Jɔn 4

Yeesu ne Samaria haah bɛl

1Farisii tena la noɔ kɛŋɔ Yeesu berɔ dɛɛ dɔ nɛra kohona dɛɛ sɔ nɛra Korowii nee kohona dɛɛ ɡwaa Jɔn. 2Kasinteŋ, dɛ Yeesu ɡbaɡba aa nɛra Korowii nee sɔ. Dɛ o habɔteŋra laanee dɛɛ sɔ ba Korowii ne. 3Yeesu aa no ɡɛ baa dɛ bol o waa la, o le Juda harɛ dɛ kaa Galilia harɛ ta.

4Dɛ Samaria harɛ taa chɛ kɛ o kpɔ dɛ́ won kaa Galilia harɛ ta. 5O baa le Samaria bwɛɛ bɛl baa dɛ yerɔ Seka la ta. Dɛ a ɡɛ bwɛɛ la ne harɛ la Jekɔb aa kpɔa tɛ o bie Josef la aa jaŋɛ.#Jos 24:32 6Dɛ Jekɔb kɔlɔŋ bɛl lɔ bela. Yeesu aa vala dɛ koh la, o kaa so kɔlɔŋ la nyoa. Dɛ wee cheɡɛ nyufala.

7Samaria haah bɛl balɔ ŋɔ ó ba dɔ ne, asɛ Yeesu ŋɔ o be ŋɔ, “Tɛ mɛ nee ń nyɔ.” 8Dɛ Yeesu habɔteŋra la kaa bwɛɛ la ta dɛ́ ka nyin kondikwaa ba.

9Belaa haah la nyoa kpo, o chaŋo ŋɔ, “Fini te Juu te dɛ soŋe Samaria haah ne aa?” Dɛ Juu tena dɛ kɔɡɛ Samaria tena taeh, dɛ baa sɛh ba ne baa pɛ numoli ne loɡa kwara.

10Anee Yeesu ŋɔ o be ŋɔ, “Dɛ he fe jemɛ kon Korowii aa dɛ nyin he tɛɛ nɔ, dɛ jemɛ naate waa dɛ soŋe nee nɔ naa, he fe ɛɛ soŋoo ásɛ o fee tɛɛ nee aa won tɛɛ mkpa.”#Wep 21:6

11Belaa haah la ŋɔ, “Nomoa, bule nɔ aa luŋa, asɛ haa wola kon baa kpɔa dɛɛ ta kɔlɔŋ dɔe nɔ, lee hɛɛ ba a ɡɛ nee aa dɛ tɛ mkpa nɔ dɔe yɔ? 12He dɛ lii kɛ he ɡwaa ya naa Jekɔb waa tɛ yaa a ɡɛ bule nɔ la kɛɛ? O ne o bii ne o kondɛɛra bwaa fa dɛ nyɔ nee bule nɔ ta.”

13Belaa Yeesu chaŋo ŋɔ, “Nomɛlbwa waa nyɔ nee nɔ la, nyɔɡre ɛɛ kpoo ja. 14Kɛ nomɛlbwa waa nyɔ nee maa dɛ tɛo la te, nyɔɡre aa on kpo bwa. Nee maa tɛo la ɛɛ ɛo kɛŋɔ bule aa lɔ naate bini dɛɛ bule nee aa dɛ tɛ mkpa aa wola jaɡa dɔe bwa.”

15Belaa haah la ŋɔ, “Nomoa, amɔ te, tɛ mɛ a ɡɛ nee la ane ásɛ nyɔɡre bɛ men kpo kpa, ásɛ n bɛ bonɔ ba ba dɔ nee kpa.”

16Anee Yeesu ŋɔ o be ŋɔ ó ka yerɛ o jaa ba.

17Asɛ o ŋɔ, “N ta jaa dɔe.”

Belaa Yeesu ŋɔ, “Dɛ he ŋɔ he ta jaa dɔe yaa, kpelaa he ŋɔ. 18He yalɛ baala banue bwa, kɛ onɔ la he ne waa lole taraken la, he jaa laa on, anomanta, kpelaa he ŋɔ.”

19Asɛ haah la ŋɔ, “Nomoa, maa naa nɔ, Korowii keamee hen. 20Bwe nɔ taa ya Samaria tena naawa faa tomɛ Korowii saŋ la. Aah ɛrɛ waa he Juu tena ŋɔ Jerusalamee chɛ Korowii toma nɔɔ?”

21Belaa Yeesu ŋɔ o be ŋɔ, “Kasinteŋ, aa ba tel saŋ bɛlee nɛra aa wola Korowii tomɛ bwe nɔ ta, baa on tomɛ Jerusalam ɡe. 22He Samaria tena te, ɛɛ he ɡee ɛ te, kɛ haa kon haa dɛ tomɛ jemɛ. Kɛ ya Juu tena te jemɛ kon yaa dɛ tomɛ, dɛkalkɛ ya nɛɛ aa ba cheɡa ásɛ Korowii lɛ nɛwɛnyina bwa. 23Korowii toma te lɔ bambile bini. Aa ba tel saŋ bɛlee, ásɛ nɛra baa dɛ tomɛ Korowii kpela kpela la che o Domadɛɛɡe la ta dɛɛ tomɔ bambile bini, dɛɛ tomɔ kasinteŋ ne, dɛkalkɛ ɡɛɛ wɛɛ nyin kɛ baa tomɔ. A ɡɛ tɔpere la telo tonɛ. 24Korowii ɛ lileo. Anomanta, dɛ ya dɛ tomɔ waa, yá che o Domadɛɛɡe kpeɡri ta dɛ́ kpɔ kasinteŋ dɛɛ tomɔ bambile bini.”

25Anee haah la ŋɔ o be ŋɔ, “N jemɔ kɛŋɔ ya Lɛɛ la baa dɛ yerɔ Kristo la ɛɛ bao. O balaa, wɛɛ baɡle yaa wobɛlbwaa.”

26Asɛ Yeesu ŋɔ, “Onee he ne wɛɛ bol waa la. Kristo laanee men.”

27Belaa Yeesu habɔteŋra la ba. Baa baa na o ne haah naa cheɡa dɛɛ bol waa la, a ɛɛ ba anebɛlbwa. Kɛ ba bɛlbwa ɡe ta berɛ won bɔɔ haah la kon la waa dɛ nyin Yeesu be. Bɛlbwa ta wone bɔɔ Yeesu waa aa bala o ne haah la ɛɛ bol waa la.

28Haah la ɡel o vii waa dɛ ba o ne nee dɔe la bela dɛ chwa la bwɛɛ la ta ka ŋɔ bela tena be ŋɔ, 29“Hé ba ba na noo! Baa bɛl wono baɡle n waa maa dɛ ɛ bwa! Jamɔ Kristo laanee kɛɛ?” 30Haah la aa ŋɔ ɡɛ la, bela tena chwao le ba bwɛɛ la ta dɛɛ ba Yeesu be.

31Haah la aa kaa bwɛɛ la ta la, Yeesu habɔteŋra la soŋo jande jande ŋɔ, “Nomoa, lɛ kondikwaa di!”

32Belaa Yeesu ŋɔ, “N dɔ kondikwaa ane haa wola a waa jemɛ.”

33Anee o habɔteŋra la ɛɛ pɛɛ dɔŋa ŋɔ, “Nomɛl baa tɛo kondikwaa o di ɡbaɔ?”

34Belaa Yeesu ŋɔ, “N kondikwaa kɛ maa dɛ ɛ n Mɛɛ waa tom mɛ la tetoora, ne kɛ maa ɛ o toma waa tɛ mɛ la bwa tonɛ.#Jɔn 6:38-39 35He laa yon ŋɔ ba du kwa aa, korobie anaarɛɛ aa di mɔɔ baa koma la aa? Kasinteŋ, he bɛ chɔ. Hé ta sie na koo kwaa bwa aa bea ne koma ɡɛ!#Mat 9:37 36Nɛn waa komɛ kwaa dɛɛ tɛ Korowii la dɛ dɔ o kembɔr. Nɛwɛnyinaa naate ɛɛ komɛ, dɛɛ lɛɛ ba ásɛ ba dɔ Korowii mkpa aa wola jaɡa dɔe bwa la, ásɛ naate ne nɛn waa dua la bwa sie lɛ. 37Baa ŋɔa, ‘Bɛlee dɛɛ du, bɛl ɡe ɛɛ komɛ’ la, kpelaa. 38N waa nɔ maa ɡela hɛɛ baɡle nɔ, a do kɛŋɔ maa ɡela hɛɛ komɛ kwaa bela haa wola parɛ la. Bane tɔ sie koh mɔɔ he baa na som la.”

39Samaria tena baa lɔ bwɛɛ la ta kɛrɛdɛ yarada Yeesu, dɛkalkɛŋɔ haah la ŋɔ ba be ŋɔ, “O bol waa maa dɛ ɛ bwa n be.” 40Anomanta, Samaria tena la aa ba Yeesu be la, ba soŋo ŋɔ ó so ba be. O soɡe ba be tɔpera anɛ dɛɛ baɡ ba Korowii Wa.

41Yeesu waa waa dɛ bol la ɡelɔ nɛra pirim berɛ yarada o waa la ja, 42dɛ ŋɔ haah la be ŋɔ, “A ta ɛɛ kɛŋɔ he waa haa bola la ɡboo ɡela ya yaradao. Ya ɡbaɡba ɡe aa kpɔ deŋne no o waa la name la, anee ɡela ya yarada dɛ jemɛ kɛŋɔ nɛra bwa Lɛɛree nɔ kpela.”

Yeesu chah nomoa bɛl bibaa

43Yeesu aa di tɔpera anɛ bela la, o le bela dɛɛ kaa Galilia harɛ. 44O ɡbabir fa bolɔ ŋɔ, “Korowii keame bɛlbwa ta sɔn dɔe o ɡbaɡba bwɛɛ bwa.” 45Waa jo Galilia harɛ la, bela tena lɛo silɛɛ ne, dɛkalkɛŋɔ baa la Galekaa Tɔpejen dii Jerusalam la, ba na waa waa ɛa Galekaa dii la ta bwa.

46Yeesu la Galilia bwɛɛ Keena. Belaa o faa kpɔ nee berɛ sen la. Waa la bela la, dɛ Abane nomoa bɛl bibaa bwara dɛ weo Kapeeneɔm. 47Nomoa la aa noa kɛŋɔ Yeesu le Juda harɛ ba Galilia harɛ la, o ba o be dɛ ba soŋo ŋɔ ó la Kapeeneɔm dɛ ka chah o bie waa dɛ ba sewa la.

48Belaa Yeesu ŋɔ o be ŋɔ, “He bɛlbwa ta nyokpowaa ne wekpeɡa ane nae yaa, haa men yarada bwa.”

49Asɛ nomoa la soŋo ŋɔ, “Nomoa, yá kaa. A waa laa aa, n bie la ɛɛ sewɔɔ.”

50Anee Yeesu ŋɔ o be ŋɔ, “Dɛɛ la he bwɛ, he bie la ɛɛ ɡbaŋroo!”

Baa la yarada Yeesu waa waa bola la, dɛ berɛ kaa o bwɛ. 51Waa dɛ kaa la, o bonɔɔna chemo ŋwɛnɛ ta, dɛ ŋɔ o be ŋɔ, “He bie la ɡbaŋrɔ!” 52Belaa o bɔɔ ba saŋ la yiso o bie la weela la nyoa aa ba harɛ, asɛ ba ŋɔ, “Dɛ ɛ webaŋa dɔŋ beŋkpoŋ saŋee o bɔwɔrɔba la le o nɛ.” 53Belaa nomoa la lii kɛŋɔ a ɡɛ saŋ la tentenee Yeesu ŋɔ o be ŋɔ, “He bie la ɛɛ ɡbaŋroo” la. A taa a che o ne o dem tena bwa yarada Yeesu waa la, dɛ kpɔ ba te tɛo.

54Yeesu aa le Juda harɛ ba Galilia harɛ la, nyokpowaa nɔɔ jaa nɛɛ waa ɛa.

Currently Selected:

Jɔn 4: mzw

Highlight

Copy