Matthew 15

NAKATA 15

Jesus Jewmiun pitkuyainik maligluanginami ukaktuk

(Mk. 7:1-23)

1Pharisekut tiitigaktillu Jerusalemin akuivlutik tikittaat Jesus ukakhutik, 2“Hug maligutitin hivullipta pitkuhigingnik malingngitpat? Uagyuinamik algagmingnik negiaktuktinatik.” 3Kiuyuk, “Ilipfili hug Godim pitkuyain maligngitpihigik malingnakuvlugit pitkuyahi ilipfi? 4God pitkuiman, 'Angutin angnanlu nagugilugik,' imaalu, 'Kinalika anguminun angnaminunlunin ukanilukumi tukutauli tamna.' 5Ukaktuhili ilipfi, 'Inuk anguminun angnaminunlunin ukagumi – Hullika piyakhagiyahi uvamnin tuniyauhimayun Godmun, talva nagugiyakhagingitaik anguni angnanilu.' 6Taima pitkuhipfigun Godim ukauhiit hungnektitahi. 7Ilumukhektuktuhi, ikuhimaitumik Isaiah hivuniugiaktukpaktuk ilipfigun ukakhimangman,

8'Hapkua inuit nagugitillunga uvanga kanimingnin uvamnin ungahiktumiitgaluaktun umatimingni. 9Angayyuvigiyangnga ilumuktungngitutun inuit pitkuhigingnik ilihauyyingnakpiagamik' ”.

10Jesusim inuit kaitkugamigit inminun ukautiyain, “Nalaugitti kangekhivagluhilu. 11Inum kaniagun itektum inuk tamna halumaektingitaa, tapfuma kaniagun aniyun halumaektiyagaluangat tamna.”

12Talva maligutaita upagamitku ukautiyaat, “Ilihimaviuk Pharisekun ukauhitin tuhaagamigit ihuigiyain?” 13Kiuyuk, “Nautiat tamangmik angutima kilangmiitum ilingngitpagit nunamun ungavaktauniaktun. 14Hugitailugit tapkua: hivulliulengmata ingningnik takpiitgaluaktillugit. Takpiitum takpiituk aipa tahiugumiuk tamangmik hituakhunguyuk itekhangmun.” 15Peterm ukallautiyaa, “Tamna hivuniunengmik kangekhipkaktitigut.” 16Tapkununga ukaktuk, “Ilipfitauk kangekhiluangitpihi? 17Ilihimangngilahi imaatun. Inum kaniagun itektun tamangmik akiagugmun piyun anaktauvlutiglu? 18Inugli humillika anitiyuk kanimigun tapkua umataanin kaitauyun halumaititugu inuk. 19Inuk ihuitumik ihumalegumi, inuagumagumilu, allatugumagumilu angnakhiugumavluni, kukitumagumilu, uneglukhuni, ihuitumik nuakatini ukautigilugit, hapkuninga tamainik hivullengmik ihumaliukpaktuk umamini. 20Tapkua ilaa inuk halumaektitaa: inuk negiaktugumi algaminik uakhimaitumik hungitpiaktuk.”

Angnaguhek Jewmiungituk naguhipkaktauyuk

(Mk. 7:31-37)

21Talvanga Jesus aullaktuk Tyrm, Sidonimlu nunainun tikittuni. 22Ilaa tapfumani angnak Caananmiutak nunamin kaiyuk kukuakhuni, “Atanek, Davidim engniga, nagliginga paniga agiuktukangman aiyukakpiakhuni akhun.” 23Tapfumali kiungitagaluanga. Maligutaitali tukhiagvigiyaat,“Aahivaktiguk kukuagningnakpagmatigut.” 24Kiuyuk, “Tiliyauhimagaluaktunga Israelmiunun ulamnauyunun imnaitun-iliyunun kihimi.” 25Angnamli upakhugu angayyuvigiyaa ukakhuni, “Atanek, ikayungnga.” 26Kiuyugaluak, “Naamangngituk kitungauyun nekhautain aitutigiguptigit kenminun.” 27Angnak ukallaktuk, “Ilaa atanek, kenmitlunin negingnaktugaluit mukpauyat ilakuinnik katakhimayunik ataniata ikpatainin.” 28Talva Jesusim kiyuaa, “Angnak, ukpegluagavin piyumayangnik piyyavutin.” Tapfuma pania naguhiyuk tayyainak.

Amihun naguhipkaktauyun

(Mk. 7:31-37)

29Talvanga Jesus aullaktuk Galileem tahingata hinatigun, manilgulmun maiyugakhuni ingiyuk. 30Inuin amigaitunlu tikittaat tikiutivlugitlu tuhiaktun, niuluktunlu, takpiitunlu ukayuitunlu allattauk. Tapfuma naguhipkaktain. 31Inuillu ukayuitun ukaktillugit, niugluktun pihuktillugit, takpiitunlu tautuglektillugit, agligutakpiaktun Israelmiut Godingat kuyagivlugu.

Inuit 4000guyun negipkaktauyun

(Mk. 8:1-10)

32Talva Jesusim maligutini kaitkugamigit inminun ukaktuk, “Inuit ilauvangmata uvamnun uvluni pingahuni negihimaitumik nagligiyatka, aullakuyumangngitagaluatkali hakueknakhavun negiyuinamik.” 33Maligutaita ukallautiyaat, “Hamani iglukpaiilgumi nakin niuvegiaktugniakkita mukpauyanik naamayunik inungnun amigaitpiaktunun?” 34Jesusimlu ukallautiyain, “Kafinik mukpauyagliuyuhi?” Kiuyun, “7nik ikalungniglu ikitunik.” 35Talva inuit ingikuyain nunamun 36tiguvlugitlu mukpauyait 7n ikaluillu kuyahuktuk. Avgukamigitlu maligutini tuniyain tapkuninga, tapkuatauk tunipkaiyun inungnun. 37Inuillu tamangmik negiyun akiatukhutik. Maligutaillu ilakuit avgukhimayun katigamitigit tigumiaktit 7n tatattain. 38Tapkualu negivaktun 4000guyun angutainain, angnat, nutakallu kitikataungitgaluakhutik. 39Jesusimlu inuit aullaktitugit umiagmun ikiyuk Magadanim nunaanun akuiyumavluni.

Currently Selected:

Matthew 15: Sperry

Highlight

Copy