ಮತ್ತಾಯ 25
25
ಪತ್ತ್ ಕನ್ನಿ ಮೂಡಿಯ
1ಅಕ್ಕ ಪರಲೋಕ ರಾಜ್ಯ, ತಂಗಡ ಬೊಳ್‌ಚತ್‍ನ ಎಡ್‍ತಂಡ್ ಮಂಗಲಕಾರನ ಕಾಂಬಕ್ ಪೊರಟ ಪತ್ತ್ ಕನ್ನಿ ಮೂಡಿಯಂಗಡನೆಕೆ ಇಪ್ಪ. 2ಅಯಿಂಗಡಡೆಲ್ ಅಂಜ್ ಕನ್ನಿ ಮೂಡಿಯಂಗ ಬುದ್ದಿ ಇಲ್ಲತಯಿಂಗಳು ಇಂಞು ಅಂಜ್ ಕನ್ನಿ ಮೂಡಿಯಂಗ ಬುದ್ದಿವಂತಯಿಂಗಳಾಯಿತ್ಂಜತ್. 3ಬುದ್ದಿ ಇಲ್ಲತಯಿಂಗ ಅಯಿಂಗಡ ಬೊಳ್‌ಚತ್‍ನ ಎಡ್‍ತಂಡ್ ಪೋಚಿ, 4ಆಚೇಂಗಿ ಬೋಂಡಿಯಚ್ಚಕ್ ಎಣ್ಣೆ ಎಡ್‍ತಂಡ್ ಪೋಯಿತ್‌ಲ್ಲೆ. ಆಚೇಂಗಿ ಬುದ್ದಿವಂತಯಿಂಗ ಬೊಳ್‍ಚ ಪಿಂಞ ಅದ್ಂಗ್ ಬೋಂಡಿಯಾನ ಎಣ್ಣೇನ, ಎಣ್ಣೆ ಪಾತ್ರತ್‍ಲ್ ಎಡ್‍ತಂಡ್ ಪೋಚಿ. 5ಮಂಗಲಕಾರ ಬಪ್ಪಕ್ ಚೆನ್ನ ನೇರ ಆಚಿ. ಅಕ್ಕ ಅಯಿಂಗಕ್ ವರ್‌ಕ್ ಬಂದಿತ್ ವರೀರ್‌ತ್.
6ನಡ್‌ಪಾದ್ರೆ ನೇರತ್‍ಲ್: ಮಂಗಲಕಾರ ಬಂದಂಡುಂಡ್, ಅಂವೊಂಡ ಮಿಂಞತ್ ಅಂವೊನ ಕಾಂಬಕ್ ಪೋಯಿ ಎಣ್ಣಿಯಂಡ್ ಕೂತ್ ಕೊಡ್‍ತತ್.
7ಅಕ್ಕ ಆ ಬುದ್ದಿವಂತ ಕನ್ನಿ ಮೂಡಿಯ ಎದ್ದಿತ್ ಅಯಿಂಗಡ ಬೊಳ್‌ಚತ್‍ನ ಕತ್ತ್‌ಚಿಟ್ಟ್ ತಯಾರ್ ಮಾಡ್‍ಚಿ.
8ಅಕ್ಕ ಬುದ್ದಿ ಇಲ್ಲತಯಿಂಗ ಬುದ್ದಿ ಉಳ್ಳಯಿಂಗಳ ನೋಟಿತ್: ನಿಂಗಡ ಪಕ್ಕ ಉಳ್ಳ ಎಣ್ಣೇಲ್ ನಂಗಕ್ ಚೆನ್ನ ತಾರೀಂದ್ ಕ್‍ೕಟತ್.
9ಅಕ್ಕ ಬುದ್ದಿವಂತಯಿಂಗ ನಿಂಗಕ್ ಎಣ್ಣೆ ತಂದತೇಂಗಿ ನಂಗಕು ನಿಂಗಕು ಎಣ್ಣೆ ಪೋರತಾಪಾಂದ್ ಎಣ್ಣ್‌ಚಿ. ಆನಗುಂಡ್, ನಿಂಗ ಎಣ್ಣೆ ಮಾರುವಂವೊಂಡ ಪಕ್ಕ ಪೋಯಿತ್ ಎಣ್ಣೆ ಎಡ್‍ತಂಡ್ ಬಾರೀಂದ್ ಎಣ್ಣ್‌ಚಿ.
10ಅಯಿಂಗ ಎಣ್ಣೆ ಎಡ್‌ತ ಬಪ್ಪಕ್ ಪೋಯಿತಿಪ್ಪಕ ಮಂಗಲಕಾರ ಬಾತ್. ತಯಾರ್ ಆಯಿತ್ಂಜಯಿಂಗ ಅಂವೊಂಡ ಕೂಡೆ ಮಂಗಲತ್‍ರ ಮನೆಕ್ ಪೋಚಿ; ಅಲ್ಲಿಂಜ ಪಡಿ ಇಟ್ಟ್‌ರ್‌ತ್. 11ಬಯ್ಯ, ಎಣ್ಣೆ ಎಡ್‌ತ ಬಪ್ಪಕ್ ಪೋನ ಕನ್ನಿ ಮೂಡಿಯ ಬಂದಿತ್: ಒಡೆಯನೇ ಒಡೆಯನೇಂದ್ ಪಡಿ ತಟ್ಟಿತ್, ದಯಬೆಚ್ಚಿತ್ ನಂಗಕು ಪಡಿ ತೊರೇಂದ್ ಕಾಕ್‍ಚಿ.
12ಅಕ್ಕ ಮಂಗಲಕಾರ: ನಾಕ್ ನಿಂಗಳ ಗೊತ್ತಿಲ್ಲೇಂದ್ ನಿಂಗಕ್ ನೇರಾಯಿತು ಎಣ್ಣ್‌ವೀಂದ್ ಎಣ್ಣ್‌ಚಿ.
13ಅನ್ನನೆ ಆ ದಿನವು ಸಮಯವು ನಿಂಗಕ್ ಗೊತ್ತಿಲ್ಲತಗುಂಡ್, ಎಚ್ಚರತ್ ಇರಿ.
ಮೂಂದ್ ಆಳ್‍ವಡ ಕಥೇರ ರೂಪ
(ಲೂಕ 19.11–27)
14ಇಂಞು ಪರಲೋಕ ರಾಜ್ಯ, ದೂರ ದೇಶಕ್ ಪೋಪ ಒರ್ ಎಜಮಾನ ಅಂವೊಂಡ ಆಳ್‍ವಳ ಕಾಕುವಂಜಿ ತಾಂಡ ಆಸ್ತಿನ ನೋಟ್‍ವಕ್ ಪಾಲ್ ಮಾಡಿತ್ ಒಪ್ಪ್‌ಚಿಡುವನೆಕೆ ಉಂಡ್. 15ಅಂವೊಂಡ ಆಸ್ತಿರ ದುಡ್ಡ್‌ಯಿಂಜ ಒಬ್ಬಂಡ ಪಕ್ಕ ಅಂಜ್ ಬಾಗತ್‍ನ, ಒಬ್ಬಂಡ ಪಕ್ಕ ದಂಡ್ ಬಾಗತ್‍ನ ಇಂಞೊಬ್ಬಂಡ ಪಕ್ಕ ಒರ್ ಬಾಗತ್‍ನ ಅಯಿಂಗಯಿಂಗಡ ಬಲಕ್ ಸರಿಯಾಯಿತ್ ಕೊಡ್‌ತಿತ್ ಪೋಪ.
16ಅಂಜ್ ಬಾಗ ಕ್‍ಟ್ಟ್‌ನಂವೊ ಅದ್‍ನ ಅಕ್ಕಣೆ ಎಡ್‍ತಂಡ್ ಪೋಯಿತ್ ವ್ಯಾಪಾರ ಮಾಡಿತ್ ಇಂಞು ಅಂಜ್ ಬಾಗತ್‍ನ ಸಂಪಾದನೆ ಮಾಡ್‍ಚಿ. 17ಅನ್ನನೆ ದಂಡ್ ಬಾಗ ಕ್‍ಟ್ಟ್‌ನಂವೊ, ವ್ಯಾಪಾರ ಮಾಡಿತ್ ಇಂಞು ದಂಡ್ ಬಾಗತ್‍ನ ಸಂಪಾದನೆ ಮಾಡ್‍ಚಿ. 18ಆಚೇಂಗಿ ಒರ್ ಬಾಗ ಕ್‍ಟ್ಟ್‌ನಂವೊ ಅದ್‍ನ ನೆಲತ್‌ಲ್ ಕುಂಡ್ ಎಡ್‍ತಿತ್ ಅದ್ಂಡ ಒಳ್‍ಲ್ ಒಳ್‌ಪ್‌ಚಿಟ್ಟತ್.
19ದುಂಬ ಕಾಲ ಆನ ಪಿಂಞ, ಆ ಆಳ್‍ವಡ ಎಜಮಾನ ಬಂದಿತ್ ಅಯಿಂಗಡ ಪಕ್ಕ ಲೆಕ್ಕ ಕ್‍ೕಟತ್. 20ಅಂಜ್ ಬಾಗ ಕ್‍ಟ್ಟ್‌ನಂವೊ ಮಿಂಞ ಬಂದಿತ್, ಸ್ವಾಮೀ, ನೀನ್ ನಾಕ್ ಅಂಜ್ ಬಾಗ ತಂದಿಯ, ಇದಾ ಅದ್‍ಲ್ ಇಂಞು ಅಂಜ್ ಬಾಗತ್‍ನ ಸಂಪಾದನೆ ಮಾಡಿಯೇಂದ್ ಎಣ್ಣ್‌ಚಿ.
21ಅಂವೊಂಡ ಎಜಮಾನ ಅಂವೊನ ನೋಟಿತ್: ನಲ್ಲದ್ ಆಚಿ, ನೀನ್ ನಲ್ಲ ಪಿಂಞ ನಂಬಿಕಸ್ತನಾನ ಆಳ್. ಚೆರಿಯ ವಿಷಯತ್‍ಲು ನೀನ್ ನಂಬಿಕೆ ಕಾಟಿತುಳ್ಳಿಯ, ನಿನ್ನ ನಾನ್ ಬಲ್ಯ ಕೆಲಸಕ್ ಅದಿಕಾರಿಯಾಯಿತ್ ಮಾಡ್‌ವಿ, ಇಕ್ಕ ಬಾ, ನೀಡ ಎಜಮಾನಂಡ ಕುಶೀಲ್ ಪ್ರವೇಶ ಮಾಡ್‍ೕಂದ್ ಎಣ್ಣ್‌ಚಿ.
22ದಂಡ್ ಬಾಗ ಕ್‍ಟ್ಟ್‌ನಂವೊ ಮಿಂಞ ಬಂದಿತ್: ಸ್ವಾಮೀ, ನೀನ್ ನಾಕ್ ದಂಡ್ ಬಾಗ ತಂದಿಯ, ಇದಾ ಅದ್‍ಲ್ ಇಂಞು ದಂಡ್ ಬಾಗತ್‍ನ ಸಂಪಾದನೆ ಮಾಡಿಯೇಂದ್ ಎಣ್ಣ್‌ಚಿ.
ಅಂವೊಂಡ ಎಜಮಾನ ಅಂವೊನ ನೋಟಿತ್: ನಲ್ಲದ್ ಆಚಿ, ನೀನ್ ನಲ್ಲ ಪಿಂಞ ನಂಬಿಕಸ್ತನಾನ ಆಳ್.
23ಚೆರಿಯ ವಿಷಯತ್‍ಲು ನೀನ್ ನಂಬಿಕೆ ಕಾಟಿತುಳ್ಳಿಯ, ನಿನ್ನ ನಾನ್ ಬಲ್ಯ ಕೆಲಸಕ್ ಅದಿಕಾರಿಯಾಯಿತ್ ಮಾಡ್‌ವಿ, ಇಕ್ಕ ಬಾ, ನೀಡ ಎಜಮಾನಂಡ ಕುಶೀಲ್ ಪ್ರವೇಶ ಮಾಡ್‍ೕಂದ್ ಎಣ್ಣ್‌ಚಿ
24ಒರ್ ಬಾಗ ಕ್‍ಟ್ಟ್‌ನಂವೊ ಮಿಂಞ ಬಂದಿತ್: ಸ್ವಾಮೀ, ನೀನ್ ಬಿತ್ತ್ ಇಡತ ಜಾಗತ್‍ಲ್ ಕೊಯ್ಯುವಂವೊನು, ಬಿತ್ತ್ ಚದ್‍ರತ ಜಾಗತ್‍ಲ್ ಕೂಟ್‌ವ ಕಠಿಣ ಮನುಷ್ಯಾಂದ್ ನಾಕ್ ಗೊತ್ತುಂಡ್. 25ಆನಗುಂಡ್ ನಾನ್ ನೀಕ್ ಬೊತ್ತಿತ್, ನೀಡ ಪಣತ್‍ನ ನಾನ್ ಕುಂಡ್‍ರ ಒಳ್‍ಲ್ ಒಳ್‍ಪ್‍ಚಿಟ್ಟಿಯೆ. ಇದಾ, ನೀಡದ್‍ನ ಎಡ್‍ತಾಂದ್ ಎಣ್ಣ್‌ಚಿ.
26ಅಕ್ಕ ಅಂವೊಂಡ ಎಜಮಾನ: ಒಂದಂಗೂ ಪ್ರಯೋಜನ ಇಲ್ಲತ ಮೋಸಕಾರನು ಸೋಮಾರಿಯು ಆನ ಆಳ್ ನೀನ್! ನಾನ್ ಬಿತ್ತ್ ಇಡತ ಜಾಗತ್‍ಲ್ ಕೊಯ್ಯುವೀಂದು, ಬಿತ್ತ್ ಚದ್‍ರತ ಜಾಗತ್‍ಲ್ ಕೂಟ್‍ವೀಂದು ನೀಕ್ ಗೊತ್ತ್ಂಜತ್. 27ಅನ್ನನಿಪ್ಪಕ, ನಾನ್ ನೀಕ್ ತಂದಾನ, ಬಡ್ಡಿಕ್ ಕೊಡ್‌ಪಕಿಂಜತ್. ಅಕ್ಕ ನಾನ್ ಬಪ್ಪಕ, ನಾಡದ್‌ನ ಬಡ್ಡಿ ಸಮೇತ ಎಡ್‌ಪಕಿಂಜ್ ಎಣ್ಣಿಯಂಡ್ ಎಣ್ಣ್‌ಚಿ. 28ಪಿಂಞ ಅಂವೊಂಡ ಆಳ್‌ನ ಕಾಕುವಂಜಿ, ಅಂವೊಂಡ ಕೈಯಿಲ್ ಇಂಜಾನ ಎಡ್‍ತಿತ್ ಪತ್ತ್ ಬಾಗ ಉಳ್ಳಂವೊಂಗ್ ಕೊಡ್‍ೕಂದ್ ಎಣ್ಣ್‌ಚಿ. 29ಉಳ್ಳಯಿಂಗಕ್ ಇಂಞು ಕ್‍ಟ್ಟ್‌ವ, ಅಯಿಂಗಕ್ ಬೋಂಡಿಯಚ್ಚಕ್ ಇಪ್ಪ; ಇಲ್ಲತಯಿಂಗಕ್ ಚೆನ್ನ ಉಳ್ಳದ್‍ನ ಸಹ ಎಡ್‌ತ್‌ರ್‌ವ. 30ಈ ಕೆಲಸಕ್ ಆಕತ ಆಳ್‌ನ ಪೊರಮೆ ಇರ್‌ಟ್‌ಲ್ ಇಡೀಂದ್ ಎಜಮಾನ ಎಣ್ಣ್‌ಚಿ. ಅಲ್ಲಿ ಗೋಳಾಟವು ಪಲ್ಲ್ ಕಡಿಪದು ಇಪ್ಪಾಂದ್ ಎಣ್ಣ್‌ಚಿ.
ಕೊರಿ ಪಿಂಞ ಆಡ್
31ಮನುಷ್ಯಕುಮಾರ ತಾಂಡ ಮಹಿಮೆಲ್ ಅಂವೊಂಡ ದೂತಂಗಡ ಕೂಡೆ ಬಪ್ಪಕ, ತಾಂಡ ಮಹಿಮೇರ ಸಿಂಹಾಸನತ್‍ಲ್ ಅಳ್‌ತಿತ್‌ಪ್ಪ. 32ಅಕ್ಕ ಎಲ್ಲಾ ದೇಶತ್‍ರ ಜನ ಒಟ್ಟ್ ಕೂಡಿತ್‌ಪ್ಪ, ಪಿಂಞ ಅಂವೊ ಒರ್ ಕೊರಿ ಕಾಪಂವೊ ಎನ್ನನೆ ಕೊರಿನ ಪಿಂಞ ಆಡ್‍ನ ಬೋರೆ ಬೋರೆ ಮಾಡ್‌ವ ಅನ್ನನೆ ಅಂವೊ ಜನಳ ದಂಡ್ ಗುಂಪಾಯಿತ್ ಬೋರೆ ಬೋರೆ ಮಾಡ್‌ವ. 33ಕೊರಿನ ತಾಂಡ ಬಲ್‌ತೆ ಬರಿಲ್ ಪಿಂಞ ಆಡ್‍ನ ತಾಂಡ ಎಡ್‍ತೆ ಬರಿಲ್ ಇಡ್‌ವ.
34ಅಕ್ಕ ರಾಜ ತಾಂಡ ಬಲ್‌ತೆ ಬರಿಲ್ ಉಳ್ಳ ಜನಳ ನೋಟಿತ್: ನಾಡ ಅಪ್ಪಂಡ ಆಶೀರ್ವಾದ ಪಡ್ಂದಯಿಂಗಳೇ ಬಾರಿ, ಈ ಲೋಕ ಸೃಷ್ಟಿ ಆಪಕ್ ಮಿಂಞ ತಯಾರ್ ಮಾಡ್‍ನ ನಿಂಗಡ ರಾಜ್ಯತ್‍ನ ಎಡ್‌ತೊಳಿ. 35ಎನ್ನಂಗೆಣ್ಣ್‌ಚೇಂಗಿ, ನಾಕ್ ಕೆಲ ಪಯಿಚಿತ್‌ಪ್ಪಕ, ನಿಂಗ ನಾಕ್ ಉಂಬಕ್ ತಂದಿರ; ನಾಕ್ ಬಾಯರಿಕೆಯಾಯಿತ್‌ಪ್ಪಕ, ಕುಡಿಪಕ್ ನೀರ್ ಕೊಡ್‌ತಿರ. ನಾನ್ ನಿಂಗಕ್ ಪರಿಚಯ ಇಲ್ಲತಂವೊನಾಯಿತಿಪ್ಪಕ, ನಿಂಗಡ ಮನೆಲ್ ಸ್ವೀಕಾರ ಮಾಡಿರ. 36ನಾಕ್ ಇಡ್‌ವಕ್ ಬಟ್ಟೆ ಇಲ್ಲತಿಪ್ಪಕ, ನಾಕ್ ಬಟ್ಟೆ ತಂದಿರ. ನಾಕ್ ಕಾಯಿಲೆ ಇಪ್ಪಕ, ನಿಂಗ ನನ್ನ ಆರೈಕೆ ಮಾಡಿರ, ನಾನ್ ಜೈಲ್‍ಲ್ ಇಪ್ಪಕ ನನ್ನ ನೋಟ್‍ವಕ್ ಬಂದೀರಾಂದ್ ರಾಜ ಎಣ್ಣುವ.
37ಅಕ್ಕ ಈ ನೀತಿವಂತಯಿಂಗ: ಒಡೆಯನೇ, ನಂಗ ಎಕ್ಕ ನೀಕ್ ಕೆಲ ಪಯಿಚದ್‍ನ, ಕಂಡಿತ್ ನೀಕ್ ಉಂಬಕ್ ತಂದಿಯೆ? ಎಕ್ಕ ನೀನ್ ಬಾಯಾರಿಕೆಯಾಯಿತ್ ಇಂಜಾನ ಕಂಡಿತ್, ನೀಕ್ ನೀರ್ ತಂದಿಯೆ? 38ಎಕ್ಕ ನಿನ್ನ ಪರಿಚಯ ಇಲ್ಲತಂವೊನಾಯಿತ್ ಕಂಡಿತ್, ಮನೇರೊಳ್‌ಕ್ ಸ್ವೀಕಾರ ಮಾಡಿಯೆ? ಎಕ್ಕ ನಿನ್ನ ಬಟ್ಟೆ ಇಲ್ಲತಂವೊನಾಯಿತ್ ಕಂಡಿತ್, ನೀಕ್ ಬಟ್ಟೆ ತಂದಿಯೆ? 39ಎಕ್ಕ ನಿನ್ನ ಕಾಯಿಲಸ್ತನಾಯಿತ್ ಪಿಂಞ ಜೈಲ್‍ಲ್ ಉಳ್ಳಾನ ಕಂಡಿತ್, ನಿನ್ನ ನೋಟ್‍ವಕ್ ಬಂದಿಯೇಂದ್ ಕ್‍ೕಪ.
40ಅಕ್ಕ ರಾಜ, ನಾಡ ಅಣ್ಣತಮ್ಮಣಂಡಡೆಲ್ ಚೆರಿಯಯಿಂಗಳಾಯಿತುಳ್ಳ ಒಬ್ಬಂಗ್ ಮಾಡ್‍ಚೇಂಗಿಯು, ಅದ್‍ನ ನಿಂಗ ನಾಕ್ ಮಾಡ್‌ನನೆಕೇಂದ್ ನೇರಾಯಿತು ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.
41ಪಿಂಞ ರಾಜ ತಾಂಡ ಎಡ್‍ತೆ ಬರಿಲ್ ಉಳ್ಳಯಿಂಗಳ ನೋಟಿತ್: ದೇವಡ ಶಾಪ ಪಡ್ಂದಯಿಂಗಳೇ, ನನ್ನ ಬುಟ್ಟಿತ್, ಸೈತಾನಂಗು ಅಂವೊಂಡ ದೂತಂಗಕು ತಯಾರ್ ಮಾಡಿತುಳ್ಳ ನಿತ್ಯ ತಿತ್ತ್‌ಕ್ ಪೋಯಿ. 42ಎನ್ನಂಗೆಣ್ಣ್‌ಚೇಂಗಿ ನಾಕ್ ಕೆಲ ಪಯಿಚಿತ್‌ಪ್ಪಕ, ನಿಂಗ ಉಂಬಕ್ ತಂದಿತ್ಲ್ಲೆ, ನಾಕ್ ಬಾಯಾರಿಕೆಯಾಯಿತ್ ಇಪ್ಪಕ ನಾಕ್ ಕುಡಿಪಕ್ ನೀರ್ ತಂದಿತ್ಲ್ಲೆ, 43ನಾನ್ ದಾರ್‌ಕು ಗೊತ್ತಿಲ್ಲತಂವೊನಾಯಿತ್‌ಪ್ಪಕ, ನಿಂಗ ನನ್ನ ಮನೆಕ್ ಕೂಟಿತ್‌ಲ್ಲೆ, ಬಟ್ಟೆ ಇಲ್ಲತಿಪ್ಪಕ, ಇಡ್‌ವಕ್ ಬಟ್ಟೆ ತಂದಿತ್ಲ್ಲೆ, ನಾನ್ ಕಾಯಿಲೆಲ್ ಪಿಂಞ ಜೈಲ್‍ಲ್ ಇಪ್ಪಕ, ನಿಂಗ ನನ್ನ ನೋಟ್‍ವಕ್ ಬಂದಿತ್‌ಲ್ಲೆ.
44ಅಕ್ಕ ಅಯಿಂಗ: ಒಡೆಯನೇ, ನೀನ್ ಎಕ್ಕ ಕೆಲ ಪಯಿಚಂವೊನಾಯಿತ್, ಬಾಯಾರಿಕೆ ಉಳ್ಳಂವೊನಾಯಿತ್, ಪರಿಚಯ ಇಲ್ಲತಂವೊನಾಯಿತ್, ಬಟ್ಟೆ ಇಲ್ಲತಂವೊನಾಯಿತ್, ಕಾಯಿಲಸ್ತನಾಯಿತ್, ಜೈಲ್‍ಲ್ ಇಂಜಂವೊನಾಯಿತ್ ಕಂಡಿತ್ ನಂಗ ನೀಕ್ ಸಹಾಯ ಮಾಡಿತ್‌ಲ್ಲೇಂದ್ ಕ್‍ೕಪ.
45ನಾಡ ಅಣ್ಣತಮ್ಮಣಂಡಡೆಲ್ ಚೆರಿಯಯಿಂಗಳಾಯಿತುಳ್ಳ ಒಬ್ಬಂಗ್ ಎಕ್ಕ ಸಹಾಯ ಮಾಡಿತ್‌ಲ್ಲೆಯೋ ಅಕ್ಕಲೆ ನಿಂಗ ನಾಕ್ ಮಾಡಿತ್‌ಲ್ಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ವ.
46ಅಕ್ಕ ಈಂಗ ನಿತ್ಯ ಶಿಕ್ಷೆಕು, ನೀತಿವಂತಯಿಂಗ ನಿತ್ಯ ಜೀವಕು ಪೋಪ.
Currently Selected:
ಮತ್ತಾಯ 25: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
