ಯೋಹಾನ 6
6
ಯೇಸು ಐಯಾಯಿರ ಜನಳ ಉಂಬ್‌ಚಿಟ್ಟದ್
(ಮತ್ತಾಯ 14.13–21; ಮಾರ್ಕ 6.30–44; ಲೂಕ 9.10–17)
1ಇದೆಲ್ಲಾ ಆನ ಪಿಂಞ ಯೇಸು ಗಲಿಲಾಯ ಪೊಳೆರ ಕೆರೆಕ್ ಪೋಚಿ. ಅದ್‍ನ ತಿಬೇರಿಯ ಪೊಳೇಂದು ಜನ ಕಾಕುವ. 2ಅಂವೊ ಕಾಯಿಲೆಸ್ತಂಗಡ ಮದ್ಯತ್‍ಲ್ ಮಾಡ್‍ನ ಅದ್ಬುತ ಕಾರ್ಯತ್‍ನ ದುಂಬ ಜನ ನೋಟ್‍ನಗುಂಡ್, ಅಂವೊಂಡ ಬಯ್ಯಕ್ ಅಯಿಂಗ ಎಲ್ಲಾರು ಪೋಚಿ. 3ಆಚೇಂಗಿ ಯೇಸು ಅಂವೊಂಡ ಶಿಷ್ಯಂಗಡ ಕೂಡೆ ಕುಂದ್‌ರ ಕೊಡಿಕ್ ಪೋಯಿತ್ ಅಳ್‌ತತ್. 4ಆ ಸಮಯತ್‍ಲ್ ಪಸ್ಕ ನಮ್ಮೆ ಪಕ್ಕ ಬಂದಿತ್ಂಜತ್.
5ಯೇಸು ದುಂಬ ಜನ ಗುಂಪ್ ಗುಂಪಾಯಿತ್ ತಾಂಡ ಪಕ್ಕ ಬಪ್ಪದ್‍ನ ದೂರತ್ಂಜ ನೋಟಿತ್, ತಾಂಡ ಶಿಷ್ಯ ಫಿಲಿಪ್ಪಂಗ್: ಈಂಗ ತಿಂಬಕ್ ಒಟ್ಟಿನ ನಂಗ ಎಲ್ಲಿಂಜ ಎಡ್‍ಪಕ್ ಕಯ್ಯೂಂದ್ ಕ್‍ೕಟತ್. 6ಯೇಸುಕ್ ಎಂತ ಮಾಡಂಡೂಂದ್ ಗೊತ್ತ್ಂಜತೇಂಗಿಯು, ಫಿಲಿಪ್ಪನ ಪರೀಕ್ಷೆ ಮಾಡ್‌ವಕಾಯಿತ್ ಇನ್ನನೆ ಕ್‍ೕಟತ್.
7ಅದ್ಂಗ್ ಫಿಲಿಪ್ಪ: ಈಂಗ ಎಲ್ಲಾರ್‌ಕು ಚೆನ್ನ ಚೆನ್ನ ಕ್‍ಟ್ಟಂಡೂಂದೂ ಎಣ್ಣ್‌ಚೇಂಗಿಯು, ಇನ್ನೂರ್ ಬೊಳ್ಳಿರ ಪಣತ್‍ನ ಕೊಡ್‌ತಿತ್ ಒಟ್ಟಿನ ಎಡ್‍ತತೇಂಗಿಯು ಮದಿ ಆಪುಲ್ಲೆಲ್ಲಾಂದ್ ಜವಾಬ್ ಕೊಡ್‍ತತ್.
8ಯೇಸುರ ಇಂಞೊರ್ ಶಿಷ್ಯನು ಸೀಮೋನ ಪೇತ್ರಂಡ ತಮ್ಮಣನು ಆನ ಅಂದ್ರೆಯ ಎಣ್ಣ್‌ವಂವೊ ಅಯಿಂಗಕ್: 9ಇಲ್ಲಿ ಒರ್ ಕ್‍ಣ್ಣ ಉಂಡ್, ಅಂವೊಂಡ ಪಕ್ಕ ಅಂಜ್ ಒಟ್ಟಿ ಪಿಂಞ ದಂಡ್ ಮೀನ್ ಉಂಡ್, ಆಚೇಂಗಿ ಇಚ್ಚಕ್ ಜನಕ್ ಅದ್ ಮದಿ ಆಪುಲೇಂದ್ ಎಣ್ಣ್‌ಚಿ.
10ಅಕ್ಕ ಯೇಸು ಅಯಿಂಗಳ ನೋಟಿತ್: ಜನಳ ಅಳ್‌ಪ್‍ಚಿಡೀಂದ್ ಎಣ್ಣ್‌ಚಿ. ಆ ಜಾಗ ದುಂಬ ಪಿಲ್ಲ್ ಉಳ್ಳ ಜಾಗವಾಯಿತ್ಂಜತ್. ಅನ್ನನೆ ಪಿಲ್ಲ್‌ರ ಮೇಲೆ ಅಳ್‍ತಯಿಂಗಡಲ್ಲಿ ಆಣಾಳ್ ಮಾತ್ರ ಸುಮಾರ್ ಅಂಜ್ ಆಯಿರ ಇಂಜತ್. 11ಅಕ್ಕ, ಯೇಸು ಒಟ್ಟಿನ ಎಡ್‍ತಿತ್ ದೇವಕ್ ವಂದನೆ ಮಾಡಿತ್, ಎಲ್ಲಾರ್‌ಕು ಪಾಲ್ ಮಾಡಿತ್ ಕೊಡ್‍ಪಕ್ ಶಿಷ್ಯಂಗಡ ಪಕ್ಕ ಕೊಡ್‍ತತ್. ಶಿಷ್ಯಂಗಳು ಅಳ್‌ತಿತ್ಂಜ ಎಲ್ಲಾರ್‌ಕು ಕೊಡ್‍ತತ್. ಅನ್ನನೆ ಮೀನ್‌ನ ಬೋಂಡಿಯಾನಚ್ಚಕ್ ಎಲ್ಲಾರ್‌ಕು ಕೊಡ್‍ತತ್.
12ಅಯಿಂಗ ಕೆಲ ದುಂಬಿತಾನ ಪಿಂಞ ಯೇಸು ಅಂವೊಂಡ ಶಿಷ್ಯಂಗಕೆಲ್ಲ: ಬಾಕಿ ಉಳ್ಳ ಒಟ್ಟಿಯೆಲ್ಲ ಪಾಳ್ ಆಕತನೆಕೆ ಒಟ್ಟ್ ಕೂಟೀಂದ್ ಎಣ್ಣ್‌ಚಿ. 13ಅನ್ನನೆ ಅಯಿಂಗ ಎಲ್ಲಾನ ಒಟ್ಟ್ ಕೂಟಿತ್, ಅಂಜ್ ಒಟ್ಟಿಲ್ ಎಲ್ಲಾರು ತಿಂದಿತಾನ ಪಿಂಞ ಬಾಕಿ ಇಂಜದ್‍ನ ಪನ್ನೆರಂಡ್ ಕುಕ್ಕೆಲ್ ದುಂಬ್‍ಚಿಟ್ಟತ್. 14ಯೇಸು ಮಾಡ್‍ನ ಈ ಅದ್ಬುತ ಕಾರ್ಯತ್‍ನ ಕಂಡ ಜನ ನೇರಾಯಿತು ಇಂವೊ ಈ ಲೋಕಕ್ ಬಪ್ಪಕಿಂಜ ಪ್ರವಾದೀಂದ್ ಎಣ್ಣ್‌ಚಿ. 15ಅಕ್ಕ, ಎಲ್ಲಾ ಜನಳು ಬಂತ್ ಅಂವೊನ ರಾಜನಾಯಿತ್ ಮಾಡ್‌ವಕ್ ಒತ್ತಾಯ ಮಾಡಿತ್ ಪುಡ್‍ಚಂಡ್ ಪೋಪಾಂದ್ ಗೊತ್ತಾನಗುಂಡ್, ಅಂವೊ ಪುನಃ ಒಬ್ಬನಾಯಿತೇ ಕುಂದ್‌ಕ್ ಪೋಚಿ.
ಯೇಸು ನೀರ್‌ರ ಮೇಲೆ ನಡ್‍ಪದ್
(ಮತ್ತಾಯ 14.22–33; ಮಾರ್ಕ 6.45–52)
16ಅಂದ್ ಬೈಟಾಪಕ, ಅಂವೊಂಡ ಶಿಷ್ಯಂಗ ಪೊಳೆರ ಕೆರೆಕ್ ಪೋಯಿತ್, 17ದೋಣಿಲ್ ಅಳ್‌ತಂಡ್ ಕೆರೆರ ಆಬರಿಲ್ ಉಳ್ಳ ಕಪೆರ್ನೌಮ್ ಪಟ್ಟಣಕ್ ಪೋಪಕ್ ಸುರು ಮಾಡ್‍ಚಿ. ಅಕ್ಕ ಇರ್‍ಟಾಯಿತ್ಂಜತ್. ಯೇಸು ಸಹ ಇಲ್ಲಿಕತ್ತನೆ ಬಂದಿತ್‌ಲ್ಲೆ. 18ಅನ್ನನೆ ಪೋಯಂಡಿಪ್ಪಕ, ಜೋರಾಯಿತ್ ಬಿರ್‌ಗಾಳಿ ಬೀಜುವಂಜಿ, ಕಡಲ್‍ಲ್ ಬಲ್ಯ ಬಲ್ಯ ಅಲೆ ಬಂದಂಡಿಂಜತ್. 19ಅಯಿಂಗ ಮೂಂದ್ ಅಥವ ನಾಲ್ ಮೈಲ್ ದೋಣಿನ ದೂಡಿಯಂಡ್ ಪೋಯಂಡಿಪ್ಪಕ, ಯೇಸು ನೀರ್‌ರ ಮೇಲೆ ನಡ್‌ದಂಡ್ ಬಪ್ಪದ್‍ನ ಕಂಡತ್. ಅಂವೊ ದೋಣಿರ ಪಕ್ಕ ಬಪ್ಪಕಾಪಕ ಶಿಷ್ಯಂಗಕೆಲ್ಲ ದುಂಬ ಪೋಡಿ ಆಚಿ.
20ಯೇಸು ಅಯಿಂಗಕ್: ಪೋಡಿ ಬೋಂಡ. ಇದ್ ನಾನೇಂದ್ ಎಣ್ಣ್‌ಚಿ. 21ಅಕ್ಕ ಅಯಿಂಗ ಯೇಸುನ ಕುಶೀಲ್ ದೋಣಿರ ಒಳ್‍ಕ್ ಕಾಕಿಯಂಡತ್. ಅಚ್ಚಕ್ ಬೆರಿಯ, ಅಯಿಂಗ ಬಪ್ಪಕುಳ್ಳ ಜಾಗಕ್ ಎತ್ತ್‌ಚಿ.
ಜನ ಯೇಸುನ ತ್‍ೕಡ್‍ನದ್
22ಪಿತ್ಯಾಂದ್ ಕೆರೆರ ಆಬರಿಲ್ ಇಂಜ ಜನಾಂಗಕ್, ಯೇಸುರ ಶಿಷ್ಯಂಗ ಪತ್ತ್‌ಚಿಟ್ಟ ಆ ಒರ್ ದೋಣಿನ ಬುಟ್ಟಿತ್ ಬೋರೆ ದೋಣಿ ಇಂಜಿತಿಲ್ಲೇಂದೂ, ಯೇಸು ಅಂವೊಂಡ ಶಿಷ್ಯಂಗಡ ಕೂಡೆ ದೋಣಿಲ್ ಪೋಯಿತ್‌ಲ್ಲೇಂದು ಗೊತ್ತ್ಂಜತ್. 23ಆ ಸಮಯತ್‍ಲ್, ಬೋರೆ ದೋಣಿಯ ತಿಬೇರಿಯ ಪೊಳೆರ ಕರೆಯಿಂಜ ಬಾತ್. ಈ ತಿಬೇರಿಯ ಪಟ್ಟಣ, ಯೇಸು ಒಟ್ಟಿನ ದೇವಕ್ ವಂದನೆ ಮಾಡಿತ್ ಕೊಡ್‍ತ ಜಾಗತ್‍ರ ಪಕ್ಕ ಇಂಜತ್. 24ಅಯಿಂಗ ಅಲ್ಲಿ ಬಪ್ಪಕ ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಅಲ್ಲಿ ಇಲ್ಲೇಂದ್ ಗೊತ್ತಾಚಿ. ಅಕ್ಕ ಜನ ಎಲ್ಲಾರು ಯೇಸುನ ತ್‍ೕಡಿಯಂಡ್ ಕಪೆರ್ನೌಮ್‍ಕ್ ಬಾತ್.
ಯೇಸು ಜೀವತ್‍ರ ಒಟ್ಟಿ
25ಕೆರೆರ ಆಬರಿಲ್ ಯೇಸುನ ಜನ ಕಾಂಬಕ, ಉಪಾದ್ಯನೇ, ನೀನ್ ಎಕ್ಕ ಇಲ್ಲಿಕ್ ಬಂದಿಯೇಂದ್ ಕ್‍ೕಟತ್.
26ಯೇಸು ಅಯಿಂಗಳ ನೋಟಿತ್: ನಿಂಗ ನಾನ್ ಮಾಡ್‍ನ ಅದ್ಬುತ ಕಾರ್ಯತ್‍ನೆಲ್ಲ ಕಂಡಿತ್ ನಾನ್ ದಾರ್‍ೕಂದ್ ಗೊತ್ತಾನಗುಂಡ್ ನಿಂಗ ನಾಡ ಬಯ್ಯಕ್ ಬಂದಂಡಿಲ್ಲೆ, ನಿಂಗ ಒಟ್ಟಿನ ತಿಂದಿತ್ ತೃಪ್ತಿಯಾನಗುಂಡ್ ಮಾತ್ರ ನಾಡ ಬಯ್ಯಕ್ ಬಂದಂಡುಂಡ್‍ೕಂದ್ ನೇರಾಯಿತು ನೇರಾಯಿತು ನಿಂಗಕ್ ಎಣ್ಣ್‌ವೀಂದ್ ಎಣ್ಣ್‌ಚಿ. 27ಪಾಳಾಯಿ ಪೋಪ ಆಹಾರಕಾಯಿತ್ ಅಲ್ಲ ಆಚೇಂಗಿ ನಿಂಗಳ ನಿತ್ಯ ಜೀವಕತ್ತನೆ ಕೊಂಡ್ ಪೋಪ ಆಹಾರಕಾಯಿತ್ ಕ್ರಿಯೆ ಮಾಡಿ; ಅದ್‍ನ ಮನುಷ್ಯಕುಮಾರ ನಿಂಗಕ್ ತಪ್ಪ, ಎನ್ನಂಗೆಣ್ಣ್‌ಚೇಂಗಿ, ಅಂವೊ ಅನ್ನನೆ ಮಾಡ್‌ವಕ್ ಅಪ್ಪನಾನ ದೇವ ಅಂವೊನ ಅದಿಕಾರಿಯಾಯಿತ್ ನೀಮಿಚಿಟ್ಟಿತುಂಡ್.
28ಅಕ್ಕ ಅಯಿಂಗ ಅಂವೊಂಗ್: ದೇವಕ್ ತಕ್ಕಂತ ಕ್ರಿಯೇನ ಮಾಡ್‌ವಕ್ ಎಂತ ಮಾಡಂಡೂಂದ್ ಕ್‍ೕಟತ್.
29ಅಯಿಂಗಕ್ ಯೇಸು: ಅಂವೊ ಅಯಿಚಂವೊನ ನಿಂಗ ನಂಬವುದೇ, ದೇವಕ್ ತಕ್ಕಂತ ಕ್ರಿಯೇಂದ್ ಉತ್ತರ ಕೊಡ್‍ತತ್.
30ಅದ್ಂಗ್ ಅಯಿಂಗ: ಅನ್ನನೆ ಆಚೇಂಗಿ, ನಿನ್ನ ನಂಗ ನಂಬುವನೆಕೆ ನೀನ್ ಎಂತ ಅದ್ಬುತ ಕಾರ್ಯತ್‍ನ ಮಾಡಿತ್ ಕಾಟ್‌ವಿಯಾ? ನೀನ್ ಎಂತ ಕ್ರಿಯೇನ ಮಾಡ್‌ವಿಯಾ? 31ಅಯಿಂಗಕ್ ಪರಲೋಕತ್‍ರ ಒಟ್ಟಿನ ದೇವ ತಿಂಬಕ್ ಕೊಡ್‍ತತ್ ಎಣ್ಣಿಯಂಡ್ ದೇವಡ ಪುಸ್ತಕತ್‍ಲ್ ಒಳ್‍ದಿ ಬೆಚ್ಚಿತುಳ್ಳನೆಕೆ, ನಂಗಡ ಪೂರ್ವ ಕಾಲತ್‍ರ ಅಜ್ಜಂಗ, ಮಣಬೂಮಿಲ್ ಮನ್ನಾ ಎಣ್ಣ್‌ವದ್‍ನ ತಿಂದತಲ್ಲಾಂದ್ ಎಣ್ಣ್‌ಚಿ.#6.31 ಪ್ರಯಾಣ ಪುಸ್ತಕ 16.4,15; ದೇವಡ ಪಾಟ್ 78.24
32ಯೇಸು ಅಯಿಂಗಕ್: ಮೋಶೆ ನಿಂಗಕ್ ಪರಲೋಕತ್ಂಜ ಒಟ್ಟಿನ ತಂದಿತ್‌ಲ್ಲೆ; ಆಚೇಂಗಿ, ನಾಡ ಅಪ್ಪನಾನ ದೇವ ನಿಂಗಕ್ ಪರಲೋಕತ್ಂಜ ಬಂದಿತುಳ್ಳ ನೇರಾನ ಒಟ್ಟಿನ ತಂದಂಡುಂಡ್‍ೕಂದ್ ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ. 33ಪರಲೋಕತ್ಂಜ ಇಳ್ಂಜಿ ಬಂದಿತ್ ಈ ಲೋಕತ್‍ರ ಮನುಷ್ಯಂಗಕಾಯಿತ್ ಜೀವ ತಪ್ಪ ಒಟ್ಟಿಯೇ ದೇವ ತಪ್ಪ ಒಟ್ಟೀಂದ್ ಎಣ್ಣ್‌ಚಿ.
34ಅಕ್ಕ ಅಯಿಂಗ: ಸ್ವಾಮೀ, ನಂಗಕ್ ಅಂತ ಒಟ್ಟಿನ ಎಕ್ಕಾಲು ತಾಂದ್ ಕ್‍ೕಟತ್.
35ನಾನೇ ನಿಂಗಕ್ ಜೀವ ತಪ್ಪ ಒಟ್ಟೀಂದ್ ಯೇಸು ಎಣ್ಣ್‌ಚಿ. ದಾರ್ ನಾಡ ಪಕ್ಕ ಬಪ್ಪ, ಅಯಿಂಗಕ್ ಎಕ್ಕಾಲು ಕೆಲ ಪಯಿಪುಲೆ. ದಾರ್ ನನ್ನ ನಂಬುವ ಅಯಿಂಗಕ್ ಎಕ್ಕಾಲು ಬಾಯಾರಿಕೆ ಆಪುಲೆ. 36ಆಚೇಂಗಿ ನಿಂಗ ನನ್ನ ಕಂಡಿತು ನನ್ನ ನಂಬಿತ್‌ಲ್ಲೇಂದ್ ನಾನ್ ನಿಂಗಕ್ ಎಣ್ಣಿಯೆ. 37ಅಪ್ಪನಾನ ದೇವ ನಾಕ್ ತಪ್ಪಯಿಂಗೆಲ್ಲಾ, ನಾಡ ಪಕ್ಕ ಬಪ್ಪ. ನಾಡ ಪಕ್ಕ ಬಪ್ಪಯಿಂಗಳ ನಾನ್ ನೇರಾಯಿತು ಪೊರಮೆ ದೂಡಿತ್ ಇಡುಲೆ. 38ಎನ್ನಂಗೆಣ್ಣ್‌ಚೇಂಗಿ, ನಾನ್ ಪರಲೋಕತ್ಂಜ ಬಂದದ್ ನಾಡ ಇಷ್ಟ ಪ್ರಕಾರ ಕ್ರಿಯೆ ಮಾಡ್‌ವಕ್ ಅಲ್ಲ, ದಾರ್ ನನ್ನ ಅಯಿಚತೋ ಅಂವೊಂಡ ಚಿತ್ತತ್‍ರ ಪ್ರಕಾರ ಕ್ರಿಯೆ ಮಾಡ್‌ವಕ್ ಬಂದಿಯೆ. 39ಅಂವೊ ನಾಕ್ ಕೊಡ್‍ತ ಜನತ್‍ಲ್, ಒಬ್ಬನ ಸಹ ಕಳೆಯತನೆಕೆ, ಆಕೀರ್ ದಿವಸತ್‍ಲ್ ಪುನಃ ಚಾವ್‍ಯಿಂಜ ಜೀವವಾಯಿತ್ ಎಪ್ಪ್‌ವದೇ ನನ್ನ ಅಯಿಚಂವೊಂಡ ಚಿತ್ತವಾಯಿತುಂಡ್. 40ಮೋಂವೊನ ನೋಟಿತ್, ಅಂವೊನ ನಂಬುವ ಎಲ್ಲಾರು ನಿತ್ಯ ಜೀವತ್‍ನ ಪಡೆಯುವದು, ನಾನ್ ಅಂವೊನ ಆಕೀರ್ ದಿವಸತ್‍ಲ್ ಎಪ್ಪ್‌ವದು ನನ್ನ ಅಯಿಚಂವೊಂಡ ಚಿತ್ತವಾಯಿತುಂಡ್.
41ನಾನ್ ಪರಲೋಕತ್ಂಜ ಬಂದ ಒಟ್ಟೀಂದ್ ಯೇಸು ಎಣ್ಣ್‌ನದ್‍ನ ಕ್‍ೕಟಿತ್ ಯೆಹೂದ್ಯಂಗ ಗೊಣಗ್‍ವಕ್ ಸುರು ಮಾಡ್‍ಚಿ. 42ಇಂವೊ ಯೋಸೇಫಂಡ ಮೋಂವೊನಾನ ಯೇಸು ಅಲ್ಲಾ? ಅಂವೊಂಡ ಅಪ್ಪವ್ವನ ನಂಗಕ್ ಗೊತ್ತುಂಡಲ್ಲ? ಅನ್ನನೆ ಇಪ್ಪಕ, ನಾನ್ ಪರಲೋಕತ್ಂಜ ಬಂದಂವೋಂದ್ ಇಂವೊ ಎಣ್ಣ್‌ವದ್ ಎನ್ನನೇಂದ್ ಎಣ್ಣ್‌ಚಿ.
43ಅದ್ಂಗ್ ಯೇಸು ಇನ್ನನೆ ಜವಾಬ್ ಕೊಡ್‍ತತ್: ನಿಂಗ ಗೊಣಗುವಾನ ನಿಪ್ಪ್‌ಚಿಡಿ. 44ನನ್ನ ಅಯಿಚ ಅಪ್ಪನಾನ ದೇವ, ಒಬ್ಬನ ಬಲಿಕತೆ ಪೋಚೇಂಗಿ ಅಂವೊ ನಾಡ ಪಕ್ಕ ಬಪ್ಪ್‌ಲೆ; ನಾನ್ ಅಯಿಂಗಳ ಆಕೀರ್ ದಿವಸತ್‍ಲ್ ಜೀವವಾಯಿತ್ ಎಪ್ಪುವಿ. 45ಪ್ರವಾದಿಯಡ ಪುಸ್ತಕತ್‍ಲ್ ಒಳ್‌ದ್‌ನನೆಕೆ, ಅಯಿಂಗೆಲ್ಲಾ ದೇವಡಗುಂಡ್ ಪಡಿಚಿತ್‌ಪ್ಪ.#6.45 ಯೆಶಾಯ 54.13 ಆನಗುಂಡ್, ಅಪ್ಪನಾನ ದೇವಡಯಿಂಜ ಪಡಿಚ ಪ್ರತಿ ಒಬ್ಬೊನು ನಾಡ ಪಕ್ಕ ಬಪ್ಪ. 46ದೇವಡಯಿಂಜ ಬಂದಂವೊನಲ್ಲತೆ ಬೋರೆ ದಾರೂ ಅಪ್ಪನಾನ ದೇವನ ಕಂಡಿತ್‌ಲ್ಲೆ, ಇಂವೊನೇ ದೇವನ ಕಂಡಂವೊ.
47ನೇರಾಯಿತು, ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ: ನನ್ನ ನಂಬ್‌ವಯಿಂಗಕ್ ನಿತ್ಯ ಜೀವ ಉಂಡ್. 48ಎನ್ನಂಗೆಣ್ಣ್‌ಚೇಂಗಿ, ಜೀವ ತಪ್ಪ ಒಟ್ಟಿ ನಾನೇ. 49ನಿಂಗಡ ಮುತ್ತಜ್ಜಂಗ ಮಣಬೂಮಿಲ್ ಕ್‍ಟ್ಟ್‌ನ ಮನ್ನಾ ಎಣ್ಣುವ ಆಹಾರತ್‍ನ ತಿಂದತ್. ಆಚೇಂಗಿಯು ಅಯಿಂಗಡ ಸಮಯ ಬಪ್ಪಕ ಅಯಿಂಗ ಚತ್ತ್ ಪೋಚಿ. 50ಆಚೇಂಗಿ, ಪರಲೋಕತ್ಂಜ ಬಪ್ಪ ಒಟ್ಟಿ ತಿಂಬಯಿಂಗ ಚತ್ತ್ ಪೋಪುಲೆ. 51ನಾನೇ ಪರಲೋಕತ್ಂಜ ಬಂದ ಜೀವತ್‍ರ ಒಟ್ಟಿ; ಈ ಒಟ್ಟಿನ ತಿಂಬಯಿಂಗ ಎಕ್ಕಾಲು ಬದ್‍ಕ್‍ವ; ನಾನ್ ತಪ್ಪ ಒಟ್ಟಿ ನಾಡ ತಡಿಯೇ. ಈ ಲೋಕತ್‍ರ ಜನ ನಿತ್ಯ ಜೀವ ಪಡೆಯುವಕಾಯಿತ್ ನಾನ್ ನಾಡ ತಡೀನ ತಪ್ಪೀಂದ್ ಎಣ್ಣ್‌ಚಿ.
52ಅಕ್ಕ ಯೆಹೂದ್ಯಂಗ: ಇಂವೊ ತಾಂಡ ತಡೀನ ನಂಗಕ್ ಎನ್ನನೆ ತಿಂಬಕ್ ತಪ್ಪಕ್ ಕಯ್ಯೂಂದ್ ಅಯಿಂಗಯಿಂಗಳೇ ತರ್ಕ ಮಾಡ್‍ಚಿ.
53ಅಯಿಂಗಕ್ ಯೇಸು: ಮನುಷ್ಯಕುಮಾರಂಡ ತಡೀನ ಉಂಗತೆ, ಅಂವೊಂಡ ಚೋರೆನ ಕುಡಿಕತೆ ಪೋನಕ, ನಿಂಗಡ ಒಳ್‍ಲ್ ಜೀವ ಇಲ್ಲೇಂದ್ ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವೀಂದ್ ಎಣ್ಣ್‌ಚಿ. 54ನಾಡ ತಡೀನ ಉಂಡಿತ್, ನಾಡ ಚೋರೆನ ಕುಡಿಪಯಿಂಗಕ್ ನಿತ್ಯ ಜೀವ ಉಂಡ್; ಅಯಿಂಗಳ ನಾನ್ ಆಕೀರ್ ದಿವಸತ್‍ಲ್ ಎಪ್ಪುವಿ. 55ಎನ್ನಂಗೆಣ್ಣ್‌ಚೇಂಗಿ ನಾಡ ತಡಿಯು ಚೋರೆಯು, ನೇರಾನ ಆಹಾರ ಪಿಂಞ ನೇರಾನ ಕುಡಿಪ ನೀರು ಆಯಿತುಂಡ್. 56ನಾಡ ತಡೀನ ತಿಂದಿತ್, ನಾಡ ಚೋರೆನ ಕುಡಿಪಯಿಂಗ ನಾಡಲ್ಲಿ ವಾಸ ಮಾಡ್‌ವ; ನಾನ್ ಅಯಿಂಗಡಲ್ಲಿ ವಾಸ ಮಾಡ್‌ವಿ. 57ನನ್ನ ಅಯಿಚ ಜೀವವಾಯಿತುಳ್ಳ ಅಪ್ಪನಾನ ದೇವ ಎಲ್ಲಾರ್‌ಕು ಜೀವ ತಪ್ಪಂವೊ. ಅಂವೊನಗುಂಡ್ ನಾಕ್ ಜೀವ ಉಂಡ್. ನಾಕ್ ಜೀವ ಉಳ್ಳನೆಕೆ, ನನ್ನ ತಿಂಬಯಿಂಗಕ್ ನನ್ನಗುಂಡ್ ಜೀವ ಇಪ್ಪ. 58ಪರಲೋಕತ್ಂಜ ಇಳಿಂಜಿ ಬಂದ ಒಟ್ಟಿ ಇದೇ. ಇದ್ ನಿಂಗಡ ಮುತ್ತಜ್ಜಂಗ ತಿಂದ ಮನ್ನಾರನೆಕೆ ಇಲ್ಲೆ, ಅಯಿಂಗ ಅದ್‍ನ ತಿಂದತೇಂಗಿಯು ಜೀವ ಇಲ್ಲತೆ ಚತ್ತ್ ಪೋಚಿ, ಆಚೇಂಗಿ ಈ ಒಟ್ಟಿನ ತಿಂಬಯಿಂಗ ಎಕ್ಕಾಲು ಬದ್‍ಕಾವಾಂದ್ ಎಣ್ಣ್‌ಚಿ. 59ಯೇಸು ಇದ್‍ನೆಲ್ಲ ಕಪೆರ್ನೌಮ್‌ಲ್ ಇಂಜ ಸಬಾಮಂದಿರತ್‍ಲ್ ಬೋದನೆ ಮಾಡ್‌ವಕ ಎಣ್ಣ್‌ಚಿ.
60ಅಂವೊಂಡ ಶಿಷ್ಯಂಗಡಲ್ಲಿ ದುಂಬ ಜನ ಈ ಬೋದನೆನ ಕ್‍ೕಟಿತ್: ಈ ಬೋದನೆ ದುಂಬ ಕಠಿಣವಾಯಿತುಂಡ್, ದಾರ್ ಇದ್‍ನ ಸ್ವೀಕಾರ ಮಾಡ್‌ವಾಂದ್ ಎಣ್ಣ್‌ಚಿ.
61ತಾಂಡ ಶಿಷ್ಯಂಗ ಈ ವಿಷಯತ್‍ಲ್ ಗೊಣಗಿಯಂಡುಂಡ್‍ೕಂದ್ ಯೇಸುಕ್ ಗೊತ್ತಾಯಿತ್,
ಅಯಿಂಗಳ ನೋಟಿತ್: ಇದ್ ನಿಂಗಳ ನೊಂಬಲ ಮಾಡಿಯಂಡುಂಡಾಂದ್ ಕ್‍ೕಟತ್. 62ಅನ್ನನೆ ಆಚೇಂಗಿ, ಮನುಷ್ಯಕುಮಾರ ಎಲ್ಲಿಂಜ ಬಾತೋ ಅಲ್ಲಿಕ್ ಪತ್ತಿತ್ ಪೋಪಾನ ನಿಂಗ ಕಂಡಕ ಎಂತ ಮಾಡ್‌ವಿರ? 63ಪವಿತ್ರಾತ್ಮ ಒಬ್ಬನೇ ಜೀವ ತಪ್ಪಂವೊ, ಮನುಷ್ಯಂಗಕ್ ಜೀವ ತಪ್ಪಕ್ ಕಯ್ಯುಲೆ. ನಾನ್ ನಿಂಗಕ್ ಎಣ್ಣ್‌ನ ಬೋದನೆ, ಪವಿತ್ರಾತ್ಮತ್‍ರ ಪಿಂಞ ಜೀವ ತಪ್ಪ ವಾಕ್ಯತ್‍ರದಾಯಿತುಂಡ್. 64ಆಚೇಂಗಿಯು, ನಿಂಗಡಲ್ಲಿ, ನನ್ನ ನಂಬತಯಿಂಗ ಚೆನ್ನ ಉಂಡ್. ಯೇಸು ಇನ್ನನೆ ಎಣ್ಣ್‌ವಕ್ ಕಾರಣ ಎಂತ ಎಣ್ಣ್‌ಚೇಂಗಿ: ಅಂವೊನ ನಂಬತಂವೊ ದಾರ್‍ೕಂದು, ಅಂವೊನ ಕೊಲ್ಲುವಕ್ ಪುಡ್‌ಚಿತ್ ಕೊಡ್‍ಪಂವೊ ದಾರ್‍ೕಂದು ಅಂವೊಂಗ್ ಆದ್ಯತ್ಂಜಲೇ ಗೊತ್ತ್ಂಜತ್.
65ಇಂಞು ಯೇಸು: ನಾಡ ಅಪ್ಪನಾನ ದೇವ, ಒಬ್ಬನ ನಾಡ ಪಕ್ಕ ಕೊಂಡ್ ಬರತೆ ಪೋನಕ, ಅಂವೊ ನಾಡ ಪಕ್ಕ ಬಪ್ಪ್‌ಲೇಂದ್ ಇದ್ಂಗಾಯಿತೇ ನಾನ್ ನಿಂಗಕ್ ಎಣ್ಣಿಯೇಂದ್ ಎಣ್ಣ್‌ಚಿ.
66ಇದಾನ ಪಿಂಞ ಅಂವೊಂಡ ಶಿಷ್ಯಂಗ ಸುಮಾರ್ ಜನ ಯೇಸುರ ಕೂಡೆ ಪೋಪದ್‌ನ ನಿಪ್ಪ್‌ಚಿಟ್ಟತ್.
67ಅಕ್ಕ ಯೇಸು ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ನೋಟಿತ್: ನಿಂಗ ಸಹ ನನ್ನ ಬುಟ್ಟಿತ್ ಪೋಪಿರಾಂದ್ ಕ್‍ೕಟತ್.
68ಅಕ್ಕ ಸೀಮೋನ ಪೇತ್ರ: ಒಡೆಯನೇ, ನಿನ್ನ ಬುಟ್ಟಿತ್ ನಂಗ ದಾಡ ಪಕ್ಕ ಪೋಪೊ? ನೀಡ ಪಕ್ಕ ನಿತ್ಯ ಜೀವತ್‍ರ ವಾಕ್ಯ ಉಂಡಲ್ಲಾ? 69ನೀನ್ ಜೀವವಾಯಿತುಳ್ಳ ದೇವಡ ಪವಿತ್ರವಾನಂವೋಂದ್#6.69 ದೇವಡ ಪವಿತ್ರವಾನಂವೋಂದ್ ಕ್ರಿಸ್ತ ಎಣ್ಣುವ ಮೆಸ್ಸಿಯನ ಕಾಕುವ. ನಂಗಕ್ ಗೊತ್ತಾನಗುಂಡ್ ನಿನ್ನ ನಂಬಿಯೇಂದ್ ಎಣ್ಣ್‌ಚಿ.
70ಅಯಿಂಗಕ್ ಯೇಸು: ಪನ್ನೆರಂಡ್ ಶಿಷ್ಯಂಗಳಾನ ನಿಂಗಳ ನಾನ್ ಗೊತ್ತ್ ಮಾಡ್‍ನ, ಆಚೇಂಗಿ ನಿಂಗಡಲ್ಲಿ ಒಬ್ಬ, ಸೈತಾನಾಯಿತುಂಡ್‍ೕಂದ್ ಎಣ್ಣ್‌ಚಿ. 71ಸೀಮೋನಂಡ ಮೋಂವೊನಾನ ಇಸ್ಕರಿಯೋತ ಯೂದ ಯೇಸುರ ಪನ್ನೆರಂಡ್ ಶಿಷ್ಯಂಗಡಲ್ಲಿ ಒಬ್ಬನಾಯಿತ್ ಇಂಜತೇಂಗಿಯು, ಬಯ್ಯ ತನ್ನ ಕೊಲ್ಲ್‌ವಕ್ ಪುಡ್‌ಚಿತ್ ಕೊಡ್‍ಪಂವೊನಾಯಿತ್ ಇಂಜಗುಂಡ್, ಅಂವೊಂಡ ವಿಷಯತ್ ಯೇಸು ಇನ್ನನೆ ಎಣ್ಣ್‌ಚಿ.
Currently Selected:
ಯೋಹಾನ 6: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
