Zang Shonang Yeesɔ 13

Suru Laa zɔ̃́ng Baranaba nɛɛ Shaawulu, a shong ri

1Ka teteng zang ɓɔɔ ri dũng Laa ka Antakiya ɓɛɛ rɛɛ zang nyaa shonang Laa kagn nɛɛ rɛɛ maalang. Zang keɓe ɓi rɛɛ Baranaba, nɛɛ Simiyon ɓɔɔ zang ɓaa wu nɛɛ “Zang vĩiri” ɓɛɛ. Nɛɛ Lukiyu yɔɔ Kiranɛ, a ɓɔɔ Manaya ɓɔɔ báng ka yeti gãa gbete nɛɛ Hiridu ɓɛɛ, a ɓɔɔ Shaawulu. 2Diki ɓɔɔgn ri bang Laa, a ri seng nyaalaa a Suru Laa kɔɔ ri tɔɔ, “Nɔɔ zɔ̃ng m Shaawulu nɛɛ Baranaba ka ruu shonang, ɓɔɔ n ɓàa ri nyaa ɓɛɛ.”

3Ri seng nyaalaa tɔ, ri ti gaa Laa, a ri shĩili rɛɛ Shaawulu nɛɛ Baranaba naa kaa yuu, a zang lɔɔ ri nyaa kati nɛɛ ri dita.

Baranaba nɛɛ Shaawulu ri daa ka Kuburu

4Baranaba nɛɛ Shaawulu ɓɔɔ Suru Laa shɔng ri, ri daa ka gari Selusiya. Ri vang laana nɛɛ Selusiya ri daa ka Kuburu. 5Ri a tɔ ka Salami, a ri kɔɔrɔ zang Ruu Laa ka gãa zɔɔ kpalɛnang. Yɔhana ɓɔɔ zang ɓaa wu nɛɛ Maraku nɛɛ ri ning, yì ri naa ka shonang.

6Ri riki tipi Kuburu tɔ nandon, ri a nɛɛ mani ka gari Paafo. Ka Paafo ri kpisi yuu nɛɛ yɔɔ Yahudi ɓɔɔ hɛ̃ɛ paa zang ɓaa wu nɛɛ Jaa Yashuwa. Suu sèé nɛɛ wu zang nyaa shonang Laa. 7Jaa Yashuwa ɓi ka teteng rɛɛ zang ɓɔɔ ri dũng Sajiya Bulu, gɔmna Kuburu ka knti ɓɛɛ. Gɔmna keɓe, ɓi zang ɓɔɔ zi vuu dɔɔli ɓɛɛ. A gɔmna ɓaa Baranaba nɛɛ Shaawulu nyaa nɛɛ wu tãa Ruu Laa. 8Yɔɔ ɓɔɔ hɛ̃ɛ paa keɓe zang ɓaa wu nɛɛ Elayima nɛɛ nyaa Heleni, kasɛ nɛɛ wu zãa ri Ruu Laa kɔɔnang katɔ. Kasɛ kpang nɛɛ gɔmna wu shing danggn ka bìí Laa kpang. 9A Shaawulu ɓɔɔ zang ɓaa wu nɛɛ Bulu ɓɛɛ, Suru Laa a ka bii ɓiɓɛ. Shu yɔɔ ɓɔɔ hɛ̃ɛpaa keɓe jĩng ka bii, 10a kɔɔyi tɔɔ, “Jaa suru shi kpang kiɓi. Mɔkɔ kasɛ kpang nɛɛ zang pálɛ̀ vuu ɓɔɔ tɔ̃ɔ kpang. Yeti ɓaaɓɛ ɓi zang nwãarɛnang kɔ shɛ̃ɛning. Mɔɔ kãa gbalang diki diki nɛɛ mɔɔ risi Ruu Laa wu nwang kaa naa sèé. 11Náa vuu palɛnang Laa lee mɔɔ ditɔ kãntang keɓe. Jĩng ɓaaɓɛ zuu katɔ, mɔɔ zi nɔng kpang diki bee katɔ tɔkɔlɔng.”

A pũngku nɛɛ nɔng tɔɔnang ri zúu Elayima jĩng kati. Rakɛ, tã̀lɛ́ naa, kãa zang ɓɔɔ yí wu naa ɓɛɛ. 12Ɓɔɔ gɔmna zi vuu ɓɔɔ palɛ Elayima, shing danggn kaa bii Laa, ti mã naa ka danggn, ka vuu ɓɔɔ Baranaba nɛɛ Shaawulu ri tusu ka yuu Kpanti Laa ɓɛɛ.

Bulu nɛɛ Baranaba ri daa ka Antakiya ɓɔɔ ka tipi Pisidiya ɓɛɛ

13Bulu nɛɛ zang ɓɔɔ ri nɛɛ wu ɓɛɛ, ri vang tonsi nɛɛ Paafo, ri a ka Paaga ɓɔɔ ka tipi Pamfiliya ɓɛɛ. A Yɔhana yaa ri, gbãayu daa Urushalima. 14Ri sha ɓarɛ kaa nɛɛ Paaga ri daa ka Antakiya ɓɔɔ ka tipi Pisidiya ɓɛɛ. Ka Diki Ɔ̃sɔnang, ri daa ka gãa zɔɔ kpalɛnang, a ri nwáng ka tipi. 15Ka knti ɓɔɔ zang hangsɛ labeenang nyaa dannang Musa nɛɛ rɛɛ labeenang zang nyaa shonang Laa gãnang tɔ, zang bang gãa zɔɔ kpalɛnang, ri shong nyaa ka bii ɓarɛ tɔɔ, “Rɛɛ manzung ɓuru, vuu ɓɔɔ nɔɔ nɛ́ɛ tɔɔ nɔɔ kɔɔ zang kagn, ɓɔɔ mã ri danggn, nɔɔ kɔɔ ta.”

16A Bulu yupaa kati, wii naa, a kɔɔyi tɔɔ, “Zang Isirela nɛɛ zang ɓɔɔ nɔɔ zang Isirela kpang, ɓɔɔ nɔɔ káa vɔrɔ Laa katɔ ɓɛɛ, nɔɔ ɓaa shoo. 17Làá rɛɛ zang Isirela keɓe, zɔ̃́ng rɛɛ dabang ɓuru. A shing ri, ri shang dɔɔli, a ri ti nwang zang bang ka ɓɔɔ ri nwang naa zang zanti ka tipi Masara ɓɛɛ. A ti nwangsɛ ri nɛɛ tipi kaɓa nɛɛ naa vuu palɛnang ɓiɓɛ. 18Laa ti mã danggn nɛɛ ri nung saa laa ziti ka jĩngti. 19A ningsi zang ɓɔɔ ri zi Laa kpang doo laa manziti ka tipi Kaana, a basɛ rɛɛ zang ɓiɓɛ tipi rɛɛ zang keɓe. 20Ri nwang kagn saa laa maani dakn dɛ̃ɛti a tu laa ziti tu kopi.

“Nɛɛ knti, Laa yiki ri zang ɓɔɔ jɛ̃ɛ ri ruu ɓɛɛ sasak a nɛɛ mani ka yuu Samayila zang nyaa shonang Laa. 21A zang Isirela ri naa kɔɔyi, nɛɛ ri kasɛ kaa kpanti, a Laa yi ri Sɔɔlì jaa Kiishi yɔɔ doo laa Biliyaminu. Sɔɔlì roo kpanti zang Isirela saa laa ziti. 22Ka knti ɓɔɔ wu nwangsɛ Sɔɔlì, a yi Dawuda kpanti. Laa kɔɔ ruu ka yuu Dawuda tɔɔ, ‘N walɛ Dawuda jaa Jeesi tɔ, zang ɓɔɔ yeti mɛɛ kasɛ ɓɛɛ, wukɔ naa palɛ vuu piti ɓɔɔ n kasɛ nɛɛ wu palɛ ɓɛɛ.’

23“Laa atɛ zang Isirela, zang ɓɔɔ ta yuu ɓarɛ nɛɛ zɔ̃ng yɔɔ keɓe kɔ, naa ɓɔɔ wu a nyaa ɓɛɛ. Zang keɓe wukɔ Yeesɔ. 24Ɓɔɔ bɛ̀ɛ́ Yeesɔ a gn kpang, Yɔhana kɔɔ zang Ruu Laa ka tipi Isirela tɔɔ, ri kɔ̃sɔ yeti ɓarɛ, zang palɛ ri batizima. 25Ɓɔɔ bɛ̀ɛ́ Yɔhana hangsɛ shonang ɓiɓɛ ɓi kaa tɔ, hɛ̃ɛ zang tɔɔ, ‘Nɔɔ kɔɔ ɓu nɛɛ nkɔ wiya? Wu nkɔ zang kaɓa ɓɔɔ nɔɔ gã wu ɓɛɛ kpang. Zang ɓɔɔ a doo naa ka knti mɛɛ ɓɔɔ n daa naa ɓɔɔ n kãlɛ soo koodoo ɓiɓɛ kpang ɓɛɛ.’

26“Rɛɛ manzung zɔ̃ng Ibirayi, nɛɛ rɛɛ zang ɓɔɔ nɔɔ zi Laa kpang, ɓɔɔ nɔɔ kaa vɔrɔ Laa kaa tɔ ɓɛɛ, zang shong rùu kɔ nyaa nɛɛ ruu, ɓɔɔ ta yuu ɓuru keɓe. 27Zang ɓɔɔ ri nwang ka Urushalima nɛɛ rɛɛ zang bang ɓarɛ ri zi Yeesɔ nung kpang. Ri ti zi rúu rɛɛ zang nyaa shonang Laa ɓɔɔ zang gã ka Diki Ɔ̃sɔnang diki diki kpang, ka ruu nɔngkɔ, ri palɛ vuu ɓɔɔ rɛɛ zang nyaa shonang Laa keɓe ri kɔɔ tɔ, ka ɓɔɔ ri dɔng wu ruu ɓɛɛ. 28Ri ĩi vuu shi kpang ɓɔɔ wu palɛ ɓɔɔ daa naa ɓɔɔ zang nyɔ wu vɔrɔ kpang. Ri kɔɔ Bilatu nɛɛ wu nyɔ wu vɔrɔ doo nɛɛ mani. 29Ka ɓɔɔ ri palɛ vuu ɓɔɔ zang beeyi nɛɛ zang naa palɛ wu tɔ nandon, ri witi vɔrɔ ɓiɓɛ nɛɛ yuu laa, ri gbãa wu ka saa. 30Laa naa wisi wu paa nɛɛ saa. 31Nwálɛ́ nyaa diki dɔɔli ka bii rɛɛ zang ɓɔɔ ri a nɛɛ wu nɛɛ Galili, ri a ka Urushalima ɓɛɛ. Rikɔ kɔɔ zang vuu keɓe.

32“Ruu atɛ nɔɔ ruu tɔ̃ɔ, ruu kɔɔ nɔɔ nɛɛ, nyaa ɓɔɔ Laa a rɛɛ dabang ɓuru, 33nwang tɔ niizang ka teteng ɓuru ɓɔɔ ruu zɔ̃ng ɓarɛ ɓɛɛ. Ka ɓɔɔ wu wisi Yeesɔ paa nɛɛ saa ɓɛɛ. Naa ɓɔɔ zang bee ka yeti labeenang Zabura ziti ɓɛɛ nɛɛ,

“ ‘Mɔkɔ jaa mɛɛ,

lɛɛkɔ n nwang Daa ɓaaɓɛ tɔ.’

34Ka ɓɔɔ Laa wisi wu paa nɛɛ saa nɛɛ wu pũng takpang ɓɛɛ, Laa kɔɔyi tɔɔ,

‘N pàlɛ́ nɔɔ tɔ̃ɔ ɓɔɔ nwang ditɔ niizang, ɓɔɔ n kɔɔ Dawuda ɓɛɛ katɔ.’

35Zang bee ka yeti labeenang Zabura ka nɔng ɓɔɔ kagn tɔɔ,

‘Mɔɔ yáa zang tɔ̃ɔ ɓaaɓɛ wu pũngnɛ kpang.’

36“Dawuda ka diki ɓiɓɛ pàlɛ́ zang ɓiɓɛ shonang naa ɓɔɔ Laa kasɛ ɓɛɛ. Vɔrɛ, a zang gbãa wu ka sàá rɛɛ dabang ɓiɓɛ, a vɔrɔ ɓiɓɛ pũngnɛ. 37Zang kaɓa ɓɔɔ Laa wisi wu paa nɛɛ saa pũ̀ng ɓi kpang.

38“Ka ruu nɔngkɔ rɛɛ manzung, nɔɔ zirɛ, zang kɔɔ nɔɔ nɛɛ zang yàá nɔɔ gbalang vuu shi kpang manɛ katɔ ka ruu yɔɔ keɓe kɔ̀. 39Zang ɓɔɔ nɛɛ shing danggn ka bii Yeesɔ keɓe, nwang zang tɔ̃ɔ ka tĩng Laa. Nɔɔ nwang zang tɔ̃ɔ ka yeti vuu piti ɓɔɔ bɛ̀ɛ́ nyaa dannang Musa risi nɔɔ, nɔ́ɔ nwang zang tɔ̃ɔ ka tĩng Laa kagn kpang ɓɛɛ. 40Ka ruu nɔngkɔ, nɔɔ palɛ waasɛ̃ vuu ɓɔɔ rɛɛ zang nyaa shonang ri kɔɔyi, nɛɛ pálɛ̀ nɔɔ. Ri kɔɔyi tɔɔ,

41“ ‘Nɔɔ zirɛ, ɓɔɔ nɔɔ zang ɓɔɔ nɔɔ kpaa zang ɓɛɛ.

Nɔɔ zi vuu ɓɔɔ zang zirɛ zang mã naa ka danggn ɓɛɛ, nɔɔ ti vɔlɔ.

Ka ruu ɓɔɔ, vuu ɓɔɔ n palɛ ka diki manɛ keɓe,

ɓi vuu ɓɔɔ naa zang ɓɔɔ kɔɔ nɔɔ doori

nɔɔ shing danggn kagn kpang ɓɛɛ.’ ”

42Ri nwáng kana nɛɛ yeti gãa zɔɔ kpalɛnang, zang gaa ri nɛɛ ri paasɛ ruu keɓe kɔɔnang tɔkn ka Diki Ɔ̃sɔnang ɓɔɔ a ɓɛɛ. 43Zang ri daarɛ tɔ, a zang Yahudi dɔɔli nɛɛ rɛɛ zang ɓɔɔ ri dũng kaa doo gbalang zang Yahudi kɔ nɛɛ yeti gbete ɓɛɛ, ri dũng Bulu nɛɛ Baranaba. A ri rang rɛɛ zang keɓe yee, kɔɔ ri nɛɛ ri yaa gbalang tɔ̃ɔ ɓɔɔ Laa palɛ ri keɓe kpang.

44Ɓɔɔ Diki Ɔ̃sɔnang naa raa bii mɔɔ kɔɔ nɛɛ zang gari bìí kpalɛ nandon nɛɛ ri tãa Ruu Laa 45Ɓɔɔ rɛɛ zang Yahudi ri zi zang ɓɔɔ ri kpalɛ dɔɔli ri kaa sũnyaa gbãng gbãng. Ri laa nyaa vuu ɓɔɔ Bulu kɔɔrɔ ɓɛɛ ri ti dãlɛ wu.

46A Bulu nɛɛ Baranaba ri rang yee, ri kaa vɔrɔ kpang, tɔɔ,

“Ruu nɛɛ rang nɔkɔ Ruu Laa shɔɔnang.

Ka ruu ɓɔɔ, nɔɔ bɛ̃ɛyi,

nɔɔ tusu yuu manɛ naa nɔɔ daa naa ɓɔɔ

nɔɔ walɛ suru bii ɓɔɔ waa nyaa kpàng kpang, ruu

raa jĩng kaa bii zang ɓɔɔ ri zang Isirela kpang ɓɛɛ.

47Ka ruu ɓɔɔ, Laa kɔɔ rùu tɔɔ,

‘N shing mɔɔ, mɔɔ nwang vuu ɓɔɔ yakɛ nɔng ka teteng zang ɓɔɔ ri zi Laa kpang ɓɛɛ,

tɔ̀ɔ, mɔɔ nwang zang ɓɔɔ shing zang, Laa ta yuu zang ɓɛɛ, ka nɔng ɓɔɔ koo waa nyaa piti.’ ”

48Ɓɔɔ rɛɛ zang ɓɔɔ ri zang Isirela kpang ri tãa naa weɓe, ri tãa tĩnang dɔɔli. Ri a Ruu Laa bannang, a rɛɛ zang ɓɔɔ bɛ̀ɛ́ Laa shingnɛ, nɛɛ ri walɛ Suru bii ɓɔɔ waa nyaa kpang katɔ, ri shing danggn ka bìí Laa.

49Ruu Laa ti bàa tipi kaɓa nandon. 50Rɛɛ zang Yahudi ri dɔ̃lɔ rɛɛ zang soro ɓɔɔ ri bang Laa ɓɛɛ, ɓɔɔ zang a ri bannang katɔ ɓɛɛ, nɛɛ rɛɛ zang bang gari kaɓa. Ri shing zang nɛɛ zang ri dang rɛɛ Bulu nɛɛ Baranaba jĩng. Ri hing ri nɛɛ tipi kaɓa. 51Bulu nɛɛ Baranaba ri waa zũng tapuru ɓɔɔ ka doo ɓarɛ, nwàng kaa naa ɓɔɔ ri kɔɔ zang Yahudi nɛɛ ruu ɓarɛ hãa ɓi tɔɔ kagn nɛɛ ri kpang ɓɛɛ. A ri daa kaa Ikoniya. 52Zang ɓɔɔ ri dũng Laa ri tãa tĩnang dɔɔli, Suru Laa ti a ka bìí ɓarɛ.

Currently Selected:

Zang Shonang Yeesɔ 13: mzmNT

Highlight

Copy