Zang Shonang Yeesɔ 11

Bituru dàa kɔɔ zang ɓɔɔ ri dũng Laa ruu keɓe ka Urushalima

1Rɛɛ zang shonang Yeesɔ, nɛɛ rɛɛ zang ɓɔɔ ri shing danggn tɔ, ɓɔɔ ri ka tipi Yahudi nandon, ri tãayi nɛɛ zang ɓɔɔ ri zang Isirela kpang, ri ta Ruu Laa tɔ jong. 2Ɓɔɔ Bituru daa ka Urushalima zang ɓɔɔ ri tɔɔ zang yee zang ɓɔɔ ri zang Isirela kpang shaa ka gbongkarɛ, ri rangkɛ wu. 3Ri tɔɔ, “Mɔɔ daa zanti ka gãa zang ɓɔɔ ri zi Laa kpang, ɓɔɔ ri yee shaa kpang ɓɛɛ, mɔɔ ti shaa vuu shaanang nɛɛ ri, ka ruu viya?” 4A Bituru kɔɔ ri ruu bìí kaa nandon nɛɛ naa ɓɔɔ gaayu ɓɛɛ tɔɔ:

5“Bɛɛ n gàá Laa ka gari Joopa, a n rɔ̃kɔ. N zi vuu a nɛɛ lapa naa fɔ̃ɔrɔ nyaa pɛɛrɛ bang ɓɔɔ zang yaa naa nɛɛ soo ɓɔɔ zang mãlɛ ka nyaa ɓiɓɛ ɓɔɔ dɛ̃ɛti ɓɛɛ. Vuu bii naa shi ka tĩng mɛɛ naabm. 6A n pɛ̃ɛrɛ waasɛ̃, n zi rɛɛ yɔpɔ soro nɛɛ yɔpɔ kpaasi, a ɓɔɔ vuu ɓɔɔ ri gɔ̃ nɛɛ buru ɓɛɛ, nɛɛ jaaning. 7A n tãa yee kɔ̀ɔ́ m nɛɛ, ‘Bituru, yupaa, mɔɔ nyɔrɛ mɔɔ shaayi.’ 8N kɔɔyi nɛɛ, ‘Kpang, Kpanti vuu ɓɔɔ shi kpang daa nyaa mɛɛ gngn kpang.’ 9A yee bìí kasɛ nyaa tɔkn nɛɛ lapa daa kaa doo ziti tɔɔ, ‘Vuu ɓɔɔ Laa kɔɔyi nɛɛ tɔ̃ɔ mɔɔ tɔɔ kpang nɛɛ shi kpang, kpang.’ 10Zang palɛ vuu keɓe nɔngkɔ dakn taati, a zang gɔ̃ vuu bìí zang daa nɛɛ mani ka lapa. 11Knti bee kpang zang taati, ri tantɛ nyaa nwannang ka gãa ɓɔɔ ruu kagn ɓɛɛ. Zang shong ri ka bii mɛɛ nɛɛ Kayisariya. 12Suru Laa kɔɔ m tɔɔ n daa nɛɛ ri, ń rɛ̃rɛ gn ziti kpang. Zang ɓɔɔ ri dũng Laa mangbete zang Joopa keɓe, ri daa nɛɛ n ka Kayisariya, a ruu daa ka yeti gãa Koneliyu nandon. 13A Koneliyu kɔɔ ruu naa ɓɔɔ wu zi zang nyaa shonang Laa ɓɔɔ ka lapa, ka yeti gãa ɓiɓɛ a kɔɔ wu tɔɔ, ‘Shong zang ɓɔɔ, wu daa ka Joopa, zang daa ɓaa mɔɔ nyaa ka Siman ɓɔɔ zang ɓaa wu nɛɛ Bituru ɓɛɛ. 14Naa kɔ̀ɔ́ mɔɔ ruu ɓɔɔ ta yuu ɓaaɓɛ nɛɛ zang ɓɔɔ ri ka yeti gãa ɓaaɓɛ nandon.’ 15Ɓɔɔ n gaayu yee rannang hn, Suru Laa a ka bii ɓarɛ naa ɓɔɔ gaayu a ka bii ɓuru ɓɛɛ. 16A n kpàa danggn ruu ɓɔɔ Kpanti Yeesɔ kɔɔyi tɔɔ, ‘Yɔhana palɛ nɔɔ batizima ɓi nɛɛ mii, zang naa palɛ nɔɔ manɛ nɛɛ Suru Laa’ ɓɛɛ. 17Ruu zi tɔ nɛɛ Laa a ri vuu ɓɔɔ wu a ruu ka diki ɓɔɔ ruu shing danggn ka bìí Kpanti Yeesɔ Kirisi tɔ jong. N m kaa wi, n zãa Laa wiya?”

18Ka ɓɔɔ ri tãa vuu keɓe, ri rangkɛ rɛɛ Bituru takpang, ri dɔɔ kaa Laa, ri kɔɔyi nɛɛ, “Nɛɛ nɔngkɔ, Laa a rɛɛ zang ɓɔɔ ri zang Isirela kpang gbalang tɔ jong nɛɛ ri kɔ̃sɔ yeti ɓarɛ, tɔ̀ɔ, ri vɔ kaa takpang.”

Zang ɓɔɔ ri dũng Laa ka gari Antakiya ɓɛɛ

19Zang ɓɔɔ ri tántɛ́, ka ruu jĩng ɓɔɔ zang dang zang ka knti ɓɔɔ Istifanu vɔ tɔ ɓɛɛ, ri daarɛ beebang ka tipi Fonishiya nɛɛ tipi Kuburu, nɛɛ gari Antakiya. Ri kɔɔ zang ɓɔɔ Ruu Laa kpang, ri kɔ̀ɔrɔ́ zang Yahudi kɔ shɛ̃ɛning. 20A zang ɓɔɔ kagn teteng ɓarɛ zang Kuburu nɛɛ ɓɔɔ Kiranɛ, ri daa ka Antakiya ri daa kɔɔ zang ɓɔɔ ri zang Isirela kpang Ruu Tɔ̃ɔ Laa jong, ka yuu Kpanti Yeesɔ. 21Laa yi ri naa kagn, ka ruu nɔngkɔ, zang dɔɔli ri shing danggn, a ri nwang kaa zang Laa.

22Zang ɓɔɔ ri dũng Laa ka Urushalima, ri tãa ruu keɓe, a ri shong Baranaba kaa Antakiya. 23Ɓɔɔ daa shɛ̃ɛ nɔng, a zi naa ɓɔɔ Laa á ri tĩnang tãanang tɔ, tãa tĩnang jong. A mã ri danggn nɛɛ ri dũng Laa nɛɛ yeti ɓarɛ nandon. 24Baranaba ɓi zang tɔ̃ɔ, Suru Laa kagn bii ɓiɓɛ, ti shing danggn ka bìí Laa dɔɔli, ka ruu nɔngkɔ, zang dɔɔli ri a ka bii Laa.

25A Baranaba daa ka gari Taasu nɛɛ wu daa kãa nɔng Shaawulu. 26Daa ĩi wu, a atɛ wu ka Antakiya. Ri ziti ri nwalɛ nɛɛ zang, ɓɔɔ ri dũng Laa, a ri ti tusu zang dɔɔli vuu, saa gbete. Zang gaayu zang ɓɔɔ ri dũng Laa ɓaanang ka Antakiya kɔ nɛɛ Kirista.

27Ka diki kaɓa, zang nyaa shonang Laa ɓɔɔ ri yupaa nɛɛ Urushalima, ri daa ka Antakiya. 28Zang gbete ka teteng ɓarɛ, zang ɓaa wu nɛɛ Agabu, Laa a wu naa vuu palɛnang, a yupaa kɔɔyi tɔɔ, nyɔkɔ bang a kana ka koo nandon. (Nyɔkɔ keɓe náa á ka saa ɓɔɔ Kaladiyu nwang Kpanti ɓɛɛ). 29Rɛɛ zang ɓɔɔ ri dũng Laa ri mang ka yeti ɓarɛ nɛɛ rí kpalɛ vuu naa ɓɔɔ zang ɓu walɛ katɔ ɓɛɛ, ri yi rɛɛ manzung ɓuru ɓɔɔ ri dũng doo Laa kɔ doori ka tipi Yahudi ɓɛɛ naa ka bii. 30Ri kpalɛ kati nɔngkɔ, a ri shòng rɛɛ zang bang, zang ɓɔɔ ri dũng Laa saka bìí kaa nɛɛ naa rɛɛ Baranaba nɛɛ Shaawulu.

Currently Selected:

Zang Shonang Yeesɔ 11: mzmNT

Highlight

Copy