ಮತ್ತಾಯ 13
13
ಬಿತ್ತ್‌ವಂವೊಂಡ ಕಥೇರ ರೂಪ
(ಮಾರ್ಕ 4.1–9; ಲೂಕ 8.4–8)
1ಅದೇ ದಿವಸ ಯೇಸು ಮನೆಯಿಂಜ ಪೊರಮೆ ಪೋಪಂಜಿ ಕೆರೆರ ಕರೆಕ್ ಪೋಯಿತ್ ಅಳ್‌ತತ್. 2ದುಂಬ ಜನ ಕೂಡಿಬಂದಗುಂಡ್ ಯೇಸು ಪೋಯಿತ್ ಅಲ್ಲಿ ಇಂಜ ಒರು ದೋಣಿಲ್ ಅಳ್‌ತಂಡತ್. ಜನಡ ಕೂಟ ಕೆರೆರ ಬರಿಲ್ ನಿಂದಂಡಿಂಜತ್. ದುಂಬ ವಿಷಯತ್‍ನ ಅಯಿಂಗಕ್ ಕಥೇರ ರೂಪತ್‌ಲ್ ಎಣ್ಣಿ ಕೊಡ್‍ತಂಡಿಂಜತ್. 3ಅಂವೊ ಸುಮಾರ್ ವಿಷಯತ್‍ನ ಕಥೇರ ರೂಪತ್‌ಲ್ ಎಣ್ಣ್‌ವಕಿಂಜತ್; ಕ್‍ೕಳಿ, ಒರ್ ಮನುಷ್ಯ ಕುರುನ ಬಿತ್ತ್‌ವಕ್ ಪೊರಟ್ ಪೋಚಿ. 4ಅಂವೊ ಆ ಕುರುನ ಬಿತ್ತ್‌ವಕ್ ಚಾಡ್‌ವಕ ಚೆನ್ನ ಕುರು ನಡ್‍ಪ ಬಟ್ಟೇಲ್ ಬುದ್ದತ್; ಆ ಕುರುನ ಪಕ್ಷಿಯ ಬಂದಿತ್ ತಿಂದತ್. 5ಚೆನ್ನ ಕುರು, ಮಣ್ಣ್ ಇಲ್ಲತ ಕಲ್ಲ್ ಕಲ್ಲಾಯಿತ್ಂಜ ನೆಲತ್‌ಲ್ ಬುದ್ದತ್. ಅಲ್ಲಿ ಚೆನ್ನಂಗೇ ಮಣ್ಣ್ ಇಂಜಗುಂಡ್, ಅಲ್ಲಿ ಬೆರಿಯ ಮೊಳಕೆ ಬಾತ್. 6ಆಚೇಂಗಿ ಬೆದ್ ಬಪ್ಪಕ ಮೊಳೆಕೆ ಒಣಂಗಿ ಪೋಚಿ. ಎನ್ನಂಗೆಣ್ಣ್‌ಚೇಂಗಿ ಆ ಗಿಡತ್‌ರ ಬೇರ್ ಆಳವಾಯಿತ್ ಪೋಯಿತ್ಂಜಿಲೆ. 7ಚೆನ್ನ ಕುರು ಮುಳ್ಳ್ ಪೊದೆಲ್ ಬುದ್ದತ್; ಮುಳ್ಳ್ ಗಿಡ ಬೊಳ್ಂದಿತ್ ಅದ್‍ನ ನೆರ್‌ಕ್‌ಚಿ. 8ಚೆನ್ನ ಕುರು ನಲ್ಲ ಮಣ್ಣ್‌ಕ್ ಬುದ್ದತ್. ಅದ್ ಬೊಳ್ಂದಿತ್, ಚೆನ್ನ ಕುರು ನೂರಚ್ಚಕ್, ಚೆನ್ನ ಅರ್‌ವದಚ್ಚಕ್, ಚೆನ್ನ ನುಪ್ಪದಚ್ಚಕ್ ಫಲ ತಂದತ್. 9ಕ್‍ೕಪಕ್ ಕೆಮಿ ಉಳ್ಳಯಿಂಗ ಕ್‍ೕಳೀಂದ್ ಎಣ್ಣ್‌ಚಿ.
ಕಥೇರ ರೂಪತ್‍ರ ಉದ್ದೇಶ
(ಮಾರ್ಕ 4.10–12; ಲೂಕ 8.9,10)
10ಅಕ್ಕ, ಶಿಷ್ಯಂಗ ಅಂವೊಂಡ ಪಕ್ಕ ಬಂದಿತ್: ನೀನ್ ಎನ್ನಂಗ್ ಜನಡ ಕೂಡೆ ಕಥೇರ ರೂಪತ್‌ಲ್ ತಕ್ಕ್ ಪರಿಯುವಿಯಾಂದ್ ಕ್‍ೕಟತ್.
11ಅಯಿಂಗಕ್ ಅಂವೊ: ಪರಲೋಕ ರಾಜ್ಯತ್‍ರ ಗುಟ್ಟ್ ನಿಂಗಕ್ ಗೊತ್ತಾಪನೆಕೆ ಮಾಡಿತುಂಡ್. ಆಚೇಂಗಿ ಪೊರಮೆ ಉಳ್ಳಯಿಂಗಕ್ ಈ ಬಾಗ್ಯ ಕ್‍ಟ್ಟಿತ್‌ಲ್ಲೆ. 12ಉಳ್ಳಯಿಂಗಕ್ ಇಂಞು ಕ್‍ಟ್ಟ್‌ವ, ಅಯಿಂಗಕ್ ಬೋಂಡಿಯಚ್ಚಕ್ ಇಪ್ಪ; ಇಲ್ಲತಯಿಂಗಕ್ ಚೆನ್ನ ಉಳ್ಳದ್‍ನ ಸಹ ಎಡ್‌ತ್‌ರ್‌ವ.
13ಅಯಿಂಗ ನೋಟ್‍ಚೇಂಗಿಯು ಕಾಂಗತಯಿಂಗಳಾಯಿತು,
ಕ್‍ೕಟತೇಂಗಿಯು ಕ್‍ೕಕತಯಿಂಗಳಾಯಿತು, ಅರ್ಥ ಆಕತಂಗಳಾಯಿತು ಉಳ್ಳಗುಂಡ್,
ನಾನ್ ಅಯಿಂಗಕ್ ಕಥೇರ ರೂಪತ್‌ಲ್ ಎಣ್ಣಿಯಂಡುಳ್ಳ.
14ಯೆಶಾಯ ಪ್ರವಾದಿ ಎಣ್ಣ್‌ನ ಪ್ರವಾದನೆ ಅಯಿಂಗಡ ಪಕ್ಕ ನೆರೆವೇರಿಯಂಡುಂಡ್; ಅಂವೊ ಇನ್ನನೆ ಎಣ್ಣಿತ್ಂಜತ್:
ಈ ಜನ ಕ್‍ೕಪ, ಆಚೇಂಗಿ ಅಯಿಂಗಕ್ ಅರ್ಥ ಆಪುಲೆ.
ಅಯಿಂಗ ನೋಟುವ, ಆಚೇಂಗಿ ಅಯಿಂಗಕ್ ಕಾಂಬುಲೆ.
15ಈ ಜನ ಕಣ್ಣಿಂಜ ಕಾಂಗತೆಯು, ಕೆಮಿಯಿಂಜ ಕ್‍ೕಕತೆಯು, ಹೃದಯತ್ಂಜ ಅರ್ಥ ಆಕತೆ ಅಯಿಂಗಡ ಮನಸ್ಸ್ ಬದ್‍ಲಾಕತೆ,
ನಾನ್ ಅಯಿಂಗಳ ವಾಸಿ ಮಾಡತೆ ಇಪ್ಪನೆಕೆ ಅಯಿಂಗಡ ಹೃದಯ ಕಠಿಣವಾಯಿತು,
ಕೆಮಿ ಕ್‍ೕಪಾನ ನಿಪ್ಪ್‌ಚಿಟ್ಟಿತು, ಕಣ್ಣ್‌ನ ಮುಚ್ಚಿತ್ ಉಂಡ್.#13.15 ಯೆಶಾಯ 6.9–10
16ಆಚೇಂಗಿ ನಿಂಗಡ ಕಣ್ಣ್ ಕಾಂಬಗುಂಡ್, ಕೆಮಿ ಕ್‍ೕಪಗುಂಡ್ ನಿಂಗ ಎಚ್ಚಕ್ ಆಶೀರ್ವಾದ ಪಡ್ಂದಯಿಂಗ. 17ದುಂಬ ಪ್ರವಾದಿಯಳು, ನೀತಿವಂತಯಿಂಗಳು ನಿಂಗ ನೋಟ್‍ವಾನ ನೋಟ್‍ವಕೂ, ನಿಂಗ ಕ್‍ೕಟಂಡುಳ್ಳಾನ ಕ್‍ೕಪಕು ದುಂಬ ಆಸೆ ಪಟ್ಟತ್, ಆಚೇಂಗಿ ಅಯಿಂಗ ಇದ್‍ನೆಲ್ಲಾ ಕಾಂಗತೆ, ಕ್‍ೕಕತೆ ಪೋಚೀಂದ್ ನಾನ್ ನೇರಾಯಿತು ನಿಂಗಕ್ ಎಣ್ಣುವಿ.
ಕಥೇರ ರೂಪತ್‍ನ ವಿವರಿಚಿಡ್‌ವದ್
(ಮಾರ್ಕ 4.13–20; ಲೂಕ 8.11–15)
18ಆನಗುಂಡ್, ಕುರು ಬಿತ್ತ್‌ವಂವೊಂಡ ಕಥೇರ ರೂಪತ್‍ರ ಅರ್ಥ ಎಂತ್‍ೕಂದ್ ಕ್‍ೕಳಿ. 19ದೇವಡ ರಾಜ್ಯತ್‍ರ ವಿಷಯತ್‍ನ ಕ್‍ೕಟಿತ್, ಅರ್ಥ ಆಕತೆ ಇಪ್ಪಕ, ಸೈತಾನ ಬಂದಿತ್ ಅಂವೊಂಡ ಹೃದಯತ್‍ಲ್ ಬುದ್ದ ಕುರುನ ಎಡ್‍ತಂಡ್ ಪೋಯಿರುವ. ಅಂವೊ ನಡ್‍ಪ ಬಟ್ಟೇಲ್ ಬುದ್ದ ಕುರುರನೆಕೆ. 20ಚೆನ್ನ ಜನ ಪಾರೆಕಲ್ಲ್‌ರ ಮೇಲೆ ಬುದ್ದ ಕುರುರನೆಕೆ. ದೇವಡ ವಾಕ್ಯತ್‍ನ ಕ್‍ೕಟಿತ್, ಬೆರಿಯ ಕುಶೀಲ್ ಸ್ವೀಕಾರ ಮಾಡ್‌ವ; 21ಆಚೇಂಗಿ, ಕಲ್ಲ್ ಜಾಗತ್‍ಲ್ ಬೇರೂರತೆ ಉಳ್ಳಗುಂಡ್, ಅದ್ ದುಂಬ ದಿವಸ ಇಪ್ಪುಲೆ. ಇನ್ನನೆ ದೇವಡ ವಾಕ್ಯತ್‍ರಗುಂಡ್ ಕಷ್ಟ, ಹಿಂಸೆ ಬಪ್ಪಕ ಅಯಿಂಗ ಕ್‍ೕಟಾನ ಬೆರಿಯ ಬುಟ್ಟ್‌ರ್‌ವ. 22ಮುಳ್ಳ್‌ರ ಪೊದೆಲ್ ಬುದ್ದ ಕುರು ಎನ್ನನೇಂದ್ ಎಣ್ಣ್‌ಚೇಂಗಿ, ಅಯಿಂಗ ದೇವಡ ವಾಕ್ಯತ್‍ನ ಕ್‍ೕಪ. ಆಚೇಂಗಿ ಈ ಬದ್‍ಕ್‍ರ ವಿಷಯತ್ ಬೇಜಾರ್ ಮಾಡಿಯಂಡ್, ಪಣತ್‍ರ ಮೇಲೆ ಉಳ್ಳ ಆಸೆರಗುಂಡ್, ಇದೆಲ್ಲ, ಅಯಿಂಗ ಕ್‍ೕಟ ದೇವಡ ವಾಕ್ಯತ್‍ನ ನೆರ್‌ಕಿತ್, ಅಯಿಂಗ ಫಲ ಕೊಡ್‍ಕತೆ ಪೋಪ. 23ನಲ್ಲ ಮಣ್ಣ್‌ಲ್ ಬುದ್ದ ಕುರು ಎನ್ನನೆ ಎಣ್ಣ್‌ಚೇಂಗಿ, ದೇವಡ ವಾಕ್ಯತ್‍ನ ಕ್‍ೕಟಿತ್, ಅರ್ಥ ಮಾಡಿಯಂಡ್, ನಲ್ಲ ಫಲ ಕೊಡ್‍ಪನೆಕೆ. ಅಂವೊ ನೂರ್, ಅರ್‌ವದ್, ನುಪ್ಪದಚ್ಚಕ್ ಫಲ ಕೊಡ್‍ಪ.
ಗೋದಿ ಪಿಂಞ ಕಳೆರ ಕಥೇರ ರೂಪ.
24ಇಂಞೊರ್ ಕಥೇರ ರೂಪತ್‍ನ ಯೇಸು ಅಯಿಂಗಕ್ ಎಣ್ಣ್‌ಚಿ: ಪರಲೋಕ ರಾಜ್ಯತ್‍ನ ಇನ್ನನೆ ಎಣ್ಣ್‌ವಕ್ ಕಯ್ಯು: ಒರ್ ಮನುಷ್ಯ, ನಲ್ಲ ಗೋದಿ ಕಾಳ್‌ನ ಬೇಲ್‌ಲ್ ಬಿತ್ತುವ. 25ಒರ್ ದಿನ, ಎಲ್ಲಾರು ವರಿಯಂಡಿಪ್ಪಕ ಅಂವೊಂಡ ವಿರೋದಿ ಬಂದಿತ್ ಕಚಡ ಕುರುನ, ಆ ನಲ್ಲ ಕುರುರ ಮದ್ಯತ್ ಬಿತ್ತ್‌ವಂಜಿ ಪೋಯಿರುವ. 26ಬೊಳೆ ಬೊಳಿಯುವಕ ಕಚಡ ಕುರು ಸಹ ನಲ್ಲ ಗೋದಿ ಬೊಳೇರಕೂಡೆ ಬೊಳ್‌ದಂಡ್ ಬಾತ್.
27ಆ ಎಜಮಾನಂಡ ಆಳ್‍ವ ಬಂದಿತ್: ಸ್ವಾಮೀ, ನೀನ್ ನಲ್ಲ ಕುರು ಮಾತ್ರ ಬಿತ್ತಿಯೆ, ಪಿಂಞ ಎನ್ನನೆ, ಅದ್ಂಡಕೂಡೆ ಕಚಡ ಗಿಡ ಬೊಳ್‌ದಂಡ್ ಉಂಡ್‍ೕಂದ್ ಕ್‍ೕಟತ್.
28ಅದ್ಂಗ್ ಅಂವೊ: ಅದ್, ದಾರೋ ನಾಡ ವಿರೋದಿ ಮಾಡ್‍ನ ಕೆಲಸಾಂದ್ ಎಣ್ಣ್‌ಚಿ. ಅಕ್ಕ ಅಂವೊಂಡ ಆಳ್‍ವ ಎಜಮಾನಂಗ್: ಆ ಕಚಡ ಗಿಡತ್‌ನೆಲ್ಲ ನಂಗ ಪೋಯಿತ್ ಬಲ್‌ಚಿರಡಾಂದ್ ಕ್‍ೕಟತ್.
29ಅಕ್ಕ ಎಜಮಾನ: ಇಕ್ಕ ಬೋಂಡ, ಕಚಡ ಗಿಡತ್‍ನ ನಿಂಗ ಬಲಿಪಕ, ಗೋದಿ ಗಿಡ ಸಹ ಬೇರೋಡೆ ಬಂದ್‍ರ್‍ವ. ಆನಗುಂಡ್, ಅದ್ ಸಹ ಆಂಡ ಕೂಡೆ ಬೊಳಿಯಡ್. 30ಕೊಯಿಪಣಿ ಸುರು ಆಪಕ, ನಾನ್ ನಾಡ ಆಳ್‍ವಕ್ ಕಚಡ ಗಿಡತ್‍ನ ಮಿಂಞ ಬಲ್‍ಚಿತ್, ಅದ್‍ನ ಚುಡ್‌ವಕ್ ಕೆಟ್ಟಿತ್ ಬೆಪ್ಪಕ್ ಎಣ್ಣಿತ್, ಬಯ್ಯ ಗೋದಿನ ಪತ್ತಾಯತ್‍ಲ್ ಇಟ್ಟಿತ್ ಕೂಟ್‍ವಕ್ ಎಣ್ಣುವೀಂದ್ ಎಜಮಾನ ಎಣ್ಣ್‌ಚಿ.
ಕಡು ಕುರುರ ಕಥೇರ ರೂಪ
(ಮಾರ್ಕ 4.30–32; ಲೂಕ 13.18,19)
31ಯೇಸು ಇಂಞೊರ್ ಕಥೇರ ರೂಪತ್‍ನ ಎಣ್ಣ್‌ಚಿ. ಪರಲೋಕ ರಾಜ್ಯ ಒರ್ ಕಡು ಕುರುರನೆಕೆ. ಒರ್ ಮನುಷ್ಯ ಆ ಕಡು ಕುರುನ ತಾಂಡ ಬೇಲ್‌ಲ್ ಬಿತ್ತುವ. 32ಆ ಕುರು ಎಲ್ಲಾ ಕುರುಕಿಂಜ ಚೆರಿಯದ್. ಅದ್ ಬೊಳಿವಕ, ಎಲ್ಲಾ ಗಿಡಕಿಂಜ ಬಲ್ಯದಾಯಿತ್ ಬೊಳ್ಂದಿತ್, ಮರ ಆಪ. ಬಾನತ್‍ರ ಪಕ್ಷಿಯ ಬಂದಿತ್ ಅದ್ಂಡ ಕೊಂಬ್‌ಲ್ ಗೂಡ್ ಕೆಟ್ಟ್‌ವ.
ಈಸ್ಟ್‌ರ ಕಥೇರ ರೂಪ
(ಲೂಕ 13.20,21)
33ಯೇಸು ಇಂಞೊರ್ ಕಥೇರ ರೂಪತ್‍ನ ಎಣ್ಣ್‌ಚಿ. ಪರಲೋಕ ರಾಜ್ಯ ಎನ್ನನೆ ಎಣ್ಣ್‌ಚೇಂಗಿ, ಒರ್ ಪೊಣ್ಣಾಳ್, ಮೂಂದ್ ಸೇರ್ ಪೊಡಿಕ್, ಚೆನ್ನ ಈಸ್ಟ್‌ನ ದುಂಬ ಮುದ್ದೆಕ್ ಕಲ್‍ಕ್‍ನನೆಕೆ. ಕಡೇಕ್ ಎಲ್ಲಾ ಮುದ್ದೆಯು ಪುಳಿಯಾಪ.
ಕಥೇರ ರೂಪತ್ ಯೇಸು ಬೋದನೆ ಮಾಡ್‍ನದ್
(ಮಾರ್ಕ 4.33,34)
34ಯೇಸು ಜನಡ ಕೂಡೆ ತಕ್ಕ್ ಪರಿಯುವಕ ಎಕ್ಕಲೂ ಇನ್ನನೆ ಕಥೇರ ರೂಪತ್‌ಲ್ ಅಥವ ಉದಾರಣೆಲ್ ಅರ್ಥ ಆಪನೆಕೆ ಎಣ್ಣಿಕೊಡ್‌ಪಯಿಂಜತ್. ಇನ್ನನೆ ಕಥೇರ ರೂಪತ್‌ಲ್ ಅಲ್ಲತೆ ಜನಕ್ ಬೋದನೆ ಮಾಡ್‌ವಕಿಂಜಿಲೆ.
35ನಾನ್ ಕಥೇರ ರೂಪತ್‌ಲ್ ತಕ್ಕ್ ಪರಿಯುವಿ;
ಬೂಲೋಕ ಸೃಷ್ಟಿ ಆಪಕಿಂಜ ಮಿಂಞ ಗುಟ್ಟಾಯಿತ್ಂಜಾನೆಲ್ಲ ಅರ್ಥ ಮಾಡಿ ತಪ್ಪೀಂದ್,
ಪ್ರವಾದಿ ಎಣ್ಣ್‌ನದ್ ಇಕ್ಕ ನೆರವೇರ್‍ಚಿ.#13.35 ದೇವಡ ಪಾಟ್ 78.2
36ಅಕ್ಕ ಯೇಸು, ಜನಳ ಬುಟ್ಟಿತ್ ಮನೆರ ಒಳ್‍ಕ್ ಪೋಚಿ. ಅಂವೊಂಡ ಶಿಷ್ಯಂಗ ಅಂವೊಂಡ ಪಕ್ಕ ಬಂತ್, ಕಚಡ ಕುರುರ ಕಥೇರ ರೂಪತ್‍ನ ನಂಗಕ್ ಎಣ್ಣಿತಾಂದ್ ಕ್‍ೕಟತ್.
37ಅದ್ಂಗ್ ಯೇಸು: ನಲ್ಲ ಗೋದಿ ಕಾಳ್‌ನ ಬಿತ್ತ್‌ನಂವೊ ಮನುಷ್ಯಕುಮಾರ, 38ಬಯಲ್ ಎಣ್ಣ್‌ವದ್ ಈ ಲೋಕ; ನಲ್ಲ ಕುರು, ದೇವಡ ರಾಜ್ಯತ್‍ರ ಮಕ್ಕ; ಕಚಡ ಕುರು ಸೈತಾನಂಡ ಜನ; 39ಅದ್‍ನ ಬಿತ್ತುವ ವಿರೋದಿ ಸೈತಾನ. ಕೊಯ್ಯುವ ಕಾಲ ಎಣ್ಣ್‌ವದ್ ಈ ಲೋಕತ್‍ರ ಕಡೆ ಕಾಲ. ಕೊಯಿಪಣಿ ಮಾಡ್‌ವಯಿಂಗ ದೇವದೂತಂಗ. 40ಕಚಡತ್‍ನ ಕೂಟಿತ್ ಚುಡ್‍ವನೆಕೆ, ಈ ಲೋಕತ್‍ರ ಅಂತ್ಯ ಇಪ್ಪ. 41ಮನುಷ್ಯಕುಮಾರ ದೇವದೂತಂಗಳ ಅಯಿಪ. ಅಯಿಂಗ, ಅಂವೊಂಡ ರಾಜ್ಯತ್‍ಲ್, ಜನಳ ಪಾಪತ್‍ಲ್ ಬೂವನೆಕೆ ಮಾಡ್‌ವಯಿಂಗಳ ಪಿಂಞ ಮೋಸಮಾಡ್‍ವಯಿಂಗಳ ಗುಡ್ಡೆ ಕೂಟಿತ್, 42ತಿತ್ತ್‌ರ ನರಕಕ್ ಚಾಡ್‍ವ. ಅಲ್ಲಿ ಅಯಿಂಗ ಮೊರಟಂಡ್ ಪಲ್ಲ್ ಕಡಿಚಂಡ್ ಇಪ್ಪ. 43ನೀತಿವಂತಯಿಂಗ ಅಯಿಂಗಡ ಅಪ್ಪಂಡ ರಾಜ್ಯತ್‍ಲ್ ಸೂರ್ಯಂಡನೆಕೆ ಮಿನ್ನುವ. ಕ್‍ೕಪಕ್ ಕೆಮಿ ಉಳ್ಳಯಿಂಗ ಕ್‍ೕಳಿ.
ಒಳ್‍ಪ್‌ಚಿಟ್ಟ್ ಬೆಚ್ಚಿತುಳ್ಳ ನಿದಿ ಪಿಂಞ ಮುತ್ತ್ ಮಣಿರ ಕಥೇರ ರೂಪ
44ಪರಲೋಕ ರಾಜ್ಯ ಎಣ್ಣ್‌ವದ್ ಬೇಲ್‌ಲ್ ಒಳ್‍ಪ್‌ಚಿಟ್ಟ್ ಬೆಚ್ಚಿತುಳ್ಳ ನಿದಿಕ್ ಸಮವಾಯಿತುಂಡ್. ಒರ್ ಮನುಷ್ಯ ಅದ್‍ನ ಕಂಡದು, ಅದ್‍ನ ಮುಚ್ಚಿರುವಂಜಿ, ಆ ಕುಶೀಲ್ ಈ ಬೇಲ್‍ನ ಕ್ರಯಕ್ ಎಡ್‌ಪಕಾಯಿತ್, ಅಂವೊಂಡ ಪಕ್ಕ ಇಂಜ ಆಸ್ತಿನೆಲ್ಲ ಮಾರಿರುವ. 45ಇಂಞು ಪರಲೋಕ ರಾಜ್ಯ ಎಣ್ಣ್‌ವದ್, ನಲ್ಲ ಮುತ್ತ್ ಮಣಿನ ತೇಡ್‍ವ ವ್ಯಾಪರಿಕ್ ಸಮವಾಯಿತುಂಡ್. 46ಅಂವೊ ಆ ನಲ್ಲ ಮುತ್ತ್ ಮಣಿನ ಕಂಡ್‍ಪುಡ್‌ಚ ಪಿಂಞ ಅಂವೊ ಪೋಯಿತ್, ಅಂವೊಂಡ ಪಕ್ಕ ಇಂಜ ಎಲ್ಲಾ ಐಶ್ವರ್ಯತ್‍ನ ಮಾರ್‌ವಂಜಿ ಆ ನಲ್ಲ ಮುತ್ತ್ ಮಣಿನ ಕ್ರಯಕ್ ಎಡ್‌ಪ.
ಬಲೇರ ಕಥೇರ ರೂಪ
47ಪರಲೋಕ ರಾಜ್ಯ ಎಣ್ಣ್‌ವದ್, ಸಮುದ್ರತ್‍ಲ್ ಚಾಡಿತ್, ನಾನಾ ತರತ್‍ರ ಮೀನ್‌ನ ಒಟ್ಟ್ ಕೂಟ್‌ವ ಬಲೇಕ್ ಸಮವಾಯಿತುಂಡ್. 48ಆ ಬಲೆ ದುಂಬ್‍ನ ಪಿಂಞ, ಅದ್‍ನ ಸಮುದ್ರತ್‍ರ ಕರೆಕ್ ಬಲಿಪಂಜಿ ಬಲೇಕ್ ಬುದ್ದ ಮೀನ್‌ನೆಲ್ಲ ಬೋರೆ ಬೋರೆ ಮಾಡಿತ್, ನಲ್ಲ ಮೀನ್‌ನೆಲ್ಲ ಅಯಿಂಗಡ ಕುಕ್ಕೆಲ್ ಇಟ್ಟಿತ್, ಪಾಳಾನ ಮೀನ್‌ನೆಲ್ಲ ಚಾಡಿರ್‍ವ. 49ಇನ್ನನೆ, ಈ ಲೋಕತ್‍ರ ಕಡೆ ಕಾಲತ್‍ಲ್ ನಡ್‍ಪ. ದೇವದೂತಂಗ ಬಂತ್ ನೀತಿವಂತಯಿಂಗಡ ಮದ್ಯತ್‍ಲ್ ಉಳ್ಳ ಪಾಳ್ ಜನಳ ಬೋರೆ ಮಾಡಿತ್, 50ಅಯಿಂಗಳ ತಿತ್ತ್‌ರ ಗುಡ್ಡೆಕ್ ಚಾಡ್‍ವ. ಅಲ್ಲಿ ಮೊರಟಂಡ್ ಪಲ್ಲ್ ಕಡಿಚಂಡ್ ಇಪ್ಪ.
51ಬಯ್ಯ, ಯೇಸು ಅಯಿಂಗಳ ನೋಟಿತ್: ನಾನ್ ಎಣ್ಣ್‌ನದೆಲ್ಲ ನಿಂಗಕ್ ಅರ್ಥ ಆಚಾಂದ್ ಕ್‍ೕಟತ್.
ಅದ್ಂಗ್ ಅಯಿಂಗ ನಂಗಕ್ ಅರ್ಥ ಆಚೀಂದ್ ಎಣ್ಣ್‌ಚಿ.
52ಅಕ್ಕ ಅಂವೊ ಅಯಿಂಗಳ ನೋಟಿತ್: ಇದ್ಂಡ ಅರ್ಥ ನ್ಯಾಯಪ್ರಮಾಣತ್‌ರ ಉಪಾದ್ಯಂಗ, ಪರಲೋಕ ರಾಜ್ಯತ್‍ರ ಶಿಷ್ಯಂಗಳಾಯಿತ್ ಬಪ್ಪಕ, ಅಯಿಂಗ ಮನೆರ ಎಜಮಾನಂಡನೆಕೆ, ಮನೆರ ಪತ್ತಾಯ ಕೋಂಬರೆಯಿಂಜ ಪುದಿಯ ಪಿಂಞ ಪಳೆಯ ನಿದಿನ ಎಡ್‌ತ ಬಂದನೆಕೆ ಇಪ್ಪಾಂದ್‌ ಎಣ್ಣ್‌ಚಿ.
ಯೇಸುನ ನಜರೇತ್‍ಲ್ ತ್‍ಕ್ಕಾರ ಮಾಡ್‍ವದ್
(ಮಾರ್ಕ 6.1–6; ಲೂಕ 4.16–30)
53ಯೇಸು ಇದ್‍ನೆಲ್ಲ ಕಥೇರ ರೂಪತ್‍ರ ಮೂಲಕ ಬೋದನೆ ಮಾಡ್‍ನ ಪಿಂಞ, ಅಲ್ಲಿಂಜ ಪೋಚಿ. 54ಅಂವೊ ತಾಂಡ ಸ್ವಂತ ಊರ್‌ಕ್ ಬಂದಿತ್, ಅಯಿಂಗಡ ಸಬಾಮಂದಿರತ್‍ಲ್ ಎಲ್ಲಾರ್‌ಕು ಬೋದನೆ ಮಾಡ್‌ವಕ್ ಸುರು ಮಾಡ್‍ಚಿ. ಇದ್‍ನ ಕ್‍ೕಟಿತ್ ಅಯಿಂಗಕೆಲ್ಲ ಆಶ್ಚರ್ಯ ಆಯಿತ್, ಇಂವೊಂಗ್ ಎಲ್ಲಿಂಜ ಈ ತರ ಜ್ಞಾನವು, ಅದ್ಬುತ ಕಾರ್ಯ ಮಾಡ್‌ವಕ್ ಶಕ್ತಿಯು ಕ್‌ಟ್ಟಿಚೀಂದ್ ತಕ್ಕ್ ಪರ್ಂದತ್. 55ಇಂವೊ ಒರ್ ಆಚಾರಿರ ಮೋಂವೊನಲ್ಲ? ಇಂವೊಂಡ ಅವ್ವ ಮರಿಯ ಅಲ್ಲ? ಯಾಕೋಬ, ಯೋಸೇಫ, ಸೀಮೋನ, ಯೂದ ಈಂಗ ಇಂವೊಂಡ ತಮ್ಮಣಂಗಲ್ಲ? 56ಇಂವೊಂಡ ತಂಗೆಯೆಲ್ಲ ನಂಗಡ ಕೂಡೆ ಉಂಡಲ್ಲ? ಅನ್ನನೆ ಇಪ್ಪಕ, ಇಂವೊ ಎನ್ನನೆ ಈ ಅದ್ಬುತ ಕಾರ್ಯತ್‍ನೆಲ್ಲ ಮಾಡ್‌ವಕ್ ಕಯ್ಯೂಂದ್, 57ಗೇನ ಮಾಡಿತ್ ಅಂವೊಂಡ ವಿಷಯತ್‍ಲ್ ಬೇಜಾರ್ ಮಾಡಿಯಂಡ್, ಅಂವೊ ಎಣ್ಣ್‌ವಾನ ಅಯಿಂಗಕ್ ನಂಬ್‍ವಕ್ ಕಯಿಂಜಿತ್‌ಲ್ಲೆ.
ಯೇಸು ಅಯಿಂಗಳ ನೋಟಿತ್: ಒರ್ ಪ್ರವಾದಿಕ್ ತಾಂಡ ಊರ್ ಪಿಂಞ ಮನೆನ ಬುಟ್ಟಿತ್ ಬೋರೆ ಎಲ್ಲಾ ಜಾಗತ್‍ಲು ಮರ್ಯಾದಿ ಕ್‍ಟ್ಟ್‌ವಾಂದ್ ಎಣ್ಣ್‌ಚಿ.
58ಅಯಿಂಗಡ ಅಪನಂಬಿಕೆಯಿಂಜ ಯೇಸು ಅಲ್ಲಿ ದುಂಬ ಅದ್ಬುತ ಕಾರ್ಯತ್‍ನ ಮಾಡಿತ್‌ಲ್ಲೆ.
Currently Selected:
ಮತ್ತಾಯ 13: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
