Yela 37
37
Korowii nɛɛ hwɛɡa
Kooro Devid yel
1He bɛ ɡel nyubinikpeɡ tena
we-ɛɛla we he nɛ,
he bɛ wechɔɡ-ɛɛra
bwara we.#Yel 73:3
2Baa biɡri hol kɛŋɔ kpɔɡa ken,
dɛ́ piɡri serewe kɛŋɔ,
kpɔɡlwɛɛ yon hol la.
3Hé kpɔ he te dawɛ Korowii
nɛ,
dɛɛ ɛ wedɛɛɡa,
ásɛ dɛ so harɛ la ta
deŋnesɔɔhna ne.
4Hé ɡel he sie ɛɛ lɛ Korowii nɛ,
ásɛ o tɛ heya he bambile
konnyina.#Aes 58:14
5Hé kpɔ he waa bwa
do Korowii nɔn ta,
hé kpɔ he te dawɛ o nɛ,
ásɛ o cha heya.
6Wɛɛ che toɡra he wa
aa toɡra taa,
ásɛ he kasinteŋ dii
do kɛ nii, dɛɛ chaah
kɛŋɔ webaŋa ken.
7Hé lawɛ bambile,
dɛɛ kpa Korowii,
dɛ nyubinikpeɡ tena
waa wer dɛɛ tɛɛ ba aa,
he bɛ ɡel a we he nɛ
kɛŋɔ aa chiɡ ba kɛrɛdɛɛ.
8Hé laa he te kpɔ tebinichɔɡ
ne bandia ta, wechɔɡa
ɡbo taa aa kaa nɛn ne.
9Nɛra baa dɔ hwɛɡa Korowii
nɛɛ la ɛɛ dɔ harɛɛ
dɛ́ so o ta,
kɛ nyubinikpeɡ tena te,
baa doŋ ba le o ta.
10Aa biɡri dɛ nyubinikpeɡ tena
toole kpa,
hɛ́ɛ baa nyin ba bɔree,
kɛ háa ban na.
11Nɛra baa pwɛr ba te la,
ɛɛ so harɛ la taa,
dɛ́ dɔ deŋnesɔɔhna
kohona.#Mat 5:5
12Nyubinikpeɡ tena
dɛ vɔrɔwe
nɛra ba wa
aa toɡra vɔrɔwa,
dɛɛ nyiŋ ba sichɔɡa ne.
13Korowii dɛ mamɛ
nyubinikpeɡ tena,
o jemɔ kɛŋɔ ba chɔɡa
tɔpere telo tonɛ.
14Nyubinikpeɡ tena kpɔ ba
tokobie,
dɛ harɛ ba tori kpa.
Ba dɛ nyin bá kpoo nyaara
ne nɛŋɡwɛɡra,
dɛ́ kpoo nɛra
ba wa aa toɡra,
15kɛ ba ɡbabir tokobie
dɛ́ kpoo ba,
ba tori kuuɡi.
16Ŋwɛnɛdɛɛɡe ta cheɡa
dɛ́ dɔ konjeɡa wer dɛ ɡwaa,
kɛ haa cheɡɛ
ŋwɛnɛchɔɡe ta dɔa kohona,#Sɛɡ 15:16
17dɛkalkɛ, Korowii ɛɛ sɔɔh
nyubinikpeɡ tena nyoa,
dɛ́ kpɔ nɔn tɔ nɛra
ba wa aa toɡra nɛ.
18Korowii jemɛ nɛra
wechɔɡa aa wola toole
ba nɛɛ wa,
baa dɔ harɛ laanee ó ɛ
ba kapɛrɛ kon,
saŋ bɛlbwa dɛɛ la.
19Baa wahalaa na sibeɡra saŋ,
lɔr saŋ kwaraa yaa,
dɛ ba te dɔ kondikwa.
20Nyubinikpeɡ tena ɛɛ serewoo,
nɛra baa ɛ Korowii dɔm la
do kɛŋɔ kpɔɡa
aa wola biɡri la ken,
baa nyoɡroo kɛŋɔ
ninchuu ken.
21Nyubinikpeɡ tena kemɛ
kon aa, ba dɛ vɛh bɔe,
kɛ nɛra ba wa aa toɡra te
aa nɛra kwaa tɛɛ ɡel bwa.
22Nɛra Korowii aa swee ba
andɛɛɡa la,
ɛɛ dɔ harɛ laanee,
kɛ banɔ la waa taah ba
la te,
wɛɛ doŋ baa le o ta.
23Korowii sie lɛ nɛra
we-ɛɛla ta naa,
o dɛ baɡ ba ŋwɛnɛ
baa kpɔ o ta,
dɛ kpɔ nɔn dɛɛ tɔ ba nɛ.
24Ba lɔ naa kwaraa naa,
baa chole,
dɛkalkɛ o laɡ ba kpoŋe.
25N fa ɛ bechala, dɛ ba ɛ
banjena, kɛ n ta
nae kɛŋɔ Korowii
laa nɔn kpɔ
nɛra ba wa aa toɡra nɛ,
kɛɛ ba bii valɛ
dɛɛ soŋe kondikwa.
26Ba won kwaa kɛɛ,
dɛɛ kemɛ ba bala ja,
ba bii ɛɛ dɔ andɛɛɡa.
27Hé ɡel wechɔɡa ɛɛ
dɛ́ɛ ɛ wedɛɛɡa,
ásɛ he so harɛ la ta
saŋ bɛlbwa dɛ́ɛ la.
28Waa aa wera dɛ toɡre
laanee Korowii ɛɛ nyin,
waa nɛra ba wa aa dɔ
kasinteŋ laanee ɡel.
Korowii ɛɛ kpɔ nɔnee
tɔ ba nɛ,
saŋ bɛlbwa dɛɛ la,
kɛ nyubinikpeɡ tena
naanar te,
wɛɛ doŋ baa le harɛ la ta.
29Nɛra ba wa aa toɡra la,
banee dɛ́ dɔ harɛ la ta so,
saŋ bɛlbwa dɛɛ la.
30Nɛra ba wa aa toɡra nyoa
wejemwaa do,
ba nyoa waa aa wera
ne kasinteŋ do.
31Korowii baa dɛ tomɔ
Mmara lɔ ba bambile bini,
baa an kpɔe dɛɛ ta bwa.
32Nyubinikpeɡ tena
dɛ kpaah nɛra
ba wa aa toɡra,
dɛɛ nyin ba dɛ́ kpoo,
33kɛ Korowii aa ɡel
ba di kpeɡri ba nɛ,
kɛɛ ba di bolchɔɡe,
ɡɛ saŋ wa aa puu ba la.
34Hɛ́ɛ hwɛɡɛ Korowii nɛ,
dɛ́ɛ teŋɛ o Mmarare ta.
Wɛɛ ɡeloo hé dɔ harɛ la ta so,
dɛ́ doŋi nyubinikpeɡ tena
la he siwi ta.
35N na nyubinikpeɡ te
waa wola nɛn nɛɛ sune,
o soɡa bini do wer kɛŋɔ,
daa waa kpeɡa
harɛdɛɛɡe ta ken,
36kɛ a ta biɡre bɛlbwa,
o den sewɛ,
n ɡaaɡe o bɔr, n ta on nae.
37Hé nyiŋi nɛra ba wa
aa toɡra na,
ba dɔ deŋnesɔɔhna ba
kerekere soɡa bini.
38Kɛ wechɔɡ-ɛɛra bwa
ɛɛ serewoo,
ba naanar aa kae
ba harɛ nɔ ta.
39Korowii dɛ lɛ nɛra
ba wa aa toɡra,
dɛɛ lɛɛ ba ba wenaale ta.
40O kpɔ nɔn dɛɛ tɔ ba nɛ,
dɛɛ lɛɛ ba, o lɛɛ ba dɛɛ le
nyubinikpeɡ tena nɔn ta,
dɛkalkɛ, onee ba chwa
kaa marɛ.
Currently Selected:
Yela 37: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
