ಮತ್ತಾಯ 28
28
ಯೇಸು ಚಾವ್‍ಯಿಂಜ ಜೀವವಾಯಿತ್ ಪುನಃ ಬಪ್ಪದ್
(ಮಾರ್ಕ 16.1–10; ಲೂಕ 24.1–12; ಯೋಹಾನ 20.1–10)
1 ಸಬ್ಬತ್ ದಿವಸ ಆನ ಪಿಂಞ ನಾರಾಚೆ ಪೊಲಿಂಜಿತಾಪ ನೇರತ್ ಮಗ್ದಲ ಮರಿಯಳು ಬೋರೆ ಮರಿಯಳು ಗೋರಿನ ನೋಟ್‍ವಕ್ ಪೋಚಿ.
2ಅಕ್ಕ ಅಲ್ಲಿ ಬಲ್ಯ ಬೂಕಂಪ ಆಯಿತ್, ಒಡೆಯಂಡ ದೂತ ಪರಲೋಕತ್ಂಜ ಬಂತ್ ಆ ಬಲ್ಯ ಬಂಡೆ ಕಲ್ಲ್‌ನ ಆಬರಿಕ್ ಉರ್‍ಟಿತ್ ಆಂಡ ಮೇಲೆ ಅಳ್‌ತತ್.
3ಅಂವೊಂಡ ರೂಪ, ಮಿಂಚ್‍ರನೆಕೆಯು, ಅಂವೊಂಡ ಬಟ್ಟೆ ಮಂಜ್‍ರನೆಕೆಯು ಬೊಳ್‌ತಿತೆ ಇಂಜತ್. 4ಅಲ್ಲಿ ಇಂಜ ಸಿಪಾಯಿಯಂಗ, ಪೋಡಿಲ್ ನಡ್‍ಗಿತ್, ಅಯಿಂಗ ಸೊಯ ತಪ್ಪಿತ್ ಚತ್ತನೆಕೆ ಆಚಿ. 5ಅಕ್ಕ ದೇವದೂತ ಪೊಣ್ಣಾಳ್‍ರ ಪಕ್ಕ: ನಿಂಗ ಬೊತ್ತತಿ! ಶಿಲುಬೇಕ್ ಇಟ್ಟ ಯೇಸುನ ನಿಂಗ ತ್‍ೕಡಿಯಂಡುಳ್ಳಿರಾಂದ್ ನಾಕ್ ಗೊತ್ತುಂಡ್. 6ಅಂವೊ ಇಲ್ಲಿ ಇಲ್ಲೆ. ಅಂವೊ ಎಣ್ಣ್‌ನನೆಕೆ ಚಾವ್‍ಯಿಂಜ ಜೀವವಾಯಿತ್ ಎದ್ದತ್. ಅಂವೊಂಡ ತಡಿ ಇಂಜ ಜಾಗತ್‍ನ ಬಂದ್ ನೋಟೀಂದ್ ಎಣ್ಣ್‌ಚಿ. 7ಇಕ್ಕ ನಿಂಗ ಬೆರಿಯ ಪೋಯಿತ್ ಅಂವೊಂಡ ಶಿಷ್ಯಂಗಕ್ ಅಂವೊ ಚಾವ್‍ಯಿಂಜ ಎದ್ದತ್‍ೕಂದ್ ಎಣ್ಣಿ. ಇಕ್ಕ, ನಿಂಗಕ್ ಮಿಂಞ ಅಂವೊ ಗಲಿಲಾಯಕ್ ಪೋಯಂಡುಂಡ್. ಅಲ್ಲಿ ಅಂವೊನ ನಿಂಗ ಕಾಂಬಿರಾಂದ್ ಅಯಿಂಗಕ್ ಎಣ್ಣ್‌ಚಿ. 8ಪೊಣ್ಣಾಳುವ ಪೋಡಿಲು ಅದೇ ಸಮಯತ್‍ಲ್ ದುಂಬ ಕುಶೀಲು ಆ ಜಾಗತ್‍ನ ಬುಟ್ಟಿತ್, ಈ ಸುದ್ದಿನ ಶಿಷ್ಯಂಗಕ್ ಎಣ್ಣ್‌ವಕ್ ಓಡಿ ಪೋಚಿ. 9ಒಮ್ಮಕೆ ಯೇಸು ಅಯಿಂಗಕ್ ಕಾಂಬ್‌ಚಿಟ್ಟಂಡ್, ನಿಂಗಕ್ ಸಮಾದಾನ ಇಕ್ಕಡ್‍ೕಂದ್ ಎಣ್ಣ್‌ಚಿ. ಅಕ್ಕ ಅಯಿಂಗ ಅಂವೊಂಡ ಪಕ್ಕ ಬಂದಿತ್ ಅಂವೊಂಡ ಕಾಲ್‌ನ ಪುಡ್‌ಚಿತ್ ಅಂವೊನ ತುದಿಚತ್. 10ಅಕ್ಕ ಯೇಸು ಅಯಿಂಗಳ ನೋಟಿತ್, ನಿಂಗಕ್ ಪೋಡಿ ಬೋಂಡ! ನಾಡ ತಮ್ಮಣಂಗಡ ಪಕ್ಕ ಪೋಯಿತ್, ಅಯಿಂಗಳ ಗಲಿಲಾಯಕ್ ಪೋಪಕ್ ಎಣ್ಣಿ, ಅಲ್ಲಿ ಅಯಿಂಗ ನನ್ನ ಕಾಂಬಾಂದ್ ಎಣ್ಣ್‌ಚಿ.
ಪಡೆಯಾಳಿಯಂಗಡ ತಕ್ಕ್
11ಪೊಣ್ಣಾಳ್‍ವ ಬಯ್ಯಕ್ ಪೋಯಂಡಿಪ್ಪಕ ಗೋರಿನ ಕಾತಂಡಿಂಜ ಚೆನ್ನ ಸಿಪಾಯಿಯ ಪಟ್ಟಣಕ್ ಪೋಯಿತ್ ಅಯಿಂಗ ಕಂಡಾನೆಲ್ಲಾ ಮುಕ್ಯ ಯಾಜಕಂಗಡ ಪಕ್ಕ ಎಣ್ಣ್‌ಚಿ.
12ಮುಕ್ಯ ಯಾಜಕಂಗ ಪೆರಿಯಯಿಂಗಡ ಕೂಡೆ ಕೂಡಿತ್ ಚರ್ಚೆ ಮಾಡಿತ್ ಸಿಪಾಯಿಯಕ್ ದುಂಬ ಪಣ ಕೊಡ್‍ಪಕ್ ತೀರ್ಮಾನ ಮಾಡ್‍ಚಿ.
13ಅಯಿಂಗ ಸಿಪಾಯಿಯಂಗಕ್: ಯೇಸುರ ಶಿಷ್ಯಂಗ ಬಯಿಟ್ ಬಂದಿತ್, ನಂಗ ವರಿಯಂಡ್ ಇಪ್ಪಕ ಯೇಸುರ ತಡೀನ ಕಟ್ಟಂಡ್ ಪೋಯಿರ್‌ತ್‍ೕಂದ್ ಎಣ್ಣೀಂದ್ ಎಣ್ಣ್‌ಚಿ. 14ಈ ಸುದ್ದಿ ಅದಿಪತಿಕ್ ಕ್‍ೕಟತೇಂಗಿ ನಂಗ ಅಂವೊನ ಸಮಾದಾನ ಮಾಡಿತ್ ನಿಂಗಕ್ ತೊಂದರೆ ಆಕತನೆಕೆ ನಂಗ ನೋಟಿಯವಾಂದ್ ಎಣ್ಣ್‌ಚಿ. 15ಸಿಪಾಯಿಯ ಪಣತ್‍ನ ಎಡ್‍ತಂಡ್ ಅಯಿಂಗ ಎಣ್ಣ್‌ನನೆಕೆ ಮಾಡ್‍ಚಿ. ಈ ವಿಷಯ ಯೆಹೂದ್ಯಂಗಡ ಮದ್ಯತ್‍ಲ್ ಪಬ್ಬ್‌ಚಿ. ಇಂದ್‍ಕತ್ತನೆ ಅಯಿಂಗ ಈ ವಿಷಯತ್‍ನ ಎಣ್ಣುವ.
ಶಿಷ್ಯಂಗಕ್ ಯೇಸುರ ಕಡೆ ತಕ್ಕ್
(ಮಾರ್ಕ 16.14–18; ಲೂಕ 24.36–49; ಯೋಹಾನ 20.19–23; ಅಪೊಸ್ತಲ 1.6–8)
16ಪಿಂಞ ಅಂವೊಂಡ ಪನ್ನಂದ್ ಶಿಷ್ಯಂಗ ಗಲಿಲಾಯತ್‍ಲ್ ಯೇಸು ಅಯಿಂಗಕ್ ಎಣ್ಣಿತ್ಂಜ ಕುಂದ್‌ಕ್ ಪೋಚಿ. 17ಅಲ್ಲಿ ಯೇಸುನ ಕಾಂಬಕ ಅಂವೊಂಗ್ ಅಡ್ಡ ಬುದ್ದಿತ್ ಅಂವೊನ ಆರಾದನೆ ಮಾಡ್‍ಚಿ. ಆಚೇಂಗಿ, ಚೆನ್ನ ಜನ ಅನುಮಾನ ಪಟ್ಟತ್. 18ಯೇಸು ಅಯಿಂಗಡ ಪಕ್ಕ ಪೋಯಿತ್, ನಾಕ್ ಪರಲೋಕತ್‌ಲು ಬೂಲೋಕತ್‌ಲು ಎಲ್ಲಾ ಅದಿಕಾರ ನಾಕ್ ತಂದಿತುಂಡ್. 19ಆನಗುಂಡ್ ನಿಂಗ ಪೋಯಿತ್, ಎಲ್ಲಾ ದೇಶತ್‍ರ ಜನತ್‍ನ ನಾಡ ಶಿಷ್ಯಂಗಳಾಯಿತ್ ಮಾಡಿ. ಅಯಿಂಗಕ್ ಅಪ್ಪ, ಮೋಂವೊ ಪಿಂಞ ಪವಿತ್ರಾತ್ಮಂಡ ಪೆದತ್‍ಲ್ ದೀಕ್ಷಾಸ್ನಾನ ಕೊಡಿ. 20ನಾನ್ ನಿಂಗಕ್ ಎಂತೆಲ್ಲಾ ಆಜ್ಞೆ ಮಾಡಿತುಂಡೋ ಅದ್‍ಂಗೆಲ್ಲಾ ಬಗ್ಗಿತ್ ನಡ್‍ಪಕ್ ಈ ಪುದಿಯ ಶಿಷ್ಯಂಗಕ್ ಎಣ್ಣಿ ಕೊಡಿ. ಇದಾ, ಈ ಲೋಕತ್‍ರ ಕಡೇಕತ್ತನೆ ನಾನ್ ನಿಂಗಡ ಕೂಡೆ ಎಕ್ಕಾಲು ಇಪ್ಪೀಂದ್ ಯೇಸು ಶಿಷ್ಯಂಗಕ್ ಎಣ್ಣ್‌ಚಿ.
Currently Selected:
ಮತ್ತಾಯ 28: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
