Zang Shonang Yeesɔ 20

Bulu gbãayu ka Makidoniya nɛɛ gari Heleni

1Nyaa ɓɔɔ zang haa ɓɛɛ naa kaa tɔ, a Bulu shong nyaa ka rɛɛ zang ɓɔɔ ri dũng Laa nɛɛ ri arɛ. Mã ri danggn, a jee ri nyaa nɛɛ wu daa kaa tɔ. A yaa ri, daa kaa tipi Makidoniya. 2Riki tipi keɓe, mã ri danggn tɔ gbãng gbãng, a yaa ri daa kaa gari Heleni. 3Nwang ka Heleni shala taati. Bɛ̀ɛ́ kpalɛ bii kana nɛɛ wu vang laana wu daa kaa tipi Siriya a zirɛ zang Yahudi ri tɔ̀ng zɔɔ tɔ, ka yuu ɓiɓɛ. A mang ka yeti ɓiɓɛ, nɛɛ wu sɔɔ kaa nɛɛ tipi Makidoniya wu gbãayu. 4Soopata jaa Firifu, yɔɔ gari Beriya daa nɛɛ wu, a ɓɔɔ zang gari Tesalonika rɛɛ Arisitaku nɛɛ Sakundu, nɛɛ Gaayu yɔɔ gari Daabe, nɛɛ Timoti a ɓɔɔ kaa rɛɛ Tikiku nɛɛ Torofimu zang tipi Asiya. 5Ri daa ɓarɛ ka tĩng, ri daa gã ruu ka Torowasa. 6Ruu vang laana ka Filipi bɛ̀ɛ́ zang shaa nyaalaa borodi ɓɔɔ zang tɛ̃ɛ yisi kagn kpang tɔ. Ruu naa ĩi ri ka Torowasa, bɛ̀ɛ́ ri roo tɔ ka nɔng, diki ɓarɛ daa maani. Ruu nwáng ka nihn diki manziti.

Bulu jee zang nyaa ka ruu ɓɔɔ wu daa kaa tɔ ɓɛɛ

7Ka Diki Ɔ̃sɔnang nɛɛ laarang, ruu kpalɛ zɔɔ ruu tɔɔ ruu shaa borodi, a Bulu rang zang ɓɔɔ ri kpalɛ ɓɛɛ yee, ka ruu ɓɔɔ tɔɔ nɔng nɛɛ gãntɛ tɔ, wu daa kaa tɔ ɓɛɛ. Rang ri yee sasak gãmbang zĩi a nɛɛ mani. 8Waa zàáng sɔɔ kagn dɔɔli ka yeti gãa lapa ɓɔɔ ruu nwang kagn ɓɛɛ. 9A yɔɔ jasang ɓɔɔ zang ɓaa nung ɓiɓɛ nɛɛ Afitiko nwang ka nyaa hangka ɓɔɔ zang ɓee ka bii binting ɓɛɛ. A hingro kpãa wu ka ɓɔɔ Bulu dɔ̃ɔ ruu ɓɔɔ wu kɔɔyi doo nɛɛ tĩng ɓɛɛ. Ɓɔɔ hingro naa yi wu dɔ̃ɔ gbete, a watɛ kaa nɛɛ lapa nɛɛ yeti gãa ɓɔɔ wukɔ duusu ka lapa daa kaa dakn taati ɓɛɛ. Ɓɔɔ zang naa tuu wu, vɔ tɔ. 10A Bulu shooro ka tipi daa watɛ ka yuu ɓiɓɛ, a kɔ̃ng wu. A kɔɔyi tɔɔ, “Yeti manɛ wu lasɛ kpang, ɓi doo ningkãari.” 11Bulu gbãayu ka lapa a shá borodi shaayi. Rang zang yee nɔng gãntɛ nɛɛ mani a yupaa daa ɓi kati. 12Á zang yɔɔ jasang keɓe, ri daa gãa kaa nɛɛ wu ningkãari. Ri tãa tĩnang dɔɔli.

Ri sɔɔ mii waapo nɛɛ Torowasa, ri daa ka Miletu

13Ruu daa ɓuru kaa tĩng ruu vang laana ruu daa ka gari Aso, ruu tɔɔ ruu daa tuu Bulu ka nɔngkɔ, ka ruu ɓɔɔ, bɛ̀ɛ́ kɔɔyi nɛɛ wu daa ɓi nɛɛ doo ɓɛɛ. 14Ɓɔɔ ruu daa ɓee zɔɔ ka Aso, naa vang laana kati, a ruu daa kaa Mitileni. 15Rùu yupaa nɛɛ laana, ɓɔɔ nɔng gãntɛ, ruu a tɔ ka Kiyosi. Ɓɔɔ nɔng gãntɛ tɔkn, ruu a tɔ ka Sama. A ɓɔɔ nɔng naa gãntɛ tɔkn, ruu a tɔ ka Miletu. 16Bulu kɔɔ ɓi ka yeti ɓiɓɛ nɛɛ wu tɛɛ ɓi nɛɛ laana wu daa ka Afisa, ka ruu ɓɔɔ, wu kasɛ wu suukãng ka Asiya kpang ɓɛɛ. Làábii nɛɛ wu kasɛ wu shɛ̃ɛ Urushalima ka diki nyaalaa Pentiku.

Bulu jee zang bang ɓɔɔ ri ka gãa Laa nyaa ka Asiya

17Bulu shong nyaa nɛɛ Miletu nɛɛ zang daa ɓàa wu nyaa ka rɛɛ zang bang zang ɓɔɔ ri dũng Laa ka Afisa ɓɛɛ. 18Ɓɔɔ ri arɛ, kɔɔ ri tɔɔ, “Nɔɔ zi zɔ̃ng nwannang ɓɔɔ n nwang nɛɛ nɔɔ tɔ, ɓu doo ɓɔɔ n a ka tipi Asiya ɓɛɛ. 19N palɛ shonang Kpanti Laa nɛɛ miiri ka jĩng mɛɛ, n lakɛ jĩng kpang. Ka yeti jĩng dannang ɓɔɔ n dangnɛ ka ɓɔɔ zang Yahudi ri tɔ̀ng zɔɔ ka yuu mɛɛ ɓɛɛ. 20Nɔɔ ti zi naa ɓɔɔ n wàasɛ̀ nɔɔ vuu ɓɔɔ tɔ̃ɔ ɓɛɛ kpang tɔ. N kɔɔ nɔɔ ruu tɔ̃ɔ katɔ ka ɓɔɔ n tusu nɔɔ vuu ka jĩng zang piti, a n ti dṹng nɔɔ ɓɔɔ ka gãa gãa, n tùsú nɔɔ ɓɛɛ. 21N shaarɛ rɛɛ zang Yahudi nɛɛ zang ɓɔɔ ri zang Isirela kpang nyaa nandon, n tɔɔ ri yaa vuu shi kpang ɓɔɔ ri palɛ ɓɛɛ. Ri kɔ̃sɔ yeti ɓarɛ, ri a ka bii Laa. Ri shing danggn kaa bii Kpanti ɓuru Yeesɔ. 22Bɛ̀ɛ́ n daa kaa tɔ Urushalima. Suru Laa dɔ̃ɔ m nɛɛ n daayi, n ti zi vuu ɓɔɔ zang daa palɛ m ka nɔng kaɓa kpàng. 23Suru Laa shaarɛ m nyaa ka gari ɓɔɔ n daa kagn piti, nɛɛ zang daa mã m ka sãa, zang ti dang m jĩng. 24N ti tɔɔ m kpang nɛɛ suru bii mɛɛ daa naa vuu ɓɔɔ tɔ kpang. Ǹ kasɛ n palɛ vuu ɓɔɔ zang shong m ɓɛɛ, n ti hangsɛ shonang ɓɔɔ Kpanti Yeesɔ a m nɛɛ n palɛ ɓɛɛ. Shonang ɓɔɔ nɛɛ n kɔɔrɔ zang rúu, ka yuu tɔ̃ɔ ɓɔɔ Laa pàlɛ́ zang ɓɛɛ.

25“Nɔɔ zang ɓɔɔ n rakɛ ka teteng manɛ, n kɔɔrɔ nɔɔ Ruu Tɔ̃ɔ Kpanti roonang Laa ɓɛɛ, n zi tɔ, nɔɔ zi m takpang dòndòng. 26Ka ruu nɔngkɔ, n kɔɔ nɔɔ ruu keɓe, kɔ́pɔ́ zĩi zang ɓɔɔ tɔ̀ɔ́ kagn yuu mɛɛ kpang lɛɛkɔ (zang ɓɔɔ nɛɛ yaa gbalang keɓe, ruu mɛɛ hãa ɓi tɔ̀ɔ́gn kpang). 27Ka ruu ɓɔɔ, n kɔɔ nɔɔ vuu ɓɔɔ Laa kasɛ ɓɛɛ tɔ nandon, n zárɛ̀ doo kpang ɓɛɛ. 28Nɔɔ gãng jĩng ka yuu manɛ nɛɛ zang ɓɔɔ Suru Laa, a ri nɔɔ ka naa ɓɛɛ waasɛ̃. Nɔɔ nwang jagãng zang ɓɔɔ ri dũng Laa, ɓɔɔ ri nwàng ka ruu ɓɔɔ, wu hoo ri nɛɛ zĩi Jaa ɓiɓɛ ɓɛɛ. 29N zi tɔ, n nɛɛ daa tɔ, zang ɓɔɔ ri tusu zang vuu, ɓɔɔ ri nwang naa zaa wisi ɓɔɔ shaa varɛ dɔɔli ɓɛɛ, ri naa a ditɔ ka teteng manɛ. Gn manɛ kɔng ri kpang. 30Ka teteng manɛ, zang ɓɔɔ ri naa risi ruu niizang ditɔ, wu nwang kaa naa sèé, nɛɛ tɔɔ ri gɔ̃ɔ zang ɓɔɔ ri dũng Laa ri dũng kaa rikɔ. 31Nɔɔ gãng jĩng kagn, danggn wu ning nɔɔ naa ɓɔɔ ka saa taati, n yaa ɓɔɔ n mangkɛ zang ɓu kpang. N mangkɛ nɔɔ nɛɛ zĩi nɛɛ laagɛ̃ piti, nɛɛ miiri ka jĩng mɛɛ ɓɛɛ.

32“N yaa nɔɔ tɔ, ka naa Laa nɛɛ yee ɓiɓɛ. Yee ɓiɓɛ ɓɔɔ zunung ɓɔɔ wu yiti nɔɔ, nɔ́ɔ bangnɛ wu ti a nɔɔ tĩnang tãanang ɓɔɔ wu shing zang ɓɔɔ wu shɛ̃ɛrɛ ri katɔ ɓɛɛ. 33N tɔɔ kpang nɛɛ saka, kɔ fɔ̃ɔrɔ zang ɓɔɔ, wu nɛ̀ɛ́ raa ɓɔɔ mɛɛ kpang. 34Nɔɔ zi tɔ, n palɛ shonang nɛɛ naa mɛɛ keɓe, ń wàlɛ̀ vuu ɓɔɔ n kasɛ, nɛɛ vuu ɓɔɔ zang ɓɔɔ ri nɛɛ n ri kasɛ ɓɛɛ. 35N tusu nɔɔ ka vuu piti nɛɛ nɔɔ palɛ shonang gbãng gbãng naa weɓe, nɔ́ɔ yi zang ɓɔɔ ri lakɛ takpang naa ka bii. Danggn yee ɓɔɔ Kpanti Yeesɔ kɔɔ nɛɛ yuu ɓiɓɛ, wu ning nɔɔ kpang. Kɔɔyi tɔɔ, ‘Mɔɔ tã̀a tĩnang, ka ɓɔɔ mɔɔ a zang vuu, ɓa ɓɔɔ zang kɔ a mɔɔ jong katɔ.’ ”

36Ɓɔɔ Bulu hangsɛ nyaa ruu keɓe, tang ka tipi, a gaa Laa nɛɛ ri nandon. 37Ri káarɛ̀ kaa tɔ nandon ka ɓɔɔ ri jee wu nyaa daanang, a ri kɔ̃ng wu ɓɛɛ. 38Yee ɓiɓɛ ɓɔɔ wu kɔɔyi nɛɛ ri zi wu takpang dòndòng ɓɛɛ, kpãa ri ka yeti dɔɔli. Ri daa shing wu kaa nɔng laana.

Currently Selected:

Zang Shonang Yeesɔ 20: mzmNT

Highlight

Copy