MALACHI 3
3
1Ga ŋayi Godtja ŋunhi Waŋarrnydja wal'ŋu buku-wakmaraŋala balanydja bitjarrana, “Yuwalk ŋarra yana yurru djuy'yun ŋarrakuway ŋarra dhäwu'mirrinhanydja ŋathil'yun, ŋayi yurru ŋarraku dhukarrnydja yäkthun baṉarra'kuma. Nhuma yukurra dhukarr-nhäma nhanŋu ŋuli Garraywu, ga yuwalk ŋayi yurru marrtjinydja lili; waḏutjana yana ŋayi yurru marrtjinydja nhanukalay ŋayi Buṉbulilinydja. Galŋanydja nhuma yukurra nhina goŋmirriyirrina dhikana wal'ŋu yanana dhukarr-nhänharayunydja ŋurikalayinydja ŋunhi ŋayi yurru marrtji lili, ga yuwalk yana ŋayi yurru marrtjinydja lili, ga djämanydja ŋayi yurru bitjan yana liŋgu ŋunhi ŋarra dhawu'mirriyaŋala ŋäthili. 2-3Yol warray dhika yurru walŋanydja yukurra nhina, ŋunhi ŋayi yurru ŋunhiyinydja maḻŋ'thun? Yol warray yurru dhärra yukurra ḏarrtjalktja gumurrŋura nhanukalanydja? Liŋgu ŋayinydja ŋunhi balanyara biyaku ŋuli ḏäl rurrwuyunaramirri girri', ŋunhi ŋayi yurru moy'nha ŋunhi winya'yunmarama buwayakkuma ŋuriŋi muḻmuḻ'yu girri'ŋuru; balanyarana ŋayi ŋunhiyi bitjan gurtha, ŋunhi ŋayi yurru ŋatŋatthun yukurra, nhära yurru, dhulwir'nha ŋunhi warrkuḻuma, barrkuwatjkuma ŋayi yurru dhukun'nha ŋuliŋuruyi yuwalkŋuŋuru yukurra. Yo, yolŋuyu ŋuli nhina djäma ḏarrtjalkkuma, dhukun' ŋuliŋuru djalkthun garwarrwarr'ŋuru gurthayu, yana liŋgu ga ŋayinydja yurru ŋunhiyinydjayi girri' djeŋarrany'tja ḏarrtjalktja, milŋ'-milŋdhunarana yanana, gänana ŋayipina ŋula nhämiriwnha. Ga bitjandhiyina ŋayi yurru Garrayyunydja djäma yukurra ḏarrtjalkkuma ŋunhi ḏalkarra'mirrinhanydja yolŋu'-yulŋunha, märr yurru walala gäma mundhurrnydja Garraywu ŋayaŋuyu ḏarrtjalkthu yana. 4Ga dhäŋuru ŋuliŋurunydja Garrayyunydja ŋaḏupthunna yurru märramana ŋunhiyi mundhurr-wekanharanydja yolŋu'-yulŋuwuŋu Djudapuyŋuwuŋunydja ga Yitjuralpuyŋuwuŋunydja; ŋayi yurru märramanydja ŋaḏupthunna-wala yana walalaŋguŋu mundhurr-wekanharanydja, bitjan yana liŋgu bitjarra ŋayi ŋäthili ŋunhi wal'ŋu.”
5Yo, ŋayi Waŋarrnydja Godtja waŋana bitjarra, “Galkina ŋarra yurru marrtjina yulŋunydja mala-yarr'yunarawunydja nhumalaŋgu, ga yuwalkkuma yana ŋarra yurru baḏuwaḏuyun ga dhä-ḏir'yunna ŋunhinydja yolŋu'-yulŋunha dhuwurr-yätjmirrinhanydja gal'ŋu, warrpam'thunna yana-wala rumbal-winya'yunmaramana, ŋunhinha walalanha mangaṯa'mirrinha yolŋu'-yulŋunha ga marramba'mirrinha ga bothinyaramirrinha ḻakaranhamirrinha walalanha, ga ŋunhinha walalanha ŋunhi walala ŋuli gombu'-gumbuma marrtji ŋurruwuykmirrinha yolŋunha walalanha, ga muŋdhu'-muŋdhunna ŋuli ŋunhi yolŋunha goŋmiriwŋuranydja, yolŋumiriwnhanydja ŋunhi, ga ŋunhinha walalanha ŋunhi walala ŋuli nhäŋiniŋ'-ḻakarama ŋunhi mulku'-mulkurunha yolŋu'-yulŋunha. Yo, ŋunhiyinydja malanha warrpam' ŋunhi walala yaka yukurra ŋarraku märr-ŋal'yun ga dhäruk-märrama ŋarranha, walala yurru yana murrmurryunna, ga yakana walala yurru nhina yukurra walŋanydja.” Ga bitjarra ŋayi Garray waŋananydja.
Godthunydja yurru wekama maŋutji-yarrkthunamiriwnha ŋurikinydja walalaŋgu ŋunhi walala ŋuli wekama nhanŋu maŋutji-yarrkthunamiriw
3:6-12 (God will bless those who give to him)
6Yo, Garraynydja yukurra waŋa bitjanna, “Ŋarranydja dhuwala Garray Waŋarr djambimiriw, yakana ŋarra ŋuli djambi ga bilyu'-bilyun ŋuli yukurra, ga dhiyakuyinayi märrwu ŋarra yakanydja nhumalanha baḏuwaḏuyurruna warrpam'thurruna, nhumalanhanydja dhuwalinydja ŋunhi nhuma Djaykupkuŋu mala-wunharawuy walala. 7Ŋäthilinydja ŋunhinydja nhumalaŋgu märi'munydja walala bilyurruna ḏiltji-wekaŋala ŋarrakunydja, yaka walala yukurrana nhinana ŋuriŋi ŋarrakalanydja romdhu, ga nhumanydja bitjarrayi yana ḏiltji-wekaŋala ŋanydjaḻa'yurruna ŋarraku, ga yakana nhuma dhäruk märraŋala ŋarranha. Gonha'yurrana dhuwalayi nhumalaŋguway nhuma romnhanydja, ga roŋiyiyana lili marrtjiya ŋarrakalana, bala ŋarranydja yurru märr-roŋiyirrina nhumalaŋgunydja, bala goŋmirriyamana ŋarra yurru nhumalanha.”
Ga nhumanydja dhä-wirra'yurruna ga waŋana bitjarra warray, “Nhaltjanna dhika ŋanapurru yurru roŋiyirrinydja nhokala? Yaka warray ŋanapurru nhuna dhika meṉguŋalanydja? Nhä dhika ŋanapurru djämanydja dhuwurr-yätjkuŋalanydja?”
8Ga ŋayi Godtja waŋana buku-wakmaraŋala bitjarra, “Manymak muka ŋunhi yolŋuwu ŋunhi ŋayi yurru manaŋirri ŋulaŋuru Godkalanydja? Yaka warray, yurru nhumanydja yukurra manaŋirri warray ŋarrakunydja.”
Ga dhä-wirrka'yun nhuma ŋuli yukurra Godnha bitjanna, “Wanhawitjan dhika dhukarrkurru nhuŋu ŋanapurru manaŋirrinydja ŋuli yukurra?” Ga ŋayi Godtja buku-wakmaraŋala waŋana bitjarra, “Ŋunhi nhuma yurru märrama ŋula nhänydja, nhumanydja bini ŋunhi guḻk-guḻkthuna muka 10-gunha ŋarrakunydja, ga ŋurruŋunydja ŋunhi waŋganydja ŋarraku ŋäthilinydja nhuma bini wekanha, liŋgu ŋunhiyinydjayi ŋurruŋunydja wal'ŋu ŋarrakuway dhulŋuŋu, ga bitjanayi liŋgu nhuma bini wekanhayi wiripunydja malanha yänana, mundhurrnha ŋarraku. Yurru nhumanydja ŋuli yaka warray ŋarrakunydja wekama nhä ŋunhi ŋarrakuway dhulŋuŋu, wo ŋula nhä, 9ga dhiyakuyinayi märrwu nhuma bukmakthirrina nhinanydja yukurra mariŋurana yana ŋula nhämiriwŋurana dhäparknha, liŋgu bukmakthu nhuma bäpurru'yunydja yukurra manaŋirrina ŋarrakala. 10Bilyurrana walala dhipuŋuruyi nhumalaŋgalaynydja nhuma dhukarrŋuru. Biyakana guḻk-guḻkthurrana nhä nhe ŋuli märrama 10-guŋana, ga wekaŋa ŋurruŋunydja ŋunhiyi ŋarraku waŋganydja, ga gäŋa lili ŋarrakalana ŋunhana Buṉbulili, ga wekaŋana mel-yarrkthunamiriw yana, märr yurru ŋunhalanydja ŋarrakalanydja ŋunhi ruwamŋuyirri muka ŋorra, dhaŋaŋ muka mirithirri.
“Ma' biyaka mak gatjarr'yurra ŋarranha. Wekaŋa ŋarrakunydja maŋutji-yarrkthunamiriw, ga nhumanydja yurru nhämana ŋunhi ŋarranydja yurru ŋunha djiwarrny'tja ḻapmaramana, ga rarryunna yana-wala nhumalaŋgunydja yurru biyapulnha wal'ŋu buku-yattjatkumana, maŋutji-yarrkthunamiriw warray. 11Yo, ŋathanydja yurru ŋuthan nhumalaŋgu dhapirrkthirri wal'ŋu dhika ŋatha-mäypamirriyirri, ga bitjandhi liŋgu borumdja yurru dhirrimukthirri dhika guḻku'yirri; yakana yurru ŋula nhäyunydja marrtji buku-ḏarrkthundja nhokuŋu ŋunhi ŋuthanmaranharawuynydja, liŋgu ŋarrapina ŋunhiyi yurru gunganhamirriyamanydja, galmumanydja yurru ŋathanydja ga borumdja, gukuma yurru ŋunhinydja ŋunhi ŋayi ŋuli marrtji baḏuwaḏuyunarawu nhokalaŋuwu.” Bitjarra ŋayi Garraynydja waŋana.
12“Yo, ŋuruŋu wiripu-guḻku'yunydja miṯtjiyu yolŋuyu walalay yurru nhämana, bala walala yurru ḻakaramanydja nhumalanha bitjanna ‘Goŋmirriyanhara Garraywuŋuna nhumanydja,’ bitjanna yurru, liŋgu nhumalaŋgu wäŋanydja yurru djingaryun ŋanyana dhikana dhapirrkthirrina wal'ŋu.” Bitjarra ŋayi Garray waŋananydja.
Godthunydja yurru mala-yarr'yunna barrkuwatjkumana ŋamakurru'nha ga yätjmirrinha
3:13-18 (God will punish the wicked and reward the righteous)
13Yo, ŋayi Garray waŋana bitjarra gam', “Nhuma yukurrana waŋana dhäruktja yätjnha ŋarraku.” Ga nhumanydja waŋana bitjarra warray, “Nhaltjarra dhika ŋanapurru waŋana djarrpi'kuŋalanydja yätjkuŋalanydja?”
14Ga ŋayi Garraynydja waŋana buku-wakmaraŋala bitjarra, “Bitjarra nhuma waŋana, ‘Nhäku ŋanapurru yurru mukthundja yana djäma Garraywu yukurra? Ŋunhi ŋanapurru ŋuli dhäruktja märrama ŋanya Garraynha, ga nhina ŋamathamanydja dhikanydja wal'ŋu, ga nhä dhika ŋayi ŋuli wekama buku-ruŋinyamaranharawuynydja ŋanapurruŋgu? Bäyŋu warray! Ŋanapurru ŋuli waŋa wuyunarawu ŋanapurruŋgalayŋuwu yätjku, ga ŋayinydja ŋuli yaka warray ŋanapurrunha goŋmirriyama. 15Wiripunydja ŋanapurru ŋuli nhäma ŋunhinha yolŋunha ŋunhi ŋayi bathala-ḻakaranhamirri ŋuli, ŋayinydja yukurra nhina ŋuli ŋunhi galŋa-djulŋithirri warray dhika warray, goŋmirriyirri warray ŋuli. Ga ŋunha ŋunhi dhuwurr-yätjmirri gal'ŋu, walalanydja ŋuli märrama birrka'mirri warray, nhäku walala djäl. Walala ŋuli gatjarr'yun yana ŋanya Godnha walalaŋgalay walala ŋuriŋi yätjthu romdhu, ga ŋayinydja ŋuli walalanha yaka warray be dhä-ḏir'yundja.’ Bitjan nhuma ŋuli wiripunydja waŋa.”
16Bala ŋunhinydja walala yolŋu'-yulŋu ŋunhi walala ŋuli rom-wiyaṉiyirri yukurra Garraywu, walala waŋanharamina yukurrana walalawuy, bitjarra waŋanharamina Garraywalaŋuwuy, nhäyinyara ŋayi dhunupa wal'ŋu, bitjanmina walala yukurrana ŋunhi waŋanharaminanydja. Ga ŋayinydja Garrayyunydja ŋäkula warray, bala ŋayi wukirrina marrtjina djorra'lilina yäkuna walalanha ŋunhiyinydja walalanha yolŋu'-yulŋunha ŋunhi walala ŋuli rom-wiyaṉiyirri nhina, ga märr-nherraṉmirri gal'ŋu nhanukalay yäkulili. Yo, ŋayi wukirrina marrtjina yäkunydja ŋunhiyi walalanha, märr yurru ŋayi yaka meṉguma ŋula waŋganynha, ŋulinyaramirriyunydja ŋunhi ŋayi yurru buku-ruŋinyamarama wekama yolŋu'-yulŋuwu.
17Yo, ŋayi Garrayyunydja ḻakaraŋalana yukurrana walalanhanydja bitjarrana gam', “Ŋunhayinydja walala yurru ŋarrakuwaynha gal'ŋu yanana dhulŋuŋuna märryu-ḏapmaranharamirrina wal'ŋu, ŋulinyaramirriyunydjayi ŋunhi ŋarra yurru djäma dhawar'maramana ŋunhi nhä ŋarra yukurrana dhawu'mirriyaŋala ŋäthili. Yo, ŋunhiyinydja ŋayaŋu-nhen-anminyaramirŋnydja walala yurru ŋarrakuwaynha yanana wal'ŋu dhulŋuŋuna, yakana ŋarra yurru walalanha dhä-ḏir'yun rrambaŋikumanydja ŋurikala yätjmirriwalanydja wal'ŋu, yana ŋarra yurru mel-wuyunna walalaŋgu, bitjanna bitjan bäpa'mirriŋu yurru gurrum'thun dhika nhanukalaŋuwu ŋayi gäthu'mirriŋuwu ŋunhi ŋayi ŋuli dhäruk ŋanya märrama.
18“Yo, ŋulinyaramirriyunydjayi nhuma yurru nhäma dharaŋanna, ŋunhi dhuwurr-ŋamakurruny'tja ga dhuwurr-yätjmirrinydja barrkuwatj yana walala yulŋunydja ŋarrakalaynydja maŋutjiŋura; yaka ŋarra ŋuli nhäma walalanha rrambaŋikumanydja. Liŋgu ŋarra yurru buku-ruŋinyamarama yulŋunydja ŋurikinydja walalaŋgu ŋunhi walala yukurra dhäruk-märrama, walalanydja yurru yukurra märrama ŋamakurru'na yanana bitjanna liŋguna, gupaḏalnha-wala yurru. Ga ŋunhinydja walala ŋunhi walala dhuwurr-yätjmirri wal'ŋu, ŋunhi walala yukurra yaka dhäruk-märrama ŋarranha ga djäma ŋarrakala romdhu, walalanhanydja yurru baḏuwaḏuyun gupaḏalkumana-wala yanana wal'ŋu. Liŋgu ŋunhi maṉḏa märrmany'tja, ŋamakurru' ga yätj barrkuwatj yana, yaka maṉḏa yurru märrama rrambaŋikumanydja ŋarrakuŋu ŋulinyaramirriyunydja dhä-yawaiŋyunaramirriyunydja waluyu.” Ga bitjarra ŋayi Garray waŋananydja.
Currently Selected:
MALACHI 3: gnnNTOTPO
Highlight
Share
Copy
Want to have your highlights saved across all your devices? Sign up or sign in
© 1989, Uniting Church of Australia
