Matthew 4

NAKATA 4

Jesus uktuktauyuk

(Mk. 1:12-13; Lk. 4:1-13)

1Talva Anengnim Naguyum Jesus aullautiyaa inuilgulmun Tupilangmin uktuktaukuvlugu. 2Uvlikaaktillugu 40nik negitailigami kaalekpiaktuk. 3Tapfumungalu huinekipkaiyi upangniktuk ukakhuni, “Godim engnigipatin ukua uyagain ukautikit mukpauyangukuvlugit.” 4Jesusim kiuyaali ukakhuni, “Godim ukauhiani tiitigakhimayuk, ' Inum inuyutigiyakhagingitain mukpauyainat kihimi ukauhitigunli tapkununa Godim ukautigiyaitigun' ” 5Talva Tupilaum Jesus aullautiyaa iglukagvingmun naguyumun angayyuvikpagyuam kaanganun ilivlugu, 6ukallautiyaalu, “Godim engnigipatin mihigiagin ataanun tiitigakhimangman, 'Godim ihalgulini pitkuhimayain munagikuvlutin,' imaatuntauk 'Tapkua algaitigun tiguniaktaatin itiganlunin aanekunagu uyagagmun.' ” 7Jesusim ukallautiyagaluanga, “Tiitigakhimayuk aahini, 'Godinik Ataningnik uktuktailutin ihuitumik.' ” 8Aahintauk Tupilaum Jesus maiyuktitaa manilgum kingikpiaktum kaanganun takupkakhugit nunat atanguvingillu tamaita, tapkua alianangningilu tapfumunga 9ukautivlugulu, “Uvanga hapkuninga tamainik tuniniaktagin hitkuvigigungma angayyuvigikuvlunga.” 10Talva Jesusim ukautiyaa “Satanguk aahivagin tiitigakhimangman, 'Angayyuvigiyakhan Godin Atanin kivgaktuglugulu tamna kihimi.” 11Talva Tupilaum kimagmagu ilaa Ihalgulgit Jesus tikittugu kivgaktuktaat.

Jesusim Capernaum Galileetumi naiyuktaa

12Jesuslu ilaani tuhaagami John Baptaiekti itektauvingmungaktitauman Galileemun aullaktuk, 13Nazareth kimakhugu Capaernaumungaktuk attakhuni Zebulun Naphtalim nunaaniitumun, 14Isaiam nalautaiyim ukauhiit ilumukuvlugit ukangman,

15“Zebulun Naphtalim nunaa tagiup hinaaniituk, Jordam avataani, Galilee inukaktuk Jewmiungitunik – 16takanani inuit taakhivaktun kaumayuaktumik tauktukpaktun, inungnunlu tukunium tagaaniitunun kaumanek nuiyuk.”

Jesus ilihauyyinahualektuk

(Mk. 1:14-15; Lk. 4:14-15)

17Talvangaanin Jesus ukauyyinahualektuk ukakhuni, “Ihumaliukigitti kilaum atanguvia tikilengman.” 18Galileem tahiata hinaatigun pihuktillugu Jesus angutingnik nukagingnik tautukakhuni, kuvyaktunahuaktungnik ikalukhiuktiumanik. Aipa atikaktuk Simon, Petermik taiyauyugaluak, tapfuma anekataa Andrewmik atikaktuk. 19Jesusim ukallautiyaik, “Malikhinga iliptik inukhiuktinguktiniagaptik.” 20Tayyainak kuvyatik kimakhugit maliktaak. 21Aullamigamilu aahin Jesusim nukagik allak tautuktaik, James, Zebedeem engniga, Johnlu ilagimatku angutitik umiagmi. Kuvyamingnik havaktillugit Jesusim kaitkuyaik. 22Tayyainak kimakhugit umiaktik, angutitiglu maliktaak. 23Jesuslu Galileem nunaatigun aullainaktuk atugvingni ilihauyyivluni atanguvium ukauhianik naguyunik ukauyyivlunilu piiyakhugit aaniagutin, aiyukangnillu aaniaktunin. 24Aahin Jesusim havaangit aglingnaktun tuhaanagmata Syriam nunaani tamaini, tapfumunga aaniakhimayun, aanialgutilgillu, agiuktulgillu, kiinayuktullu, tumangayullu kagitiyauyun, tapfuma naguhipkaktain tamaita. 25Inuillu amigaitpiaktun Galileemin, iglukavingninlu kulinin, Jerusaleminlu, Judeaminlu, Jordam avataaninlu maliktaat.

Currently Selected:

Matthew 4: Sperry

Highlight

Copy