Genesis 15

Godthu dhawu'-nherrara Yipuramnha

15:1-21 (God's covenant with Abram)

1Waŋganymirri ŋayi Yipuram nhinana yukurrana nhanukiyingala wäŋaŋura buṉbuŋura, bala ŋayinydja ŋunhi Garraynha ŋayipina maḻŋ'thurruna nhanukala rumbalnha, ga dhunupana ŋayi ŋäkula rirrakaynha ŋanya Garraynha, ŋayi waŋananydja nhanukala bitjarra, “Way Yipuram, yaka barrariya ga wilwilyurra. Ŋarranydja nhuna yurru yukurra dhuwala gungama ŋula nhäŋuru yätjŋuru romŋuru, ga biyapul ŋarra yurru nhuna wekamayi nhänydja malanha ŋamakurruny'tja.”

2-3Bala ŋayi Yipuramdja buku-wakmaraŋala waŋana nhanŋu Garraywu bitjarra, “Waŋarr God, nhepina dhuwala ŋunhi biyapulnydja walŋu bukmakku. Nhäku warray nhe yurru wekama ŋarrakunydja ŋula nhä? Bäyŋu warray dhuwala ŋarraku yothuny'tja. Ŋunhi ŋarra yurru ganan rakunydhirrinydja, bala waŋganydhuna yurru djämamirriyuna ŋarrakala märramanydja nhä malanha ŋunhi ŋarraku nhe yurru wekamanydja, ŋuriŋiyi Damatjkapuyŋuyuna ḏarramuyu Layitjayuna yäkuyu, bili bäyŋuna ŋarraku gäthu'mirriŋunydja dhuwala.”

4Ga ŋayinydja nhanukala waŋana Garraynydja bitjarra, “Dhiyaŋuyinydja ḏarramuyu djämamirriyunydja yurru yakana märrama nhokuŋu nhä mala, liŋgu nhuŋunydja yurru maḻŋ'thundhi nhuŋuwaynydja walŋu gäthu'mirriŋu, ga ŋayina yurru ŋawatthundja ŋunhiyinydja malanha ŋunhi nhe yurru ganan. 5Go dhawaṯthurrana lili warraŋullilina, ga nhäŋa ŋunha ya' ganyu'nha miṯtji. Bakuruŋa ga nhäŋa ŋunha ya' miṯtji, ŋula nhämunha'na ŋunha yulŋunydja, bala bothurruna. Balanyarayina yurru nhokuŋu miṯtjinydja, guḻku'na dhikana yana, ŋula nhämunha'na bothurrumiriwnha.”

6Bala ŋayi Yipuramdja märr-yuwalkthinana walŋu yana, märr-nherraṉminanydja nhanukala Garraywala, bala ŋayi Godthunydja ŋanya Yipuramnha ḻakaraŋala ŋayaŋu-dhunupana yana, bala märraŋalanydja ŋanya nhanŋuwayliliyaŋalana ŋuriŋiyina ŋunhi märr-yuwalkthinyarayu nhanukala Yipuramgala.

7Ga dhunupana yana ŋayi Garraynydja waŋana Yipuramgala, ḻakaraŋala bitjarra. “Ŋarranydja dhuwala ŋunhiyi, ŋunhi ŋarra nhuna gäŋala beŋuru wäŋaŋuru Woŋuru dhipala wäŋalili, märr yurru ŋarra wekama dhuwalanydja wäŋa nhuŋuwaynha,” bitjarra ŋayi God Garray waŋananydja.

8Ga ŋayinydja waŋana Yipuramdja bitjarra, “Nhäyu dhika ŋarra yurru marŋgithirri bitjandhiyinydja, ŋunhi yurru dhuwalanydja wäŋa be ŋarraku?”

9Bala ŋayi biyapul God waŋana Yipuramgala bitjarra, “ŋarranydja yurru dhuwala dhäruktja nherraṉ, nininyŋuna dhärranharayŋuna wäwun nhuŋu ga ŋarraku. Gatjuy marrtjiya, ga märraŋa wäyinnhana malaŋunha, buliki'nha ga nanikutnha ga bembinha ḏarramunha wäyinnha, ga biyapul märrma' yutjuwaḻa' wäyin ḻaparr ga murryil. Ŋarra yurru wäwun nherraṉmirrina nhokala Yipuram,” bitjarrana ŋayi waŋana Garraynydja.

10Bala ŋayi marrtjinana, wapmaraŋalanydja marrtjina Yipuramdhu, märraŋalanydja ŋayi ŋunhiyinydja malanha, bala yana gäŋalana lili, bala ŋunhilinydja ŋayi mitmitthurrunana. Yo, mitthurrunanydja ŋayi muḻkurrkurru yana ṉapuŋga'kurru, ga ŋunhana-wala, yana liŋgu ga rumballili wapthurruna barraŋiny'kuŋala. Yo, gulk-gulkthurrunanydja ŋayi barrkuwatjkuŋalanydja, bala rulwaŋdhurrunana marrtjina gali'lili ga gali'lili bitjarrana bala, ga yaka ŋayi ŋunhi yutjuwaḻa'nhanydja wäyinnha maṉḏanha mitthurruna, yana maṉḏanha ŋunhina liŋgu gurrunhara, rumbalmirrinha maṉḏanha gali'lili ga gali'lili, ga ṉapuŋgany'tja marrtjina ŋorrana dhukarrnha bala. Ga ŋunhi ŋayi djäma bitjarrayinydja, ŋunhiyinydja rom walalaŋgu yolŋu'-yulŋuwu, walala ŋuli yukurranha bitjana djäma ŋunhi ŋuli märrma' yolŋu maṉḏa dhawu'mirriyanhaminya maṉḏanhawuy maṉḏa.

11Yo, ŋunhiyinydja wäyindja malanha marrtjina ŋorra'-ŋurranana, bala walalanydja gonha wäyin wakinmirrina ḻuŋ'thurruna marrtjina, balanyara bitjan gaḻkarriŋu' rumbal, yurru bathalamirrina, walala bini ŋunhiyi ḻukanhana marrtjinya ŋunhi ŋanaknha wäyinnha, bala ŋayi Yipuramdhunydja wirriw'-wirriwyurrunana, gukuŋalana walalanha.

12Yo, walunydja marrtjina ŋunhi gärrinana, bala ŋayi Godthunydja ŋanya yakurr wekaŋalana ŋorranharawuna, bala ŋayi yakurrthinana yana Yipuramdja, yurru muḻkurrnydja ŋayi bira'yurruna yukurrana, bala ŋayi nhäŋalana yukurrana ŋunhiyi maŋutji-waḻa'waḻamirriyuna, wilwilyurrunana manapara wirrkina. 13-15Bala dhunupana ŋayi God waŋana Yipuramgala ḻakaraŋala, ŋunhi yurru nhaltjan ŋunhala bala yalala, bitjarrana ŋayi ḻakaraŋalanydja, “Nhenydja yurru nhina yukurra marimiriw yana, yana liŋgu ga rakunydhirrinydja nhe yurru worruŋu yana, bala walala yurru dholkumana nhuna. Ga ŋunhi yurru dhuŋgarra marrtji djuḻkthun bala, bala nhuŋu yurru miṯtjinydja guḻku'yirrina, bala walala yurru yukurra nhinanydja mulkuruŋurana wäŋaŋuranydja ŋunhi, yurru garrpiṉarana walalaŋguŋu djämamirrina walala; nhinanydja walala yurru yukurra ŋunhi burakirrina yana walalaŋguŋu, galŋa-yätjthirrina bitjanna liŋgu, weyinŋumirrina yurru, 400-nha dhuŋgarra. Ga ŋuliŋuruyinydja dhäŋuru ŋarra yurru dhä-ḏir'yunna ŋunhiyinhanydja walalanha ŋunhi walala ŋuli yukurra yätjkuma nhokuŋu miṯtji-wunharanha, bala ŋarranydja yurru yana nhuŋu miṯtjinhanydja ŋunhi dhawaṯmaramana ŋuliŋuru mulkuruŋurunydja wäŋaŋuru, bala walala yurru yana marrtjinydja ŋulaŋuruyi wäŋaŋuru ḻukunydjamirrina. 16Yo, nhinanydja walala yurru yukurra märr-weyinŋumirri yana ŋunhiliyi mulkuruŋuranydja wäŋaŋura, ga yurruna ŋarra yurru roŋinyamaramanydja walalanha gäma lili dhipalanydja wäŋalili. Yo, dhiyakuynydja wäŋawuy Gaynanbuyŋunydja yolŋu walala yukurra nhina yätjmirrina walŋu yanana, ga bitjanna liŋguna walala yurru yukurra dhiyala nhinanydja yätjnha yana, bala ŋarranydja yurru walalanha dhä-ḏir'yunna ŋulinyaramirriyu, liŋgu wekamanydja ŋarra yurru walalaŋguna wäŋanydja dhuwalayi nhokalaŋuwuna miṯtjiwu walalaŋguwaynha.” Bitjarrayina ŋayi waŋana Godthu dhawu'-nherraranydja Yipuramnha.

17Yo, walunydja ŋunha gärrinana liŋguna, munhakuna walŋu, ga ŋayi Yipuramdja mukthurrunaŋga yana yakurr ŋorrana, bala ŋayi nhäŋala Yipuramdhu ŋunhiyina märrma' maṉḏanha, waŋganydja banikin ḻirrwi'mirri ŋunhi ŋawulul' marrtjina gaŋgathina, ga waŋganydja djarraṯawun', yurru gurtha ŋunhi dhäŋa'mirri; maḻŋ'thurrunanydja maṉḏa ŋunhi, bala marrtjinana yukurrana ŋuliyina ṉapuŋga'kurruna, ŋunhi wanhaka marrtjina wäyin malanha ŋorra'-ŋurrana galiŋura ga galiŋura. 18Bala ŋayi Yipuramdhu dharaŋarana yana ŋunhimalayinydja, ŋunhi ŋayipi yana ŋunhiyi God yulŋunydja marrtji'-marrtjinanydja yukurrana, biyaku ŋuli ŋayi dhawu'na nherrara Godthu ŋunhiyinydja maṉḏakuway maṉḏa, bala yurru ŋunhiyi dhawuny'tja yukurra dhärrana yana yurru gupaḏalnha-wala yana. Liŋgu balanyarayi rom yukurrana walalaŋgunydja ŋorrana dhawu'-nherraṉminyarawu, yuwalknha yana ḏälnha walŋu ŋunhiyi dhawuny'tja. Ga dhuwalana ŋunhi dhawuny'tja ŋayi ḻakaraŋala nhanŋu Yipuramgu bitjarra, “Ŋarranydja yurru dhuwala wäŋa bukmaknha yana wekama nhokalaŋuwuna miṯtji-wunharawu yukurranharawu, dhipuŋuru liŋgu yurru Yetjipŋuru ga yana liŋgu-u-u ga ŋunha mayaŋ'lili wapthun Yipuraytilili yäkulili; 19-20dhuwalayinydja wäŋa malanha yurru walalaŋguwaynha yanana, nhokalaŋuwuna miṯtjiwu, nhäyikapuyŋuwuna Genbuyŋuwuna wäŋa, ga Genitjpuyŋuwuna, ga Gadmanbuyŋuwuna, ga Yitpuyŋuwuna, ga Biritjpuyŋuwuna, ga ŋurikina yolŋu'-yulŋuwu ŋunhi walala ŋuli ḻakarama djaka'-weyinguna yolŋuwu, 21ga Yamarpuyŋuwuna, ga Gaynanbuyŋuwuna, ga Girkatjpuyŋuwuna, ga Djepatjpuyŋuwuna, dhuwalayinydja wäŋa malanha ŋarra yurru wekama nhokalaŋuwuna miṯtjiwu.” Ga bitjarra ŋayi Godthu ḻakaraŋala dhawu'mirriyaŋalanydja Yipuramgu.

Currently Selected:

Genesis 15: gnnNTOTPO

Highlight

Copy