Genesis 8

Dhuwalanydja ŋunhi gapuna marrtjina nyimdhurruna bala

8:1-19 (The end of the flood)

1-4Yurru mukthurruna yana Godthunydja yukurrana guyaŋina ŋanya Nowanha, yaka ŋayi meṉguŋala ŋanya, bala yana Godthu djuy'yurruna watana bo'yunarawu marrtjinyarawu, djaw'yunarawu gapuwu, bala yana marrtjina gapunydja ŋunha yir'yurruna, nyimdhurrunana marrtjina bala. Mukthurrunaŋga yana nyimdhurruna marrtjina bala-a-a gapunydja ŋunhi, yana liŋgu-u-u, ga marthaŋa marrtjina baṉḏany'thina, bala djingaryurrunana yukurrana ŋunhalana bäyma bukuŋarana, yäkunydja ŋunhiyi buku Yararat.

5-7Bulnhaŋga yana marrtjina gapunydja nyimdhurruna, ga Nowanydja galkurruna yana yukurrana, yana liŋgu ga buku'-wukunydja wäŋanydja malanha maḻŋ'thu-maḻŋ'thurrunana marrtjina. Nhäŋa'-nhaŋalanydja ŋayi buku malanha, bala märraŋala wäyinnha gaḻkarriŋunhana, bala yana djuy'yurrunana buṯthunmaraŋalana wäŋawuna nhänharawu. Bala ŋayi buṯthurruna-a-a yukurrana, nhäŋala marrtjina, ga yakana ŋayi roŋiyinanydja; mukthurrunaŋga Yana buṯthurruna yukurrana ŋulaŋga yana ya' barrkukurru, yana liŋgu ga wäŋa baṉḏanydhina.

8Bala ŋayi Nowayu ŋawatthurruna wiripuna wäyin murryil'nhana, ga ŋanyana djuy'yurruna nhänharawu marrtjinyarawu wäŋawu. 9Buṯthurrunanydja ŋayi, marrtjina nhäŋala ḻiw'maraŋala-a-a, ga yakana ŋula maḻŋ'maraŋala wäŋa nhanŋuway nhinanharawu, bala ŋayi liliyi roŋiyina goŋlili Nowawala. 10-11Nowanydja bulnha galkurruna yukurrana 7 walunydja ŋupara, ga djuḻkmaraŋala, bala ŋayi biyapul djuy'yurruna ŋanya murryil'nha. Buṯthurrunana nhinana ŋayi bala-a-a, dharr-way nhäŋala dharpa man'tjarr, bala ŋayi buṯthurruna lili, gulk gay' gulkthurruna ŋunhiyi man'tjarrnydja, bala balayi buṯthurruna gäŋala nhinana Nowawalana. Bala ŋayi Nowanydja marŋgithinana ŋunhi gapunydja marrtjina nyimdhurrunana.

12Bitjarrayi yana liŋgu ŋayi galkurruna märr-gurriri, ga yanayi ŋayi djuy'yurruna ŋunhiyi murryil'nha; buṯ gay' ŋayinydja buṯthurruna gupaḏalnha yana-wala, ga yakana ŋayi roŋiyinanydja lili.

13Yo, marthaŋaŋuranydja walala yukurrana nhinana galki bini waŋganynha dhuŋgarra mulkanha, bala ŋayi Nowayunydja marrtjina ḻapmaraŋalana dhurrwaranydja ŋunhi marthaŋa, nhäŋala wäŋanydja munathany'tja baṉḏanydhinyarana marrtjinyara. 14Yanayi walala galkurruna nhinana waŋgany ŋaḻindi, bay ŋayipi ga yuwalkkuŋala wäŋa warrpam' baṉḏanydhina. 15Bala yana Godtja waŋana Nowawala bitjarra, 16-17“Gatjuy nhuma dhawa-yawaṯthurrana dhipuŋuru marthaŋaŋurunydja, nhuma yolŋu walala ga dhuwali wäyin malanha, märr yurru wäyindja walala yana marrtji buḻwaŋ'thunna, malana guwar-yalkthunmirri guḻku'kumana, märr yurru wäŋanydja monyguma warrpam' wäyindhu biyapul.”

18-19Bala walala yukurrana dhawa-yawaṯthurrunana Nowanydja ga nhanŋu miyalk ga yumurrku' maṉḏaku ga walalaŋgu miyalk walala, ga bukmak wäyin, gaḻ'yunaramirri ga marrtjinyaramirri ga buṯthunaramirri; dhawa-yawaṯthurrunana walala marrtjina ŋulaŋuru marthaŋaŋurunydja, warrpam'nha yana.

Godthu nherrara dhawu'na Nowawala

8:20—9:17 (God's promise to Noah)

20Bala ŋuliŋurunydja ŋayi Nowayunydja guṉḏana ŋal'-ŋalmaraŋala barŋguŋala, dhaŋalkuŋala, bala ŋayi wäyinnhana walalanha bumara, bala batha'-batharana ŋunhimalayi barŋlilinydja, mundhurrnha wekaŋala Garraywu. 21-22Bala ŋayi ŋawululny'tja ṉoluŋdhinana marrtjina, buŋgandja garrwarthina, yurru ŋayi Garraynydja wirrkina goŋmirriyina nhäŋala ŋoy-ŋamathinana, bala ŋayi waŋanana, “Liŋguna ŋarra marŋgina yolŋuwunydja ŋayaŋuwu, ŋunhi walala rom-mäypathina beŋuru yana yutjuwaḻaŋuru, yurru yakana ŋarra biyapulnydja yurru buwayakkuma buma yolŋu'-yulŋunha. Yo, wäŋanydja dhuwala djingaryun yukurra yurru ŋamathirrina yana; waluna ga munhana yurru, ga gawatha'yirri yurru ga rarranhdharr'yirri yurru, yana liŋgu ga buku yurru ŋunha mulka, bala dhawar'yunna yurru wäŋanydja.”

Currently Selected:

Genesis 8: gnnNTOTPO

Highlight

Copy