Sawmus 16

Madikte naymuhwan ay piwaku

1Kiyavwiye Uhokri, avuriwnanuba, mmanawa pisnewa nukavriwten.

2Nah awna git Kiyavwiye Uhokri: “Pisnewa nuwohkiga. Wake ka pisma ay nukakuh, yumakam ariknawnama kabayka nudahan.”

3Nah ka aynsima batek adahan darihwak gikakkis pihiyegavu barewvityevwi. Igkis kibeynevwinenwa hiyeg.

4Ignesme ku pariye wewnevwi gikakkis nawenyevwi giwohkigakis, igkiswa ewk ka aynsima mbeyne gitkis. Nahme ka kumadukasawnek gitkis giwohkigakis, nah kawnata kiyathanek giwohkigakis.

5Kiyavwiye Uhokri, pisnewa madikte nudahan. Kibeyne, naymuhwan in ay madikte piwaku, pis avuriw madikte nudahan.

6Ini nuwetri ku pariye pis ike nutuh, in kibeyne iwetrit. Henewa, madikte naymuhwan ay piwaku.

7Nah kabayha Kiyavwiye Uhokri, mmanawa ignewa iki nutuh nuhiyekemni. Msanpi nah himeke. Hewke nikwe nah kuwis hiyak ku pariye adahan nah keh.

8Nah hiyak ku ig Kiyavwiye Uhokri avanenekwa ay nukakuh. Kibeyne, ig kennesa ay numunuh niyewka. Nikwe yuma ariknawnama tuguhkisne nukamaxwan.

9Inneki keh nuyakni bateke. Mataytak nah awna batekkanenwa. Ku nah miya, ka sam. Nah iveg givitit Kiyavwiye Uhokri ku ig kanikasan akiw.

10Nah awna: “Kibeyne, Kiyavwiye. Pis ka ikis nanmavuh aynte amun miyaravye giwetrikis. Pis ka isaksan nah pikamkayh barewvitye adahan nuvituh madivwip.

11Mmanawa pis keh nah aymuhwa adahan avanenekwa. Kuwewanek pis keh nah batek nunaktin akiw awaku ku samah nah ay pimun. Ayge pis ikinek kabayka inyewatnene nutuh adahan avanenekwa.”

Currently Selected:

Sawmus 16: pluPB

Highlight

Copy