MAKA 8

Tailakatuluwovasi tauwau ikamsi

(Md 15.32-39)

1Igau oluvi tobobawa isigugulasi tuvaila. E gala kasi kalaga. Mapaila Yesu idou la toligalega bimakaiasi, iluki matausina, kawala, 2“Anokapisi tobobawa, paila ikalatolusi isikailigusi e gala kʹasi. 3Kidamwa bawitali matausina deli kasi molu bikaimilavausi osi valu, bivigaki kasi mitibiliuya wa keda; paila mimilisi si valu saina kaduwonaku.”

4La toligalega ivitakaulokaisi matauna, kawasi, “Ammetoya bitabani kaula bitakamovi matausina ovilouwokuva baisa?”

5Ikatupoi matausina, kawala, “Kwaivila beredi kuyosisi?”

Ikaibigasi, kawasi, “Kwailima kwaiyu.”

6Iluki tobobawa bisilaisi opwaipwaia. Ikau makwaisina beredi kwailima kwaiyu. Bogwa inokagutoki baisa Yaubada, ikimimisi, isaiki la toligalega bipataisi baisa tomota; e ipataisi baisa tobobawa. 7Iyosisi sitana yena nakikekita. Bogwa inokagutoki baisa Yaubada paila minasina, iluki bipataisi minasina tuvaila baisa tomota. 8E ikamsi, ikomatasi; ikatuyoulaisi kasi kobwaga peta lima yuwa ikasewasi. 9Matausina iboda tailakatuluwovasi tomota. 10Yesu itali matausina bilosi; e nanakwa isila wa waga deli la toligalega, itapela mapilana Dalimanuda.#Mapilana valu gala tanikoli mokwita tumalela milaveta Galili olumata opilikwaibwaga. Mimilisi buki pilabubogwa gala iginisi Dalimanuda mitaga kaimapula iginisi Magadana (kugisi Md 15.39) kainaga Magidala.

Parisi inigadaisi kabutuvatusi

(Md 16.1-4; Lk 12.54-56)

11Parisi imaisi ikominimanisi deli Yesu. Mwada biwakolaisi matauna, mapaila inainevisi mwada bivagi vavagi siligaga bikibuboti Yaubada ininabwaila paila matauna. #Md 12.38; Lk 11.16 12Itiliawai sainela, e ikaibiga, kawala, “Avaka paila tubwa matubona inainevisi kabutuvatusi? Baisa bukululuwaisi. Gala sitana kabutuvatusi basaiki baisa matubona.” #Md 12.39; Lk 11.29

13Isilavi matausina, e isivau waga makaina bilokaia mapilana ewaiwa.#Mapilana opilibomatu.

Parisi toyo Erodi si yisi

(Md 16.5-12)

14Bogwa ilumwelavaisi bikauwaisi kʹasi; kwaitala beredi wala isisu wa waga. 15E Yesu iluki matausina, kawala, “Ka! kuyamataimi paila si yisi Parisi toyo la yisi Erodi.”#Matauna Erodi Anitipasa (kugisi Mk 6.14). Mitaga mimilisi buki pilabubogwa iginisi “Erodi la boda”. #Lk 12.1

16Ititamapusi titoulesi, kawasi, “Eilulukwaidasi paila uula gala takauwaisi kada beredisi.”

17Yesu inikoli baisa, e ikatupoi matausina, kawala, “Avaka paila kutitamapusi gala kami beredi? Gala sitana kugisaisi, kaina gala kukwatetasi kadai? Ammakawami saina kasai ninami? 18Kugigisasi mitaga gala kugisimlilaisi ke? Kuligalegasi mitaga gala kuligimlilaisi ke? Ki, gala kululuwaisi? #Yer 5.21; Isi 12.2; Mk 4.12 19Tuta matutona akimimisi beredi kwailima paila tailakatuluwolima, vila peta ikasewasi kasi kobwaga kukwatuyoulaisi?”

Ivitakaulokaisi matauna, kawasi, “Luwotala yuwa.”

20Yesu kawala, “E tuvaila tuta matutona akimimisi beredi kwailima kwaiyu paila tailakatuluwovasi, vila peta ikasewasi kasi kobwaga kukwatuyoulaisi?”

Ivitakaulokaisi matauna, kawasi, “Lima yuwa.”

21E ikatupoi matausina, kawala, “Ki, ammakawami? Kaina gala sitana kukwatetasi, kadai?”

Yesu ikatumovi tokwau mapilana Betisaida

22Imakaiasi Betisaida.#Mapilana valu milaveta Galili olumata opilikwaibwagayouya. Imiakaisi taitala tokwau baisa Yesu, iyokakapisisi bikabikoni matauna. 23E Yesu iyosi yamala tokwau, ivakadi matauna isilavaisi valu; bogwa igiu matala deli isaili yamala baisa matauna, ikatupoi, kawala, “Ki, sita avaka kugigisi?”

24E tokwau imitalala ikaibiga, kawala, “Agigisi tauwau; mitaga kasi gigisa makawala kai, e ililoulasi makaisina.”

25Yesu ikibodivau matala; e tuta baisa tokwau itobu matala imitakavata; e bogwa ibwaina, igisimlili vavagi komwaidona. 26Yesu iwitali bila ola bwala, e ikaibiga, kawala, “Taga sitana kukwaimilavau mapilana valu.”

Pita ikamituli Yesu avai tau matauna

(Md 16.13-20; Lk 9.18-21)

27Yesu deli la toligalega ititavinasi mapilasina viluwela Sisaria Pilipai;#Mapilana valu isisu sitana kaduwonaku metoya milaveta Galili opiliyavata kala kaduwonaku Giribwa bitala Kuluvitu (40 km). ililoulasi, e Yesu ikatupoi la toligalega, kawala, “Tomota ililivalasi mwada yeigu availa?”

28Ilukwaisi matauna, kawasi, “Mimilisi idokaisi mwada yoku Yoni Tobapitaisi; e mimilisi idokaisi Ilaitia;#Kugisi Mk 6.15 kala katumiki. e mimilisiga taitala metoya osi boda tovitoubobuta.” #Mk 6.14-15; Lk 9.7-8

29Yesu ikatupoi matausina, kawala, “Mitaga yokomi kudokaisi availa yeigu?”

Pita ivitakauloki matauna, kawala, “Yoku Mesaia.”#Kugisi makasana Biga Kala Katumiki. #Yn 6.68-69 30E Yesu ikaraiwogi matausina, kawala, “Taga bukulukwaisi availa paila yeigu.”

Yesu ivitububoti la kaliga

(Md 16.21-28; Lk 9.22-27)

31E Yesu ivitouula ivituloki matausina kidamwa bibodi Latula Tomota bibani kala mmayuyu bidubadu, kaidadala valu deli tolula kasi tokugwa deli toninitalapula paila Karaiwaga bikoulovaisi matauna. Bikatumataisi; e yam kwaitolu oluvi bitokaia goli. 32E vavagi makwaisina ikabau. E Pita ivakouli Yesu ilau opayumila e ivitouula ibuyoyu matauna. 33Mitaga Yesu itovila imitakavati la toligalega e ibuyoyu Pita, kawala, “Kum otapwagu Setani, paila gala magim la vavagi Yaubada mitaga si vavagi tomota.”

34Mapaila Yesu idou bimakaiasi tobobawa deli la toligalega, iluki matausina, kawala, “Kidamwa availa magila bibokulaigu, ibodi bikatilavi tatoula, bikeula kala korosi, bibokulaigu. #Md 10.38; Lk 14.27 35Paila availa magila biyusi tatoula, matauna bitamwau; e availa bikitumou tatoula paila yeigu e paila Bulogala Bwaina, matauna bimova goli. #Md 10.39; Lk 17.33; Yn 12.25 36Avaka kala bwaina baisa taitala, kidamwa iyosi guguwala valu valu komwaidona, mitaga matauna bitamwau? Gala avaka kala bwaina. 37Gala gagabila availa bisaiki guguwa bimipuvau la momova. 38Tubwa matubona tubugaga ilumwelavaisi Yaubada. Kidamwa availa matubona immosila paila yeigu deli paila ulo biga,#paila ulo biga. Mimilisi buki pilabubogwa iginisi “paila agu tobwakuli”. makawala yeigu Latula Tomota bammosila paila matauna, avai tuta bama ola guyugwayu Tamagu deli matausina anelosi bumaboma.”

Currently Selected:

MAKA 8: PNGKIR

Highlight

Copy