ಲೂಕ 15
15
ಕಾಂಗತ ಪೋನ ಕೊರಿರ ಕಥೇರ ರೂಪ
(ಮತ್ತಾಯ 18.12–14)
1ಒರ್ ದಿವಸ ಯೇಸುರ ಉಪದೇಶತ್‍ನ ಕ್‍ೕಪಕಾಯಿತ್ ಚೆನ್ನ ಕಂದಾಯ ಎಡ್‌ಪಯಿಂಗಳು, ಸಮಾಜ ಪಾಪಿಯಂಗಾಂದ್ ಎಣ್ಣುವ ಜನಳು ಬಂದಿತ್ಂಜತ್. 2ಫರಿಸಾಯಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಇದ್‍ನ ನೋಟ್‌ವಂಜಿ: ಈ ಮನುಷ್ಯ ಕೆಟ್ಟ ಜನಡ ಕೂಡೆ ಕೂಟ್‍ಕೂಡಿಯಂಡ್ ಅಯಿಂಗಡ ಕೂಡೆ ಉಂಬಲ್ಲಾಂದ್ ಗೊಣಗ್‍ಚಿ.
3ಅಕ್ಕ ಯೇಸು ಒರ್ ಕಥೇರ ರೂಪತ್‍ನ ಎಣ್ಣಿ ಕೊಡ್‍ತತ್. 4ನಿಂಗಡಲ್ಲಿ ಒಬ್ಬಂಗ್ ನೂರ್ ಕೊರಿಯ ಇಪ್ಪಕ, ಅದ್‍ಲ್ ಒಂದ್ ಕಾಂಗದಾಚೇಂಗಿ, ಅಕ್ಕ ತೊಂಬತೊಯಿಂಬದ್ ಕೊರಿಯಳ ಬೇಲ್‌ಲ್ ಬುಟ್ಟಿತ್, ಕಾಂಗತ ಪೋನ ಒಂದ್‌ನ ಕಂಡ್‍ಪುಡಿಪಕ‍ತ್ತನೆ ತ್‍ೕಡಿಯಂಡ್ ಪೋಪ್‍ಲೆಯಾ? 5ಆ ಕೊರಿ ಕ್‍ಟ್ಟ್‌ನ ಪಿಂಞ, ಅದ್‍ನ ನಿಪ್ಪ್‌ಲ್ ಇಟ್ಟಂಡ್ ಮನೆಕ್ ಬಂದಿತ್, 6ನಿಂಗಡ ಸ್ನೇಹಿತಂಗಕು, ನೆರೆಮನೆಕಾರಕು ಕೊರಿ ಕ್‍ಟ್ಟ್‌ನ ವಿಷಯತ್‍ನ ಎಣ್ಣಿತ್: ಬಾರಿ! ನಾಡ ಕೂಡೆ ಸಂತೋಷ ಪಡಿರೀಂದ್ ಎಣ್ಣುವಿರಲ್ಲ. 7ಅನ್ನನೆ, ಪಶ್ಚಾತಾಪ ಪಡಂಡೂಂದ್ ಇಲ್ಲತ ತೊಂಬತ್‌ತೊಯಿಂಬದ್ ನೀತಿವಂತಯಿಂಗಕಿಂಜ ಪಶ್ಚಾತಾಪ ಪಟ್ಟಿತ್ ದೇವಡ ಕಡೇಕ್ ತಿರ್‌ಗ್‌ವ ಒರ್ ಪಾಪಿರ ವಿಷಯತ್ ಪರಲೋಕತ್‍ಲ್ ದುಂಬ ಕುಶಿ ಇಪ್ಪಾಂದ್ ನಾನ್ ನಿಂಗಕ್ ಎಣ್ಣ್‌ವಿ.
ಕಾಂಗತ ಪೋನ ನಾಣ್ಯತ್‍ರ ಕಥೇರ ರೂಪ
8ಯೇಸು ಇಂಞೊರ್ ಕಥೇರ ರೂಪತ್‍ನ ಎಣ್ಣ್‌ಚಿ: ಒರ್ ಪೊಣ್ಣಾಳ್‍ರ ಕೈಯಿಂಜ ಪತ್ತ್ ಬೊಳ್ಳಿರ ನಾಣ್ಯತ್‌ಲ್ ಒರ್ ನಾಣ್ಯ ಕಾಂಗತ ಪೋನಕ, ಆ ಒರ್ ನಾಣ್ಯತ್‍ನ ತ್‍ೕಡ್‍ವಕಾಯಿತ್ ಬೊಳ್‌ಚತ್‍ನ ಕತ್ತಿಚಿಟ್ಟ್, ಮನೆನ ಒಡ್‌ಕಿತ್, ಕಂಡ್‍ಪುಡಿಪಕ‍ತ್ತನೆ ತ್‍ೕಡಿಯಂಡಿಪ್ಪಲ್ಲ? 9ಆ ನಾಣ್ಯ ಕ್‍ಟ್ಟ್‌ನ ಪಿಂಞ ಅವಡ ಸ್ನೇಹಿತಳ ಪಿಂಞ ನೆರೆಮನೆಕಾರಳ ಕಾಕಿತ್, ಕಾಂಗತ ಪೋನ ನಾಡ ನಾಣ್ಯ ಕ್‍ಟ್ಟ್‌ಚಿ, ಬಾರಿ! ನಾಡ ಕೂಡೆ ಕುಶಿ ಪಡಿರೀಂದ್ ಎಣ್ಣ್‌ವಲ್ಲಾಂದ್ ಎಣ್ಣ್‌ಚಿ. 10ಅನ್ನನೆ ಒರೇ ಒರ್ ಪಾಪ ಮಾಡ್‍ನ ಮನುಷ್ಯ ದೇವಡ ಕಡೇಕ್ ತಿರ್‌ಗ್‍ಚೇಂಗಿ ಪರಲೋಕತ್‍ಲ್ ಉಳ್ಳ ದೇವದೂತಂಗಡ ಮಿಂಞತ್‍ಲ್ ಸಂತೋಷ ಉಂಟಾಪಾಂದ್ ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.
ಕಾಂಗತ ಪೋನ ಮೋಂವೊಂಡ ಕಥೇರ ರೂಪ
11ಯೇಸು ಇಂಞು ಎಣ್ಣಿಯಂಡ್ ಪೋಚಿ. ಒರ್ ಮನುಷ್ಯಂಗ್ ದಂಡ್ ಮಕ್ಕ ಇಂಜತ್.
12ಅದ್‍ಲ್ ಎಳಿಯಂವೊ ಅಪ್ಪಂಗ್: ನಂಗಕ್ ಆಸ್ತಿನ ಪಾಲ್ ಮಾಡ್, ನಾಡ ಪಾಲ್‍ನ ತಾಂದ್ ಕ್‍ೕಟತ್. ಅಕ್ಕ, ಅಪ್ಪ ಅಂವೊ ಕ್‍ೕಟನೆಕೆ ಆಸ್ತಿನ ಪಾಲ್ ಮಾಡಿ ಕೊಡ್‍ತತ್.
13ಚೆನ್ನ ದಿವಸ ಆನ ಪಿಂಞ ಅಂವೊ ತಾಂಡ ಎಲ್ಲಾ ಆಸ್ತಿನ ಎಡ್‍ತಂಡ್ ದೂರ ದೇಶಕ್ ಪೋಯಿತ್ ಎಲ್ಲಾ ಪಣತ್‍ನ, ಮನಸ್ಸ್ ಬಂದನೆಕೆ ಖರ್ಚಿಮಾಡಿತ್ ಸೂರೆ ಮಾಡಿಯಂಡಿಂಜತ್. 14ಅಂವೊಂಡ ಪಣ ಎಲ್ಲಾ ತ್‍ೕಂದ್ ಪೋನ ಪಿಂಞ, ಆ ದೇಶಕ್ ಬರಗಾಲ ಬಂದ್‌ರ್‌ತ್. ಅಂವೊಂಗ್ ಕೆಲ ಪೈಪಕಿಂಜತ್. 15ಅಕ್ಕ, ಆ ದೇಶತ್‍ರ ಒರ್ ಮನುಷ್ಯಂಡ ಪಕ್ಕ ಪೋಯಿತ್ ಒರ್ ಕೆಲಸತ್‍ನ ಕ್‍ೕಟತ್. ಆ ಮನುಷ್ಯ ಪಂದಿಯಳ ಮೇಯಿಚಿಡ್‌ವ ಕೆಲಸ ಕೊಡ್‍ತತ್. 16ಅಕ್ಕ ಅಂವೊ, ಪಂದಿಯ ತಿಂಬ ಕಾಯಿನ ತಿಂದಿತ್ ತಾಂಡ ಕೆಲತ್‍ನ ದುಂಬ್‍ಚಿಡ್‍ವಕ್ ಗೇನ ಮಾಡ್‍ಚಿ. ಆಚೇಂಗಿ, ಆ ಕಾಯಿನ ಸಹ ದಾರೂ ಅಂವೊಂಗ್ ಕೊಡ್‍ತಿತ್‌ಲ್ಲೆ. 17ಅಕ್ಕ ಅಂವೊಂಗ್ ಬುದ್ದಿ ಬಾತ್, ನಾಡ ಅಪ್ಪಂಡ ಮನೆಲ್ ಎಚ್ಚಕೋ ಆಳ್‍ವಕ್ ಚಾಯಿತೆ ತಿಂಬಕ್ ಉಂಡ್, ನಾಡ ಕೆಲಕ್ ಒಂದು ಕ್‌ಟ್ಟಿಯಂಡಿಲ್ಲೆ.
18ನಾನ್ ನಾಡ ಅಪ್ಪಂಡ ಪಕ್ಕ ಪೋಪಿ, ಅಲ್ಲಿ ಪೋಯಿತ್: ಅಪ್ಪಾ! ನಾನ್ ನೀಕು ದೇವಕು ವಿರೋದವಾಯಿತ್ ಪಾಪ ಮಾಡಿಯೆ. 19ನಾನ್ ನೀಡ ಮೋಂವೊ ಎಣ್ಣಿಯಂಡ್ ಕಾಕುವಕ್ ಲಾಯಕ್ ಇಲ್ಲೆ, ನೀಡ ಆಳ್‍ರ ಕೂಟ್‌ಲ್ ಒಬ್ಬನಾಯಿತ್ ನನ್ನ ಮಾಡ್‍ೕಂದ್ ಎಣ್ಣ್‌ವೀಂದ್ ಗೇನ ಮಾಡಿಯಂಡ್, 20ಎದ್ದಿತ್ ಅಂವೊಂಡ ಅಪ್ಪಂಡ ಪಕ್ಕ ಪೋಚಿ. ಅಂವೊಂಡ ಅಪ್ಪ ತಾಂಡ ಮೋಂವೊ ದೂರತ್‍ಲ್ ಬಪ್ಪದ್‍ನ ಕಾಂಬಂಜಿ ಅಂವೊಂಗ್ ಕನಿಕರ ಆಚಿ. ಅಪ್ಪ ಮೋಂವೊಂಡ ಪಕ್ಕ ಓಡಿ ಪೋಯಿತ್, ಅಂವೊನ ತಬ್ಬಿಯಂಡ್ ಮುತ್ತ್ ಕೊಡ್‍ತತ್. 21ಅಪ್ಪಾ, ನಾನ್ ನೀಕ್ ವಿರೋದವಾಯಿತು ದೇವಕ್ ವಿರೋದವಾಯಿತು ಪಾಪ ಮಾಡಿಯೆ. ನಾನ್ ನೀಡ ಮೋಂವೊ ಎಣ್ಣಿಯಂಡ್ ಕಾಕುವಕ್ ಲಾಯಕ್ ಆಯಿತ್‌ಲ್ಲೇಂದ್ ಎಣ್ಣ್‌ಚಿ.
22ಆಚೇಂಗಿ ಅಪ್ಪ ಅಂವೊಂಡ ಆಳ್‍ವಳ ಕಾಕುವಂಜಿ: ಬೆರಿಯ ಅಂವೊಂಗ್ ನಲ್ಲ ಬಟ್ಟೆ ಎಡ್‌ತ ಬಾರಿ, ಕೈ ಬೆರಕೆಲ್ಲ ಮೊಯಿರ ಇಡಿ, ಅಂವೊಂಡ ಕಾಲ್‌ಕ್ ಎಕ್ಕಡ ಇಡಿ, 23ನಿಂಗಡ ಕೂಟ್‌ಲ್ ಉಳ್ಳ ಪುಷ್ಟಿಯುಳ್ಳ ಕಡ್‍ಚಿನ ಕೊಲ್ಲಿ, ಸಂತೋಷ ಪಟ್ಟಿತ್ ಗದ್ದಾಳ ಮಾಡನ. 24ನಾಡ ಈ ಕುಂಞಿ ಇಚ್ಚಕ್ ದಿವಸ ಚತ್ತ್ ಪೋಯಿತ್ಂಜತ್, ಆಚೇಂಗಿ ಪುನಃ ಜೀವವಾಯಿತ್ ಬಂದತ್, ಇಕ್ಕಣಕೆ ಕಾಂಗತೆ ಪೋಯಿತ್ಂಜತ್, ಇಕ್ಕ ಇಂವೊ ಕ್‍ಟ್ಟ್‌ಚೀಂದ್ ಅಪ್ಪ ಎಣ್ಣಿತ್, ಗದ್ದಾಳ ಮಾಡ್‌ವಕು, ಆಟ್‌ಪಾಟ್ ನಡ್‍ಪಕ್ ಸುರು ಮಾಡ್‍ಚಿ. 25ಅಂವೊಂಡ ಪೆರಿಯ ಮೋಂವೊ ಬೇಲ್‍ರ ಪಣಿ ತ್‍ೕತಂಡ್ ಮನೆರ ಪಕ್ಕಪಕ್ಕ ಎತ್ತ್‌ವಕ ಆಟ್‌ಪಾಟ್ ಕ್‍ೕಟಂಡಿಂಜತ್. 26ಒರ್ ಆಳ್‌ನ ಕಾಕುವಂಜಿ, ಎಂತ ಇದ್ ಆಟ್‌ಪಾಟ್ ಕ್‍ೕಟಂಡುಂಡಲ್ಲಾಂದ್ ಕ್‍ೕಟತ್.
27ಅಕ್ಕ ಆ ಆಳ್: ನೀಡ, ತಮ್ಮಣ ಬದ್‌ಕಿತ್ ಬಾತ್, ಅಂವೊ ಚಾಯಿತೆ ಬಂದಾಂಗ್ ನಲ್ಲ ಚಾಯಿ ಕಡ್‍ಚಿನ ಕೆತ್ತುವಂಜಿ ಗದ್ದಾಳ ಕೊಡ್‌ತಂಡ್ ಉಂಡ್‍ೕಂದ್ ಎಣ್ಣ್‌ಚಿ. 28ಅಕ್ಕ ಪೆರಿಯ ಮೋಂವೊ, ಚೆಡಿಲ್ ಒಳ್‍ಕ್ ಪೋಕತೆ ಇಂಜತ್. ಅಂವೊಂಡ ಅಪ್ಪ ಪೊರಮೆ ಬಂದಿತ್ ಅಂವೊನ ಒಳ್‍ಕ್ ಬಪ್ಪಕ್ ಬೋಡಿಯಂಡತ್.
29ಆಚೇಂಗಿ ಅಂವೊ ಅಪ್ಪಂಗ್: ನೋಟಿ! ನಾನ್ ಇಚ್ಚಕ್ ಕಾಲ ನೀಕ್ ಒರ್ ಆಳ್‍ರನೆಕೆ ಸೇವೆ ಮಾಡಿಯೆ, ನಾನ್ ನೀಡ ಒರ್ ಆಜ್ಞೆನ ಸಹ ಮೀರತೆ ನಡ್ಂದಂಡಿಲ್ಲೆಯಾ? ಆಚೇಂಗಿ, ನಾಡ ಸ್ನೇಹಿತಂಗಡ ಕೂಡೆ ಕೂಡಿತ್ ಕುಶಿ ಪಡುವಕ್ ನೀನ್ ಒರ್ ದಿವಸ ಕೂಡೆ ನಾಕ್ ಒರ್ ಚೆರಿಯ ಆಡ್ ಕುಟ್ಟಿನ ಸಹ ತಂದಿತ್ತ್‌ಲ್ಲೆ. 30ಇಂವೊ ವೇಶಿಯಂಗಡ ಕೂಡೆ ಕೂಡಿಯಂಡ್, ನೀಡ ಆಸ್ತಿನೆಲ್ಲ ಪಾಳ್ ಮಾಡಿರ್‌ತ್. ಇನ್ನನೆ ಆಚೇಂಗಿಯು, ನೀಡ ಈ ಮೋಂವೊ ಬಪ್ಪಕ, ನೀನ್ ಚಾಯಿ ಕಡ್‍ಚಿನ ಕೊಂದಿತ್ ಕೊಡ್‌ತಿತುಳ್ಳಿಯಾಂದ್ ಎಣ್ಣ್‌ಚಿ.
31ಅಕ್ಕ ಅಪ್ಪ: ಮೋಂವೊನೇ! ನೀನ್ ಎಕ್ಕಾಲು ನಾಡ ಕೂಡೆ ಉಳ್ಳಿಯ, ನಾಡ ಆಸ್ತಿಯೆಲ್ಲಾ ನೀಡದೇ. 32ಆಚೇಂಗಿ ಇಕ್ಕ ಕುಶಿಪಡ್‍ವದ್ ನ್ಯಾಯ, ಎನ್ನಂಗೆಣ್ಣ್‌ಚೇಂಗಿ ನೀಡ ತಮ್ಮಣ ಚತ್ತ್ ಪೋಯಿತ್ಂಜತ್, ಪುನಃ ಎದ್ದಿತ್ ಬಾತ್, ಅಂವೊ ಕಾಂಗತೆ ಪೋಯಿತ್ಂಜತ್, ಆಚೇಂಗಿ ಇಕ್ಕ ಕ್‍ಟ್ಟ್‌ಚೀಂದ್ ಅಂವೊಂಡ ಅಪ್ಪ ಎಣ್ಣ್‌ಚಿ.
Currently Selected:
ಲೂಕ 15: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
