ಮತ್ತಾಯ 20
20
ದ್ರಾಕ್ಷಿ ತೋಟತ್‍ಲ್ ಆಳ್ವ
1ಪರಲೋಕ ರಾಜ್ಯ ಎನ್ನನೆ ಎಣ್ಣ್‌ಚೇಂಗಿ, ಒರ್ ಮನೆರ ಎಜಮಾನ, ಅಂವೊಂಡ ತೋಟತ್‍ಲ್ ಪಣಿಕ್ ಆಳ್‍ವಳ ಕಾಕಿಯಂಡ್ ಬಪ್ಪಕ್ ಪೊಲಾಕಲೆ ಪೋಚಿ. 2ಅಂವೊ ಅಯಿಂಗಕ್ ಒರ್ ದಿವಸತ್‍ರ ಕೂಲಿಯಾಯಿತ್ ಒರ್ ಬೊಳ್ಳಿರ ನಾಣ್ಯತ್‍ನ ತಪ್ಪೀಂದ್ ಎಣ್ಣಿತ್ ಕೆಲಸಕ್ ಕಾಕಿಯಂಡ್ ಬಾತ್.
3ಒಯಿಂಬದ್ ಗಂಟೆಕ್ ಅಂವೊ ಪೊರಮೆ ಪೋಪಕ ಚತ್ತೆಲ್ ಚೆನ್ನ ಆಳ್ವ ಮುಂಡತೆ ನಿಂದಂಡಿಪ್ಪದ್‌ನ ಕಂಡಿತ್, 4ನಾಡ ದ್ರಾಕ್ಷಿ ತೋಟಕ್ ಪೋಯಿತ್ ಕೆಲಸ ಮಾಡಿ ನಿಂಗಕ್ ತಕ್ಕಂತ ಕೂಲಿನ ತಪ್ಪೀಂದ್ ಎಣ್ಣಿತ್ ಅಯಿಂಗಳ ಅಯಿಚತ್. 5ಅಕ್ಕ ಅಯಿಂಗ ಪೋಚಿ. ಪುನಃ ಮಜ್ಜಣ ಮೂಂದ್ ಗಂಟೆಕು ಅನ್ನನೆ ಮಾಡ್‍ಚಿ. 6ಅಂಜ್ ಗಂಟೆಕ್ ಅಂವೊ ಪುನಃ ಪೇಟೇಲ್ ಇಪ್ಪಕ ಇಂಞು ಚೆನ್ನ ಆಳುವಳ ಕಂಡಿತ್, ಎನ್ನಂಗ್ ನಿಂಗ ಪೂರ್ತಿ ದಿವಸ ಕೆಲಸ ಮಾಡತೆ ಸಮಯತ್‍ನ ಕಳೆಂದಂಡ್ ಉಳ್ಳಿರಾಂದ್ ಕ್‍ೕಟತ್.
7ಅದ್ಂಗ್ ಅಯಿಂಗ: ನಂಗಳ ದಾರೂ ಕೆಲಸಕ್ ಕಾಕಿತ್‌ಲ್ಲೇಂದ್ ಎಣ್ಣ್‌ಚಿ.
ಅಕ್ಕ ಅಂವೊ ಅಯಿಂಗಳ ನೋಟಿತ್: ಅನ್ನನಾಚೇಂಗಿ ನಿಂಗಳು ನಾಡ ತೋಟತ್‍ಲ್ ಪಣಿಕ್ ಪೋಯೀಂದ್ ಅಯಿಚತ್. 8ಬಯಿಟಾಪಕ ದ್ರಾಕ್ಷಿ ತೋಟತ್‍ರ ಎಜಮಾನ ಅಂವೊಂಡ ಮೇಸ್ತ್ರಿನ ಕಾಕಿತ್ ಎಲ್ಲಾರ್‌ಕು ಕೂಲಿ ಕೊಡ್‍ಪಕ್ ಎಣ್ಣ್‌ಚಿ. ಬಯ್ಯ ಬಂದಯಿಂಗಕು ಆದ್ಯವಾಯಿತ್ ಬಂದಯಿಂಗಕು ಕೊಡ್‍ಪಕ್ ಎಣ್ಣ್‌ಚಿ.
9ಅಂಜ್ ಗಂಟೆಕ್ ಕೆಲಸಕ್ ಬಂದಯಿಂಗಕ್ ಒರ್ ದಿವಸತ್‍ರ ಕೂಲಿಯಾಯಿತ್ ಒರ್ ಬೊಳ್ಳಿರ ನಾಣ್ಯ ಕ್‍ಟ್ಟ್‌ಚಿ. 10ಅಕ್ಕ, ಪೊಲಾಕಲೆ ಪಣಿಕ್ ಬಂದಯಿಂಗ, ಅಲ್ಲಿ ಬಂದಿತ್ ನಂಗಕ್ ಚೆನ್ನ ಜಾಸ್ತಿ ಕ್‍ಟ್ಟ್‌ವಾಂದ್ ಗೇನ ಮಾಡ್‍ಚಿ. ಆಚೇಂಗಿ ಅಯಿಂಗಕ್ ಸಹ ಒರ್ ಬೊಳ್ಳಿರ ನಾಣ್ಯತ್‍ನ ಕೊಡ್‍ತತ್.
11ಅಯಿಂಗ ಆ ದುಡ್ಡ್‌ನ ಎಡ್‍ತಂಡ್ ಎಜಮಾನಂಗ್: 12ಬಯ್ಯ ಬಂದ ಈಂಗ ಒರ್ ಗಂಟೆ ಮಾತ್ರ ಕೆಲಸ ಮಾಡ್‍ಚಿ. ಆಚೇಂಗಿ ನಂಗ ಪೊಲಾಕಯಿಂಜ ಬೆದ್‍ಲ್ ಕಷ್ಟಪಟ್ಟಿತ್ ಕೆಲಸ ಮಾಡಿಯೆ, ನಂಗಳ ಈಂಗಕ್ ಸರಿಸಮವವಾಯಿತ್ ಮಾಡಿರಲ್ಲಾಂದ್ ಗೊಣಗ್‍ಚಿ.
13ಅಕ್ಕ ಎಜಮಾನ, ಅಯಿಂಗಡಲ್ಲಿ ಇಂಜ ಒಬ್ಬಂಗ್: ಸ್ನೇಹಿತನೇ, ನಾನ್ ನೀಕ್ ಮೋಸ ಮಾಡಿತ್‌ಲ್ಲೆ. ನೀನ್ ನಾಡ ಪಕ್ಕ ಒರ್ ಬೊಳ್ಳಿರ ನಾಣ್ಯಕ್ ಒತ್ತಂಡಿಯಲ್ಲಾ? 14ನೀಡ ದುಡ್ಡ್‌ನ ಎಡ್‍ತಂಡ್ ಪೋ. ಕಡೇಕ್ ಬಂದ ಈಂಗಕ್, ನೀಕ್ ಕೊಡ್‍ತಚ್ಚಕೇ ಕೊಡ್‍ಪದ್ ನಾಡ ಇಷ್ಟ. 15ನಾಡ ಪಣತ್‍ನ ನಾಕ್ ಕುಶಿ ಆಪನೆಕೆ ಮಾಡ್‌ವಕ್ ನಾಕ್ ಹಕ್ಕ್ ಇಲ್ಲೆಯಾ? ಅಥವ, ನಾಕ್ ಉದಾರ ಮನಸ್ಸ್ ಉಳ್ಳಾಂಗ್ ನೀಕ್ ಹೊಟ್ಟೆಕಿಚ್ಚಾ?
16ಅನ್ನನೆ, ದಾರ್ ಮಿಂಞತ್‍ಲ್ ಉಂಡೋ ಅಯಿಂಗ ಬಯ್ಯತ್ ಆಯಿಪೋಪ. ಬಯ್ಯತ್ ಉಳ್ಳಯಿಂಗ ಮಿಂಞಕ್ ಇಪ್ಪಾಂದ್ ಯೇಸು ಎಣ್ಣ್‌ಚಿ.
ಯೇಸು ಪುನಃ ಅಂವೊಂಡ ಚಾವ್‍ರ ವಿಷಯತ್‍ನ ಎಣ್ಣ್‌ವದ್
(ಮಾರ್ಕ 10.32–34; ಲೂಕ 18.31–34)
17ಯೇಸು ಯೆರೂಸಲೇಮ್‌ಕ್ ಪೋಪಕಾಪಕ, ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಕಾಕುವಂಜಿ, ಅಂವೊಂಗ್ ಎಂತ ನಡ್‌ಪಾಂದ್ ಎಣ್ಣ್‌ಚಿ. 18ನಂಗ ಯೆರೂಸಲೇಮ್‌ಕ್ ಎತ್ತ್‌ವಕ, ಮನುಷ್ಯಕುಮಾರನ ಪುಡ್‌ಚಿತ್ ಮುಕ್ಯ ಯಾಜಕಂಗಡ ಕೈಯಿಕೂ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡ ಕೈಯಿಕೂ ಪುಡ್‌ಚಿತ್ ಕೊಡ್‍ಪ. 19ಅಯಿಂಗ ಕೊಲ್ಲ್‌ವಕ್ ಒಪ್ಪ್‌ಚಿಡ್‌ವ. ಅಯಿಂಗ ಅಂವೊನ ನಾನಾತರ ಬೈಗಳ ಬೈಯುವ, ಚಾಟಿಲ್ ಪೊಯ್ಯುವ, ಪಿಂಞ ಶಿಲುಬೇಕ್ ಇಡ್‌ವಕಾಯಿತ್ ಯೆಹೂದ್ಯಂಗಲ್ಲತಯಿಂಗಡ ಕೈಯಿಕ್ ಒಪ್ಪ್‌ಚಿಡ್‌ವ. ಆಚೇಂಗಿ ಮೂಂದನೆ ದಿನ ಚಾವ್‍ಯಿಂಜ ಜೀವವಾಯಿತ್ ಅಂವೊ ಏವಾಂದ್ ಎಣ್ಣ್‌ಚಿ.
ಒರ್ ಅವ್ವಂಡ ಬೋಡಿಕೆ
(ಮಾರ್ಕ 10.35–45)
20ಅಕ್ಕ ಜೆಬೆದಾಯಂಡ ಪೊಣ್ಣ್ ಅವಡ ದಂಡ್ ಮಕ್ಕಳ ಯೇಸುರ ಪಕ್ಕ ಕಾಕಿಯಂಡ್ ಬಂದಿತ್, ಅಂವೊಂಡ ಪಕ್ಕ ಒರ್ ಸಹಾಯ ಕ್‍ೕಪಕಾಯಿತ್ ಮೊಣಕಾಲ್ ಇಟ್ಟತ್.
21ಅಕ್ಕ ಯೇಸು ಅವಳ ನೋಟಿತ್: ನೀಡ ಬೋಡಿಕೆ ಎಂತ್‍ೕಂದ್ ಕ್‍ೕಟತ್.
ಅಕ್ಕ ಅವ: ನಾಡ ಈ ದಂಡ್ ಮಕ್ಕಳ, ನೀನ್ ನೀಡ ರಾಜ್ಯತ್‍ಲ್ ಇಪ್ಪಕ, ಒಬ್ಬನ ನೀಡ ಬಲ್‌ತೆ ಬರಿಲ್ ಇಂಞೊಬ್ಬನ ನೀಡ ಎಡ್‍ತೆ ಬರಿಲ್ ಅಳ್‍ಪನೆಕೆ ಮಾಡ್‍ೕಂದ್ ಎಣ್ಣ್‌ಚಿ.
22ಅದ್ಂಗ್ ಯೇಸು: ನೀನ್ ಎಂತಾನ ಕ್‍ೕಟಂಡುಳ್ಳಿಯಾಂದ್ ನೀಕ್ ಗೊತ್ತ್‌ಲ್ಲೆ. ನಾನ್ ಕುಡಿಪಕುಳ್ಳ ಕಷ್ಟತ್‍ರ ಪಾತ್ರತ್‍ನ#20.22 ಇಲ್ಲಿ ಯೇಸು ಪಾತ್ರಾಂದ್ ಎಣ್ಣ್‌ವದ್, ತಾಂಡ ಕ್ರೂರವಾನ ಚಾವ್‍ರ ವಿಷಯತ್ ಎಣ್ಣಿಯಂಡುಂಡ್. ನೀನ್ ಕುಡಿಪಕಯ್ಯುವಾಂದ್ ಕ್‍ೕಟತ್.
ಅಕ್ಕು, ನಂಗಕ್ ಕಯ್ಯೂಂದ್ ಎಣ್ಣ್‌ಚಿ.
23ಅಯಿಂಗಕ್ ಯೇಸು: ನಿಂಗ ನೇರಾಯಿತು ನಾನ್ ಕುಡಿಪ ಕಷ್ಟತ್‍ರ ಪಾತ್ರತ್‍ನ ಕುಡಿಪಿರ. ಆಚೇಂಗಿ ನಾಡ ಬಲ್‌ತೆ ಬರಿಲ್ ಪಿಂಞ ಎಡ್‍ತೆ ಬರಿಲ್ ದಾರ್ ಅಳ್‍ಕಂಡೂಂದ್ ಎಣ್ಣ್‌ವಕ್ ನಾಕ್ ಅದಿಕಾರ ಇಲ್ಲೆ. ಆ ಜಾಗತ್‍ನ ದಾರ್‌ಕ್ ನಾಡ ಅಪ್ಪ ಆಯ್ಕೆ ಮಾಡಿತುಂಡೋ ಅಯಿಂಗಕಾಯಿತ್ ಬೆಚ್ಚಿತುಂಡ್‍ೕಂದ್ ಎಣ್ಣ್‌ಚಿ.
24ಯಾಕೋಬ ಪಿಂಞ ಯೋಹಾನ ಎಣ್ಣ್‌ನದ್‍ನ ಕ್‍ೕಟಿತ್ ಬೋರೆ ಪತ್ತ್ ಶಿಷ್ಯಂಗಕ್ ಚೆಡಿ ಬಾತ್. 25ಯೇಸು ಅಯಿಂಗಳೆಲ್ಲ ತಾಂಡ ಪಕ್ಕ ಕಾಕುವಂಜಿ, ಈ ಲೋಕತ್‍ನ ಆಳುವಯಿಂಗ ಅಯಿಂಗಯಿಂಗಡ ಜನಳ ಆಂಗಾರತ್‍ಲ್ ಆಳುವ, ಪಿಂಞ ಅಯಿಂಗಡ ಅದಿಕಾರಿಯಂಗ ಅಯಿಂಗಡ ಮೇಲೆ ಬಲತ್ಕಾರತ್‌ಲ್ ಅದಿಕಾರ ಮಾಡ್‍ವದ್ ನಿಂಗಕ್ ಗೊತ್ತುಂಡ್. 26ಆಚೇಂಗಿ ನಿಂಗಡ ಒಳ್‍ಲ್ ಅನ್ನನೆ ಇಪ್ಪಕ್ಕಾಗ. ನಿಂಗಡಲ್ಲಿ ದಾರ್‌ಕ್ ಬಲ್ಯಂವೊನಾಯಿತ್ ಇಪ್ಪಕ್ ಕುಶಿಯುಂಡೋ ಅಂವೊ ಎಲ್ಲಾರ್‌ಕು ಅಡಿಯಾಳಾಯಿತ್ ಸೇವೆ ಮಾಡ್‌ವನೆಕೆ ಇಕ್ಕಂಡು. 27ಪಿಂಞ ನಿಂಗಡಲ್ಲಿ ದಾರ್‌ಕ್ ಮಿಂಞತ್ ಇಪ್ಪಕ್ ಕುಶಿ ಉಂಡೋ, ಅಯಿಂಗ ನಿಂಗಕ್ ಆಳಾಯಿತ್ ಇಕ್ಕಂಡು. 28ಅನ್ನನೆ, ಮನುಷ್ಯಕುಮಾರ ಸಹ ಬೋರೆಯಿಂಗಡಿಂಜ ಸೇವೆ ಮಾಡ್‌ಚಿಟ್ಟ್‌ವಕಾಯಿತ್ ಬಂದಿತ್ತ್‌ಲ್ಲೆ. ಆಚೇಂಗಿ ಸೇವೆ ಮಾಡ್‌ವಕಾಯಿತು, ದುಂಬ ಜನಳ ಬುಡ್‍ಗಡೆ ಮಾಡ್‌ವಕ್ ತಾಂಡ ಜೀವತ್‍ನ ಕೊಡ್‍ಪಕಾಯಿತು ಬಂದಿಯೇಂದ್ ಎಣ್ಣ್‌ಚಿ.
ಯೇಸು ದಂಡ್ ಕುರ್‌ಡಂಗಳ ವಾಸಿ ಮಾಡ್‍ನದ್
(ಮಾರ್ಕ 10.46–52; ಲೂಕ 18.35–43)
29ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಯೆರಿಕೋಯಿಂಜ ಪೋಪಕ ಬಲ್ಯ ಜನಡ ಗುಂಪ್ ಅಯಿಂಗಡ ಬಯ್ಯತ್ ಪೋಚಿ. 30ಅಕ್ಕ ಬಟ್ಟೆ ಬರಿಲ್ ಅಳ್‌ತಂಡಿಂಜ ದಂಡ್ ಕುರ್‌ಡಂಗಕ್ ಯೇಸು ಈಲೆ ಪೋಯಂಡ್ ಉಂಡ್‍ೕಂದ್ ಗೊತ್ತಾಚಿ. ಅಕ್ಕ ಅಯಿಂಗ, ಒಡೆಯನೇ, ದಾವೀದಂಡ ಮೋಂವೊನೇ, ನಂಗಡ ಮೇಲೆ ಕನಿಕರ ಕಾಟ್‍ೕಂದ್ ಜೋರಾಯಿತ್ ಕೂತ್ ಕೊಡ್‍ತತ್. 31ಜನಡ ಗುಂಪ್, ಅಯಿಂಗಕ್ ಮುಂಡತೆ ಇರೀಂದ್ ಜೋರ್ ಮಾಡ್‍ಚಿ. ಆಚೇಂಗಿ ಅಯಿಂಗ ಇಂಞು ಜೋರಾಯಿತ್ ಒಡೆಯನಾನ ದಾವೀದಂಡ ಮೋಂವೊನೇ ನಾಡ ಮೇಲೆ ದಯಕಾಟ್‍ೕಂದ್ ಕೂತ್ ಕೊಡ್‍ಪಕ್ ಸರುಮಾಡ್‌ಚಿ.
32ಯೇಸು ನಿಪ್ಪಂಜಿ ಅಯಿಂಗಳ ಕಾಕಿತ್: ನಿಂಗಕ್ ನನ್ನಗುಂಡ್ ಎಂತಾಂಡೂಂದ್ ಕ್‍ೕಟತ್.
33ಅದ್ಂಗ್ ಅಯಿಂಗ: ಒಡೆಯನೇ ನಂಗಕ್ ಕಣ್ಣ್ ಕಾಂಬನೆಕೆ ಮಾಡ್‍ೕಂದ್ ಎಣ್ಣ್‌ಚಿ. 34ಯೇಸುಕ್ ಬಾರಿ ಕನಿಕರ ಆಚಿ. ಅಯಿಂಗಡ ಕಣ್ಣ್‌ನ ಮುಟ್ಟ್‌ಚಿ. ಒಡನೆ ಅಯಿಂಗಕ್ ಕಣ್ಣ್ ಕಾಂಬಕಾಚಿ, ಅಯಿಂಗ ಯೇಸುರ ಬಯ್ಯತ್ ಪೋಚಿ.
Currently Selected:
ಮತ್ತಾಯ 20: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
