu ɓiɓɛ

17“N gbãayu n daa Urushalima. N gàá Laa ka yeti Gãa Laa, a n rɔ̃kɔ. 18N zi Kpanti Laa rang yee kana, a kɔɔ m tɔɔ, ‘Shing doo gn, mɔɔ nwangnɛ mɔɔ yaa Urushalima, ka ruu ɓɔɔ, ri tà ruu ɓɔɔ mɔɔ naa kɔ̀ɔ́ ka yuu mɛɛ kpang.’ 19N kɔɔ wu n tɔɔ, ‘Kpanti, ri zi naa ɓɔɔ n daarɛ ka gãa zɔɔ kpalɛnang n yiki zang, a n ti nyɔkɔ zang ɓɔɔ ri shing danggn ka bii ɓaaɓɛ ɓɛ̀ɛ́ tɔ. 20Ka ɓɔɔ zang nyɔ Istifanu yɔɔ ɓɔɔ kɔɔ ruu ka yuu ɓaaɓɛ vɔrɔ, n ka nɔng. Nyaa mɛɛ kagn, nkɔ ti gãng jĩng ka fɔ̃ɔrɔ zang ɓɔɔ ri nyɔ wu vɔrɔ ɓɛɛ.’ 21A Kpanti kɔɔ m tɔɔ, ‘Dita, N shong mɔɔ ka nɔng beebang, ka bii zang ɓɔɔ ri zang Isirela kpang ɓɛɛ.’ ”

22Zang ɓɔɔ ri kpalɛ zɔɔ ri ɓàa Bulu shoo sasak, ɓɔɔ naa kɔɔ ruu keɓe, ri mɛɛ nyaa ka lapa nabm tɔɔ, “Nɔɔ dita nɛɛ wu, nɔɔ daa nyɔ wu vɔrɔ. Daa naa ɓɔɔ zɔ̃ng zang ɓɔɔ naa weɓe nwang ningkãari kpàng.” 23Ri gòó nyaa kana, ri ti wiiri fɔ̃ɔrɔ ɓarɛ kana lapa, a ri ti vang zũng tapuru ka lapa. 24Yɔɔ zang bang sɔɔja Rooma kɔ̀ɔ zang ɓiɓɛ nɛɛ ri dita nɛɛ Bulu ka yeti nɔng ɓɔɔ gãa rɛɛ sɔɔja kagn ɓɛɛ. Nɛɛ ri nyɔ wu nɛɛ gbãa, tɔ̀ɔ, wu kɔɔ ruu vuu ɓɔɔ wu palɛ zang Yahudi, ri haa nyaa ka yuu ɓiɓɛ nɔngkɔ ɓɛɛ. 25Zang mã wu, zang tɔɔ zang nyɔ wu kaa tɔ, a Bulu hɛ̃ɛ zang bang sɔɔja ɓɔɔ shii ka nɔng naabm tɔɔ, “Nyaa daanang kasɛ tɔ nɛɛ nɔɔ nyɔ zang ɓɔɔ zang Rooma, nɔɔ ti dɔng wu ruu ka takpang ɓɛɛ ya?”

26Ɓɔɔ yɔɔ sɔɔja tãa naa weɓe, daa ka bii zang bang ɓarɛ, daa hɛ̃ɛ wu nɛɛ, “Mɔɔ nɛɛ mɔɔ palɛ ɓu viya? Yɔɔ keɓe ɓi zang Rooma.”

27A yɔɔ zang bang sɔɔja daa ka bii Bulu daa hɛ̃ɛ wu, tɔɔ, “Kɔɔ m jong, mɔɔ zang Rooma ya?”

Bulu kasɛ wu nyaa tɔɔ, “Nn.”

28A yɔɔ zang bang sɔɔja kɔɔ wu tɔɔ, “N hoo nwannang zang Rooma mɛɛ m nɛɛ saka dɔɔli.” Bulu kɔɔ wu tɔɔ, “Zang yi m nɛɛ mani.”

29Zang ɓɔɔ bɛ̀ɛ́ ri tɔɔ ri nyɔ Bulu, nɛɛ tɔ̀ɔ, wu kɔɔ ri vuu ɓɔɔ wu palɛ, ɓɔɔ ri tãa naa weɓe ri gɔ̃ɔ bii nɛɛ knti tantɛnang. Yɔɔ zang bang sɔɔja kaa vɔrɔ ka ɓɔɔ wu naa zirɛ nɛɛ Bulu ɓi zang Rooma ɓɛɛ, a wu ti mã wu nɛɛ soo saka ɓɛɛ.

Bulu ka tĩng zang ɓɔɔ ri jɛ̃ɛ zang ruu ɓɛɛ

30Zang bang sɔɔja keɓe, kasɛ nɛɛ wu zi vuu ɓɔɔ zang Yahudi ri haa Bulu nyaa kagn bii, ka ruu ɓiɓɛ ɓɛɛ. Ka ruu nɔngkɔ, ɓaa rɛɛ zang bang bang zang ɓɔɔ ri dɔɔ vuu ka Gãa Laa ɓɛɛ, nɛɛ rɛɛ zang ɓɔɔ ri jɛ̃ɛ zang ruu ɓɛɛ, nɛɛ ri nwáng ka tipi. A kɔɔ zang nɛɛ zang kãlɛ saka ɓɔɔ zang mã Bulu nɛɛ mani ɓɛɛ, zang atɛ wu nɛɛ wu shii ka tĩng ɓarɛ nandon.

Currently Selected:

Zang Shonang Yeesɔ 22: mzmNT

Highlight

Copy