ಅಪೊಸ್ತಲ 21
21
ಪೌಲಂಡ ಯೆರೂಸಲೇಮ್ ಪ್ರಯಾಣ
1ನಂಗ ಅಯಿಂಗಳ ಬುಟ್ಟಿತ್ ಹಡಗ್ ಪತ್ತ್‌ನ ಪಿಂಞ, ನೇರೆ ಕೋಸ್ ದ್ವೀಪಕ್ ಕೂಡ್‍ಚಿ. ಪಿತ್ಯಾಂದ್ ರೋದ ದ್ವೀಪಕ್ ಪೋಯಿತ್ ಅಲ್ಲಿಂಜ ಪತರ ಎಣ್ಣ್‌ವ ಪಟ್ಟಣಕ್ ಬಾತ್. 2ಅಲ್ಲಿ ಫೊಯಿನಿಕೆ ದೇಶಕ್ ಪೋಪ ಹಡಗ್‍ನ ಕಂಡಿತ್ ಆ ಹಡಗ್‍ಕ್ ಪತ್ತಿತ್ ಪ್ರಯಾಣ ಮಾಡ್‍ಚಿ. 3ಮಿಂಞಕ್ ಕುಪ್ರ ದ್ವೀಪತ್‍ನ ಕಂಡಿತ್ ಅದ್ಂಡ ತೆಕ್ಕ್ ದಿಕ್ಕ್‌ಲ್ ಬುಟ್ಟಿತ್ ಸಿರಿಯ ದೇಶತ್‍ರ ಬರಿಕ್ ಪೋಯಿತ್ ತೀರ್ ಪಟ್ಟಣಕ್ ಬಂತ್ ಅಲ್ಲಿ ಇಳ್ಂಜಿತ್; ಎನ್ನಂಗೆಣ್ಣ್‌ಚೇಂಗಿ ಅಲ್ಲಿ ಹಡಗ್‍ರ ಸಮಾನತ್‍ನ ಉಳ್‍ಪಕಿಂಜತ್. 4ಅಲ್ಲಿ ಇಂಜ ಯೇಸುನ ನಂಬ್‍ನಯಿಂಗಳ ತ್‍ೕಡಿ ಕಂಡ್‍ಪುಡ್‌ಚಿತ್ ನಂಗ ಅಯಿಂಗಡ ಕೂಡೆ ಒರ್ ವಾರ ಒಳಿಂಜಿತ್.
ಅಯಿಂಗ ಪೌಲನ ನೋಟಿತ್: ನೀನ್ ಯೆರೂಸಲೇಮ್‌ಕ್ ಪೋಪದ್ ಬೋಂಡಾಂದ್ ಪವಿತ್ರಾತ್ಮತ್‍ರ ಪ್ರೇರಣೆಯಿಂಜ ಎಣ್ಣ್‌ಚಿ. 5ಆಚೇಂಗಿ, ಹಡಗ್ ಅಲ್ಲಿಂಜ ಪೊರಡ್‌ವ ಸಮಯ ಬಪ್ಪಕ, ಅಯಿಂಗೆಲ್ಲಾರು ಪೊಣ್ಣ್ ಮಕ್ಕಡ ಕೂಡೆ ಪಟ್ಟಣತ್‍ರ ಕಡೇಕತ್ತನೆ ನಂಗಡ ಕೂಡೆ ಬಾತ್. ನಂಗ ಕಡಕರೆಲ್ ಮೊಣಕಾಲ್ ಇಟ್ಟಿತ್ ಪ್ರಾರ್ಥನೆ ಮಾಡ್‍ಚಿ. 6ಅಯಿಂಗಕೆಲ್ಲ ನಂಗ ವಂದನೆ ಎಣ್ಣಿತ್ ಹಡಗ್‍ಲ್ ಪತ್ತ್‌ನ ಪಿಂಞ ಅಯಿಂಗೆಲ್ಲಾರು ಅಯಿಂಗಡ ಮನೆಕ್ ಪೋಚಿ.
7ನಂಗ ತೀರ್ ಪಟ್ಟಣತ್ಂಜ ಪೊರಟಿತ್ ಪ್ತೊಲೆಮಾಯ ಪಟ್ಟಣಕ್ ಬಂತ್ ಸಮುದ್ರತ್‍ರ ಪ್ರಯಾಣತ್‍ನ ತ್‍ೕತಿತ್, ಅಲ್ಲಿಂಜ ಯೇಸುನ ನಂಬ್‍ನ ಅಣ್ಣತಮ್ಮಣಂಗಡ ಪಕ್ಕ ಪೋಯಿತ್, ಒರ್ ದಿವಸ ಅಯಿಂಗಡ ಕೂಡೆ ಒಳಿಂಜತ್. 8ಪಿತ್ಯಾಂದ್ ಅಲ್ಲಿಂಜ ಪೊರಟಿತ್, ಕೈಸರೈಯಕ್ ಬಂದಿತ್ ದೇವಡ ನಲ್ಲ ಸುದ್ದಿನ ಬೋದನೆ ಮಾಡ್‌ವ ಫಿಲಿಪ್ಪಂಡ ಮನೆಕ್ ಪೋಯಿತ್ ಅಂವೊಂಡ ಮನೆಲ್ ಇಂಜತ್. ಈ ಫಿಲಿಪ್ಪ, ಯೆರೂಸಲೇಮ್‍ಲ್ ಉಳ್ಳ ಸಬೇಲ್ ಕೂಳ್ ಪಾಲ್‌ಮಾಡ್‌ವಕಾಯಿತ್ ಅಪೊಸ್ತಲಂಗ ಗೊತ್ತ್ ಮಾಡ್‍ನ ಏಳ್ ಸೇವಕಂಗಡಲ್ಲಿ ಒಬ್ಬನಾಯಿತ್ಂಜತ್. 9ಅಂವೊಂಗ್, ಮಂಗಲ ಆಕತ ನಾಲ್ ಮೂಡಿ ಮಕ್ಕ ಇಂಜತ್; ಅಯಿಂಗ ಪ್ರವಾದನೆ ಎಣ್ಣ್‌ವಯಿಂಗಳಾಯಿತ್ ಇಂಜತ್. 10ನಂಗ ಅಯಿಂಗಡ ಮನೆಲ್ ದುಂಬ ದಿವಸ ಇಂಜತ್. ಆ ಸಮಯತ್‍ಲ್ ಅಗಬ ಎಣ್ಣುವ ಒರ್ ಪ್ರವಾದಿ ಯೂದಾಯತ್ಂಜ ನಂಗಡ ಪಕ್ಕ ಬಾತ್. 11ಅಂವೊ ನಂಗಡ ಪಕ್ಕ ಬಂದಿತ್, ಪೌಲಂಡ ಅರೆಪಟ್ಟಿನ ಎಡ್‍ತಿತ್ ಅಂವೊಂಡ ಕಾಲ್‌ಕೈಯಿನ ಆ ಪಟ್ಟಿಲ್ ಕೆಟ್ಟಿಯಂಡತ್.
ಅಂವೊ ನಂಗಳ ನೋಟಿತ್: ಈ ಅರೆ ಪಟ್ಟಿ ದಾಡದೋ, ಅಂವೊನ ಯೆರೂಸಲೇಮ್‍ರ ಯೆಹೂದ್ಯಂಗ ಇನ್ನನೆ ಕೆಟ್ಟಿತ್ ಅಲ್ಲಿಯತ್‍ರ ಯೆಹೂದ್ಯ ಅಲ್ಲತಯಿಂಗಡ ಕೈಕ್ ಒಪ್ಪ್‌ಚಿಡುವಾಂದ್ ಪವಿತ್ರಾತ್ಮ ಎಣ್ಣಿಯಂಡ್ ಉಂಡ್‍ೕಂದ್ ಎಣ್ಣ್‌ಚಿ. 12ಆ ತಕ್ಕ್‌ನ ಕ್‍ೕಟ ನಂಗ ಪಿಂಞ ಅಲ್ಲಿ ಇಂಜ ಜನ, ಪೌಲನ ನೋಟಿತ್, ನೀನ್ ಯೆರೂಸಲೇಮ್‌ಕ್ ಪೋಪದ್ ಬೋಂಡಾಂದ್ ಬೋಡಿಯಂಡತ್.
13ಆಚೇಂಗಿ ಪೌಲ: ನಿಂಗ ಎನ್ನಂಗ್ ಇನ್ನನೆ ಮೊರಟಂಡ್, ನಾಡ ಹೃದಯ ತಳ್ಂದ್ ಪೋಪನೆಕೆ ಮಾಡ್‌ವಿರ? ನಾನ್ ಒಡೆಯನಾನ ಯೇಸುರ ಪೆದಕಾಯಿತ್ ಯೆರೂಸಲೇಮ್‍ಲ್ ಜೈಲ್‌ಕ್ ಪೋಪಕ್ ಮಾತ್ರ ಅಲ್ಲ, ಚಾವಕು ತಯಾರಾಯಿತ್ ಉಳ್ಳ್‌ೕಂದ್ ಎಣ್ಣ್‌ಚಿ. 14ಅಂವೊ ನಂಗ ಎಣ್ಣ್‌ವಾನ ಒತ್ತತೆಗುಂಡ್, ಒಡೆಯಂಡ ಚಿತ್ತತ್‍ರನೆಕೆ ಆಡ್‍ೕಂದ್ ಎಣ್ಣಿತ್ ನಂಗ ಮುಂಡತೆ ಇಂಜತ್.
15ಇಲ್ಲಿಂಜ ಚೆನ್ನ ದಿನ ಆನ ಪಿಂಞ ನಂಗ ಪ್ರಯಾಣ ಮಾಡ್‌ವಕುಳ್ಳ ಸಾಮಾನತ್‍ನ ಎಲ್ಲಾ ಎಡ್‍ತಂಡ್ ಯೆರೂಸಲೇಮ್‌ಕ್ ಪೊರಟತ್. 16ಕೈಸರೈತ್ಂಜ ಚೆನ್ನ ಯೇಸುನ ನಂಬ್‍ನಯಿಂಗ ನಂಗಡ ಕೂಡೆ ಬಾತ್. ಅಯಿಂಗ ಮ್ನಾಸೋನ ಎಣ್ಣ್‌ವಂವೊಂಡ ಮನೆಲ್ ನಂಗ ಇಪ್ಪಕ್ ಜಾಗ ಇಂಜಗುಂಡ್ ಅಲ್ಲಿಕ್ ಕಾಕಿಯಂಡ್ ಬಾತ್. ಇಂವೊ ಕುಪ್ರ ದೇಶತ್ಂಜ ಬಂದಂವೊನು, ಯೇಸುರ ಮೇಲೆ ಮಿಂಞಲೇ ನಂಬಿಕೆ ಇಟ್ಟಂವೊನು ಆಯಿತ್ಂಜತ್.
ಪೌಲಂಡ ರೋಮ್ ಪಟ್ಟಣತ್‍ರ ಪ್ರಯಾಣ 21.17–28.31
17ನಂಗ ಯೆರೂಸಲೇಮ್‌ಕ್ ಬಪ್ಪಕ ಯೇಸುನ ನಂಬ್‍ನ ಅಲ್ಲಿಯತ್‍ರ ಅಣ್ಣತಮ್ಮಣಂಗ ನಂಗಳ ಕುಶೀಲ್ ಕೂಟಿಯಂಡತ್. 18ಪಿತ್ಯಾಂದ್ ಪೌಲ ನಂಗಳ ಕಾಕಿಯಂಡ್ ಯಾಕೋಬಂಡ ಪಕ್ಕ ಪೋಚಿ; ಸಬೆರ ಪೆರಿಯಯಿಂಗೆಲ್ಲಾ ಅಲ್ಲಿ ಬಂದಿತ್ಂಜತ್. 19ಪೌಲ ಅಯಿಂಗಕೆಲ್ಲ ವಂದನೆ ಎಣ್ಣಿತ್, ತಾಂಡ ಸೇವೇನಗುಂಡ್ ದೇವ ಯೆಹೂದ್ಯಂಗಲ್ಲತ ಬೋರೆ ಜನಡ ಮದ್ಯತ್‍ಲ್ ಮಾಡ್‍ನ ಕಾರ್ಯತ್‍ನ ಒಂದೊಂದಾಯಿತ್ ವಿವರಿಚಿಟ್ಟತ್. 20ಇದ್‍ನೆಲ್ಲ ಅಯಿಂಗ ಕ್‍ೕಪಕ, ಅಯಿಂಗ ದೇವನ ತುದಿಚತ್.
ಅಕ್ಕ ಅಯಿಂಗ ಅಂವೊನ ನೋಟಿತ್: ಪ್ರೀತಿರ ಪೌಲನೇ, ಯೆಹೂದ್ಯಂಗಡಡೆ‍ಲ್ ಯೇಸುನ ನಂಬ್‍ನಯಿಂಗ ಎಚ್ಚಕ್ ಆಯಿರ ಜನ ಉಂಡ್‍ೕಂದ್ ನೀನ್ ನೋಟಿಯಂಡುಳ್ಳಿಯಲ್ಲ. ಅಯಿಂಗೆಲ್ಲಾರು ನ್ಯಾಯಪ್ರಮಾಣಕ್ ತಗ್ಗಿತ್ ನಡ್ಂದಂಡ್, ಅಚ್ಚಕ್ ವೈರಾಗ್ಯತ್‍ಲ್ ಉಂಡ್. 21ಯೆಹೂದ್ಯಂಗ ಅಲ್ಲತೆ ಬೋರೆ ಜನಾಂಗಡಡೆಲ್ ವಾಸ ಮಾಡಿಯಂಡುಳ್ಳ ಯೆಹೂದ್ಯಂಗೆಲ್ಲಾ ಅಯಿಂಗಡ ಮಕ್ಕಕ್ ಸುನ್ನತಿ ಮಾಡ್‌ವದು, ನಂಗಡ ಪದ್ದತಿರ ಪ್ರಕಾರ ನಡ್‍ಪದೂ ಬೋಂಡಾಂದ್ ನೀನ್ ಎಣ್ಣಿತ್, ನ್ಯಾಯಪ್ರಮಾಣತ್‍ನ ಬುಟ್ಟಿತ್ ಪೋಯೀಂದ್ ನೀನ್ ಬೋದನೆ ಮಾಡಿಯಂಡುಳ್ಳದ್‍ನ ಅಯಿಂಗ ಅರಿಂಜಿ ಬಂದಿತುಂಡ್. 22ಇಕ್ಕ ಎಂತ ಮಾಡನ? ನೀನ್ ಇಲ್ಲಿ ಬಂದಿತುಳ್ಳಿಯಾಂದ್ ಕಂಡಿತವಾಯಿತ್ ಅಯಿಂಗಕ್ ಗೊತ್ತಾಪ. 23ಆನಗುಂಡ್ ನಂಗ ಎಣ್ಣುವಾನ ನೀನ್ ಕ್‍ೕಳ್. ನಂಗಡ ಪಕ್ಕ ದೇವಕ್ ಪರ್‍ಕೆ ಮಾಡ್‍ನ ನಾಲ್ ಜನ ಉಂಡ್. 24ನೀನ್ ಅಯಿಂಗಳ ಕೂಟಿಯಂಡ್ ಪೋಯಿತ್ ಅಯಿಂಗಡ ಕೂಡೆ ನಿನ್ನ ಶುದ್ದ ಮಾಡ್‌ವ ಆಚಾರತ್‍ಲ್ ಅಯಿಂಗ ತಂಗಡ ತೆಲ್‍ಮಿನ ಬೋಳ್‍ಚಿಡ್‌ವಕ್ ಆಪಂತ ಪಣತ್‍ನ ಕರ್ಚ್‌ಮಾಡ್: ಇನ್ನನೆ ಮಾಡ್‍ಚೇಂಗಿ ನಿಂಗಡ ವಿಷಯತ್ ಕ್‍ೕಟ ತಕ್ಕ್ ನೇರಲ್ಲಾಂದು, ನಿಂಗಳು ಸಹ ನ್ಯಾಯಪ್ರಮಾಣತ್‍ರ ಪ್ರಕಾರ ನಡ್ಂದಂಡುಂಡ್‍ೕಂದು ಎಲ್ಲಾ ಜನಕು ಗೊತ್ತಾಪ.
25ಯೆಹೂದ್ಯಂಗ ಅಲ್ಲತ ಯೇಸುನ ನಂಬ್‍ನಯಿಂಗ: ವಿಗ್ರಹಕ್ ಅರ್ಪಿಚಿಟ್ಟ ಕೂಳ್‍ಕ್, ಚೋರೆ ತಿಂಬಕ್, ನೆರ್‌ಕಿತ್ ಚತ್ತ್‌ಪೋನ ಪ್ರಾಣಿಯಡ ಯರ್ಚಿಕ್ ಪಿಂಞ ಲೈಂಗಿಕ ಪಾಪಕ್ ದೂರವಾಯಿತ್ ಇರಂಡೂಂದ್ ನಂಗ ತೀರ್ಮಾನ ಮಾಡಿತ್ ಒಳ್‍ದಿಯೇಂದ್ ಎಣ್ಣ್‌ಚಿ. 26ಅಕ್ಕ, ಪಿತ್ಯಾಂದ್ ಪೌಲ ಆ ಮನುಷ್ಯಂಗಳ ಕಾಕಿಯಂಡ್ ಅಯಿಂಗಡ ಕೂಡೆ ತಾನು ಶುದ್ದಮಾಡಿಯಂಡ್ ದೇವಾಲಯತ್‍ರ ಒಳ್‍ಕ್ ಪೋಯಿತ್, ಅಯಿಂಗ ಒಬ್ಬೊಬ್ಬಂಗಕಾಯಿತ್ ಬಲಿ ಕೊಡ್‌ತಿತ್ ಪೂರೈಚಿಡ್‌ವಕತ್ತನೆ ಶುದ್ದ ಮಾಡ್‌ವ ಆಕೀರ್ ದಿವಸತ್‍ನ ನೆರೆವೇರಿಚಿಡುವೀಂದ್ ಎಣ್ಣ್‌ಚಿ.
ಪೌಲನ ಯೆರೂಸಲೇಮ್‍ಲ್ ಪುಡಿಪದ್
27ಅನ್ನನೆ ಶುದ್ದ ಮಾಡ್‌ವ ಏಳ್ ದಿವಸ ನೆರವೇರುವಕ್ ಪಕ್ಕ ಆಪಕ, ಆಸ್ಯ ಸೀಮೆಯಿಂಜ ಬಂದಿತ್ಂಜ ಯೆಹೂದ್ಯಂಗ ಪೌಲನ ದೇವಾಲಯತ್‍ಲ್ ಕಂಡತ್. ಅಯಿಂಗ ಬಲ್ಯ ಗಲಾಟೆ ಮಾಡಿತ್ ಗುಂಪು ಕೂಟಿತ್ ಅಂವೊನ ಪುಡ್‌ಚಿರ್‌ತ್. 28ಅಯಿಂಗ ಬಲ್ಯ ಸ್ವರತ್‍ಲ್: ಇಸ್ರಾಯೇಲ್ ಜನಳೇ, ಸಹಾಯ ಮಾಡಿ, ನಂಗಡ ಜನಾಂಗಕು ನ್ಯಾಯಪ್ರಮಾಣಕು ಈ ದೇವಾಲಯಕು ವಿರೋದವಾಯಿತ್ ಎಲ್ಲಾ ಜಾಗತ್‍ಲ್ ಪಿಂಞ ಎಲ್ಲಾ ಜನಕ್ ಬೋದನೆ ಮಾಡ್‌ವ ಮನುಷ್ಯ ಇಂವೊನೇ; ಇದ್‍ಲ್ಲತೆ, ಇಂವೊ ಯೆಹೂದ್ಯ ಅಲ್ಲತ ಜನತ್‍ನ ದೇವಾಲಯತ್‍ರ ಒಳ್‍ಕ್ ಕೂಟಿಯಂಡ್ ಬಂದಿತ್, ಈ ಪವಿತ್ರವಾನ ದೇವಾಲಯತ್‍ನ ಅಶುದ್ದ ಮಾಡ್‍ಚೀಂದ್ ಕೂತ್ ಕೊಡ್‍ತತ್. 29ಅಯಿಂಗ ಇನ್ನನೆ ಎಣ್ಣುವಕ್ ಕಾರಣ ಎಂತ ಎಣ್ಣ್‌ಚೇಂಗಿ: ಮಿಂಞತ್‍ರ ದಿವಸತ್‍ಲ್ ಎಫೆಸ ಪಟ್ಟಣತ್ಂಜ ಬಂದಿತ್ಂಜ ತ್ರೊಫಿಮ ಎಣ್ಣುವ ಒಬ್ಬನ ಪೌಲಂಡ ಕೂಡೆ ಪಟ್ಟಣತ್‍ಲ್ ಕಂಡಿತ್ಂಜತ್, ಅಂವೊ ಗ್ರೀಕ್ ತಕ್ಕ್ ಪರಿಯುಂವೊನಾಯಿತ್ಂಜತ್. ಆನಗುಂಡ್ ಪೌಲ ಅಂವೊನ ದೇವಾಲಯತ್‍ರ ಒಳ್‍ಕ್ ಕಾಕಿಯಂಡ್ ಬಂದಿತ್‌ಪ್ಪಾಂದ್ ಅಯಿಂಗ ಅನುಮಾನ ಪಟ್ಟತ್.
30ಅಕ್ಕ ಪಟ್ಟಣತ್‍ಲ್ ಬಲ್ಯ ಗಲಾಟೆ ಆಚೀಂದ್ ಪಟ್ಟಣತ್‍ಲ್ ಇಂಜ ಜನಕೆಲ್ಲ ಗೊತ್ತಾಯಿತ್ ಓಡಿ ಬಂತ್ ಕೂಡ್‍ಚಿ. ಪಿಂಞ ಪೌಲನ ಪುಡ್‌ಚಿತ್ ದೇವಾಲಯತ್‍ರ ಪೊರಮೆ ಬಲ್‍ಚಂಡ್ ಬಾತ್. ಅಕ್ಕಣೆಕ್ ದೇವಾಲಯತ್‍ರ ಪಡಿನ ಅಯಿಂಗ ಮುಚ್ಚಿರ್‌ತ್. 31ಅಯಿಂಗ ಅಂವೊನ ಕೊಲ್ಲ್‌ವಕ್ ಪ್ರಯತ್ನಪಡ್‍ವಕ, ಯೆರೂಸಲೇಮ್‍ಲ್ ಬಲ್ಯ ಗಲಿಬಿಲಿ ಆಯಂಡುಂಡ್‍ೕಂದ್ ರೋಮ್ ರಾಜ್ಯತ್‍ರ ಸೇನೆರ ಅದಿಪತಿಕ್ ಸುದ್ದಿ ಬಾತ್. 32ಅಕ್ಕಣೆ, ಅಂವೊ ಸಿಪಾಯಿಯಂಗಳ ಪಿಂಞ ಅದಿಕಾರಿಯಳ ಕೂಟಿಯಂಡ್, ಅಯಿಂಗಡ ಪಕ್ಕ ಬೆರಿಯ ಬಾತ್. ಜನ, ಸೇನೆರ ಅದಿಪತಿನ ಪಿಂಞ ಸಿಪಾಯಿಯಂಗಳ ಕಾಂಬಕ ಪೌಲನ ಪೊಯ್ಯುವಾನ ನಿಪ್ಪ್‌ಚಿಟ್ಟತ್.
33ಅಕ್ಕ ಸೇನೆರ ಅದಿಪತಿ ಪೌಲಂಡ ಪಕ್ಕ ಬಂದಿತ್ ಅಂವೊನ ಪುಡ್‌ಚಿತ್, ಅಂವೊನ ದಂಡ್ ಸರ್ಪಣಿಲ್ ಕೆಟ್ಟ್‌ವಕ್ ಆಜ್ಞೆ ಕೊಡ್‍ತತ್. ಪಿಂಞ ಸೇನೆರ ಅದಿಪತಿ, ಇಂವೊ ದಾರ್? ಇಂವೊ ಎಂತ ಮಾಡ್‍ಚೀಂದ್ ಕ್‍ೕಟತ್. 34ಅದ್ಂಗ್ ಚೆನ್ನ ಜನ ಒರ್ ವಿಷಯತ್‍ನ, ಇಂಞು ಚೆನ್ನ ಜನ ಬೋರೆ ಒರ್ ವಿಷಯತ್‍ನ ಬಲ್ಯ ಸ್ವರತ್‍ಲ್ ಎಣ್ಣಿಯಂಡ್ ಇಂಜತ್. ಜನ ಜೋರಾಯಿತ್ ಕೂತ್ ಕೊಡ್‍ತಂಡಿಂಜಗುಂಡ್ ಅಯಿಂಗ ಎಂತ ಎಣ್ಣಿಯಂಡುಂಡ್‍ೕಂದ್ ಆ ಅದಿಪತಿಕ್ ಗೊತ್ತ್‌ಮಾಡ್‍ವಕ್ ಕಯಿಂಜಿತ್‌ಲ್ಲೆ. ಆನಗುಂಡ್ ಅಂವೊನ, ಕೋಟೆರ ಒಳ್‍ಕ್ ಕಾಕಿಯಂಡ್ ಪೋಪಕ್ ಆಜ್ಞೆ ಕೊಡ್‍ತತ್. 35ಪೌಲ ಕೊಡಿಕ್ ಬಪ್ಪಕ, ಜನ ದುಂಬ ನೂಕಿಯಂಡಿಂಜಗುಂಡ್, ಸಿಪಾಯಿಯಂಗ ಅಂವೊನ ಪೊರ್‍ತಂಡ್ ಪೋಪನೆಕೆ ಆಚಿ. 36ಅಂವೊಂಡ ಬಯ್ಯಕ್ ನುಗ್ಗಿಯಂಡ್ ಪೋಯಂಡಿಂಜ ಜನ, ಅಂವೊನ ಕೊಲ್ಲಿ, ಕೊಲ್ಲೀಂದ್ ಕೂತ್ ಕೊಡ್‌ಪಯಿಂಜತ್.
37ಪೌಲನ ಕೋಟೆರ ಒಳ್‍ಕ್ ಕೊಂಡ್ ಪೋಪಕ್ ಮಿಂಞ, ಅಂವೊ ಸೇನೆರ ಅದಿಪತಿನ ನೋಟಿತ್: ನಾನ್ ನಿಂಗಡ ಕೂಡೆ ತಕ್ಕ್ ಪರಿಯುವಕ್ ಕಯ್ಯುವಾಂದ್ ಕ್‍ೕಟತ್.
ಅದ್ಂಗ್ ಅಂವೊ: ಪೌಲನ ನೋಟಿತ್ ನೀಕ್ ಗ್ರೀಕ್ ತಕ್ಕ್ ಪರಿಯುವಕ್ ಗೊತ್ತುಂಡಾ? 38ಚೆನ್ನ ದಿವಸತ್‍ರ ಮಿಂಞ ಸರ್ಕಾರಕ್ ವಿರೋದವಾಯಿತ್ ಗಲಾಟೆ ಮಾಡಿತ್ ಮುಕ್ಯಪಟ್ಟಯಿಂಗಳ ಕೊಲ್ಲ್‌ವಂತ ನಾಲಾಯಿರ ಉಗ್ರವಾದಿಯಳ ಮಣಬೂಮಿಕ್ ಕಾಕಿಯಂಡ್ ಪೋನ ಐಗುಪ್ತ ದೇಶತ್‍ರ ಮನುಷ್ಯ ನೀನ್ ತಾನೇಂದ್ ಕ್‍ೕಟತ್.
39ಅದ್ಂಗ್ ಪೌಲ, ನಾನ್ ಒರ್ ಯೆಹೂದ್ಯ ಮನುಷ್ಯ, ಕಿಲಿಕ್ಯ ಪ್ರಾಂತ್ಯತ್‍ರ ಮುಕ್ಯಪಟ್ಟ ಪಟ್ಟಣವಾನ ತಾರ್ಸ ಪಟ್ಟಣತ್‍ರ ಪ್ರಜೆ. ಈ ಜನಡ ಕೂಡೆ ಚೆನ್ನ ತಕ್ಕ್ ಪರಿಯುವಕ್ ನಾಕ್ ಅಪ್ಪಣೆ ತರಂಡೂಂದ್ ಕ್‍ೕಟತ್.
40ಅಪ್ಪಣೆ ಕೊಡ್‌ಪಕ ಪೌಲ, ಮೊಟ್ಟ್‌ರ ಮೇಲೆ ನಿಂದಿತ್: ಜನಳ ನೋಟಿತ್, ಅಯಿಂಗ ಮುಂಡತೆ ಇಪ್ಪಕ್ ಕೈ ಸನ್ನೆ ಮಾಡ್‍ಚಿ. ಅಯಿಂಗ ಶಾಂತಿ ಆಪಕ, ಅಯಿಂಗಡ ಕೂಡೆ ಅರಾಮಿಯ ಬಾಷೆಲ್ ತಕ್ಕ್ ಪರಿಯುವಕ್ ಸುರ್ ಮಾಡ್‍ಚಿ.
Currently Selected:
ಅಪೊಸ್ತಲ 21: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
