Matews 28

Jesus kannikaw

Mk 16.1; Lk 24.1; Jo 20.1; 1Ko 15.4

1Ayteke amavye samdi, paka abet kabeyweke, eg kiyavuno Mahi Madalena gukak nor pahavuwa Mahi akiw egkis tivik iwasapnokis gimew.

2Pahaye adahan wayk segke kihhaw mmanawa pahavwi ahj Uhokri giwatni muhuke inuriktak. Ig danuh atere arit Kiyavwiye Jesus gimew. Ig woke asabwat. Ayteke ig batahkiswe atere nivitminat.

3Gihivak uguhvari ke ugugunebe. Ig kasimsavu akak simis seyne. In tigigihwe.

4Neras avuriwnevwi gimew igkis hiyapni hene, igkis avisasew. Igkis segke mpiynevevye, igkis tuguhe. Igkis misekwe harit ke maviyebe.

5Ayteke egkis tinogben danuh atere. Igme ahj awna ta gutkis:

— Ka yi muwaka avis. Nah hiyak ku yis ivegvene Kiyavwiye Jesus ku pariye deddehpika, 6heneme ig yuma ay. Ig kuwis kannikew, ku samah gikaksan yit. Ba yi ayta atan iwasa gidukwen.

Egkis timapni hene, egkis pareke atere arikut gimew. Egkis iwase gidukwen.

7Ayteke ig ahj awna gutkis:

— Kuri tiviknay kibehtenwa. Ataknay gitkis gikannuhnivwi. Akkanay gitkis ku ig kuwis kannikew ariw gimiremni. Awnanay gitkis: “Kuri ig tivik pitati yavit ta avitit Galileyamnaw. Ayge yis hiyavginek.” Henewatbaki in ku samah nah awna yit.

8Egkis hiyapni hene, egkis pese kibehtenwa arikutak gimew. Egkis avise, heneme egkis hawata ka aynsima batek. Egkis sigise ta gimkatkis Kiyavwiye Jesus gikannuhnivwi adahan akkanokis inakni ahj ginetni ta gitkis.

9Egkis avigku ahin, pahaye adahan igwa Kiyavwiye Jesus patiptak gukakkis. Ig awna gutkis:

— Uhokri gabay yikaknek.

Egkisme danukwa atere git. Egkis paberetusaw gikimpurit. Egkis sumuhe gikugku. Egkis kabayhig.

10Igme Kiyavwiye Jesus awna ta gutkis:

— Ka yi muwaka avis. Su yi atak kinetihwa ta gitkis nukebyuvwi adahan igkis atak ta avitit Galileyamnaw. Ayge igkis hiyavunnek.

Egkis timapni hene, egkis tivik.

Avuriwnevwi imewti kinisak amin Jesus gikankawni

11Ku aysaw egkis tinogben adukwenewa avigku ahin, gaytakkis neras suwtat ku pariye avuriwnevwi imewti igkis diyuhe ta avitit paytwempu Jerusalém. Igkis danuh atere, igkis ekke gitkis neras muwveg kiyatyevwi madikte ku pariye danuhe.

12Igkis muwveg kiyatyevwi timapni hene, igkis pahadguhwe gikakkis neras judeyenevwi giwewkistenkis. Ayge igkis ahegbete ginetnikis. Pisenwa gahegbetankis, igkis iwe ka aynsima karukri, igkis ikepni ta gitkis neras suwtatviyene.

13Igkis awna gitkis:

— Kinetihwanay gitkis hiyeg ku gikannuhnivwi danuhe tiyegem igkis kidise Jesusmin givit avim ini ku samah yis himekbetnene.

14Ku ner hiyaptigi time yaknek, ku yis ka avuriw kabayntiwatma, ka sam. Usuh atere git, usuh awnamnihyi. Usuh wadithebdih yihawkan gikak adahan ig ka hiyapkis mbeyne yit avatra ku samah yis himeke.

15Igkisme hiyapni hene, igkis ameve gikakurakis. Igkis ihe inakni neras muwveg kiyatyevwi giwnkis. Inneki keh he kuviknene akak inin ka aynsima judeyenevwi kinetihwenene inakni inetit.

Jesus hiyapkiswa gitkis giwatnivwi

Mk 16.14; Lk 24.36; Jo 20.19; At 1.6

16Igkisme giwatnivwi madikawkunene gikebikis gikak pahavwi gawnakis (11) tivik ta avitit Galileyamnaw. Igkis danuh atere, igkis wagehe ta avitit paha waxri imuwadnene ku kiney Kiyavwiye Jesus wasavanaw giminkis adahan igkis patiptakig.

17 Igkis danuh atere, igkis utevgi ayge. Igkis hiyapni hene, igkis kabayhig. Heneme gaytakkis pukuhpaw gibohri.

18Igme Kiyavwiye Jesus danukwe kennesa gitkis, ig awna:

— Madikte kumadukaki ikepka nutuh adahan nah kumadukene madikte inurikyenevwi hawata madikte amedgenevwi inin.

19Ataknabay ta gitkis madikte hiyegviyenevwi. Kannuhnigkis adahan igkis humaw nukannuhnivwi. Kaywanigkis ahakwat un giwavrik Wigwiy, hawata giwavrik Gikamkayh hawata giwavrik Gitip adahan areketni ku igkis ikewnevwi wotuh.

20Kannuhnigkis adahan igkis ihpa madikte nuwnuh ku pariye nah kuwis awna yit. Ayge amun ini nah ayge yikaknek avanenekwa he danuhe amaksemni hawkri.

Currently Selected:

Matews 28: pluPB

Highlight

Copy