Mathuyu 1

Dhuwalanydja balakurru yarraṯakurru Yipurayimgala, Djesu-Christtja maḻŋ'thurruna

1Dhuwalanydja dhäwu' Garraywalaŋuwuy Djesu-Christkalaŋuwuy, ŋurikalaŋuwuy ŋunhi ŋayi dhiyala dhawal-wuyaŋinanydja yolŋu yana, ŋulaŋuru liŋgu yarraṯaŋuru Giŋ-Daypitkala, ŋunhi ŋayinydja Daypittja dhawal-wuyaŋina dhipuŋuru Yipurayimgala yarraṯaŋuru.

2Yo, ŋunhi Yipurayimdja bäpa'mirriŋu Yitjakku-na, ga Yitjaktja bäpa'mirriŋu Djaykupku,

ga Djaykuptja bäpa'mirriŋu Djudawu ga nhanukalaŋuwu gutha'mirriŋuwuna walalaŋgu, 3ga Djudanydja bäpa'mirriŋu Beratjku ga Djärawu, ŋunhi maṉḏaku ŋäṉḏi'mirriŋunydja Dayma,

ga Beratjtja bäpa'mirriŋu Yitjurungu,

ga Yitjurundja bäpa'mirriŋu Rämgu, 4ga Rämdja bäpa'mirriŋu Minatapku,

ga Minataptja bäpa'mirriŋu Nätjungu,

ga Nätjundja bäpa'mirriŋu Djamangu, 5ga Djamandja bäpa'mirriŋu Bawatjku, ga ŋäṉḏi'mirriŋunydja nhanŋu Bawatjku Rayapnha,

ga Bawatjtja bäpa'mirriŋu Wopitku, ga ŋäṉḏi'mirriŋu nhanŋu Wopitku Rothnha,

ga Wopittja bäpa'mirriŋu Djitjiwu, 6ga Djitjinydja bäpa'mirriŋu Daypitkuna, ŋunhi ŋayina ŋurruŋunydja buŋgawanydja, Giŋ-Daypitnha.

Ga ŋunhiyinydja ŋayinydja Daypittja bäpa'mirriŋu Djalamanguna,

ga ŋäṉḏi'mirriŋunydja nhanŋu Djalamangu ŋunhina miyalk ŋunhi ŋayi ŋäthilinydja Yurayawu miyalk, 7ga Djalamandja bäpa'mirriŋu Riyapalamgu,

ga Riyapalamdja bäpa'mirriŋu Bayitjawu,

ga Bayitjanydja bäpa'mirriŋu Watjawu, 8ga Watjanydja bäpa'mirriŋu Djutjapatku,

ga Djutjapattja bäpa'mirriŋu Djoramgu,

ga Djoramdja bäpa'mirriŋu Yutjayawu, 9ga Yutjayanydja bäpa'mirriŋu Djothamgu,

ga Djothamdja bäpa'mirriŋu Wayatjku,

ga Wayatjtja bäpa'mirriŋu Yitjakayawu, 10ga Yitjakayanydja bäpa'mirriŋu Manatjawu,

ga Manatjanydja bäpa'mirriŋu Wayman'ku,

ga Wayman'tja bäpa'mirriŋu Djotjayawu, 11ga Djotjayanydja bäpa'mirriŋu Djakanayawu ga nhanukalaŋuwu gutha'mirriŋuwu walalaŋgu, ga ŋulinyaramirriyunydjayi ŋunhi ŋayi Djakanaya yukurrana nhinana, bala miriŋuyunydja walalay yindilkuŋalana Yitjuralnhanydja yolŋu'-yulŋunha walalaŋgiyingalayŋuŋuru wäŋaŋuru, bala wäŋalili yäkulili Bapilunlilina.

12Ga ŋuliŋuru dhäŋuru ŋunhi walala yindilkuŋala Yitjuralpuyŋunha bala Bapilunlili, bala Djakanayanydja bäpa'mirriŋu Djiyaltiyalwu,

ga Djiyaltiyalnydja bäpa'mirriŋu Djarapapulwu, 13ga Djarapapulnydja bäpa'mirriŋu Wapiyuwu,

ga Wapiyunydja bäpa'mirriŋu Layakimgu,

ga Layakimdja bäpa'mirriŋu Watjuwu, 14ga. Watjunydja bäpa'mirriŋu Djätukku,

ga Djätuktja bäpa'mirriŋu Waykimgu,

ga Waykimdja bäpa'mirriŋu Yiliyutku, 15ga Yiliyuttja bäpa'mirriŋu Layatjawu,

ga Layatjanydja bäpa'mirriŋu Mathangu,

ga Mathandja bäpa'mirriŋu Djaykupku, 16ga Djaykuptja bäpa'mirriŋu Djotjipkuna, ŋunhi ŋayi dhuway'mirriŋu Merriwuna, ga Merrinydja ŋäṉḏi'mirriŋu Djesuwuna, ŋurikina ŋunhi ŋayi Garray wäwungunhara Godkuŋuna, yäku Christnha.

17Ga märrma'-goŋ ga ḏämbumiriw bäythinyaragäthu'mirriŋu walala Yipurayimgala, bala Giŋ-Daypitkalana, ga biyapul märrma'-goŋ ga ḏämbumiriw bäythinyara gäthu'mirriŋu walala Daypitkalaŋuŋuru, ga yana liŋgu ga ŋulinyaramirriyuna ŋunhi miriŋuyu yindilkuŋala gukuŋala Yitjuralpuyŋunha bala Bapilunlilina, ga dhurrwaraŋuru ŋuliŋuru biyapul märrma'-goŋ ga ḏämbumiriw bäythinyara gäthu'mirriŋuwalana walalaŋgalaŋuŋuru, bala ŋunhinydja ŋuliŋuruyinydja bala Garraynha dhawal-wuyaŋina Djesu-Christnha, ŋunhiyina ŋunhi ŋayi Godthu dhawu'mirriyaŋala be ŋäthili.

Ḻakarama yukurra Djesu-Christnha, nhaltjarra ŋayi dhawal-wuyaŋina

18Ga bitjarrana ŋayi Djesu-Christtja dhawal-wuyaŋina munatha'ŋuranydja gam', ŋäṉḏi'mirriŋunydja nhanŋu ŋunhi Merrinydja ḻuni miyalk, yaka ŋayi märraŋala ḏarramunhanydja ŋula, liŋgu ŋayi ŋunhiyinydjayi dhäyka dhawu'mirri Djotjipku yäkuwu. Yurru ŋäthili yana, yurruna maṉḏa märranhamina, ŋayi Merrinydja ŋunhi yothu'mirriyinana Garrkuḻukkalana ŋuriŋina Birrimbirryu Godkalana. 19Ŋayi Djotjipthu ŋäkula ŋunhi Merrinhanydja yothu'mirriyinyarana, bala ŋayi galŋa-yätjthinana dhika. Yo, Djotjiptja ŋunhiyi dhuwurr-dhunupa ŋayi yolŋu, yaka ŋayi djäma ŋula nhä mari; yaka ŋayi ḏukṯuk Merriwunydja gora-wekanharawu, bala ŋayi guyaŋina yukurrana bitjarrana, “Yakana ŋarra yurru ŋanya dhuwala märramanydja, yana ŋarra yurru gananna ŋanya, gonha'yunna gupaḏalkumana.” 20Yo, bitjarrayi ŋayi ŋunhi yukurrana guyaŋinanydja, bala ŋayi Garraywu ŋunhi djiwarr'wuy dhäwu'mirrinydja maḻŋ'thurrunana nhanukala Djotjipkala bukaway'kurruna. Ga bitjarrana ŋayi ŋunhi dhäwu'mirrinydja yolŋu waŋana, “Way Djotjip gäthu'mirriŋu Daypitku, yaka nhe barrariya. Märraŋana ŋunha Merrinhanydja, ŋayi yurru nhuŋuna miyalk, liŋgu ŋunhi yothuny'tja ŋayi yukurra gäma ŋulaŋuru Birrimbirrwuŋu Garrkuḻukkuŋu, yaka ŋula yolku yolŋuwu. 21Yo, Merriwuŋu yurru dhawal-wuyaŋirrinydja yothuny'tja ḏarramu, ga yäkunydja ŋanya nhe yurru nherraṉ Djesu, liŋgu ŋayinydja yurru ŋunhi walŋakuma nhanŋuway miṯtjinha, buwayakkuma walalaŋgu yurru yätj malanha.” Bitjarrana ŋayi ŋunhi djiwarr'wuyyunydja yolŋuyu ḻakaraŋala yukurrana Djotjipkalanydja.

22Ŋäthilinydja benydja baman'tja, Garrayyu ḻakaraŋala yukurrana ŋuliwitjarra dhäwu'-ḻakaranhamirriwala nhanukalaŋuwala, ŋayi waŋana ḻakaraŋala bitjarra, 23“Ḻuni' yurru dhäyka yothu'mirriyirri, ga ḏarramu ŋunhi yothuny'tja yurru dhawal-wuyaŋirrinydja nhanukuŋu, ga yäkunydja yurru ŋunhiyi yothuny'tja ‘Yimanyuwal’ bitjan, liŋgu mayaliny'tja ŋunhiyi yäku ‘Godtja dhiyalami ŋilimurruŋgala galki.’ ” Yo, dhuwalayinydjayi dhäruk wukirriwuy ŋäthiliwuy yana wal'ŋu, yurru yuwalkthi ŋunhi maḻŋ'thurrunanydja ŋulinyaramirriyuna ŋunhi ŋayi Merri yothu'mirriyinana ŋuriŋina Garrkuḻukkalana Birrimbirryu.

24Ga dhäŋuru ŋuliŋurunydja ŋunhi ŋayi waŋana ŋanya yukurrana djiwarr'wuyyu yolŋuyu, goḏarr'mirrinydja ŋayi gaŋgathina Djotjip, marrtjina ŋayi bala, ga märraŋalana ŋanya Merrinha nhanukalaynha ŋayi wäŋalili, bitjarra liŋgu bitjarra ŋunhi dhawu'mirriyu ḻakaraŋala nhanŋu. 25Yurru yaka ŋayi ŋunhi Djotjipthu yuwalktja märraŋalanydja ŋanya, yana ŋayi djäka marrtjina, barrkuwatj yana maṉḏa nhinananydja yukurrana, yana liŋgu-u-u ga yothu ŋunhi dhawal-wuyaŋina. Bala ŋayi Djotjipthu yäkunydja nherrara ŋanya Djesuna.

Currently Selected:

Mathuyu 1: gnnNTOTPO

Highlight

Copy