ಯೋಹಾನ 8
8
ವ್ಯಬಿಚಾರ ಮಾಡ್‍ನ ಪೊಣ್ಣಾಳ್‍ನ ಯೇಸು ಮನ್ನಿಚಿಡ್‌ವದ್
1ಪಿಂಞ ಯೇಸು ಆಲಿವ್ ಎಣ್ಣುವ ಕುಂದ್‌ಕ್ ಪೋಯಿತ್ ಅಲ್ಲಿ ಇಂಜತ್. 2ಪಿತ್ಯಾಂದ್ ಪೊಲಾಕ ಯೇಸು ದೇವಾಲಯಕ್ ಪೋಚಿ. ಅಕ್ಕ ಜನಯೆಲ್ಲ ಅಂವೊಂಡ ಸುತ್ತ್‌ಲೂ ಕೂಡ್‍ಚಿ. ಯೇಸು ಅಲ್ಲಿ ಅಳ್‌ತಂಡ್ ಅಯಿಂಗಕ್ ಬೋದನೆ ಮಾಡ್‌ವಕ್ ಸುರು ಮಾಡ್‍ಚಿ. 3ಆ ಸಮಯತ್‍ಲ್ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳು, ಫರಿಸಾಯಂಗಳು ವ್ಯಬಿಚಾರತ್‍ಲ್ ಚಿಕ್ಕಿತ್ಂಜ ಒರ್ ಪೊಣ್ಣಾಳ್‍ನ ಕಾಕಿಯಂಡ್ ಬಂತ್, ಎಲ್ಲಾಡ ಮದ್ಯತ್ ಅವಳ ನಿಪ್ಪ್‌ಚಿಟ್ಟತ್.
4ಅಯಿಂಗ ಯೇಸುನ ನೋಟಿತ್: ಉಪಾದ್ಯನೇ, ಈ ಪೊಣ್ಣಾಳ್ ವ್ಯಬಿಚಾರ ಮಾಡಿಯಂಡ್ ಇಪ್ಪಕ ನಂಗ ಕಂಡ್‍ಪುಡ್‌ಚಿತ್ ನೀಡ ಪಕ್ಕ ಕೊಂಡ್ ಬಾತ್. 5ನ್ಯಾಯಪ್ರಮಾಣತ್‍ರ ಪ್ರಕಾರ ಅಂತ ಪೊಣ್ಣಾಳ್‌ಕ್, ಕಲ್ಲ್ ಕನ್‍ಚಿತ್ ಕೊಲ್ಲಂಡೂಂದ್ ಉಂಡಲ್ಲಾ? ಇಕ್ಕ ನೀನ್ ಎಂತ ಎಣ್ಣ್‌ವಿಯಾಂದ್ ಕ್‍ೕಟತ್. 6ಇನ್ನನೆ ಪ್ರಶ್ನೆ ಕ್‍ೕಟಿತ್, ಯೇಸು ತಪ್ಪ ಉತ್ತರತ್ಂಜ ಅಂವೊನ ಕೆಣಿಪಕಾಯಿತ್ ಅಯಿಂಗ ಪ್ರಯತ್ನಪಟ್ಟತ್. ಆಚೇಂಗಿ ಯೇಸು ಬಗ್ಗಿಯಂಡ್ ಕೈ ಬೆರತ್ಂಜ ನೆಲತ್‌ಲ್ ಒಳ್‍ದಿಯಂಡ್ ಇಂಜತ್ 7ಅಯಿಂಗ ಈ ವಿಷಯತ್‍ಲ್ ಅಂವೊನ ಪುನಃ ಪುನಃ ಪ್ರಶ್ನೆ ಕ್‍ೕಟಂಡಿಂಜಗುಂಡ್,
ಅಂವೊ ನೇರೆ ಅಳ್‌ತಿತ್: ನಿಂಗಡಲ್ಲಿ ಪಾಪ ಇಲ್ಲತಂವೊ ಇವಡ ಮೇಲೆ ಮಿಂಞ ಕಲ್ಲ್ ಕನಿರೀಂದ್ ಎಣ್ಣ್‌ಚಿ. 8ಪಿಂಞ ಅಂವೊ ಪುನಃ ಬಗ್ಗ್‌ವಂಜಿ ನೆಲತ್‌ಲ್ ಒಳ್‍ದ್‍ವಕ್ ಸುರು ಮಾಡ್‍ಚಿ. 9ಯೇಸು ಇನ್ನನೆ ತಕ್ಕ್ ಪರಿವಾನ ಕ್‍ೕಟದು, ಪೆರಿಯಯಿಂಗಯಿಂಜ ಚೆರಿಯಯಿಂಗಕತ್ತನೆ ಒಬ್ಬೊಬ್ಬಂಗಳಾಯಿತ್ ಅಲ್ಲಿಂಜ ಪೋಯಿರ್‌ತ್. ಯೇಸು ಒಬ್ಬನೇ ಅಲ್ಲಿ ಇಂಜತ್. ಆ ಪೊಣ್ಣಾಳ್ ಅಲ್ಲಿಯೇ ನಿಂದಂಡಿಂಜತ್. 10ಯೇಸು ನೇರೆ ಅಳ್‌ಪಂಜಿ, ಅಯಿಂಗ ದಾರೂ ಅಲ್ಲಿ ಇಲ್ಲತಾನ ಕಂಡಿತ್, ಅವ್ವ, ಅಯಿಂಗೆಲ್ಲಾರು ಎಲ್ಲಿಯಾ? ನೀಕ್ ಒಬ್ಬ ಸಹ ಶಿಕ್ಷೆ ತಂದಿತ್‌ಲ್ಲೆಯಾಂದ್ ಕ್‍ೕಟತ್.
11ಅದ್ಂಗ್ ಆ ಪೊಣ್ಣಾಳ್: ಇಲ್ಲೆ ಒಡೆಯಾಂದ್ ಎಣ್ಣ್‌ಚಿ.
ಯೇಸು ಅವಕ್: ನಾನ್ ಕೂಡೆ ನೀಕ್ ಶಿಕ್ಷೆ ತಪ್ಪ್‌ಲೇಂದ್ ಎಣ್ಣ್‌ಚಿ. ನೀನ್ ಪೋ ಇಂಞು ಮಿಂಞಕ್ ನೀನ್ ಪಾಪ ಮಾಡತೇಂದ್ ಯೇಸು ಎಣ್ಣ್‌ಚಿ.
ಯೇಸು ಈ ಲೋಕತ್‍ರ ಬೊಳಿ
12ಯೇಸು ಜನಳ ನೋಟಿತ್: ನಾನ್ ಲೋಕಕ್ ಬೊಳಿಯಾಯಿತ್ ಉಂಡ್, ದಾರ್ ನಾಡ ಬಯ್ಯಕ್ ಬಪ್ಪ, ಅಯಿಂಗ ಇರ್‌ಟ್‌ಲ್ ನಡ್‍ಪ್‍ಲೆ, ಆಚೇಂಗಿ ಜೀವ ತಪ್ಪ ಬೊಳಿಲ್ ನಡ್‌ಪಾಂದ್ ಎಣ್ಣ್‌ಚಿ.
13ಅಕ್ಕ ಅಲ್ಲಿ ಇಂಜ ಫರಿಸಾಯಂಗ ಯೇಸುಕ್: ನೀಡ ವಿಷಯತ್ ನೀನೇ ಸಾಕ್ಷಿ ತಪ್ಪಿಯ, ನೀಡ ಸಾಕ್ಷಿ ಸತ್ಯ ಅಲ್ಲಾಂದ್ ಎಣ್ಣ್‌ಚಿ.
14ಅಯಿಂಗಕ್ ಯೇಸು ಇನ್ನನೆ ಉತ್ತರ ಕೊಡ್‍ತತ್: ನಾಡ ವಿಷಯತ್ ನಾನೇ ಸಾಕ್ಷಿ ಕೊಡ್‍ತ್‍ಚೇಂಗಿಯು, ನಾಡ ಸಾಕ್ಷಿ ನೇರಾನದಾಯಿತುಂಡ್. ಎನ್ನಂಗೆಣ್ಣ್‌ಚೇಂಗಿ, ನಾನ್ ಎಲ್ಲಿಂಜ ಬಾತ್‍ೕಂದು, ನಾನ್ ಎಲ್ಲಿಕ್ ಪೋಪೀಂದು ನಾಕ್ ಗೊತ್ತುಂಡ್, ಆಚೇಂಗಿ ನಾನ್ ಎಲ್ಲಿಂಜ ಬಾತ್‍ೕಂದು ಎಲ್ಲಿಕ್ ಪೋಪೀಂದು ನಿಂಗಕ್ ಗೊತ್ತ್‌ಲ್ಲೆ. 15ನಿಂಗ ಮನುಷ್ಯಂಗಡ ಜ್ಞಾನಕ್ ತಕ್ಕಂತ ತೀರ್ಪ್ ಮಾಡ್‌ವಿರ, ಆಚೇಂಗಿ ನಾನ್ ದಾರ್‌ನು ತೀರ್ಪ್ ಮಾಡುಲೆ. 16ಅನ್ನನೆ ನಾನ್ ತೀರ್ಪ್ ಮಾಡ್‍ಚೇಂಗಿ, ನಾಡ ತೀರ್ಪ್ ನೇರಾಯಿತ್‌ಪ್ಪ. ಎನ್ನಂಗೆಣ್ಣ್‌ಚೇಂಗಿ, ನಾನ್ ಒಬ್ಬನಾಯಿತ್ ಇಲ್ಲೆ, ನನ್ನ ಅಯಿಚ ಅಪ್ಪನಾನ ದೇವ ನಾಡ ಕೂಡೆ ಉಂಡ್. 17ದಂಡಾಳ್‌ರ ಸಾಕ್ಷಿ ನೇರಾನದ್‍ೕಂದ್ ನಿಂಗಡ ನ್ಯಾಯಪ್ರಮಾಣತ್‍ಲ್ ಒಳ್‌ದಿತುಂಡಲ್ಲಾ? 18ನಾನೇ ನಾಡ ವಿಷಯತ್ ಸಾಕ್ಷಿ ಕೊಡ್‍ಪಿ, ನನ್ನ ಅಯಿಚ ಅಪ್ಪನಾನ ದೇವ ಸಹ ನಾಡ ವಿಷಯತ್ ಸಾಕ್ಷಿ ತಪ್ಪಾಂದ್ ಎಣ್ಣ್‌ಚಿ.
19ಅಕ್ಕ ಫರಿಸಾಯಂಗ ಅಂವೊಂಗ್: ನೀಡ ಅಪ್ಪ ಎಲ್ಲಿಯಾಂದ್ ಕ್‍ೕಟತ್.
ಅದ್ಂಗ್ ಯೇಸು ಅಯಿಂಗಕ್: ನಾನ್ ದಾರ್‍ೕಂದೂ ಗೊತ್ತ್‌ಲ್ಲೆ, ನಾಡ ಅಪ್ಪ ದಾರ್‍ೕಂದೂ ನಿಂಗಕ್ ಗೊತ್ತ್‌ಲ್ಲೆ; ನಿಂಗಕ್ ನಾನ್ ದಾರ್‍ೕಂದ್ ಗೊತ್ತ್‌ಂಜತೇಂಗಿ, ನಾಡ ಅಪ್ಪನ ಸಹ ಗೊತ್ತ್ಂಜತಿಪ್ಪ. 20ಯೇಸು ದೇವಾಲಯತ್‍ಲ್ ಬಂಡಾರ ಇಡ್‌ವ ಪೊಟ್ಟಿ ಬೆಪ್ಪ ಜಾಗತ್‍ಲ್ ಉಪದೇಶ ಮಾಡಿಯಂಡಿಪ್ಪಕ ಇದ್‍ನೆಲ್ಲಾ ಎಣ್ಣ್‌ಚಿ. ಅಂವೊಂಡ ಸಮಯ ಇಂಞು ಬಂದಿತ್‌ಲ್ಲೆ, ಆನಗುಂಡ್ ದಾರೂ ಅಂವೊನ ಪುಡ್‌ಚಿತ್‌ಲ್ಲೆ.
21ಯೇಸು ಇಂಞು ಅಯಿಂಗಳ ನೋಟಿತ್: ನಾನ್ ಪೋಪಿ, ನಿಂಗ ನನ್ನ ತ್‍ೕಡ್‌ವಿರ. ಆಚೇಂಗಿ ನಾನ್ ಪೋಪ ಜಾಗಕ್ ನಿಂಗ ಬಪ್ಪಕ್ ಕಯ್ಯುಲೆ; ನಿಂಗ ನಿಂಗಡ ಪಾಪತ್‍ಲ್ ಚತ್ತ್ ಪೋಪಿರಾಂದ್ ಎಣ್ಣ್‌ಚಿ.
22ಅಕ್ಕ, ಅಲ್ಲಿ ಇಂಜ ಯೆಹೂದ್ಯ ಅದಿಕಾರಿಯಂಗ: ಅಂವೊ ಪೋಪಲ್ಲಿಕ್ ನಂಗ ಪೋಪಕ್ ಕಯ್ಯುಲೇಂದ್ ಎಣ್ಣುವಲ್ಲ, ಇದ್ಂಡ ಅರ್ಥ ಎಂತ? ಅಂವೊನ ಅಂವೊನೇ ಕೊಂದ್‍ರ್‍ಂವೊನೋ ಎಣ್ಣಿಯಂಡ್ ಅಯಿಂಗಯಿಂಗಳೇ ತಕ್ಕ್ ಪರ್ಂದಂಡಿಂಜತ್.
23ಯೇಸು ಅಯಿಂಗಳ ನೋಟಿತ್: ನಿಂಗ ಅಡಿಲಿಂಜ ಬಂದಯಿಂಗ, ನಾನ್ ಕೊಡಿಯಿಂಜ ಬಂದಂವೊ; ನಿಂಗ ಈ ಲೋಕಕ್ ಸ್ವಂತವಾನಯಿಂಗ, ಆಚೇಂಗಿ ನಾನ್ ಈ ಲೋಕಕ್ ಸ್ವಂತವಾನಂವೊ ಅಲ್ಲ. 24ಅದ್ಂಗಾಯಿತೇ, ನಿಂಗ ನಿಂಗಡ ಪಾಪತ್‍ಲ್ ಚಾವೀರಾಂದ್ ಎಣ್ಣಿಯೆ; ನಾನೇ ಅಂವೋಂದ್ ನಿಂಗ ನಂಬತೆ ಪೋಚೇಂಗಿ, ಕಂಡಿತವಾಯಿತ್ ನಿಂಗಕ್ ಮನ್ನಿಪ್ ಕ್‍ಟ್ಟತೆ ಚತ್ತ್ ಪೋಪಿರಾಂದ್ ಎಣ್ಣ್‌ಚಿ.
25ಅದ್ಂಗ್ ಅಯಿಂಗ: ಅಕ್ಕ ನೀನ್ ದಾರ್‍ೕಂದ್ ಕ್‍ೕಟತ್?
ಯೇಸು ಅಯಿಂಗಕ್: ನಾನ್ ದಾರ್‍ೕಂದ್ ನಿಂಗಕ್ ಮಿಂಞಲೇ ನಾನ್ ಎಣ್ಣಿಯಲ್ಲಾ? 26ನಿಂಗಡ ವಿಷಯತ್ ಎಣ್ಣುವಕು, ನಿಂಗಡ ಮೇಲೆ ಕಂಡನೆ ಮಾಡ್‌ವಕು ನಾಕ್ ದುಂಬ ವಿಷಯ ಉಂಡ್. ನನ್ನ ಅಯಿಚಂವೊ ಸತ್ಯವಂತಂವೊ, ನಾನ್ ಅಂವೊಂಡಿಂಜ ಕ್‍ೕಟದ್‍ನೆಲ್ಲ ಈ ಲೋಕಕ್ ಎಣ್ಣಿಯಂಡ್ ಉಳ್ಳ್‌ಂದ್ ಎಣ್ಣ್‌ಚಿ. 27ಯೇಸು ಅಂವೊಂಡ ಅಪ್ಪನಾನ ದೇವಡ ವಿಷಯತ್‍ನ ಎಣ್ಣ್‌ಚೀಂದ್ ಜನಕ್ ಗೊತ್ತಾಯಿತ್‌ಲ್ಲೆ.
28ಆನಗುಂಡ್, ಯೇಸು ಪುನಃ ಅಯಿಂಗಕ್: ನಿಂಗ ಮನುಷ್ಯಕುಮಾರನ ಕೊಡಿಕ್ ನೇತ್‍ವಕ, ನಾನೇ ಅಂವೋಂದ್ ನಿಂಗಕ್ ಗೊತ್ತಾಪ. ನಾನ್ ನಾಡ ಇಷ್ಟ ಪ್ರಕಾರ ಏದು ಮಾಡತೆ, ನಾಡ ಅಪ್ಪನಾನ ದೇವ ನಾಕ್ ಎಂತದ್‍ನ ಬೋದನೆ ಮಾಡ್‍ಚೋ ಅದ್‍ನೇ ನಾನ್ ಎಣ್ಣಿಯೇಂದ್ ಅಕ್ಕ ನಿಂಗಕ್ ಗೊತ್ತಾಪ. 29ನನ್ನ ಅಯಿಚಂವೊ ನಾಡ ಕೂಡೆ ಉಂಡ್, ಅಂವೊಂಗ್ ಕುಶಿ ಆಪದ್‍ನ ನಾನ್ ಎಕ್ಕಾಲು ಮಾಡ್‌ವಗುಂಡ್ ಅಂವೊ ನನ್ನ ಎಕ್ಕಾಲು ಒಂಟಿಯಾಯಿತ್ ಬುಟ್ಟಿತ್‌ಲ್ಲೇಂದ್ ಎಣ್ಣ್‌ಚಿ. 30ಯೇಸು ಇದ್‍ನೆಲ್ಲ ಎಣ್ಣಿಯಂಡಿಪ್ಪಕಲೇ, ದುಂಬ ಜನ ಯೇಸುರ ಮೇಲೆ ನಂಬಿಕೆ ಬೆಚ್ಚತ್.
ನೇರಾನ ಶಿಷ್ಯಂಗ ದಾರ್?
31ಯೇಸು ಅಂವೊನ ನಂಬ್‍ನ ಯೆಹೂದ್ಯಂಗಳ ನೋಟಿತ್: ನಿಂಗ ನಾನ್ ಎಣ್ಣುವ ಬೋದನೆನ ಕ್‍ೕಟಿತ್ ಅದ್ಂಡ ಪ್ರಕಾರ ನಡ್ಂದತೇಂಗಿ ನಿಂಗ ನೇರಾಯಿತು ನಾಡ ಶಿಷ್ಯಂಗಳಾಯಿತ್‌ಪ್ಪಿರ. 32ಅಕ್ಕ, ನಿಂಗಕ್ ಸತ್ಯ ಎಂತ್‍ೕಂದ್ ಗೊತ್ತಾಪ, ಆ ಸತ್ಯ ನಿಂಗಳ ಬುಡ್‍ಗಡೆ ಮಾಡ್‌ವಾಂದ್ ಎಣ್ಣ್‌ಚಿ.
33ಅದ್ಂಗ್ ಅಯಿಂಗ: ನಂಗ ಅಬ್ರಹಾಮಂಡ ಸಂತಾನಕಾರಂಗ, ನಂಗ ಏದ್ ಸಮಯತ್‍ಲು ದಾರ್‌ಕು ಅಡಿಯಾಳಾಯಿತ್ ಇಂಜಿತ್‌ಲ್ಲೆ; ಅನ್ನನೆ ಇಪ್ಪಕ, ನಿಂಗ ಬುಡ್‍ಗಡೆ ಆಪಿರಾಂದ್ ಎನ್ನನೆ ಎಣ್ಣುವಿಯಾಂದ್ ಕ್‍ೕಟತ್.
34ಅಯಿಂಗಕ್ ಯೇಸು: ಪಾಪ ಮಾಡ್‌ವಯಿಂಗ ಎಲ್ಲಾರು ಪಾಪಕ್ ಅಡಿಯಾಳಾಯಿತಿಪ್ಪಾಂದ್ ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ. 35ಅಡಿಯಾಳ್ ಎಕ್ಕಾಲು ಮನೆಲ್ ಇಪ್ಪುಲೆ, ಆಚೇಂಗಿ ಮೋಂವೊ ಎಕ್ಕಾಲು ಮನೆಲ್ ಇಪ್ಪ. 36ಆನಗುಂಡ್ ಮೋಂವೊ ನಿಂಗಳ ಬುಡ್‍ಗಡೆ ಮಾಡ್‍ನಕ ನಿಂಗ ನೇರಾಯಿತು ಬುಡ್‍ಗಡೆ ಆಪಿರ. 37ನಿಂಗ ಅಬ್ರಹಾಮಂಡ ಸಂತಾನಕಾರಂಗಾಂದ್ ನಾಕ್ ಗೊತ್ತುಂಡ್; ಆಚೇಂಗಿಯು, ನಾಡ ಬೋದನೆ ನಿಂಗಡ ಹೃದಯತ್‍ಲ್ ನಿಕ್ಕತೆಗುಂಡ್, ನನ್ನ ಕೊಲ್ಲ್‌ವಕ್ ಪೇಚಾಡ್‌ವಿರ. 38ನಾನ್ ನಾಡ ಅಪ್ಪಂಡಲ್ಲಿ ಕಂಡದ್‍ನ ಎಣ್ಣ್‌ವಿ, ನಿಂಗಳು ಸಹ ನಿಂಗಡ ಅಪ್ಪಂಡಲ್ಲಿ ಕ್‍ೕಟಾನ ಮಾಡಿಯಂಡುಳ್ಳಿರಾಂದ್ ಎಣ್ಣ್‌ಚಿ.
39ಅದ್ಂಗ್ ಅಯಿಂಗ: ಅಬ್ರಹಾಮನೇ ನಂಗಡ ಮುತ್ತಜ್ಜಾಂದ್ ಎಣ್ಣ್‌ಚಿ.
ಯೇಸು ಅಯಿಂಗಕ್: ನಿಂಗ ಅಬ್ರಹಾಮಂಡ ಮಕ್ಕಳಾಯಿತ್ಂಜತೇಂಗಿ, ಅಂವೊ ಎಣ್ಣ್‌ನನೆಕೆ ಮಾಡ್‍ವಿರಲ್ಲಾ? 40ದೇವಡಯಿಂಜ ಕ್‍ೕಟಿತ್ ನಿಂಗಕ್ ಎಣ್ಣುವ ನನ್ನ, ನಿಂಗ ಕೊಲ್ಲ್‌ವಕ್ ನೋಟಿಯಂಡುಳ್ಳಿರ, ಅಬ್ರಹಾಮ ಇನ್ನನೆ ಮಾಡಿತ್‌ಲ್ಲೆಲ್ಲಾ. 41ನಿಂಗ ನಿಂಗಡ ಅಪ್ಪ ಮಾಡ್‌ನಾನ ಮಾಡ್‌ವಿರಾಂದ್ ಎಣ್ಣ್‌ಚಿ.
ಅಕ್ಕ ಅಯಿಂಗ ಅಂವೊಂಗ್: ನಂಗ ತಪ್ಪಾಯಿತ್ ಪುಟ್ಟ್‌ನಯಿಂಗ ಅಲ್ಲ, ನಂಗಕ್ ಒರೇ ಅಪ್ಪ ಮಾತ್ರ ಉಂಡ್, ಅಂವೊನೇ ನಂಗಡ ದೇವಾಂದ್ ಕೂತ್ ಕೊಡ್‍ತತ್.
42ದೇವ ನಿಂಗಡ ನೇರಾನ ಅಪ್ಪನಾಯಿತುಂಡೇಂಗಿ, ನಿಂಗ ನಾಡ ಮೇಲೆ ಪ್ರೀತಿಲ್ ಇಪ್ಪಿರ. ಎನ್ನಂಗೆಣ್ಣ್‌ಚೇಂಗಿ ನಾನ್ ದೇವಡಯಿಂಜ ಬಂದಿತುಳ್ಳ. ನಾನ್ ನಾಡ ಇಷ್ಟ ಪ್ರಕಾರ ಬಂದಿತ್‌ಲ್ಲೆ, ಅಂವೊನೇ ನನ್ನ ಅಯಿಚತ್. 43ನಾನ್ ಎಣ್ಣುವಾನ ನಿಂಗ ಎನ್ನಂಗ್ ಅರ್ಥ ಮಾಡಿಯಂಡಿಲ್ಲೆ? ಎನ್ನಂಗೆಣ್ಣ್‌ಚೇಂಗಿ, ನಾಡ ಬೋದನೆನ ಕ್‍ೕಪಕ್ ಸಹ ನಿಂಗಕ್ ಕುಶಿಯಿಲ್ಲೆ. 44ನಿಂಗ ನಿಂಗಡ ಅಪ್ಪನಾನ ಸೈತಾನಂಡ ಮಕ್ಕಳಾಯಿತುಳ್ಳಿರ; ನಿಂಗಡ ಅಪ್ಪಂಡ ಇಚ್ಛೆರ ಪ್ರಕಾರ ನಿಂಗ ಮಾಡ್‌ವಿರ; ನಿಂಗಡ ಅಪ್ಪನಾನ ಸೈತಾನ ಪಂಡಿಂಜೇ ಕೊಲ್ಲ್‌ವಂವೊನಾಯಿತುಂಡ್; ಅಂವೊಂಡ ಪಕ್ಕ ಸತ್ಯ ಇಲ್ಲತಗುಂಡ್, ಅಂವೊ ಸತ್ಯತ್‍ಲ್ ನಿಂದಿತ್‌ಲ್ಲೆ. ಅಂವೊ ಪೊಟ್ಟ್ ಪರಿಯುವಂವೊನು, ಎಲ್ಲಾ ಪೊಟ್ಟ್‌ಕ್ ಅಪ್ಪನಾಯಿತು ಉಂಡ್. ಅಂವೊ ಪೊಟ್ಟ್ ಪರಿಯುವಕ, ತಾಂಡ ಸ್ವಂತ ಗುಣತ್ಂಜ ಪೊಟ್ಟ್ ಪರ್ಂದಂಡುಂಡ್. 45ನಾನ್ ನಿಂಗಕ್ ಸತ್ಯತ್‍ನ ಎಣ್ಣಿಯಂಡುಳ್ಳಗುಂಡ್ ನಿಂಗ ನನ್ನ ನಂಬುಲೆ. 46ನಾಡಲ್ಲಿ ಪಾಪ ಉಂಡ್‍ೕಂದ್ ನಿಂಗಡಲ್ಲಿ ದಾರ್ ನನ್ನ ಕುತ್ತ ಪರಿಯುವಕ್ ಕಯ್ಯು? ನಾನ್ ಸತ್ಯ ಎಣ್ಣ್‌ವಕ, ನಿಂಗ ಎನ್ನಂಗ್ ನನ್ನ ನಂಬುಲೆ? 47ದೇವಡಗುಂಡ್ ಪುಟ್ಟ್‌ನಯಿಂಗ ದೇವಡ ತಕ್ಕ್ ಕ್‍ೕಪ; ನಿಂಗ ದೇವಡಗುಂಡ್ ಪುಟ್ಟತಗುಂಡ್ ನಾಡ ತಕ್ಕ್‌ಕ್ ಕೆಮಿ ಕೊಡ್‍ಪ್‍ಲೇಂದ್ ಯೇಸು ಎಣ್ಣ್‌ಚಿ.
48ಅಕ್ಕ ಯೆಹೂದ್ಯಂಗಡ ಅದಿಕಾರಿಯಂಗ ಯೇಸುಕ್: ನೀನ್ ಸಮಾರ್ಯ ಊರ್‌ಕ್ ಕೂಡ್‍ನಂವೋಂದು, ಕೂಳಿ ಪುಡ್‌ಚಂವೋಂದು ನಂಗ ಎಣ್ಣ್‌ನದ್ ಸರಿಯಾಚಲ್ಲಾಂದ್ ಎಣ್ಣ್‌ಚಿ.
49ಯೇಸು ಅಯಿಂಗಳ ನೋಟಿತ್: ನಾನ್ ಕೂಳಿ ಪುಡ್‌ಚಂವೊ ಅಲ್ಲ, ನಾನ್ ನಾಡ ಅಪ್ಪಂಗ್ ಮಹಿಮೆ ಕೊಡ್‍ಪಿ, ನಿಂಗ ನಾಕ್ ಮಹಿಮೆ ತಪ್ಪ್‌ಲೆ. 50ನಾನ್ ನಾಕಾಯಿತ್ ಮೆಹಿಮೇನ ತ್‍ೕಡಿಯಂಡ್ ಇಲ್ಲೆ, ಆಚೇಂಗಿ ಅದ್‍ನ ತ್‍ೕಡ್‌ವಂವೊನು, ನ್ಯಾಯತೀರ್ಪ್ ಮಾಡ್‌ವಂವೊನು ಒಬ್ಬ ಉಂಡ್. 51ದಾರ್ ಒಬ್ಬ ನಾಡ ಬೋದನೆನ ಕ್‍ೕಟಿತ್, ಅದ್ಂಗ್ ಬಗ್ಗಿತ್ ನಡ್‍ಪೋ ಅಂವೊಂಗ್ ಚಾವ್ ಎಣ್ಣುವದ್ ಎಕ್ಕಾಲು ಇಲ್ಲೇಂದ್ ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವೀಂದ್ ಎಣ್ಣ್‌ಚಿ.
52ನೀಕ್ ಕೂಳಿ ಪುಡ್‌ಚಿತ್ ಉಂಡ್‍ೕಂದ್ ನಂಗಕ್ ಇಕ್ಕ ಗೊತ್ತಾಚಿ. ಅಬ್ರಹಾಮನು, ಪ್ರವಾದಿಯಂಗಳು ಚತ್ತ್ ಪೋಚಿ. ಆಚೇಂಗಿ, ನೀನ್: ನೀಡ ಬೋದನೆರ ಪ್ರಕಾರ ನಡ್‍ಪಯಿಂಗ ಎಕ್ಕಾಲು ಚಾವ್‍ಲೇಂದ್ ಎಣ್ಣುವಿಯಲ್ಲಾಂದ್ ಎಣ್ಣ್‌ಚಿ. 53ನಂಗಡ ಮುತ್ತಜ್ಜನಾನ ಅಬ್ರಹಾಮಕಿಂಜ ನೀನ್ ಬಲ್ಯಂವೊನಾ? ಅಂವೊ ಚತ್ತ್ ಪೋಚಿ, ಪ್ರವಾದಿಯಂಗಳು ಚತ್ತ್ ಪೋಚಿ; ಅಕ್ಕ ನೀನ್ ನಿನ್ನ ಏದ್ ತರ ಮನುಷ್ಯನಾಯಿತ್ ಮಾಡಿಯೋವಿಯಾಂದ್ ತರ್ಕ ಮಾಡ್‍ಚಿ.
54ಯೇಸು ಅಯಿಂಗಕ್: ನನ್ನ ನಾನೇ ಮಹಿಮೆ ಪಡ್‍ತ್‍ಚೇಂಗಿ, ಆ ಮಹಿಮೇಕ್ ಒರ್ ಮರ್ಯಾದೆಯು ಇಪ್ಪ್‌ಲೆ. ನಿಂಗ ನಿಂಗಡ ದೇವಾಂದ್ ಎಣ್ಣುವ ನಾಡ ಅಪ್ಪನೇ ನಾಕ್ ಮಹಿಮೆ ತಪ್ಪ. 55ಆಚೇಂಗಿಯು ಅಂವೊನ ನಿಂಗಕ್ ಗೊತ್ತ್‌ಲ್ಲೆ, ನಾಕ್ ಅಂವೊನ ಗೊತ್ತುಂಡ್; ಅಂವೊನ ನಾಕ್ ಗೊತ್ತ್‌ಲ್ಲೇಂದ್ ನಾನ್ ಎಣ್ಣ್‌ಚೇಂಗಿ, ನಾನ್ ನಿಂಗಡನೆಕೆ ಪೊಟ್ಟ್‌ಮಾರಿಯಾಯಿತ್‌ಪ್ಪಿ. ನಾಕ್ ಅಂವೊನ ಗೊತ್ತುಂಡ್, ಅಂವೊಂಡ ತಕ್ಕ್‌ಕ್ ನಾನ್ ಬಗ್ಗಿತ್ ನಡ್‍ಂದಿಯೆ. 56ನಿಂಗಡ ಮುತ್ತಜ್ಜನಾನ ಅಬ್ರಹಾಮ ನಾನ್ ಬಪ್ಪ ದಿವಸತ್‍ನ ಕಾಂಬಕ್ ಕುಶೀಲ್ ಇಂಜತ್, ಅದ್‍ನ ಕಂಡಿತ್ ಅಂವೊಂಗ್ ಕುಶಿ ಆಚೀಂದ್ ಎಣ್ಣ್‌ಚಿ.
57ಅಕ್ಕ ಅಯಿಂಗ: ನೀಕ್ ಇಂಞು ಐಂಬದ್ ವಯಸ್ ಆಯಿತ್‌ಲ್ಲೆ, ನೀನ್ ಅಬ್ರಹಾಮನ ಕಂಡಿತುಳ್ಳಿಯಾಂದ್ ಕ್‍ೕಟತ್.
58ಅದ್ಂಗ್ ಯೇಸು: ಅಬ್ರಹಾಮ ಪುಟ್ಟ್‌ವಕ್ ಮಿಂಞಲೇ ನಾನ್ ಉಳ್ಳ್‌ಂದ್ ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವೀಂದ್ ಎಣ್ಣ್‌ಚಿ. 59ಅಕ್ಕ, ಅಯಿಂಗ ಯೇಸುರ ಮೇಲೆ ಕಲ್ಲ್ ಕನಿಪಕ್, ಕಲ್ಲ್‌ನ ಎಡ್‍ತಿತ್ ನೋಟಿಯಂಡ್ ಇಂಜತ್. ಆಚೇಂಗಿ ಯೇಸು ಅಯಿಂಗಡ ಕಣ್ಣ್‌ಕ್ ಕಾಂಗತನೆಕೆ ದೇವಾಲಯತ್‍ನ ಬುಟ್ಟಿತ್ ಪೊರಮೆ ಪೋಯಿರ್‌ತ್.
Currently Selected:
ಯೋಹಾನ 8: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
