Sawmus 12

Kiyavwiye Uhokri avuriw mabimnavye

1Kiyavwiye, uya amnihun! Mmanawa yuma pahavwinema hiyeg ay ku pariye wew akak pihiyekemni. Igkisme hiyeg ku pariye ik adahan nah kamaxwa givititkis igkis yuma ay akiw.

2Madikte hiyeg kinisak pawtak. Igkis kinis hiyeg ke wotbe igkis awna inyewatbe iwit bawa he kinisakanenwa nibet.

3Kiyavwiye Uhokri, uya sabukis gibiykis neras awnenevwi iwit waditnevyenen, neras ku pariye kehnene giwantikis.

4Igkis awna: “Hiyawa usuh kawih ubiyuh ku samah umawkan. Hiyawa usuh awna ku pariye usuh awnekere. Yuma hiyeg hiya asabkak ubiyuh.”

5Heneme ig Kiyavwiye Uhokri Dehetniye awna: “Igkis madiptavye hiyepnene mbeyne. Igkisme mabimnavye migiswenene awaku kayahwaki. Kuri nah kannikawte adahan nah amnihgikis pisenwate. Nah avuriwgikiste giwkis neras ku pariye kehnevwi mbayka gikakkis.”

6 Kibeyne, Kiyavwiye Uhokri Dehetniye giwn in inyewa. In yuma kinisaka nibet. In kewa karukri wahanobe seyno ku pariye egyewatnene, ku pariye kuwisnene pusukaki ntewnehkervut ariwtrik tiket, eg pes barewbet arikutak tiket atiy.

7Kiyavwiye, avuriwnaba usuh kabayntiwa takunipti. Wiwhnaba usuh giwakutakkis neras mbayavye.

8 Mmanawa igkis ay wewnamahkis muwapuw. Ku kit igkis wewkere igkis wew. Ku pariye hiyakemniki mbeyevye git Kiyavwiye Uhokri gitkisme in kibeynenenwa hiyakemniki.

Currently Selected:

Sawmus 12: pluPB

Highlight

Copy