Yela 33
33
Korowii kpɛɛra yel
1Nɛra he wa aa toɡra bwa,
hé ɡo silɛɛ yela kpɛɛ
Korowii
waa waa ɛa wa,
nɛra haa dɛ teŋɛ o waa ta
bwa, hé kpɛɛro.
2Hé lɔ janjela kpɛɛ Korowii,
hé kpɔ koŋkwaa baa kpɔa
dɛɛ hɛlɛ bwa soo siwi,
lɔ yela kpɛɛro.#1We 15:16
3Hé ɡo yelfale tɛo,
hé lɔ janjela kɛrɛdɛ,
dɛ́ moo silɛɛ ne.
4Kasinteŋ lɔ Korowii waa ta,
o waa waa dɛ ɛ bwa wer.
5Korowii dɛ nyin
wa aa toɡra dɛ do wer,
o nyina aa wola jaɡa dɔe
lɔ harɛ nɔ nɛra bwa nɛ.
6Nyoa wobol nee
Korowii ta nyundua,
ne kwaa aa lɔ
nyundua bwa.
7Onee ɡela mpo boa nyoa
chɔ bobeŋkpoŋ,
dɛ kwaa a vile cheɡ kɛŋɔ,
paa yon kwaa kondikwaa
cheɡ dɔndɔŋ bini la.
8Harɛ nɔ ta nɛra,
hé tomɛ Korowii,
hé kpɔ duure tɛo.
9Nyoa wobol nee
Korowii ta harɛ,
asɛ komɛlbwa do le,
dɛ ɛ ɡɛ waa ŋɔa.#Mum 1:9-25
10Korowii chɔɡ harɛre nɛra
vɔrɔwa baa vɔrɔwa,
o lɔ waa baa dɛ vɔrɔwe
bwa ta.
11O wobɛlbwa waa vɔrɔwa
dɛ che kiŋkiŋ
saŋ bɛlbwa dɛɛ la,
o liire aa charɛ bwa,
a lole saŋ bɛlbwa dɛɛ la.
12Harɛ bɛlbwa nɛra
baa kpɔ Korowii dɛɛ tomɔ,
o lee ba tɛ o te la,
ba na som.
13Korowii soɡe nyundua,
dɛɛ na nɛwɛnyina bwa
harɛ ta.
14O soɡe bela waa dɛ di kora,
dɛɛ na nɛra baa lɔ harɛ
nɔ ta bobɛlbwa.
15Onee tɛ nɛwɛnyina liire,
dɛ jemɛ waa baa dɛ ɛ bwa.
16Kooro laa tena wara laa ɡela
o yo laa dɛɛ pɔ o dɔma nɛ,
banyoo kpeɡri laa
ɡela o yo dɛɛ le.
17Jaɡre baa soɡe a ta dɛɛ yo,
aa won ɡel nɛn pɔ o dɔm
nɛɛ laa ta,
a bokpeɡa kohona laa
dɛ́ won lɛ naate.
18Korowii sie lɔ
nɛra baa dɛ teŋɛ o waa ta,
nɛra baa dɛ hwɛɡɛ o nyina
aa wola jaɡa dɔe ta la.
19O lɛɛ ba dɛɛ le seo nyoa,
dɛ́ ɡel ba so le, hale lɔr saŋ.
20Ya hwɛɡa bwa lɔ Korowii nɛ,
onee dɛɛ cha yaa,
dɛɛ tɔ yaa ɡbemɡbe.
21Ya dɛ hwɛɡɛ o sɔn
waa do ɡoroŋ la ta,
anomanta, ya dɛ hɛɡre.
22N Naa Korowii, ɡel he nyina
aa wola jaɡa dɔe la
ba ya nɛ,
he nɛɛ ya kpɔ ya hwɛɡa
bwa do.
Currently Selected:
Yela 33: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
